ลูกา 13
13
เยซู เค็ย ต็อง เอิด ใจ แมะ
1ญาม เยซู ซอน อัห อุ นัน ก็ มี ครำ ตี ปัง เยซู อุ นัน อัห ไล คาว เลือง ครำ กาลิลี อน ตัก เยซู ปัง อัห เค็ย ปีลาด มเบิล แอ็ม ครำ กาลิลี มี ปึง นะ ครำ กาลิลี ปึง นะ อัห กำลัง ทวาย ซะ อน ตัก เอาซาง ตัก วิฮาน เอาซาง นัน พอดี ปีลาด ก็ มเบิล แอ็ม อัห ตัก วิฮาน นัน 2แลว อัห ไล เยซู แลว เยซู ก็ ลด ไล ปึง พซาซน ตี ปัง นำ อุ นัน นำ ไล อัห คือเน “แป กึด เค็ย ครำ ตี ปีลาด มเบิล แอ็ม นัน อัห ลุห ดก กวา ครำ ซอ ตัก จังวัด กาลิลี มด ก้า กัน อัห ไอ มี ลุห ดก เอาซาง ก็ ไอ มี ระ อัห เปิล ฮุง เตาะ แป กึด มอก เน นอ 3ก็ ไอ แมน ซัง เอิญ ไล แป นังเลาะ นะ ครำ กาลิลี นัน อัห ลุห ก็ แมน อุ แต แป เนๆ แป ก็ เป็น ครำ ลุห เมือนนอย กัน แป ไอ มี เอิด ใจ แมะ ไอ มี พระ แอ็ม ซะ ลุห ไอ มี เจือ เอาซาง แป ก็ ลุห มอก อัห นัน ต็อง เปิล ต็อง กุญ โทด มอก อัห นัน” เยซู อัง
4เยซู ก็ ไล อัห ตอ วัล “เลือง ตึก ซีโลอำ ตี เกลิน แอ็ม กำนา นัน ก็ เมือนนอย มี ครำ เปิล ซิบแปด ล็อง แป กึด เค็ย ครำ ปึง นัน อัห แอง ลุห ดก กวา ครำ จู ล็อง ตัก เมือง เยรูซาเล็ม นัน อัน ไอ แมน เตาะ 5เอิญ ไล แป นังเลาะ นะ แป ก็ เป็น ครำ ลุห มอก อัห นัน กัน แป ไอ มี เอิด ใจ แมะ แป ก็ ต็อง เปิล ต็อง กุญ โทด มอก อัห นัน” เยซู อัง
เลือง เทิล แพะ คุล ไอ มี แพละ
6เยซู ก็ มเบิด ไล อัห วัล นำ มเบิด เลือง มี ล็อง นะ เทิล แพะ คุล นำ ไล อัห คือเน “มี ครำ มี ล็อง นะ นำ แอง ซวน นำ ก็ เทิล แพะ คุล มี เกา ตัก ซวน ออ แกะ เกา แพะ คุล นัน แลว นำ ก็ เริล เก็บ แพละ ดอม ลบ นเดย ก็ ไอ มี แพละ ซัก มี และ 7งกี ซวน นะ ก็ ไล ลูกนอง ออ คือเน ‘เกา แพะ คุล เน เอิญ โตะ เก็บ แพละ แพะ วาง แลว ก็ ไอ มี แพละ เอิญ โตะ ลบ นเดย ก็ ไอ มี เม็จ แพละ ซัก มี และ เคิล แอ็ม ติก กีด ซะ มาลือ นำ อัง 8ลูกนอง นะ ก็ ไล เอาเลียง ออ คือเน “อำ งเคาะ เคิล เตาะ นอ เอิญ ลอง บก อ็อญ ซิก ซิห อ็อญ ปุย วาล 9เพา ดอม อ็อญ วาง แทะ วัล จับ มี แพละ วาง แทะ ฮุ กัน มี แพละ วาง แทะ ก็ ระ อน กัน ไอ มี แพละ วาง แทะ อา ก็ เคิล แอ็ม นอ” ล็อง นะ อัง
เยซู รักซา อัหเม งคุม เคา
