Milimo 14

Mbobakacita mu Ikoniyumu

1Lino mbuli cilengwa Paulu a Banabasi bakaya kucikombelo ca Bajuda mu Ikoniyumu. Oomo bakaiisya canguzu cakuti Bajuda abamasi banji bakasyoma. 2Pele Bajuda baabo atakasyoma bakakopanya bamasi akubacitya kuti basulaike basyomi. 3Batumwa bakakkala ooko ciindi cilamfu, bakakambauka makani aa Mwami cabusicamba. Mwami wakatondezya kuti makani aaamba zyaluse lwakwe alikasimpe kwiindila mukubapa nguzu zyakucita maleele azigambya. 4Bantu bamumunzi bakaandaana, bamwi bakali kubbazu lya Bajuda, bamwi lyabatumwa.

5Mpoonya aawo bamasi basinkondonyina, Bajuda, abasololi babo bakapangana kuti bapenzye batumwa akubauma mabwe. 6Batumwa nibakaaziba makani aaya, bakatijila kuminzi ya Lisitula a Deebe, minzi iili mucisi ca Likawoniya, amuzisi zimwi zizingulukide. 7Ooko bakaakukambauka Makani Mabotu.

Mbobakacita mu Lisitula amu Deebe

8Mumunzi wa Lisitula mwakali kukkala mwaalumi wakalemene maulu kateendi kuzwa kukuzyalwa kwakwe. 9Wakaliswiilide Paulu naakali kukambauka. Paulu wakabona kuti mwaalumi ooyo uulaalusyomo lwakuti aponyezegwe, eelyo wakamulangisisya. 10Wakamwaambila ajwi pati wati, “Imikila amaulu aako!” Mpoonya mwaalumi ooyo wakaima akutalika kweendeenda. 11Nkamu yabantu niyakabona cakacita Paulu, yakatalika kuyowela mumusyobo wabo wa Cilikawoni kuti, “Baleza balisandula kuba bantu akuza kulindiswe!” 12Banabasi bakati ngu Zusi, Paulu bakati ngu Heemezi, nkaambo nguwakatalika kwaamba. 13Mupaizi wa Zusi, wakali aacikombelo anze aamunzi wakaleta basune amaluba-luba kumulyango wamunzi. Nkaambo walo antoomwe abantu bakali kuyanda kupa cipaizyo kubatumwa.

14Pele ba Banabasi a Paulu nibakamvwa ncibakali kuyanda kucita bantu aabo, bakayaula zisani zyabo akuzuzila mukati kabantu kabaya bwaamba kuti, 15“Nkaambo nzi nomucita eeci, nobantu? Aswebo tuli bantu, bantu buyo mbubonya mbuli ndinywe! Twakaza kuno kuzooambilizya Mulumbe Mubotu, kuti tumusandule kuzwa kukukomba zintu eezi zyabuyo zitakwe amulimo pe, musandukile kuli Leza uupona. Ooyo wakalenga julu anyika, lwizi azyoonse zili mulinzizyo. 16Kaindi Leza wakalekelela bantu kukomba mbobakali kuyanda beni. 17Pele lyoonse wakali kulitondezya kwiindila muzintu zibotu nzyaakali kucita. Ulamupa mvula kuzwa kujulu azilyo zilabizwa muciindi ceelede. Ulamupa zyakulya, nkaako mulakondwa mumyoyo yanu.” 18Nikuba kuti batumwa bakaamba majwi aaya, cakali ciyumu kulesya bantu kuti batapi zipaizyo kulimbabo.

19Lino kwakasika Bajuda bamwi bakazwa ku Antiyoki waku Pisidiya aku Ikoniyumu. Bakoongelezya bantu banji kuti baye kulubazu lwabo, bakamuwaala mabwe Paulu akumukwelela anze aamunzi, kabayeeya kuti wafwa. 20Pele basyomi nibakamubunganina akumuzinguluka, Paulu wakabuka akubweeda mukati kamunzi. Nibwakaca Paulu a Banabasi bakaya ku Deebe.

Mbobakabweeda ku Antiyoki waku Siliya

21Paulu a Banabasi bakakambauka Makani Mabotu mu Deebe, akusandula bantu banji kuti basyome. Mpoonya bakabweeda ku Lisitula aku Ikoniyumu, mane baakusika ku Antiyoki waku Pisidiya. 22Bakayumya-yumya basyomi akubasimya kuti batasiyi lusyomo. Bakali kubaiisya kuti, “Tweelede kwiinda mumasunko manji-manji kuti tukanjile mubwami bwa Leza.” 23Bakasala baalumi kuti beendelezye mbungano yomwe-yomwe, nibakamana kukomba akuliimya kulya, bakababikka mumaanza aa Mwami Jesu ngobakasyoma boonse.

24Lino nibakainda cisi ca Pisidiya bakaakusika ku Pamfiliya. 25Nibakamana kukambauka majwi aa Leza mu Pelega, bakainka ku Ataliya. 26Nibakazwa ooko, bakainka abwato kababweeda ku Antiyoki. Oobu mbobusena bantu nkubakapeda ba Banabasi a Saulu mumaanza aa Leza kuti abaleleke mumulimo ngobakamanizizye.

27Nibakasika ku Antiyoki, bakabunganya bambungano akubalungulwida makani oonse aayo Leza ngaakabeleka ambabo, ambuli Leza mbwaakajalula nzila kuti bamasi basyome. 28Ku Antiyoki ooko bakakkala ciindi cilamfu abasyomi.

Currently Selected:

Milimo 14: Tonga96

Highlight

Copy