มาระโก 10
10
เยซู มบราง พระ นอย
มัดทิว 19:1-12
1เจ็นนัน เยซู ก็ ทอก เริล เจ็น งวัล คาเปอนาอุม โตะ ตัก จังวัด ยูเดีย เจ็นนัน นำ ก็ คาม นอก จอแดน โตะ พาโนน พซาซน ก็ รูบ โตะ และ นำ เป็น ปึง มี ลบ วัล นำ ก็ นเจ็น อัห ฮุน จู ลบ นัน 2ปึง ฟาริซี แกด ล็อง ก็ โตะ ลอง ใจ เยซู อัห ซ็วน นำ คือเน “กัน แอ พระ ยัห ออ แอ ลุห อัง กด เอาซาง อัน” อัห อัง 3เยซู ก็ ลบ วัล ซ็วน อัห ฮุนเน “โมเซด เคียน ระ อน ตัก แป จังนัก บ็อห” 4อัห ก็ ซวัล เยซู “โมเซด ไล ปึง อัหคล็อง แอง ไบ ยา อน ตัก ยัห วาล ซัง พระ นอย กุญ” อัห อัง 5เยซู ก็ ซวัล อัห คือเน “ตี โมเซด เคียน กด ระ อน ฮุนนัน ก็ เป็น ตัก แป ลืน เกิน ฮาย 6แต เจ็น ตัก อิง ญาม เอาซาง แอง โลก แมะๆ นัน เอาซาง ก็ แอง ครำ เป็น อัหคล็อง เคิบ อัหเม 7เจ็นนัน อัหคล็อง ก็ ลด พระ เอา พระ เม ออ ลด อุ เคิบ ยัห ออ ติกๆ ฮัก 8ปา คล็อง เคิบ ยัห ก็ ลด เป็น ครำ ฮุน มี ล็อง เดียว ไอ แมน เป็น เปียะ ล็อง เตาะ แต เป็น มี ล็อง เดียว เลิม 9กัน เอาซาง แอง ระ ปาม เป็น มี ล็อง เดียว เลิม แลว ก็ อำ แอง ระ ปาม พระ นอย เตาะ” เยซู อัง
10เจ็นนัน เยซู ก็ กุด ควังใน เจิง ลูกนอง ก็ ที ซ็วน นำ เลือง ตี นำ เลามุน เคิน 11เยซู ก็ ไล อัห คือเน “กัน เอา นเดย พระ แอ็ม ยัห ออ ลบ เอิด ยัห แมะ วัล เอา นัน ก็ แอง ลุห มอก ปิล จู นัน 12อัหเม ก็ เมือนนอย กัน นำ พระ แอ็ม คล็อง ออ ลบ เอิด คล็อง แมะ วัล นำ ก็ ลุห ปิล จู เมือนนอย” เยซู อัง เกาตีนา 1:27, 2:24
เยซู รัก ควัน แย็ด
มัดทิว 19:13-15, ลูกา 18:15-17
13ทาเน มี ครำ แกด ล็อง อัห ซับ ควัน แย็ด โตะ และ เยซู อัห ซีรอก ระ นำ เอิด ที คอบ ซิห ควัน แย็ด นัน แต ลูกนอง นำ ก็ มบราง อัห 14เยซู เม็จ ลูกนอง มบราง ควัน แย็ด โตะ และ ออ นัน นำ ก็ อ็อด นำ ก็ ไล ลูกนอง ออ ฮุนเน “อำ แป มบราง อัห เตาะ ระ ควัน แย็ด โตะ และ เอิญ ติก ดาย นังเลาะ นะ แป ก็ ต็อง เป็น มอก ควัน แย็ด เน ซัง แป กุญ อุ ตี เลาะ คอง เอาซาง 15เอิญ ไล แป นังเลาะ นะ กัน แป ไอ มี ญอม ฮับ เอาซาง มอก ปึง ควัน แย็ด เน แป ก็ ไอ มี กุญ อุ ตี เลาะ เลิม เคิบ เอาซาง เตาะ” เยซู อัง 16แลว นำ ไล อัห ฮุนเน แลว นำ ก็ เกาะ ปึง ควัน แย็ด นัน นำ ก็ คอบ ซิห นัง ปึง ควัน แย็ด นัน นำ ก็ ลด อวยพอน อัห วัล
ครำ ฮัง โตะ ซ็วน เยซู
มัดทิว 19:16-30, ลูกา 18:18-30