10ทาเน ก็ เล็ห วัน เซา ตัก เป็น งิ มโบละ ครำ ยิว มี งิ วัล เยซู ก็ คุด นเจ็น พซาซน อุ ตัก ฮ็อง พซุม ครำ ยิว 11ทาเน ก็ มี อัหเม มี ล็อง อุ ตัก นัน นำ โซะ เยิง เคา ปรอง แอง ระ นำ งคุม เคา อุ ซิบแปด ปี แลว นำ งคุม เคา อุ ตลอด ไอ มี เป็น นำ ญ็อง กรัลๆ ซือๆ เตาะ 12เยซู เม็จ อัหเม ล็อง นัน เยซู ก็ งกรอ นำ โตะ และ ออ เยซู ก็ ไล นำ คือเน “เมจ็อง มัห ปน แอ็ม เจ็น ปรอง แลว เย็ห ไอ มี แอง ระ มัห งคุม เคา วัล เตาะ” เยซู อัง 13ทาเน เยซู ก็ ลด คอบ ซิห เคา อัหเม ล็อง นะ อัหเม ล็อง นะ ก็ ลด เลาะ เล็ห ลด งาล งคุม เคา ลด ญ็อง กรัลๆ ซือๆ อัหเม ล็อง นะ นำ เม็จ นัง ออ เลาะ เล็ห นำ ก็ ลือ เอาซาง
14ทาเน ฮัวนา ฮ็อง พซุม ครำ ยิว นัน นำ เม็จ เยซู รักซา อัหเม ล็อง นัน ตัก วัน เซา นำ ก็ ไอ มี ปอใจ เตาะ นำ อ็อด อัง เยซู ซีเละ นำ ก็ ไล พซาซน ตัก ฮ็อง พซุม นัน คือเน “งิ แองกาน มี อุ ฮก งิ แป โตะ ระ เยซู รักซา ออ ฮก งิ นัน ก็ เลาะ ตัก วัน เซา เน แป อำ ระ เยซู รักซา ออ เตาะ” นำ อัง 15เยซู เม็จ ฮัวนา ฮ็อง พซุม จ็อก คือนัน นำ ก็ โป เอา นะ คือเน “นทัห มัด มัห เลาะ นอ แต ใจ มัห มี ยาง วัล งัว ลา คอง แป แป ก็ ญัง อีด ทาล ทอก เจ็น ลุก ระ เย็ห ออก ตัก วัน เซา 16แอ ตึ อัง งัว อัง ลา ออ แลว แอ ตึ อัง อัหเม ล็อง เน วัล ก็ เลาะ นอ นำ เป็น ควัน งา อับราฮัม ดุห ปรอง ทอระมาน นำ ซิบแปด วาง แลว เอิญ จวย นำ ระ ปน แอ็ม เจ็น อำนาด ปรอง ตัก วัน เซา เน ก็ เลาะ” เยซู อัง 17ทาเน ครำ ตี ไอ มี จับ อัง เยซู นัน อัห เม็จ นำ จ็อก คือนัน อัห ก็ กราญ มัด แต ปึง พซาซน นัน อัห เลาะใจ อัห ก็ อวด ลือ เยซู อัห อวด ลือ นำ ตี นำ แอง เลาะ ซิห อัห ดก มบลึ
เยซู มเบิด เลือง ซะ แย็ด เป็น เล็ห ซะ จ็อง
มัดทิว 13:31-33, มาระโก 4:30-32
18เยซู ก็ ไล อัห คือเน วัล “เลือง เอาซาง โตะ ปกคอง โลก เน ก็ เป็น จังนัก ซีเละ บ็อห เอิญ มเบิด ตัก ซีวะ ซัง เลาะ บ็อห 19เอิญ มเบิด ตัก พรัน มบัห โคระ นะ แย็ด แก็น#ค 19 เยซู เลามุน เลือง มบัห ซีนาเป ซีนาเป นัน เป็น มบัห โคระ ปะเทด อัห จ็อง เกา ดก งกา ทึห ซม ซี เม็ด ญาม แอ เทิล พรัน ตัก ซวน ก็ แย็ด แก็น ปลัด แลว ก็ แกะ แกะ แลว ก็ จ็อง เกา ดก งกา เซ็ม ก็ โตะ แอง มพวย ตัก งกา นัน กุญ มด” นำ อัง
