Malu Menza 7
7
Stefane udi ulongesha bantu
1Mutuangaji munene kukonka Stefane ne:
— Bidi bantu aba bakusonguela nabi mbia bushuwa anyi?
2Ke Stefane kuandamuna ne:
— Batatu, bana betu, ntelejayi. Mvidi Mukulu wa butumbi kumuenekela nkambua wetu Abrahame, patshivuaye mu Mezopotamiya, kayi muanji kuya mu Arane. 3Kumuambilaye ne: “Umbuka mu ditunga dienu ne mu diku dienu, uye mu ditunga dingakuleja.” 4Abrahame kumbuka mu ditunga dia bena Kesede, kuya kuasa mu Arane. Tatuende mumane kufua, Mvidi Mukulu kumufikisha mu ditunga dinudi basombe mpindiewu edi. 5Mu ditunga edi Mvidi Mukulu kavua mupeshe Abrahame buloba nansha bukese, nansha muaba bunene bua dikasa to. Kadi Mvidi Mukulu kumulaya amu bua kumupa ditunga. Ndelanganyi yende ivua mua kudipiana, yeye mumane kufila. Kadi tshikondu atshi Abrahame kavua muanji kulela. 6Ke Mvidi Mukulu kumuambila ne: “Ndelanganyi yebe neisombe mu ditunga dia bende. Nebashalemu mu bupika bidimu nkama inayi. Nebabakengeshemu. 7Kadi nennyoke bantu bavua babakuate ku bupika. Pashishe nebumbuke mu ditunga adi, bua kuntendelela muaba ewu.#7.7 Miaba mikuabu inudi mua kubala bua tun. 2-7: tun. 2-3: Tishib 12.1 — kan. 4: Tshib 11.31; 12.4. — kan. 5: Tshib 12.7; 13.15; 15.18; 17.8. tun. 6-7: Tshib 15.13-14; Tshim 3.12. 8Nenku Mvidi Mukulu kutua ndondu ne Abrahame. Tshimanyinu tshia ndondu ewu ke ditekangana panshi. Abrahame kulela Izake, kumuteka panshi kunyima kua matuku muanda mukulu. Izake pende kuteka Yakobe panshi. Yakobe kuenza momumue ne bankambua betu dikumi ne babidi.#7.8 Tangila Tshib 17.10-14; 21.4. — bankambua: tangila 2.29 ne diumvuija.
9Bankambua kutekela Yozefe lubabu, kumupana bua ashale mupika mu Ejipitu. Kadi Mvidi Mukulu uvua nende. 10Kumusungidilaye ku makenga ende onsu. Kumuambuluishaye bua mukalenga wa bena Ejipitu, amunange, anyishe meji ende. Ke mukalenga awu kumuteka mulombodi wa ditunga dia Ejipitu, ne wa nzubu wende mujima wa bukalenga. 11Tshiyole tshia nzala kubuela mu ditunga dijima dia Ejipitu ne dia Kenaane. Bantu kukenga bikole. Bankambua betu kabavua ne tshiakudia. 12Yakobe umvua ne: mu Ejipitu mudi ntete ya kuenza bukula, kutumayemu bankambua betu musangu wa kumpala. 13Musangu muibidi uvuabu baye mu Ejipitu, Yozefe kudimanyisha kudi bana babu. Nanku diku dia Yozefe kumanyikadi kudi mukalenga wa bena Ejipitu. 14Ke Yozefe kubikidisha tatuende Yakobe ne diku diabu dijima; bantu bonsu basanga bavua makumi muanda mutekete ne batanu. 15Nanku Yakobe kupueka mu Ejipitu. Ke muakafuilaye, ne bankambua betu kabidi. 16Kuambulabu bitalu biabu, kuya nabi mu Shekeme, kubijikabu mu lukita luvua Abrahame musumbe, mufile mushinga kudi bana ba Emore, nkambua wa bena Shekeme.#7.16 Miaba mikuabu inudi mua kubala bua tun. 7.9-16: kan. 9: Tshib 37.11, 28; 39.2,21. — kan. 10: Tshib 41.39-41. — kan. 11: Tshib 41.57; 42.1-2. — kan. 13: Tshib 45.1, 16. — kan. 14: Tshib 45.9-10,17-18; bantu makumi muanda mutekete ne batanu: Tshib 46.27, muvua bena Ngreke bandamune ku kale. — kan. 15: Tshib 46.1-7; 49.33. — kan. 16: Tshib 23.3-16; 33.19; 50.7-13; Yosh 24.32.
