NITRITI 30

1Noro Rahel pijet ba, gwam tut nimunggwom hi bak Yakub bigyo. Gima rino wok nikindig ba, nso tut bak Yakub bipai “Abindei ba, digwam tut dimunggwom! Gi bi lene dimai ug ri!”

2Lene Yakub ningon sibui sut noni bibuhup “Bit bon diya luei Allah nohoti kan bi. Noni rino bindei dino apijet a.”

3Gima rino Rahel pai binoni “Angat ditde awak Bilha rima. Ma ayem njita tut noni leu binhyepo noni migwam tut nimunggwom hi bida apino dibon dimunggwom bat nya tug hon noni.” 4Lene noni kes nide awak Bilha bak nijjep lene igyem njita tut yam. 5Lene Bilha tta buhun bigwam tut nipmot hi. 6Gima rino Rahel kan “Allah ya hacan mem sa bibuhup side nadi tu ba, yai sipmot bisa tu.” Gima rino noni jem nipmot ninyeng Dan. 7Jei bi lene Bilha tta buhun hanyen bu bigwam tut nipmot hi kin bu. 8Lene Rahel kan “Sibrim singkek nindig bibor apino soom kep sikindig tu.” Gima rino noni jem nipmot ninyeng Naftali. 9Tirigi Lea kan tut bipia yai munggwom bi ei nituti poi su lene noni kes nide awak sop Zilpa bak Yakub binok nitnem ndrim bu. 10Leu api Zilpa cem tta buhun bigwam tut nipmot. 11Lene Lea kan “Mun di kei pek kep mem da.” Gima rino noni jem nipmot ninyeng Gad. 12Jei bi lene Zilpa tta buhun hanyen bigwam tut nipmot hi kin bu. 13Lene Lea kan “Singon llei nindig bibor apino sop nya mitri tut singon di llei bibor.” Gima rino noni jem nipmot ninyeng Asyer.

14Mpe hi bu tirigi bed dem mem ike gandum ngan lene Ruben mbut susti bingat mun di nok mpam ndum bindung hi kwei bak nipmem Lea. Lene Rahel hara Lea bipai “Akwas mpam ndum di apmot ndung kwei bina dima ndrim hi tut da.”

15Lene Lea buhup “Gi po ayai dijjep leu da pima dem mem na bi e? Nogindini ma ayai mpam ndum di dipmot ndung kwei bida cem bu e?”

Lene Rahel pai binoni “Gino akwas mpam ndum di apmot ndung kwei bina gom-gom tut da lene midisindui sut gima Yakub hwou biyem njita tut na mem mmun di ariman.”

16Tirigi Yakub kwei hanyen leu dumti mem mmunti lene Lea ug um noni bipai bak “Ma siyem njita tut yam mem mmun di ariman lewo diba mpam ndum di dipmot ndung kwei bida bingot kep Rahel tu.” Gima rino igyem njita tut yam mem mmun dima.

17Lene Allah buhup Lea de nadi apino noni tta buhun bu bigwam tut nipmot gi nimuhwi. 18Lene noni kan “Allah yai simuhup bisa lewo sindo side awak Zilpa bak sijjep tu. Gima rino noni jem nipmot ninyeng Isakhar.” 19Jei bi lene noni tta buhun hanyen bu bigwam tut nipmot gi nimuhwindagom. 20Lene noni kan “Allah njei mun di kei-kau bak sani. Nogindini misibon sinyeng ei sijjep niyai him lewo siyai sipmot bat ibou muhwindagom binoni tu.” Gima rino noni jem nipmot ninyeng Zebulon. 21Mpe hi bu lene noni tta buhun hanyen bu bigwam tut nipmisop bijem ninyeng Dina.

22Lene Allah ningon prion ser Rahel bi. Gima rino Noni buhup nide nadi bibindei ba, noni nghop. 23Lene Rahel tta buhun bigwam tut nipmot lene kan “Allah ciu ser mun di bindei nim kep sa bingwig leu sa tu. 24Nna ba tuhan bindei ba, sitta buhun bisigwam tut sipmot gom kin bu.” Gima rino noni jem nipmot ninyeng Yusuf.

Yakub kin Laban itte tut yam

25Niabiati Rahel gwam tut Yusuf tu lene Yakub pai bak Laban “Ma akes da bidingkwei hanyen ug ei ditimieisi. 26Ma akes ditnem bat kin dimunggwom bat nya di diyai leu na tug hon midyai di diyai mem na leu binhyepo dingkwei hanyen. Lewo jo nibreisi mem na bipia diba dijoi biyai midyai mem na ninno tu.”

