NITRITI 28
28
1Gima rino Ishak hig Yakub kwei bikwei ngat noni lene ba ningon di kei bipigo noni tug hon Allah ninyenga. Lene sok kep noni bipai “Ma awak sop minu Kanaan jit au! 2Noro ma akiju ba, aug ei agnyon Betuel de minu Mesopotamia hak ug ba, abuwak apmum Laban nipmisop hi nok atnem. 3Nna ba Allah Di Sindem Bibor njei mun di kei bak nani tirigi awak atnem leu api bindei ba, amunggwom bat nya imang bibor intun nani him leu binhyepo anok pung di mben mang bibor intun him! 4#Kej. 17:4-8 Nna ba Allah njei mun di kei bak nani kin ade nintun him yamti di bram yam nya bit leu nok Noni njei mun di kei bak Abraham! Nna ba anyeng tak kep minu di abong ser dini di Allah pek bak Abraham nipou su!” 5Lene Ishak kes Yakub leu api Yakub mbut ug ei Mesopotamia leu binhyepo bong bit Laban di nicig Betuel di timiei minu Aram. Laban ne Ribka nikijam rin ba, noni jem Yakub kin Esau nok ninggwo bat nya ri.
Esau wak nitnem hi kin bu
6Lene Esau miap tut bipia Ishak njei mun di kei bak Yakub bicuk noni ug ei Mesopotamia leu binhyepo wak sop ei minu dima. Gima cem noni miap tut bipia tirigi nicig njei mun di kei nya hagom bak Yakub tu lene sok kep noni ngkiem ser bipia wak sop timiei minu Kanaan au. 7Lene noni miap tut bipia Yakub bit nicig nipmem nya ighyet buug ei Mesopotamia tu. 8Lene ningon dorti tut bipia nicig joi sut sop timiei minu Kanaan nya bi. 9Gima rino noni ug ngat Ismael di Abraham nipmot bibuwak nipmisop Mahalat di Nebayot nikwohop nok nitnem ndrim.
Yakub bong bimumpriem ei Betel
10Lene Yakub jo leu Bersyeba buug ei minu Haran. 11Mpia jinjui su lene noni kwei krau gumihyep gom di kwes-kwau. Lene noni ug yai tig gom mem bitau bibong bas. 12#Yoh. 1:51 Lene noni mumpriem bingat lo, lin mbrei gom di itas ei dihyeisi bikui ug ei mpia-bbed him lene malaikati nya iti ba, bihi ijuk kwei lo, bihi ikui hanyen. 13#Kej. 13:14-15 Leu api tuhan ningat rin simiak noni bipai “Dani ne tuhan ba, Abraham kin Ishak ide Allah pima ri. Mporo midipek minu di abong eisi dini hagom binani kin ade nintun him yamti di bram yam nya. 14#Kej. 12:3, 22:18 Yo di intun nani him midigek kep mpia ba, imangti ningot ndig noyam kin dihyei ndung nimangti. Lene mporo yoni mikieng kep mpia ug ei nite bei mpia nicutti kin nite bei mpia nipriti kin nite bei mpia nijjai kin nite bei mpia nibiho. Ba, mben dihyeisi dini hagom mporo mitug ndei mun di kei tug hon nani kin ade nintun him yamti di bram yam nya cem.#28:14: Nipas kep mitug ndei mun di kei tug hon nani: Angig ayai kep Kej. 12:3. 15Amiap e, midingat rin bit na kikau bidem ambutti nya hagom ba, dinyohou na. Lene mporo midibuwak na hanyen kwei ei atimieisi dini. Midimbres Da leu na bi sren. Midibindei ba, mun di dipreu kep na tut nya hagom mipek kep mem na.”
16Lene Yakub da niyai bikiju lene pai “tuhan ningat rin ei gumihyep dini! Noro sindi dikan tut!” 17Gima rino noni digit tut ba, simbot dat “Gumihyep dini bindei ba, dinga leu nindig bibor! Gini ne Allah de ig ba, dimbou hui di bie ug ei gwamti ri!”
18Njapti kui bu lene noni kiju mem ha yausi bitas tig di bitau pima pijum nok tig nibiyok ngon kep leu api ampou tut mini zaitun bisiber ei dip bipigig sut ei mem Allah. 19Lene noni jem gumihyep dima ninyeng Betel. (Ninyeng timiei rino Lus.) 20Lene noni heng bipai “Gino na di tuhan anyohou da ba, aya ser da kak dimbutti dini ba, ayai njita kin sinsun hi bida, 21kikau bidiba dingwes ngun bingkwei hanyen kwei ei dicig de ig bei nsi lene midikuk da biNa di tuhan Nangkom. 22Lene midikwas gom leu ningot gom lene gom leu ningot gom bikwop mun nyeng hagom di dinyeng tut nya leu Na di tuhan hanyen biNa. Tig nibiyok ngon kep dini minok gumihyep mem tungwatu nya ibikuk yok bak tuhan eisi.”
Currently Selected:
NITRITI 28: HAD
Highlight
Share
Copy

Want to have your highlights saved across all your devices? Sign up or sign in