Luke Diumvuija
Diumvuija
Dilondangana dia malu mu mukanda wa Luke ndifuanangane ne dia mu mukanda wa Matayi ne wa Marke:
— Mudimu wa Yowanane-Batiste, udi ulongoluela Yezu njila (3.1-20); Yowanane udi uvua Yezu mu mayi (3.1-22); badi bateta Yezu kudi diabolu (4.1-13).
— Mu Ngalileya Yezu udi ulongesha bantu, ujikija masama abu (4.14—9.50).
— Yezu udi umuka mu Ngalileya, uya ku Yerushalayime (9.51—19.28). Kadi mu tshitupa etshi, Luke udi usakidila malu a bungi adi Marke kayi nawu, bu: lusumuinu lua muena Samariya wa muoyi muimpe, lua mubanji mupange meji, lua tatu ne bana bende babidi…, dikumbula dia Yezu mu nzubu wa Marte ne Mariya.
— Mudimu wa Yezu mu Yerushalayime (19.29—21.38).
— Makenga a ndekelu a Yezu ne lufu luende (bit. 22-23).
— Dituku dia Dibika dia Kristu: udi umuenekela balongi ba mu Emawuse, pashishe ubanda mu diulu (tshit. 24).
Kadi mukanda wa Luke mmushilangane kabidi ne wa Marke ku malu makuabu. Mu ntuadijilu wa mukanda wende udi umvuija mushindu uvuaye muufunde (1.1-4). Pashishe udi uleja mushindu uvua Lumu lua Disanka lubanga mu bantu (bit. 1-2): mutumibue wa Mvidi Mukulu udi umuenekela Zekarya ne Mariya, diledibua dia Yowanane-Batiste ne dia Yezu, balami badi baya kumona muana, misambu ya Mariya (Magnificat), Zekarya ne Shimeyone. Pa kufunda bionsu abi, Luke ukadi utumanyisha malu manene adiye musue kutujadikila: Yezu udi Muana wa Muena kulu, kadi udi muana kabidi wa mu tshisamba tshia bena Izrayele. Padiye ufika kutudi, malu onsu a panu adi ashintuluka. Luke udi uleja kabidi mudi Mvidi Mukulu unanga bantu bashadile (bena muoyi mupuekele, bantu badibu badiwula, bakaji, bapele, bana, benyi) mushindu musunguluke. Udi utumvuija kabidi mudimu wa Mueyelu wa Mvidi Mukulu. Udi utuleja mudi bantu badi bumvua Lumu lua Disanka, bakuata nalu mudimu, benda basanka panu nansha mu makenga, batumbisha Mvidi Mukulu, bamutendelela.
Mukanda wende, udi uufundila bantu bavua kabayi bamanye bimpe bibidilu bia bena Izrayele. Ke mudiye ubiumvuija misangu ne misangu. Ku mikanda yonsu inayi ya Lumu lua Disanka, wa Luke udi umueneka bu udi bena lelu mua kumvua bimpe, kamuyi lutatu. Muntu udi uubala ne lutulu, neajadike mudi Yezu Musungidi wa bantu bonsu.
Currently Selected:
Luke Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996