27Lene Laban buhup “Dipai bina bipia diko bidinggok tut ba, tuhan njei mun di kei bak dani tug hon nani. 28Apai angon kanti brei bida leu api midikum ei amuhupti hak ug.”

29Lene Yakub pai “Na di Andigpoi akan tut bipia diba dijoi bibor biyai midyai mem na apino ade mindhe-ndhe nya ibep bisider-wap cem tu. 30Nipou tirigi dikwei ngat na bigyo lene na di Andigpoi anyeng tut mun nyeng gom-gom he noro tini bu lene anyeng bibor. tuhan njei mun di kei bak nani tug hon da tu.#30:30: Nipas kep tug hon da tu cem kei lene nipas kep bidem dimbutti nya tu cem kei. Gima rino njap dem mem gima diyai kep ditde midyai bidinyohou danti ditde ig bei nsi nya.”

31Lene Laban hig ser noni “suar diyai mindei bina i?”

Lene Yakub buhup “Amom e, ayai mun bida au. Midinyohou na di Andigpoi ade mindhe-ndhe nya kikau gino ace tut dingon kanti gom dini. 32Ma asindui sut da bidiyok diyai kep ade mindhe-ndhe nya hagom leu binhyepo diyai domba pmot di ninta nimmun nya#30:32: Nipas kep domba pmot di ninta nimmun nya cem kei lene nipas kep domba pmot di ba nimmun bikos nya kin gi ba ninta nimmun bitem nya cem cem kei. kin kambir nehen pap di ninta llikti nya hagom ei mem da binok dimuhup ri. 33Ei nidipti bu lene krop kei mem na di Andigpoi akan tut bipia diba dingon sren biyai midyai. Gino na di Andigpoi akwei ngig ayai kep ditde mindhe-ndhe nya ba, angat lo, kambir di ninta llikti bi kin domba di ninta nimmun bi srigsi lene na di Andigpoi akan tut bipia dimbrai gi hi dima leu nani tu.”

34Lene Laban ce bipai “Igbit ri! Ma siyai hagom bit leu angon kanti hak ug.” 35Noro njap gom ndia lene Laban dimig nide kambir nikre di nillikti nya kin kambir niwek di nillikti kin niwek di ba nimmun bikos kin domba di ninta nimmun hagom keyam bikes hagom ei nipmot bat nya inda nsi. 36Lene Laban yoni ijem mindhe-ndhe dima yok hagom bimbut tut mem mmun-njap ningai ug ei minu ting bibor. Lo bi lene Yakub gwam binyohou Laban de mindhe-ndhe nindigsi nya.

37Lene noni ug tot biei hawar kin badam kin berangan ninda-nda di ngun kwei birik ningkek leu nirup bibet ningkek gom-gom eisi. 38Leu api noni kes biei rup nillikti dini hammi kambir nya kin domba nya igyati ei minyei bousi. Lewo kambir nya kin domba nya ipri gau yam ei mpe dino ikwei dut minyei bousi. 39Gima rino tirigi kambir nya ipri gau yam hammi biei rup nillikti lene ibep ipmot bat di nillikti nya bu dem kep biei rup nibikos pima.

40Lene noni dimig domba nya bijo ter leu binhyepo igya hammi kambir di nillikti nya. Gima rino noni kum ei nide mindhe-ndhe di nillikti nya nindig bibor. Leu api noni jem mindhe-ndhe dima yok hagom bigya ter leu Laban de mindhe-ndhe nya. 41Tirigi noni ngat Laban de mindhe-ndhe di isindem bibor nya ipri gau yam lene noni dat biei rup nillikti hammi igyai him ei minyei bousi. 42Noro noni kes biei rup nillikti hammi Yakub de mindhe-ndhe di kinei-kinau nya igyai him bi. Jei bi lene Laban de mindhe-ndhe di nillikti bi hagom kinei-kinau. Lene Yakub de mindhe-ndhe di nimmun kin nillikti hagom sindem bibor. 43Gima rino Yakub nyeng bibor binyeng tut mindhe-ndhe nya kin unta nya kin keledai nya kin awak nya imang bibor.

Currently Selected:

NITRITI 30: HAD

Highlight

Copy