Luka 24

Ekunjwelo ea Yesu

(Mt 28.1-10; Mk 16.1-8; Yoa 20.1-10)

1Nda mbile ea joso eʼeyenga, la nkesa mongo, iyo baoya ndʼekundelo, baoyela baimi bakiʼyʼezaka. 2Ko baotana ekenje eokalimwa lima ekundelo. 3Baolotswa, lolo ntabatana jonge ja Nkolo Yesu. 4Ko akakaanʼiyo bokakaano mongo la joi liko, bala baende bafe balota bito bia ngesingesi, baolemala lʼiyo. 5Iyo baolokʼooma mongo, ko baosunya bilongi ndʼokili. Ko bantʼako baolauola, Inyo lolasʼende oyoike ele bawei lae? 6Ende afʼane, lolo aokunjwa! Lofwaka baoyi bakiʼndʼosangelakʼinyo nkʼakiʼnde nda Ngalilaya, 7wae Bonʼowʼonto ifolekyama ndʼakata bʼanto bʼobe, ko ifoomama ndʼekulusu, ko nda mbile eʼisato ifokunjwa! 8Nkako baolofwa baoyi bakiʼnde. 9Ko baoluta limʼekundelo, ko baosangela ba-jom lʼomoko, ko bamo bauma baki lʼiyo baoyiʼane bauma. 10Iyʼasangelaki bikima baoyiʼane wae Malia Mangandala la Yoana la Malia nyango ea Yakobo, ko lʼamato bankina baki lʼiyo. 11Lolo baoyiʼane baolenyʼelʼiyo ngole bisangasanga, ko ntabimeza bako. 12Lolo Petelo aolemala, aolikumwa ndʼekundelo, aosunama, ko aolena bito bia mbenza o biko kika; ko aokertda ekaʼnde, ayokamwa lʼaoyi bandielaki.

Lokendo ja bafe ndʼEmao

(Mk 16.12-13)

13Ko mbilʼeko mongo bamʼakiyo bafe bayokende ndʼonanga bomo botangema Emao, boki ngole kilométres jom lʼife lima Yelusalema. 14Ko basoolaki ndʼaoyi bane bauma bandielaki. 15Ko akiʼyʼosoolaka, ko buwanaki, Yesu mongo aotutama, ko aokenda lʼiyo. 16Lolo baiso bakiyo baosukama wae bafolongozʼende. 17Ko aolauola, Baoyiʼane basoolʼinyo akendʼinyo lokendo na? Iyo baosilama, bilongi la lokeseli. 18Ko omo okiyo otangema Keleopa aolamba, La okitase bofaya nda Yelusalema nko we kika, wae ofea baoyi bakelama eko ndʼembilʼene? 19Ko aolauola, Baoyiʼako na? Ko baolamba, Baoyi baki Yesu owa Nazaleta, oki boteli owa mpamba ndʼo-keto la ndʼetefeelo nda joso ja Nzakomba la jʼantʼauma, 20ko lʼelengʼeki nkanga ya joso la banto bakiso ba mpifo olekyakʼende wae umbame ndʼiwa, ko baolooma ndʼekulusu. 21Lolo iso tolendezaki wae bontʼone aki nkʼoko ocwʼosikola Yisalaele. Ko joi limo nsangana ndʼaoyiʼane bauma wete mbilʼene ele mbilʼeʼisato limʼeki baoyiʼane okelamaka. 22Koko bamatʼamo bakiso baotokamweya, wete baocwa la nkesa mongo ndʼekundelo, 23ko ntabatana jonge likae, ko baoya, baotosangela wae baolena enelo ea bikima bandasangelaki wae ayoike. 24Nkako bamo limʼelʼiyʼaki lʼiso baocwa ndʼekundelo, ko baotana nkʼelengʼeki bamato otefelaka, lolo ntaboenʼende mongo. 25Nkako ende aolakela, O banto basamba nkoto, ko la ba lokuto jimeza ndʼetema baoyiʼauma baki bateli otefelaka! 26Ntatoonga nde, wae Masiya enʼelo, lʼaoyiʼane bauma, mpanga otswa nda jilangi likae? 27Ko aangaki la Mose, ko limʼele bateli bauma, aolacingoza nda bikotelo biuma, baoyi baki ndʼeloko ekae.