17ทาเน ญาม เยซู กำลัง และ เริล ออ นัน ก็ มี อัหคล็อง มี ล็อง เล็ง โตะ กราบ ไว นำ นำ ก็ ซ็วน เยซู คือเน “อาจาน มัห เป็น อาจาน เลาะ ซีเละ เอิญ แอง จังนัก บ็อห ซัง เอิญ กุญ รีด อุ เคิบ เอาซาง จำ นเดย จำ กวา” นำ อัง 18เยซู ก็ ซวัล นำ คือเน “มัห เค็ย เอิญ เป็น ครำ เลาะ อังวะ ไอ มี ซีเอ เป็น ครำ เลาะ เตาะ เอาซาง เลาะ มี ล็อง เดียว” เยซู อัง 19นำ ก็ ไล ล็อง นัน ตอ วัล “มัห ก็ เม็จจึด กด แลว อำ มเบิล ครำ อำ ปิล จู อำ ลอด ซะ อำ จบ โตด อัห ไอ มี เฮดพน อำ โกง อัห ต็อง นับทือ เอา เม ออ เลือง เน มัห ก็ เม็จ มด แลว นอ” เยซู อัง#อิซราเอล ญาย 20:12-16, กด ลบ ซอง 5:16-20
20เอา นัน ก็ ไล เยซู “อาจาน เฮย กด จู คอ เน เอิญ ก็ แอง มด เจ็น แย็ด ดุห” นำ อัง 21เยซู ก็ ที ดอม เอา นัน นำ ตึ อัง เอา นัน ซีเละ นำ ก็ ไล เอา นัน ฮุนเน “มัห ต็อง แอง มี มบลึ วัล ดาย มัห วัล เจิง เท็จ แอ็ม ซะ ตี มัห มี อุ นัน มด เจ็นนัน มัห ก็ เอิด เงิน เอิด ทอง นัน แจก อน ตัก ครำ ตุก ครำ ญาก กัน มัห แอง คือนัน มัห ก็ มี รางวัน ดก นทม ระ ตัก ซะวัน ทึห เจ็นนัน มัห ก็ โตะ เป็น ลูกนอง เอิญ เริล เลิม เคิบ เอิญ” เยซู อัง 22เอา นัน ก็ นจูล โนด ญ็อก แมด ตับ แมด แซ็ง ลด ทอก เริล ออ นำ เซียใจ ซีเละ เพาะวา นำ เป็น ครำ ฮัง มี ซะ ดก 23เยซู ก็ งแก็ล ดอม ลูกนอง ออ นำ ไล อัห ฮุนเน “ครำ ฮัง กุด อุ ตี เลาะ เลิม เคิบ เอาซาง ก็ ญาก ซีเละ” เยซู อัง
24เยซู จ็อก คือนะ ปึง ลูกนอง ก็ งึด อัง นำ ซีเละ แต เยซู ก็ ไล อัห คือเน “ควัน เฮย ครำ กุด อุ ตี เลาะ เลิม เคิบ เอาซาง ก็ ญาก ซีเละ ดาย 25อูด กุด มพุง งาด ก็ งาย กวา ครำ ฮัง กุด ซะวัน ครำ ฮัง กุด อุ เลิม เคิบ เอาซาง ก็ ญาก ซีเละ” นำ อัง 26ปึง ลูกนอง ก็ เฮง งึด วัล อัห ก็ ลด ซ็วน นอย คือเน “กัน คือนะ ก็ ไอ มี อีเอ ปน แอ็ม เจ็น โทด เตาะ” อัห อัง 27เยซู ก็ ดอม ปึง ลูกนอง ออ นำ ก็ ซวัล อัห คือเน “เลือง ปน แอ็ม เจ็น โทด เน ครำ ก็ จวย นัง ออ ไอ มี กุญ เตาะ แต ซำรับ เอาซาง นำ แอง ซีวะ ก็ กุญ มด จู มบลึ” เยซู อัง
28เปโตร ก็ ซวัล เยซู คือเน “อิห เน ดุห อิห พระ แอ็ม จู มบลึ จู มบลัก แลว ลด เคริบ มัห เริล” นำ อัง 29เยซู ก็ ไล อัห คือเน “นังเลาะ นะ ซีเอ ก็ ตึก กัน อัห พระ เจิง พระ กวัห พระ แซ พระ ซวน พระ ควน พระ นไจ พระ เอา เม ออ พระ ควัน ออ ญอน อัห เจือ เอิญ นัน ญอน อัห เจือ คาว เลาะ คาว แลม คอง เอาซาง อัห ก็ กุญ ดก เตา วัล 30ซะไม เน อัห