17Matuku avua Mvidi Mukulu ne bua kukumbaja bivuaye mulaye Abrahame, tshisamba tshietu kutanta, kuvulangana mu Ejipitu. 18Ke mukalenga mupiamupia, uvua kayi mumanye Yozefe, kudia bukalenga bua bena Ejipitu. 19Mukalenga awu kudinga bana betu, kukengesha bankambua, kubenzeja ku bukole bua bashiye bana babu batekete mu tshisuku, bafue.#7.19 Miaba mikuabu inudi mua kubala bua tun. 17-19: tun. 17-18: Tshim 1.7-8. — kan. 19: Tshim 1.10-11, 22. 20Ke tshikondu tshivuabu balele Moshe, muana wa mpala muimpe, uvua mutokele Mvidi Mukulu ku muoyi. Kumudishabu ngondu isatu ku nzubu kua tatuende.#7.20 Tangila Tshim 2.2. 21Pavuabu bamushiye pende mu tshisuku nanku, muana wa bakaji wa mukalenga wa bena Ejipitu kumuangula, kumukolesha bu muanende mulela.#7.21 Tangila Tshim 2.3-10. 22Ke muvuabu balongeshe Moshe malu onsu avua bena Ejipitu bamanye. Kuenzaye muntu uvua mumanye mua kuakula ne kulongolola malu. 23Moshe ukumbaja bidimu makumi anayi, kujingaye kumonangana ne bana babu bena Izrayele. 24Dimue dituku kumonaye muena Ejipitu ukengesha muena Izrayele. Kusungidilaye uvuabu bakengeshe. Bua kumusombuela, kushipaye muena Ejipitu. 25Uvua wela meji ne: bana betu bena Izrayele nebumvue ne: Mvidi Mukulu mmunsungule bua kubapikula. Kadi bobu kabavua bitabe nanku to. 26Butshia, Moshe kusangana bena Izrayele babidi baluangana. Kukebaye mua kubasunga, ubabela ne: “Bana betu, nudi bena muntu. Nudi nukengeshangana bua tshinyi?” 27Kadi uvua ukuma muinende, kusakila Moshe, umuamba ne: “Udi mukuteke mfumu ne mukoshi wa nsambu yetu nnganyi? 28Udi musue kunshipa, muuvua mushipe muena Ejipitu makelela anyi?” 29Moshe umvua miaku ayi, kunyemaye, kuya mu buloba bua Madiyane. Kulelayemu bana ba balume babidi.#7.29 Miaba mikuabu inudi mua kubala: tun. 23-29: Tshim 2.11-15, 21-22; 18.3-4.
30Bidimu makumi anayi bimane kupita, mutumibue wa Mvidi Mukulu kumuenekela Moshe mu tshipuka tshitema kapia, mu tshipela tshivua pabuipi ne mukuna wa Sinayi. 31Moshe kukatshila bivuaye mumone abi. Kusemenaye pabuipi bua kubibandila. Kumvuaye diyi dia Maweja-Nangila, diamba ne: 32“Meme ndi Mvidi Mukulu wa bankambua bebe, Mvidi Mukulu wa Abrahame, wa Izake ne wa Yakobe.” Moshe kuzakala ne bowa. Nanshaye kukimina kubanduluka kabidi. 33Ke Maweja-Nangila kumuamba ne: “Ko-pola bisabata, bualu muaba uudi muimane ewu mbuloba bua tshijila. 34Ndi mumone mudi bantu banyi bakenga mu Ejipitu. Ndi mumvue mudibu batua mikemu. Ke pandi mupueke bua kubasungidila. Mpindiewu, luaku! Ndi nkutuma ku Ejipitu.#7.34 Muaba mukuabu wa kubala: tun. 30-34: Tshim 3.1-10.”