20-21เยซู ก็ ไล อัห คือเน วัล “เลือง เอาซาง โตะ ปกคอง โลก เน เอิญ ก็ เปียบเทียบ เคิบ เจือ ยีด ตี อัห ซิห ตัก แปง แพะ ทัง อัห ซิห เจือ ยีด นัน แลว เจือ ยีด นัน ก็ ฮัก แปร เริล ทัว แปง แพะ ทัง นัน ไอ มี อิง แปง แพะ ทัง นัน ก็ มี เจือ ยีด อุ ทัว มด วัล” นำ อัง
เยซู ไล แอ กุด ตัก ปะตู แกรบ
มัดทิว 7:13-14, 7:21-23
22เจ็นนัน เยซู ก็ เริล เมือง เยรูซาเล็ม ญาม นำ เริล นัน นำ ก็ แวด แอว ดก งวัล ดก เมือง นำ เริล งวัล นเดย นำ ก็ ไล เลือง เอาซาง อน อัห ปัง ติกๆ 23ทาเน ก็ มี ครำ มี ล็อง นะ ซ็วน เยซู คือเน “งกีจ็อง ไอ มี ดก ครำ ปน แอ็ม เจ็น ลุห ก้า” นำ อัง เยซู ก็ ไล อัห คือเน 24“เอิญ ครอ เลามุน เลือง ปะตู ตี กุด เริล ซะวัน อน แป ปัง ดาย ปะตู นัน ก็ แกรบ ซีเละ ดาย ครอ ระ แป กิว เอิด ใจ ซิห เลือง กุด ปะตู แกรบ นัน ซีเละ ดาย ดก ล็อง ซีรอก กุด ปะตู นัน แต อัห กุด ไอ มี กุญ เตาะ
25เลือง เน ก็ มอก งกี เจิง มี ล็อง นะ กัน งกี เจิง นะ เติล ปะตู ออ แลว แป วาง งโก็ห ปะตู ระ นำ พลาง อน ออ ก็ ไอ มี ปะโยด เตาะ งกี เจิง นะ ก็ ไอ มี พลาง เตาะ ปน แอ็ม เวลา แลว งกี เจิง เม็จ แป งโก็ห ปะตู นัน นำ ก็ โป แป วัล นำ เค็ย ไอ มี เม็จจึด แป เตาะ 26จับ แป เทียง งกี เจิง นัน เค็ย ‘แอ เกย อุ เกย ป็อง เคิบ นอย มัห ก็ เกย นเจ็น อิห ตาม รวง ตาม เมือง’ แป อัง แป วาง ครอ จังนัก ก็ ตึก งกี เจิง นัน ก็ ไอ มี จบ พลาง ปะตู อน แป เตาะ 27นำ ก็ วัล มบรึห แป ปัด วัล นำ ก็ เค็ย ไอ มี เม็จจึด แป นำ เค็ย แป เป็น ครำ ไอ มี เลาะ นำ ก็ มบรึห แป ปัด ระ ปน แอ็ม เจ็น มัด ออ 28นำ มบรึห แป ปัด อุ บัดซะ ฮัก เจ็นนัน แป ก็ เญ็ม พ็อก เซิง อุ ฮัก แต ตัก เจิง นะ แป ก็ เม็จ อับราฮัม อิซอัก ยาโคบ เคิบ ลาม เอาซาง ดก ล็อง อุ ตัก เจิง นะ 29มี ครำ ทัว โลก โตะ ป็อง เลียง จ็อง ตัก เจิง นะ อัห โตะ เจ็น เซอะ เจ็น งคม ลัห เทิ๊บ งิ ลัห โตะ งิ ก็ เลอะ โตะ มด อัห เลอะ โตะ ป็อง เลียง จ็อง อุ ตัก เจิง นะ มด แต กัน ซีเอ ไอ มี กุด ตัก ปะตู แกรบ นะ อัห ก็ ไอ มี กุญ ป็อง เลียง เลิม เคิบ ปึง นัน เตาะ 30เอิญ ไล แป นังเลาะ นะ ญาม นัน บัดนะ ครำ ตี เอาซาง มพอล เอิด จูบ วาล นัน เอาซาง ก็ ไอ มี เอิด อัห อุ เคิบ ออ เตาะ แต ครำ ตี เอาซาง มพอล เอิด จูบ แทะ นัน เอาซาง ก็ เอิด อัห อุ เคิบ ออ ซีเละ” เยซู ไล อัห จังนะ
