NƐHIMAYA 5

Nyanibleisia ti Yamɔnɛlei

1Kiahuna ngɔlɔ wo waa yɛlɔ a gbua nungeisia kɛ ti nyahangeisia gama kɔlongɔ ti ndewengaa Juubleisia ma. 2Gbamaile nasia lɔɔna ti yɛ a nde tɛɛ, “ Mu hingalengeisia kɛ mu nyahalengeisia mu gbotongɔi, kungɔi mu mba galei majɔɔ, kɔɔ wɔi mu mɛ tawao mu yɛ ndɛvu hu.” 3Nasia lɔɔna gbɔma ti ndeni tɛɛ, “Mua mu gbaleisia wu lɔ a kpɔmbei, mu lɔ yeyakɔ gbaleisia kɛ mu wɛleisia kɔɔ wɔi mu mɛhɛɛ majɔɔ ndɔlɛ watii hu.” 4Kɛ nasia lɔɔna ti ndeni tɛɛ, “Mua navo hou ma a kpa mu gbaleisia va kɛ mu lɔ yeyakɔ gbaleisia va kɔ mu mahei pawa navoi ve. 5Kiahuna mu luwui wiengɔi kia mu ndewengaa ti na; mu lengeisia bɛ ti wiengɔi lekee kia ti nda lengeisia ti na; kɛ na tuuŋ mua kpɔndama mu hingalengeisia kɛ mu nyahalengeisia wote va a nduwɔngaa, tawao mu nyahalengeisia lɛnga ti wotenga a nduwɔngaa; kpaya gbi ii mu yeya, tawao mu gbaleisia kɛ mu lɔ yeyakɔ gbaleisia ti nungaa wekangaa lɔ naa yeya.”

6Ngi liileweilɔ waa ji ngi ti wɔlɔ woi mɛnini kɛ ti gbɔnyeisia. 7Ji ngi gilini la, ngi nyamu loilɔ samangeisia kɛ tokulɔisia; ngi ndeilɔ ti ma ngɛɛ, “Wua nda mahu hakanga wumbu ma wu nda nungeisia yeya.” Kɛ ngi fahaŋ waa lolinga kɔɔ mu yɛpɛ, 8kɛ ngi ndenga samangeisia kɛ tokulɔisia ma ngɛɛ, “Kia lekee mua gu la, mu mu ndewengaa Juubleisia yeyanga gbɔma, nasia ti ti majiani kɛnyɛ wekangaa ma; kɛɛ kiahuna waa wu nda ndewengeisia majia ma, nasia kungɔ mu ti yeya gbɔma!” Ti londoilɔ looŋ tawao jɛpɛ i yɛ ti la nde va. 9Fale ngi ndeilɔ ngɛɛ, “Hindei ji wu piema ii nyandeni. Wuɛ luwa Ngewɔ maluwei ma, kɔɔ mu ngɔnyɔu lɔɔleisia ta mu yɛlɛ? 10Kpɛlɛɛngɔ na ma nya kɛ nya ndewehingeisia kɛ nya bɔilopoisia lɔ navo kɛ mba galɛ gbawuli ma ti ma. A mu gbe a ndamahu navoisia wumbu la. 11A gama ti ma foloi ji vulii, ti gbaleisia, ti lɔ yeyakɔ gbaleisia, ti ɔlivi wuluisia, kɛ ti wɛleisia, kɛ ndamahu navoi, kɛ mba galɛ, kɛ ndɔ, kɛ ngulɔi na wu yɛni kpuani ti yeya.” 12Na wooma ti ndeilɔ tɛɛ, “Ma hakeisia kpɛlɛɛ yamalɔ ti ma tawao muɛ yaa haka wumbu ti yeya gbɔma. Ma pielɔ kia bi ndenga la.” Kɛ ngi saagbuableisia lolinga kɛ ngi pienga ti lahedi wumbu kɔɔ wɔi ti pie kia ti ndenga la. 13Ngi gbɔma nya gulaya gbunɔngɔi na yɛ nya hama gbuanilɔ ngi sɛjia kɛ ngi ndenga ngɛɛ, “Fale Ngewɔ i numu na gbi lekee jɛsia i hiye ngi yee pɛlɛ la, kɛ ngi yeya haka ma na ii tooni lahedi ji wooma. Hi mia ta jɛsia tawao ta wopoo.” Kɛ faheiŋ kpɛlɛɛ ndenga yɛɛ, “Amina”, kɛ ti Ndemɔi latonga. Tawao nungeisia ti pielɔ kia ti lahedi wumbuni la.

Nɛhimaya Hinda Yekpei

14Kpɛlɛngɔ na ma i hiye watii na ma ti loko loni nya ma yɛva a ti gɔminei Juda lɔɔlei hu, i hiye fooi yee numu gbɔyɔngɔi ma i too fooi yee numu gbɔyɔngɔ mahu puu mahu felei ma Mahei Aatasasi mahayei hu, fooi yee puu mahu felei, nya ɔɔ nya ndewengeisia muii mɛhɛɛ gbi mɛni nahi yɛni gɔminei va. 15Gɔminei yee nasia ti yɛni nya gulɔ ti yɛ a kahaŋ waa wu nungaa wumba, tawao ti yɛ a mɛhɛɛ kɛ ndɔ wumbu ti yeya, i gbua kanigolei sɛkɛl numu fele gbɔyɔngɔi na ma ti yɛ mbubuni ti yeya. Ti bɔilopoisia bɛ ti yɛ a kpɔu nungeisia la. Kɛɛ ngi pieni hii, gbamaile nduwa yɛnilɔ nya hu Ngewɔ va. 16A tɔnya, ngi nya gbayei kpɛlɛɛ wulɔ bundi ji loolei hu, tawao ngii ndɔɔlɔ gbi majɔɔni; tawao nya bɔilopoisia kpɛlɛɛ ti lɛlɔma ngengei wei va. 17I gbɛlɛɛ na ma numu hɔndɔ yila kalɛ nuu fele gbɔyɔngɔ mahu puu (150), Juubleisia kɛ tokulɔbleisia i gbua naa ma ti wani mu gama ta gbua kɛnyɛ wekangaa hu mu galangɔ, mua tieni mu mɛhɛɛ mɛlɔ nya mɛhɛɛmɛ bɛtei ma. 18Kiahuna naa mɛhɛɛ na ti yɛ hugbatɛni folo yila va i yɛni a nika yila lɔ, kɛ mbala yekpe weitangaa; ti tɛngeisia bɛ hugbatɛnilɔ gbɔma nya wɛ, heima yila lɔwɔ puu gohu gbi ndɔ gbula gbotongaa; na hu gbi ngii gɔminei mɛhɛɛ gbuani ti yeya, gbamaile mɔnɛ waa na i yɛ nungeisia ma. 19Ngili a nya gbekpeyei, O nya Yewɔi, na gbi ngi pienga nungei jisia va.

Currently Selected:

NƐHIMAYA 5: RMB

Highlight

Copy