35Bena Izrayele bavua babenga Moshe, bamuamba ne: “Udi mukuteke mfumu ne mukoshi wa nsambu yetu nnganyi?” Kadi yeye Moshe, ke muntu uvua Mvidi Mukulu mutume, bua alombole bantu bende, abapikule ku diambuluisha dia mutumibue wende, uvua mumumuenekele mu tshipuka. 36Moshe kupatula bena Izrayele mu Ejipitu, kuenza bishima ne malu a dikema mu ditunga dia bena Ejipitu, mu mayi manene Makunze, ne mu tshipela, bidimu makumi anayi.#7.36 Miaba mikuabu ya kubala bua tun. 35-36: kan. 35: Tshim 2.14. — kan. 36: Tshim 7.3; 14.21; Dib 14.33. 37Moshe awu kabidi ke uvua muambile bena Izrayele ne: “Mvidi Mukulu neanutumine muambi bu meme, muntu wa mu tshisamba tshienu.#7.37 bu meme: badi mua kuandamuna kabidi ne: bu muvuaye muntume meme. Tangila Diel 18.15, 18.” 38Moshe ke uvua pamue ne bena Izrayele mu tshipela: uvua pankatshi pa bankambua betu ne mutumibue wa Mvidi Mukulu, uvua wakula nende pa mukuna wa Sinayi. Mvidi Mukulu kumumanyisha miaku idi mua kumpetesha muoyi. Moshe kuyifikisha kutudi.#7.38 Tangila Tshim 19.1-20.17; Diel 5.1-33. 39Kadi bankambua betu bavua babenga kumutumikila. Bavua bamudiombola, bajinga kupingana mu Ejipitu. 40Bavua bambila Arone ne: “Utuenzele nwidie idi mua kutulombola, bualu Moshe uvua mutupatule mu Ejipitu awu, katuena bamanye tshidi tshi-muenzekela.” 41Kufulabu lupingu lua muana wa ngombe, kululambulabu mulambu. Nanku kusankidilabu tshintu tshivuabu benze ne bianza biabu!#7.41 Miaba ya kubala bua tun. 39-41: kan. 39: Dib 14.3. — kan. 40: Tshim 32.1. — kan. 41: Tshim 32.2-6. 42Ke Mvidi Mukulu kubalengulula, kubalekela banemeke mabulunge a mulu. Ke mudibu bafunde mu mukanda wa bambi ne:
“Bena Izrayele, bidimu makumi anayi binuvua mu tshipela,
nuvua bandambule meme milambu ya nyama, nansha milambu mikuabu anyi?
43Nansha kakese! Kadi nuvua bambule ntente wa nwidie Moloke,
ne tshimfuanyi tshia Refane, nwidie wenu wa mutotu.
Ke mpingu inuvua benze bua kuyikukuila.
Ke pandi nnufila mu bupika, dia muamua dia Babilone.#7.43 Tun. 42-43: Am 5.25-27, muvua bena Ngreke bandamune miaku eyi ku kale. — Moloke: ke ume wa ku nwidie ivua bantu, bavua bascombe kale mu ditunga dia bena Kenaane, batendelela. — Refane: ke nwidie wa kale uvuabu bakukuile bu mfumu wa dibulunge dia Saturne.