ก็ กุญ มี รอย เตา เป็น เจิง เป็น ควน นไจ เป็น เม เป็น ควัน เป็น แซ เป็น ซวน อัห ก็ กุญ มี รอย เตา มด แต วา อัหซอ ก็ ซำ คมเฮง อัห วัล แต บัดนะ นโดน อัห ก็ กุญ รีด อุ เคิบ เอาซาง จำ นเดย จำ กวา นังเลาะ 31ตี แป ซะละ จู มบลึ แต ซุดทาย กุญ เลาะ ซีเละ ก็ ไอ มี เมือน กำกึด ครำ นอ มี ดก ล็อง ตี เป็น ซะ แกะ มานะ เน บัดนะ อัห ก็ ไอ มี กุญ เกียด เตาะ แต ครำ ตี ไอ มี เกียด มานะ เน บัดนะ อัห ก็ มี เกียด ดก เป็น ซะ แกะ วัล” เยซู อัง
เยซู เพีย ไล เค็ย ต็อง โซะ ต็อง เปิล
32ทาเน เยซู เคิบ ลูกนอง ก็ กำลัง ก็อห เริล เมือง เยรูซาเล็ม เยซู เริล วาล ปึง ลูกนอง ก็ เริล แทะ ปึง ลูกนอง ก็ ญ็อก งึด อัง นำ ตี นำ เริล เยรูซาเล็ม นัน อัหซอ ตี เคริบ เริล เลิม นัน อัห ก็ แร็ง นเจิก เยซู ก็ เลามุน เคิบ ลูกนอง เริล ตาม รวง จุม อัห ฮัก นำ เลามุน เลือง ซะ ตี บัก และ เกิด เล็ห ตัก นัง ออ บัดนะ 33เยซู ไล ลูกนอง คือเน “ปัง เลาะๆ ดาย แป ญาม แอ เล็ห ตัก เมือง เยรูซาเล็ม แลว อัห ก็ เอิด เอิญ เน ตี เอาซาง ระ เกิด เป็น ครำ ลด มอบ อน ตัก ปึง มอ เอาซาง แกะ เคิบ ปึง อาจาน ครำ ยิว ปึง อัห นัน ก็ ตัดซิน มเบิล แอ็ม เอิญ อัห ก็ มอบ เอิญ อน ตัก ครำ กรอก ซอ มเบิล แอ็ม 34ครำ กรอก ซอ ก็ ปิล มัด ปิล มุห เอิญ อัห จ็วห มัด จ็วห มุห เอิญ อัห มบัด เอิญ อัห มเบิล แอ็ม เอิญ วัล แพะ งิ เจ็นนัน เอิญ ก็ รีด เล็ห วัล” เยซู อัง
ยอน เคิบ ยากอบ ซ็วน อุ ตี เลาะ
35ทาเน โตะ ยากอบ เคิบ ยอน ควัน เซเบดี ปาม โตะ ซ็วน เยซู คือเน “อาจาน เยอะ ครอ วอน มัห จวย เยอะ มี มบลึ กุญ อัน” ปาม อัง 36เยซู ก็ ซวัล ปาม “ปา ไล เอิญ แอง ซีวะ บ็อห” 37ปาม ก็ ซวัล คือเน “บัดนะ ญาม มัห คุด อุ ตัก ตี คุด ครึ ตี มี เกียด คอง เอาซาง นัน ครอ ระ เอิญ เคิบ ควน ออ คุด อุ เลิม เคิบ มัห ดาย ครอ ระ เยอะ คุด เพียห วิ มี ล็อง คุด เพียห เลาะ มี ล็อง ดาย” ปาม อัง 38เยซู ก็ ซวัล ปาม คือเน “ปา ครอ ซีวะ ปา ก็ ไอ มี เคาใจ ปา ออก เลิม ตัก จอก#ค 38 “ออก ตัก จอก” เป็น แญง มเบิด เลือง อด เอิด ซะ ไอ มี เลาะ ตี เอิญ ออก ออ กุญ อัน ปา อด เอิด ซะ ญาก เลิม เคิบ เอิญ กุญ อัน” เยซู อัง 39“กุญ กา” ปาม อัง เยซู ก็ ลด ที ไล ปาม ระ เคาใจ คือเน “จอก ตัก เอิญ ออก ออ เน ปา ก็ ต็อง ออก ซีเละ เอิญ อด เอิด ซะ ตุก ซะ ญาก ปา ก็ ต็อง อด เอิด เลิม ซีเละ 40แต เอิญ ไอ มี ซิด เลือก เอิด ซีเอ ระ คุด เพียห เลาะ เพียห วิ คอง เอิญ เอาซาง มี ซิด เลือก ฮัก นำ เตียม ระ อน ตัก เอา นเดย นำ ก็ อน ตัก เอา นัน” เยซู อัง
