1 Makani 16
16
1Bakatola bbokesi lyacizuminano kutente eelyo Devedi ndyaakalibambilide. Ooko bakapa zipaizyo azituuzyo zyalumvwano kumbele lya Leza. 2Devedi naakamana kupa zipaizyo azituuzyo wakaleleka bantu muzina lya Mwami Leza. 3Eelyo Devedi wakapa Muisilayeli omwe-omwe mwaalumi naba mukaintu cinkwa comwe acituli canyama njoke, ansaansa ziyanikidwe.
4Lino Devedi wakasala Balevi bamwi kuti kabakutaukila kumbele lyabbokesi lya Mwami Leza, nkokuti kabakomba, kulumbaizya akumutembaula Leza wa Isilayeli. 5Bakasalwa boobu: Asafu, wakali ngomusololi wabo, kumane ngu Zekaliya, kumane ngu Jeiyeli, Syemilamoti, Jehiyeli, Matitiya, Eliyabu, Benaiya, Obediedomu a Jeiyeli. Aaba mbibakali kulizya tulumbu atuntimbwa. Asafu nguwakali kulizya nsakalala. 6Benaiya a Jahaziyeli bapaizi mbibakali kusiba myeembo lyoonse kumbele lyabbokesi lyacizuminano ca Mwami Leza. 7Mbobuzuba oobu Devedi naakatalika kweendelezya Asafu abeenzinyina kuti babe mbabalanga baimba nyimbo zyakutembauzya.
Lwiimbo lwakutembaula
(Intembauzyo 105.1-15; 96.1-13; 106.1, 47-48)
8Amulumbe Mwami Leza, amukombe mukwiita zina lyakwe.
Amulungulule zya milimo yakwe akati kabantu boonse.
9Amumwiimbile cakumulumbaizya.
Amulungulule zyamilimo yakwe iikankamanisya.
10Amulikankaizye muzina lyakwe lisalala.
Myoyo yabaabo bayandaula Mwami Leza iisekelele.
11Amuyandaule Mwami Leza,
muyandaule nguzu zyakwe,
amube kuli nguwe lyoonse.
12Amuyeeye zigambya nzyaakacita, amaleele aakwe,
ambeta nzyaakaambilizya,
13nywebo nolunyungu lwa Abulahamu mubelesi wakwe,
nobana ba Jakobo basale bakwe.
14Namakungwe ngo Mwami Leza wesu,
nguubeteka munyika yoonse.
15Nguyeeya cizuminano cakwe lyoonse,
majwi ngaakaambilizya kwamazyalani aali zyuulu-zyuulu.
16Cizuminano ncaakapangana a Abulahamu.
Cikonke ncaakakonkezya Izaka.
17Wakaciindulula kuli Jakobo kuti cibe mulawo,
kuli Isilayeli kuti cibe cizuminano citamani.
18Wakati, “Njookupa nyika ya Kenani,
iyooba lukono lwako.”
19Naakaamba boobo bakacili bace,
bace kuceela limwi alimwi kabali beenzu mulinjiyo.
20Bakali kutuntulika kuzwa munyika imwi kusikila muli imwi,
kuzwa kubulelo bumwi kuyoosika kuli bumwi.
21Mwami Leza taakazumizya muntu naba ni kuti abadyaaminine.
Mukubakwabilila wakatapatila bamami.
22Wakati, “Mutabagutaiki basale bangu,
mutapenzyi basinsimi bangu.”
23Amwiimbile Mwami Leza nyoonse nobantu bakwe,
amwaambilizye mbwafutula bantu bakwe buzuba abuzuba.
24Amwaambilizye bulemu bwakwe kumasi oonse,
mwaambilizye milimo yakwe iigambya njacita akati kabantu boonse.
25Iiyi, Mwami Leza mupati,
uleelede kulumbaizigwa,
uleelede kuyoowegwa kwiinda baleza boonse.
26Kayi baleza bamisyobo yoonse mituni buyo,
pele Mwami Leza nguwakalenga majulu.
27Bulemu abulelo nzizyakwe,
nguzu alutangalo zili muŋanda yakwe.
28Amumutembaule Mwami Leza nomikwasyi yamisyobo yoonse.
Amutembaule bulemu anguzu zyakwe.
29Amuzumine kuti bulemu bulimweelede.
Amupe zipaizyo, muze kuŋanda yakwe.
Amumukombe nalibonya mubulemu bwakwe.
30Muzyangame kulinguwe nobamunyika yoonse.
Nyika ilijisi tiikonzyi kutenkaanyizigwa.
31Nozya mujulu azyamunyika amusekelele,
amwaambilizye kuti, “Mwami Leza nguulela.”
32Lwizi azili mumo zivuume.
Nomyuunda amusekelele azili mulindinywe.
33Aalo masamu aamusokwe aimbe,
aimbe cakukondwa kumbele lya Mwami Leza.
Uyooboola kubeteka nyika.
34Amumulumbe Mwami Leza nkaambo mmubotu,
luyando lwakwe lutazungaani ndwalyoonse a lyoonse.
35Kotufutula, “Leza Mufutuli wesu.
Tuyobolole utuvune kuli bamasi,
tuzoolumbaizye zina lyako lisalala,
tulisumpule notukutembaula.”
36Aatembaulwe Mwami Leza wa Isilayeli,
amumutembaule lyoonse alyoonse.
Lino bantu boonse bakati, “Akube boobo.”
Aatembaulwe Mwami Leza.
Mbubakakomba mu Jelusalemu aku Gibeyoni
37Mwami Devedi wakabikka Asafu abeenzinyina kuti kabakutauka kumbele lyabbokesi lyacizuminano ca Mwami Leza mbubweelede mulimo wabuzuba abuzuba. 38Obediedomu mwanaa Jedutuni abeenzinyina bali makumi aali cisambomwe alusele mbibakali kubagwasilizya. Hosa a Obediedomu bakali bapati babalindizi baamilyango. 39Mwami Devedi wakabikka Zadoki mupaizi abapaizi bamwi kuŋanda yakukombela iili ku Gibeyoni, 40kuti kabapa zipaizyo ku Mwami Leza acipaililo cakutentela lyoonse. Bakali kucita oobo cifumo-fumo akumangolezya kweendelana ambokulembedwe mumulawo wa Mwami Leza ngwaakapa Baisilayeli. 41Ambabo kwakali Hemani a Jedutuni abamwi mbubakasala kuti kabatembaula Mwami Leza kabati, “Nkaambo luyando lwakwe talumani.” 42Hemani a Jedutuni mbibakali kwiimbya balizya myeembo ansakalala atungwali-ngwali twakali kubelesegwa mukwiimba nyimbo zyabukombi. Baciinga ca Jedutuni mbibakali kulanga balindizi baamulyango.
43Zimane eezi bantu boonse bakamwaika baya kumaanda aabo. Awalo Devedi wakapilukila kwakwe kuyoojuzya mukwasyi.
Currently Selected:
1 Makani 16: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