44Mu tshipela, bankambua betu bavua ne ntente wa kusambakena, uvuabu benze mushindu uvua Mvidi Mukulu muambile Moshe, kabidi bilondeshile tshivua Mvidi Mukulu mumuleje. 45Bankambua betu bakuabu bavua bapiane ntente ewu. Bavua bamuambula diba divua Yoshuwa, mulombodi wabu, mukuate nabu ditunga divua dia bisamba bia bende. Bisamba abi, Mvidi Mukulu uvua ubipata, pavua bena Izrayele benda babuela mu ditunga. Nanku ndelanganyi yonsu ya bena Izrayele kushala ne ntente awu, too ne ku tshikondu tshia Davide.#7.45 Tun. 44-45: Tshim 25.9,40; Yosh 3.14-17. 46Davide kabidi uvua mutokele Mvidi Mukulu ku muoyi. Kulombaye bua amone mua kuashila Mvidi Mukulu wa Yakobe nzubu.#7.46 Mvidi Mukulu wa Yakobe nzubu: mu mikanda mikuabu ya kale mbafunde ne: ndelanganyi ya Yakobe. Tangila 2 Sam 7.1-16; 1 Kul 17.1-14. 47Kadi nzubu awu, bakamuasa amu kudi Shelomu.#7.47 Tangila 1 Bak 6.1-38; 2 Kul 3.1-17. 48Kadi Mvidi Mukulu wa mulu kena usomba mu nzubu miasa kudi bantu. Bambi bavua bajadika ne:
49“Maweja-Nangila udi wamba ne:
Diulu ke nkuasa wanyi,
buloba ke tshidiatshilu tshia makasa anyi.
Kadi nuenu nenungashile nzubu wa mushindu kaayi?
mMuaba kaayi ungasomba meme?
50Diulu ne buloba, ki mmeme udi mubienze anyi?#7.50 Tun. 49-50: Yesh 66.1-2.”
51Nuenu bantu ba mutu mukole, ba muoyi mupape, kanuena nuitaba ku lubila lua Mvidi Mukulu! Nudi amu nutombokela Mueyelu wa Tshijila! Muvua bankambua benu benza, ke munudi nuenza amu! 52Kudi muambi uvua bankambua benu kabayi bakengeshe anyi? Bavua bashipe bantu bavua babamanyishe ne: Muena buakane neafike. Ke Yeye unudi bapangile, bashipe kabidi mpindiewu!#7.52 Tun. 51-52: fuanyikija ne Yesh 63.10; 2 Kul 36.16; Mat 23.31. 53Mvidi Mukulu kunutumina mikenji yende kudi batumibue bende.#7.53 Balongeshi bakuabu ba kale ba bena Yuda bavua bambe ne: Mvidi Mukulu uvua mutume batumibue bende, bua bamanyishe bantu mikenji yende pa mukuna wa Sinayi. Fuanyikija ne Ngal 3.19; Ebr 2.2. Kadi kanuena bayikumbaje to!
Badi bashipa Stefane
54Bena Tshipangu bumvua miaku yonsu eyi, kufikabu munda bikole, kudia dinu, pavuabu batangile Stefane. 55Kadi Stefane, muwule ne Mueyelu wa Tshijila, kutangila mulu, kumona butumbi bua Mvidi Mukulu, ne Yezu muimane ku dia bukole dia Mvidi Mukulu. 56Kuambaye ne:
— Telejayi: ndi mmona diulu diunzuluke. Ndi mmona Muana wa muntu, muimane ku dia bukole dia Mvidi Mukulu.
57Ke kuelabu mbila mikole, bajibika ne bianza ku matshi. Kudielabu kudiye bonsu tshiapamue. 58Kumukokelabu ku mpenga kua tshimenga. Kumuasabu mabue bua kumushipa. Bajadiki ba bualu ebu, bavua badianjila kumuasa mabue, bavua bashiye bilamba biabu kudi nsongalume, diende Shawule. 59Pavuabu bamuasa mabue apu, Stefane uvua utendelela Mvidi Mukulu, wamba ne:
— Mfumu Yezu, angata muoyi wanyi!
60Pashishe kutuaye binu panshi, kuela lubila lukole ne:
— Mfumu, kuvuluki bubi buabu ebu!#7.60 Fuanyikija ne Luk 23.34.
Mumane kuamba nanku, kukulaye muoyi.
Currently Selected:
Malu Menza 7: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