41ลูกนอง ซิบ ล็อง นัน เม็จ ปาม ซ็วน เยซู คือนัน อัห ก็ อ็อด อัง ปาม 42เยซู ก็ งกรอ ลูกนอง ไท จู ล็อง โตะ ปัง แญง ออ นำ ไล อัห คือเน “แป ก็ เม็จ แลว ปึง เจา ปึง นาย ตี ปกคอง เมือง ครำ กรอก ซอ นัน อัห ก็ ไจ อำนาด ออ คนาบ พซาซน ปึง เอา แกะๆ ก็ มอก นะ อัห ซอบ คนาบ พซาซน ฮับไจ ออ
43แต ซำรับ ปึง แป เน อำ แอง คือนัน ดาย กัน แป ซีรอก ระ อัห นับทือ ออ แป ก็ ต็อง ฮับไจ อัห ดาย 44กัน แป ซีรอก เป็น นาย เป็น แกะ แป ก็ ต็อง เป็น ลูกนอง อัห มด ต็อง ฮับไจ อัห จู ล็อง จู นัง 45เพาะวา เอิญ ตี เอาซาง ระ เกิด เป็น ครำ เน เอิญ โตะ ตัก โลก แพนซิก เน เอิญ ไอ มี โตะ เพือ ระ ครำ จวย ออ แต เอิญ โตะ เพือ จวย ครำ ฮัก เอิญ ญอม ซะละ ซีวิด ออ แก แอ็ม ตี ลุห ครำ ดก ล็อง แป ก็ ซำ ฮาย แป ก็ ต็อง เป็น ครำ ฮับไจ อัห มด จู ล็อง ซัง เลาะ” เยซู อัง
เยซู จวย ครำ บอด มัด
มัดทิว 20:29-34, ลูกา 18:35-43
46แทะ นัน วัล เยซู ก็ โตะ ตัก เมือง เยรีโค เจ็นนัน นำ เคิบ ปึง ลูกนอง ก็ ทอก เริล วัล มี อัหซอ ดก ล็อง เริล เลิม ทาเน ก็ มี ครำ บอด มัด มี ล็อง คุด อุ ตัก เปล รวง นัน ซือ นำ ตัก บาทิเมอัด นำ เป็น ควัน ทิเมอัด นำ คุด ครอ ทาน อุ เปล รวง จ็อง นัน 47นำ เม็จ คาว เค็ย โตะ เยซู ครำ นาซาเร็ด นำ ก็ งกรอ แร็งๆ คือเน “เยซู ควัน งา ดาวิด เฮย ครอ เคิบ มัห ตึ อัง เอิญ ดาย” นำ อัง
48อัห ดก ล็อง ก็ โป นำ ระ นำ เค็ด อุ นำ ก็ เฮง งกรอ แร็งๆ วัล “ควัน งา ดาวิด เฮย ครอ เคิบ มัห ตึ อัง เอิญ ดาย” นำ อัง 49เยซู ลด ญ็อง อุ งเกิน นำ ก็ ไล อัห งกรอ ครำ บอด มัด ล็อง นัน
ทาเน อัห ก็ งกรอ ไล นำ “ควน เฮย มัห เลาะใจ นทึห เตาะ เยซู งกรอ มัห โตะ และ ออ แลว ร็อห เนอ” อัห อัง 50นำ ก็ โปลก แอ็ม โกบ นซุบ ซีนุก ร็อห โตะ และ เยซู 51เยซู ก็ ซ็วน นำ คือเน “มัห ระ เอิญ จวย ออ จังนัก บ็อห” นำ อัง เอา นัน ก็ ซวัล “อาจาน เฮย ครอ ระ เอิญ ดอม ซะ ตาด ดาย” นำ อัง 52เยซู ก็ ไล นำ “เริล เลาะๆ ดาย มัห เจือ มัห ก็ งาล บอด มัด” เยซู อัง เอา นัน ก็ ลด ดอม ซะ ตาด มด นำ ลด เริล เคิบ เยซู
Currently Selected:
มาระโก 10: Prai
Highlight
Share
Copy
Want to have your highlights saved across all your devices? Sign up or sign in
Global Partners
