2 Pita 3

Cisyomezyo cakuboola kwa Mwami

1Nomuyandwa, lugwalo ndwemulembela oolu ndwabili. Mulingawo oonse ndayanda kumubukulusya kuti muyeeyele zyabwini zyoonse eezi. 2Ncenciceeco ncindamuyeezya majwi aakaamba basinsimi basalala bakaindi alimwi amulawo wa Mwami Mufutuli wesu ngumwakapegwa abatumwa. 3Kusaanguna muleelede kumvwisya kuti mumazuba aamamanino basimalabali bayooboola baccilila zisusi zyabo. 4Bayooamba kuti, “Sena tali yooyo wakasyomezya kuti uyooboola? Ino uyooboola lili? Basikale besu bakafwa kaindi, pele zintu zyoonse zicili mbubonya mbozyakabede kuzwa kumalengelo.” 5Balilubya-lubya caali kuti amajwi aakwe Leza wakalenga julu alimwi anyika kuzwa kumaanzi naakaandaanya nyika amaanzi. 6Alimwi nyika yaciindi ciya yakanyonyoonwa azambangulwe lyamaanzi. 7Pele Leza amajwi ngoonya aaya ulibambide julu anyika nzyotubona sunu kuti azoozyuumpe amulilo. Ulizibambide kusikila buzuba mbwayoobeteka akunyonyoona bantu basikasampu-sampu.

8Kuli cintu comwe ncemuteelede kuluba pe, nomuyandwa, eeco ncakuti ku Mwami buzuba bomwe buli mbuli cuulu camyaka, acalo cuulu camyaka cili mbuli buzuba bomwe buyo. 9Takuli kuti Mwami Leza wamuka kucita eezyo nzyaakasyomezya, mbobayeeya bamwi, pele ucimweetelela, nkaambo tayandi kuti bamwi bakanyonyoonwe, pele uyanda kuti boonse beempe.

10Lino buzuba bwa Mwami buyoosika mbuli mubbi. Mubuzuba oobo zyakujulu ziyoomaninina amuzunzumina uuyoosya. Zintu zyoonse ziyooenzemuka akupya kutaambiki, ayalo nyika azyoonse zili mulinjiyo ziyoopya akumaninina! 11Lino mukuti zyoonse eezi ziyooenzemuka boobu, tamweelede na kuba bantu baandeene mubukkale bwanu amukukomba Leza? 12Nomulindila akubelekela buzuba bwakusika kwa Leza, mubinzya buzuba oobo. Mubuzuba oobo zyakujulu ziyooenzemuka amulilo, zintu zyoonse ziyoonyonyoonwa akupya kutaambiki. 13Pele swebo tulindila julu pya anyika mpya, Leza nzyaakasyomezya, mwalo oomo muyooba bululami.

14Nkaako, nomuyandwa, mukuti mulangila zintu eezi, amusungwaale kuti mukajanwe mulikkede muluumuno, kamutakwe kapa, naa kampenda kuli Leza. 15Amuzibe kuti Leza ulamweetelela nkaambo uyanda kuti amufutule. Awalo Paulu mukwesu uuyandika wakamulembela zyazeezi abusongo mbwaakapegwa a Leza. 16Wakaamba makani aaya mumagwalo aakwe oonse. Mumagwalo aayo muli zimwi ziyumu kumvwa. Bantu basicinguni batakkazikene mumoyo balazipilinganya mbuli mbobacita Malembe amwi. Nibacita boobo balalinyonyoona beni.

17Pele nywebo nomuyandwa, mbomuzizi kale eezi amucenjele kuti lweeno lwabantu babi lutamusowi akuwa, kuti musweekelwe kuzyandamana lwanu. 18Kamuya bukomena muluse amuluzibo lwa Mwami Mufutuli wesu Jesu Kilisito.

Kulinguwe akube bulemu sunu alyoonse kukabe kutamani. Akube boobo.

Currently Selected:

2 Pita 3: Tonga96

Highlight

Copy