Marke 16

Yezu udi ubiika ku bafue

(Mat 28.1-8; Luk 24.1-12; Yow 20.1-10)

1Dituku dia Dikisha dimane kupita, Mariya muena Magdala, ne Mariya mamuende wa Yakobe kabidi ne Salome kusumbabu manananshi bua kuya kulaba tshitalu tshia Yezu. 2Dituku dia lumingu pa kabundubundu, diba dimane kupatuka, kuyabu ku lukita. 3Bavua belangana ne:

— Muntu udi mua kubunguluja dibue didi ku mushiku wa lukita nnganyi?

4Kadi padibu babanduluka, kumonabu dibue divua dipite bunene dimana kubunguluja ku luseke. 5Kubuelabu mu lukita, kumonabu nsongalume musombe ku dia balume, muvuale nkanzu mutoke. Buowa kubakuata. 6Kadi yeye kubambila ne: — Nudi nukeba Yezu wa mu Nazarete uvuabu bapopela pa mutshi mutshiamakane. Ukadi mumane kubiika ku lufu, kena apa nansha. Jojayi muaba uvuabu bamuteke. Kanutshinyi nansha. 7Nuye mpindiewu, nuambile balongi bende kabidi ne Petro ne: Yezu udi udianjila kumpala kuenu mu Ngalileya. Momu ke munuamumuena amu bu musuaye munuambile.#16.7 Tangila 14.28.

8Bakaji kupatuka mu lukita, kunyemabu bonsu benda bazakala, batshina. Kadi ka-bavua mua kuyukila ne muntu bualu nansha bumue, bualu bavua ne bowa.

Yezu udi umuenekela Mariya muena mu Magdala

(Mat 28.9-10; Yow 20.11-18)

[ 9#16.9 Tun. 9-20 katuena mu mikanda mikuabu mivule ya kale to.Yezu mumane kubiika ku lufu pa kabundubundu mu dinda, dituku dia lumingu, uvua mudianze kumuenekela Mariya muena mu Magdala uvuaye mumushe mikishi mibi muanda mutekete. 10Mariya kuya kumanyisha lumu alu kudi bavuaye wendakana nabu. Bobu kubungama, kudila kabidi. 11Kadi pumvubu bivua Mariya wamba ne: Yezu udi ne muoyi, mvua mumumone, kabavua bamuitaba nansha.

Yezu udi umuenekela balongi babidi

(Luk 24.13-35)

12Pashishe, Yezu kumueneka mushindu mukuabu kudi balongi babidi, bavua baya ku musoku. 13Bobu kupingana, kulondela bakuabu bualu abu, kadi kabavua mua kubitaba nansha.

Yezu udi umuenekela balongi dikumi ne umue

(Mat 28.16-20; Luk 24.36-49; Yow 20.19-23; MM 1.6-8)

14Ku ndekelu, Yezu kumuenekela balongi dikumi ne umue pavuabu badia. Uvua ubatandisha bua pavuabu kabayi ne ditaba ne pavuabu ne muoyi mupape kabayi mua kuitaba bantu bavua bamane kumumona ne muoyi bamba. 15Pashishe kubambilaye ne:

— Nuye mu buloba bujima, nulongeshe bantu bonsu#16.15 Fuanyikija ne MM 1.8. Lumu lua Disanka. 16Muntu udi witaba, bamutue mu mayi, neapande. Kadi wabenga kuitaba neapete tshibawu. 17Umvua yi bishima bidibu mua kumanyina bantu badi bitaba mbiebi: nebipate mikishi mibi mu dina dianyi, nebakule miakulu mipiamipia, 18nansha bobu bakuate nyoka ne bianza biabu, nansha bobu banue mayi a lulengu, kabiena bibenzela bualu bubi nansha bumue. Nebatenteke babedi bianza masama abu neajike.

Yezu udi ubanda mu diulu

(Luk 24.50-53; MM 1.9-11)

19Mfumu Yezu mumane kuyukila ne balongi bende nanku, kumuambulabu mu diulu, kusombaye ku dia balume dia Mvidi Mukulu.#16.19 Fuanyikija ne MM 1.9-11 20Balongi kuya kulongesha miaba yonsu Lumu lua Disanka. Mfumu uvua ubambuluisha mu mudimu ewu, bua kuleja ne bivuabu balongesha bivua bia bushiwa ku bishima bivuabu benza.]

Currently Selected:

Marke 16: TSH96

Highlight

Copy