เยรูซาเล็ม ต็อง เป็น นจุง
มัดทิว 23:37-39
31อุ เจ็นนัน มี ญาม วัล ก็ มี ครำ ฟาริซี แกด ล็อง โตะ ไล เยซู คือเน “อาจาน มัห เจ็ย ปัด เจ็นเน ดาย เพาะวา เฮโรด นำ ซีรอก มเบิล แอ็ม มัห” ครำ ฟาริซี อัง 32เยซู ก็ ซวัล อัห คือเน “แป เริล ไล ซวะ นจ็อย นัง นัน ดาย แป ไล นำ เค็ย งิ นะ งิ กรัก เอิญ ต็อง มบรึห ปรอง เอิญ ต็อง จวย รักซา ครำ โซะ งิ กรัก นัน วัล เอิญ ก็ แอง เอิญ ต็อง แอง จำปอ แลว แอ็ม มด 33เอิญ จำเป็น ต็อง แองกาน ออ ตัก เน ระ แลว แอ็ม วาล เอิญ ไอ มี ระ อีเอ เกิ๊ด รวง ออ เตาะ เจ็นนัน เอิญ ก็ ต็อง เริล เมือง เยรูซาเล็ม เพาะวา กัน อัห มเบิล ลาม เอาซาง อัห ก็ ต็อง มเบิล ตัก เมือง เยรูซาเล็ม นัน ฮัก มเบิล ลาม เอาซาง ตัก ตี ซอ ก็ ไอ มี จบ กุญ เตาะ อัห ต็อง มเบิล ลาม ตัก เมือง เยรูซาเล็ม นัน ฮัก” เยซู อัง
34-35เจ็นนัน เยซู ก็ เญ็ม จ็อก นำ เญ็ม จ็อก เลือง ครำ เยรูซาเล็ม นัน “โอ ครำ เมือง เยรูซาเล็ม เฮย เอิญ ตึ อัง แป ซีเละ ดาย แป มเบิล แอ็ม ลาม เอาซาง ฮัก เอาซาง ไล ครำ คอง ออ โตะ และ แป แป ก็ วัล เอิด เกียง นดืม แอ็ม อัห ดอม บัดนะ เนอ เอาซาง ต็อง ทำลาย เมือง คอง แป ซีเละ ไอ มี ควะ เลือ ซีวะ เตาะ ฮีเอิห ครำ เยรูซาเล็ม เฮย เอาซาง พระ แอ็ม กรอก แป ซีเละ ดก ลบ เอิญ ซีรอก จวย แป เอิญ ซีรอก เกาะ ระ แป มอก เม็ย ไก โอบ ระ ควัน ออ ตัก พานาล แต แป ไอ มี ญอม ระ เอิญ จวย ออ เตาะ เอิญ ไล แป นังเลาะ นะ เจ็นเน นโดน แป ก็ ไอ มี เม็จ มัด เอิญ วัล เตาะ แป ไอ มี เม็จ มัด เอิญ จำปอ แป จ็อก เลาะ ซิห เอิญ แป จ็อก คือเน ‘ครอ ลือ มัห ตี งกีจ็อง ไล มัห โตะ และ อิห ดาย แป อัง’ ครำ เยรูซาเล็ม เฮย กัน แป จ็อก คือนัน ซัง แป กุญ เม็จ มัด เอิญ” เยซู เญ็ม จ็อก เลือง เยรูซาเล็ม จังนะ#เยเรมี 22:5, เพลง เอาซาง 118:26
Currently Selected:
ลูกา 13: Prai
Highlight
Share
Copy
Want to have your highlights saved across all your devices? Sign up or sign in
Global Partners