28Ko baotutama lʼonanga bocwʼiyo; ko ende aokela nga akongʼokenda. 29Lolo iyo baolosuka, baokela, Yalaka lʼiso, ele bokolo bokita, jefa josilʼoselama. Ko aolotswa wae ayale lʼiyo. 30Ko akiʼndʼokitasʼa mesa lʼiyo, aokola mampa, aosakʼokako, aotenʼeko ko aolakaya. 31Ko baiso bakiyo baolifwa, ko baololongoza. Nkako aolimwa limʼelʼiyo limo. 32Ko iyo baotefelana, Betema bekiso ntabefeta ndʼetei ekiso nde, akiʼndʼotefelaka lʼiso nda mboka, lʼakiʼndʼotokombozaka bikotelo? 33Ko baolemala ndʼekekʼeko mongo, ko baoluta nda Yelusalema. Ko baotana ba-jom lʼomoko, ko lʼamo baki lʼiyo, batakanaki. 34Ko iyo baolasangela, Nkolo aokunjwa nkʼekoji, ko aolenya ele Simona. 35Nkako iyo baosanga baoyi baki nda mboka, ko elenge ekiʼndʼeanaka elʼiyo ndʼetenelo ea mampa.

Yesu aolenya ele bakimi

(Mt 28.16-20; Mk 16.14-18; Yoa 20.19-23; Bik 1.6-8)

36Nkʼasoolʼiyo ndʼaoyiʼane, Yesu mongo aolemala ndʼetei ekiyo, ko aolakela, Kuci elʼinyo. 37Iyo baosasimwa, ko baolokʼooma, baokanela wae benʼolimo. 38Lolo aolatefeela, Lokakaana lae? Ko lokakaza ndʼetema lae? 39Losisimya bakata la bakaka bakami, wete ale nkʼemi mongo. Lommame ko lofonga jena, ele bolimo bofa la wunyu la biese elenge endenʼinyo elʼemi. 40Ko akiʼndʼotefelaka ngoko, aolaeneya bakata lʼakakaʼakae. 41Akiʼyo ntabimeza la ncina ea bosalangano, ko akakamwʼiyo; aolakela, Lole la yomba ya ndala ane nde? 42Ko baolokaya etei ea nse ea ntatumba. 43Aokolʼeko ko aleki eko nda joso likiyo.

44Nkako aolasangela, Bane bale baoyiʼakami bakiʼmʼosangelakʼinyo akiʼmi eko lʼinyo; wae aonga wete baoyiʼauma bakoci nda Esekyelo eki Mose la nda bateli la nda Njemba ndʼeloko ekami bakokʼolo. 45Nkako aolifola nkai ikiyo wae bakotole bikotelo. 46Ko aolakela, Joi jokotama ngoe, wete Masiya ifenʼelo, ko ende ifokunjwa limʼele bawei nda mbile eʼisato, 47ko nda lina likae eututaelo la etungwelo limʼaoyiʼobe bifongozama ele bise biuma, mbaanga lima Yelusalema. 48Inyo lole temoins ya baoyibane. 49Ko bala njifosokozʼinyo elaka ea Fafa ekami. Lolo inyo lokongʼoyala ndʼonanga bone elaka nko lolotsama la mpamba limʼaliko.

Yesu aoluta nda loola

(Mk 16.19-20; Bik 1.9-11)

50Nkako aolayela elaka nko Betania; ko aosangya bakatʼakae, aolasakela bokako wa swa. 51Ko andasakelʼende bokako, aolena lʼiyo, ko aotombama nda loola. 52Ko iyo baoluta nda Yelusalema la bosalangano mongo. 53Ko baki nda Tempelo iyakiyaka, ko baomemya Nzakomba.

Currently Selected:

Luka 24: LOL87

Highlight

Copy