NITRITI 29
29
Yakub ug krau Laban de ig bei
1Lene Yakub mbut kikau ei minu Kanaan ug ei nite bei mpia nipriti. 2Leu api noni tau kep minyei bousi gom ei ngoi dumti bingat domba nya nimpung ningai di idis yam simiak minyei bousi bimem kep ser tto bou mem yo di ighyen kep yok ibei nibeng leu nuhui bitau minyei mem yok. Nibeng dima ne tig mma nindig bibor ri. 3Mpe dino domba nya yahagom idem yam tu leu api yo di ighyen kep nya ibei tig dima leu nuhui bitau minyei bak mindhe-ndhe yahagom ba, idut bindei yok leu api ibikibou kep ser hanyen.
4Lene Yakub hig ser gembala nya di ikwei ya-ya nyen nya “Disut bat jen, jibong ei hantou i?”
Lene ibuhup “Nibong ei minu Haran.”
5Lene Yakub hig ser yok “Jikan tut Laban di ntun Nahor him e?”
Lene ice bipai “I, nikan tut.”
6Lene noni hig ser yok bu “Notou mem noni i? Hagom kei e?”
Lene ice bipai “I, hagom kei lo, angat i! Nipmisop Rahel rino sindi jem Laban de domba nya di tau sut mo kwei.”
7Lene Yakub hig ser yok bu “Nogindini mpia njap yo ba, jam dem mem jijem domba nya hanyen ug ei sar nsi bigyo. Nggon rino jitau minyei ba, idut bindei yok leu api jijem yok hanyen kep abris meng bi i?”
8Noro isrep bipai “E bi! Bit bon nitau minyei bi bibou domba yahagom idem yam leu api nibei tig leu minyei bousi nuhui leu api nitau minyei biyok bidut noyam.”
9Tirigi Yakub kes nihyet bigyo lene Rahel tau kep yok bijem domba nya kwei. 10Tirigi Yakub ngat igbit nipmum Laban nipmisop Rahel di tau sut Laban de domba nya nok lene noni bipbur ba, ug ei minyei bousi bikau nibeng leu lene tau minyei bak nide domba nya bidut. 11Lene noni mei Rahel ningyoi bipim lewo ningon nggan-triot kei. 12Leu api pai binoni “Acig ninggwo ridani ba, dipmem Ribka nikijam rino acigya.”
Gima rino Rahel bisau bingkwei hanyen lene tri tut hagom bak nicigya. 13Tirigi Laban miap nipmisop nihyet tut ninggwo Yakub nikweisi nok lene noni dor buug ngat noni leu api yahacem inggriou yam bimei yam ngyoi. Lene Laban buwak Yakub hanyen kwei ei ig bei nsi. Tirigi Yakub pui sut mun di pek kep mem noni hagom bak, 14lene Laban pai “Jit-jit! Jo nibreisi bipia sani ne sa di pung gom ri.”
Leu api Yakub bong bit ei ninsi bed gom.
Yakub yai midyai mem Laban ba, biyok wa kep Rahel kin Lea
15Mpe di gom bu lene Laban pai bak Yakub “Mbro nok gino dinggwo rinani lo, ma ayai midyai mikuisi mem da au. Diba mindei bibirop amuhup hanyen bina i?” 16Mpe dima lene Laban bon nipmisop bat nya ibou can. Misop mighumbou ninyeng Lea lene nipumiap ninyeng Rahel. 17Lea niyai nggrop mbris lene Rahel ninghuisi kwes ba, niimaisi ubbu ngat.
18Yakub ningon ngakei Rahel. Gima rino noni buhup Laban nihyet “Gino ando Rahel bida lene midiyai midyai mem na kikau ei ninsi ari bingwam muhwindacan.”
19Lene Laban ce bipai “Dijoi sut gima abuwak noni nok atnem leu gima ngkiai gom kwei buwak noni a. Gima rino suar abong bit da leu binhyepo ayai midyai bit da.” 20Lene Yakub yai midyai bit Laban mem ninsi ari bingwam muhwindacan leu binhyepo wak Rahel nok nitnem. Mem noni lene nijam dima dem kep njap poi he lewo ningon ngakei Rahel nindig bibor.
21Nijam dima ngwig leu su lene Yakub pai bak Laban “Tto bou dem tu ba, ace tut da bidiwak apmisop nok ditnem.” 22Gima rino Laban bon pesta nindig bibor kep gi iwak yamti binduk timiei minu ndig dima yahagom kwei. 23Himmun di iwak yam dima lene Laban tak kep Rahel lene buwak Lea bak Yakub ba, Yakub kin Lea igyem njita tut yam. (24Mpe dima lene Laban kes nide awak sop Zilpa bak Lea binok nide awak bu.) 25Njap bigyoti bu rino Yakub da niyai bingat lo, yem njita tut Lea. Gima rino noni ug nggok Laban bihig ser noni “Nggon rino abon ndei da no nti dini i? Diyai midyai mem na leu binhyepo diwak Rahel nok ditnem bi e? Aris bida nok tut nggon i?”
26Lene Laban buhup “Dem mem gima nye di timiei minu dini nitri nipmisop mien bak nijjep njiriek nikindig bi. 27Nok bibou abet angon mem ari gom bu bibou pesta di nibon kep jiwak yamti ngwig leu api midibuwak Rahel cem bina binok atnem mien lo, suar ayai midyai mem da kikau mem ninsi ari bingwam muhwindacan bu.”
28Lene Yakub ce nihyet. Tirigi pesta gi iwak yamti dima ngwig leu su lene Laban buwak nipmisop Rahel bak Yakub binok nitnem mien. (29Mpe dima lene noni kes nide awak sop Bilha bak Rahel binok nide awak bu.) 30Lene Yakub yem njita tut Rahel cem ba, ningon ngakei noni nindig bibor dor njiriek Lea. Leu api noni yai midyai mem Laban kikau mem ninsi ari bingwam muhwindacan bu.
Yakub yai nimunggwom bat nya
31Tirigi tuhan ngat lo, Yakub ningon ngakei Lea noyam kin Rahel bi lene Noni bindei ba, Lea yai nimunggwom noro Rahel pijet. 32Gima rino Lea tta buhun bigwam tut nipmot lene kan “tuhan ngat igbit singon di buhun tu apino hon kep ammani kui sijjep miningon ngakei sa.” Gima rino jem nipmot ninyeng Ruben. 33Jei bi lene noni tta buhun hanyen bu bigwam tut nipmot hi kin bu. Lene noni kan “tuhan yai sipmot dini bisa lewo kan tut bipia sijjep ningon ngakei sa bi. Gima rino noni jem nipmot ninyeng Simeon.” 34Jei bi lene noni tta buhun hanyen bu bigwam tut nipmot hi kin bu. Lene kan “Nogindini sijjep miningon ce sa bi lewo siyai sipmot bat nya ibou ningai binoni tu.” Gima rino noni jem nipmot ninyeng Lewi. 35Jei bi lene noni tta buhun hanyen bu bigwam tut nipmot hi kin bu. Lene kan “Mpe dini misinggei sut tuhan.” Gima rino noni jem nipmot ninyeng Yehuda. Leu api noni yai munggwom bi ei nituti poi.
Currently Selected:
NITRITI 29: HAD
Highlight
Share
Copy
Want to have your highlights saved across all your devices? Sign up or sign in
