11
یرُوشلِیم وِچ شاہانہ داخلہ
1تے جد یرُوشلِیم دے نیڑے زَیتُون دے پہاڑ کول بَیت فگے تے بَیت عَنِیاہ تِیکر پہنچے۔ تے اوس اپنے شاگِرداں وِچوں دو بندیاں نُوں گھلّیا۔ 2تے اوہناں نُوں آکھیا۔ اوس پِنڈ نُوں جاؤ۔ جیہڑا تُہاڈے سامھنے اے تے اوہدے وِچ وڑدیاں سار اِک کھوتی دے بچّے نُوں بَدّھا ہویا تُسی ویکھو گے۔ جیہدے اُتّے کدی کوئی سوار نئیں ہویا۔ اوہنوں کھول لیاؤ۔ 3تے جے کوئی تُہانوں آکھے۔ تُسی ایہہ کیوں کر دے ہو؟ تے آکھنا خُداوند نُوں ایہدی لوڑ اے۔ تے اوہ جھٹ پَٹ مُڑ اوہنوں ایتھے پرتا دے گا۔ 4تے اوہ گئے۔ تے کھوتی دے بچّے نُوں باہر دروازے دے کول گلی وِچ بَدّھا ہویا ویکھیا تے اوہنوں کھولیا۔ 5تے کئیاں اوہناں وِچوں جیہڑے اوتھے کھلوتے سن اوہناں نُوں آکھیا۔ تُسی کِیہ کر دے اوہ۔ پئی کھوتی دے بچّے نُوں کھول دے اوہ؟ 6تے اوہناں جیہا یِسُوع آکھیا سی اوہناں نُوں آکھیا۔ تے اوہناں نیں اوہناں نُوں جان دِتّا۔ 7تے اوہ اوس بچّے نُوں یِسُوع کول لے آئے۔ تے اپنے کپڑے اوہدے اُتّے پائے۔ تے اوہ اوہدے اُتّے چڑھ بَیٹھا۔ 8تے بتھیریاں اپنے کپڑے راہ وِچ وچھائے تے ہورناں پَیلِیاں وِچوں پَتّر توڑ کے اوہناں دا فرش وچھا دِتّا۔ 9تے اوہ جیہڑے اگّے اگّے جاندے تے مگر آوندے سن اُچّی اُچّی آکھدے سن۔ ہوشعنا۔ دھنّ اوہ جیہڑا خُدا دے ناں اُتّے آؤندا اے۔ 10دھنّ ساڈے پئیو داؤد دی بادشاہی۔ جیہڑی آؤندی اے۔ اسماناں وِچ ہوشعنا۔
11تے یرُوشلِیم اَپڑ کے ہیکل وِچ گیا۔ تے جد اوس چَواں پاسے سبھ کُجھ ویکھ لیا۔ تَد اوہ باراں نال بَیت عَنِیاہ نُوں گیا۔ ایس لئی اودُوں شام دا ویلا سی۔
یِسُوع ہنجیر دے دَرخت اُتّے لعنت کر دا اے
12تے اگلے دِن جد اوہ بَیت عَنِیاہ توں باہر آئے تَد اوہنوں بُھکھ لگّی۔ 13تے ہنجیر دا اِک رُکھّ پَتّراں نال لدّیاں ہویا دُوروں ویکھ کے گیا۔ پئی شاید اوہدے وِچوں کُجھ ہتّھ آوے۔ تے جد اوہدے نیڑے آیا تے پَتّراں دے بِناں اوہدے وِچ کُجھ نا لَبّھیا۔ کیوں جو ہنجیراں دی رُت نئیں سی۔ 14تَد اوس آکھیا۔ تَیتھوں کوئی کَدے وی پَھل نا کھاوے۔ تے اوہدے شاگِرداں ایہہ گلّ سُنی۔
یِسُوع ہیکل وِچ جاندا اے
15فیر اوہ یرُوشلِیم وِچ آئے۔ تے اوہ ہیکل دے اندر جا کے اوہناں نُوں جیہڑے ہیکل وِچ ویچدے تے مُل لَیندے سن۔ باہر کڈھن لگّا۔ تے صرّافاں دے تختے تے کبُوتر ویچن والیاں دِیاں چَوکِیاں اُلٹا دِتّیاں۔ 16تے کِسے نُوں ہیکل وِچوں دی بھانڈا لے کے لنگھن نا دِتّا۔ 17تے تعلِیم دے کے اوہناں نُوں آکھیا۔ ایہہ نئیں لِکھیا اے۔ پئی میرا گھر سارِیاں قوماں دے لئی دُعا دا گھر اکھوائے گا؟ پر تُساں اوہنوں ڈاکُوؤاں دی کھوہ بنا دِتّا اے۔ 18تے سردار کاہِن تے فقِیہ ایہہ سُن کے سوچ وِچ پئے۔ پئی اوہدا ناس کِیویں کریئے۔ کیوں جو اوہدے کولوں ڈردے سن۔ ایس لئی پئی سارے لوک اوہدی تعلِیم توں حَیران ہو گئے سن۔ 19تے شام پَیاں اوہ شہروں باہر جاندا ہوندا سی۔
ہنجیر دے رُکھّ توں سبق
20تے سویرے اوہناں اودھروں دی لنگھدیاں ہویاں ویکھیا۔ پئی ہنجیر دا رُکھّ جڑوں سُک گیا اے۔ 21تے پطرس چیتا کر کے اوہنوں آکھیا۔ اَے ربّی۔ ویکھ ہنجیر دا رُکھّ جِہنُوں تُوں لعنت دِتّی سُک گیا اے۔ 22تے یِسُوع جواب دے کے اوہناں نُوں آکھیا خُدا اُتّے اِیمان لیاؤ۔ 23مَیں تُہانوں سَچ آکھنا آں پئی جو کوئی ایس پہاڑ نُوں آکھے پئی اُٹھ تے سمُندر وِچ جا پَو۔ تے اپنے مَن وِچ شک نا لیاوے۔ پر یقِین کرے۔ پئی جو کُجھ آکھنا آں اوہ ہوندا اے سو اوہدے لئی ہوئے گا۔ 24ایس لئی مَیں تُہانوں آکھنا آں۔ پئی دُعا منگدیاں سبھ کُجھ جو تُسی منگدے اوہ۔ یقِین کرو پئی اوہ تُہانوں لَبّھ گیا۔ تے تُہاڈے لئی ہو جائے گا۔ 25تے جد کدی تُسی کھلو کے دُعا منگدے اوہ۔ جیکر تُہاڈا کِسے اُتّے گِلہ ہوئے۔ اوہنوں مُعاف کرو۔ تاں جو تُہاڈا باپ وی جیہڑا اسماناں اُتّے اے تُہاڈے قصوراں نُوں مُعاف کرے۔ 26[تے جے تُسی مُعاف نا کرو گے تے تُہاڈا باپ وی جیہڑا اسماناں اُتّے اے مُعاف نا کرے گا۔]
یِسُوع دے اختیار تے اعتراض
27تے اوہ فیر یرُوشلِیم وِچ آئے۔ تے جد اوہ ہیکل وِچ پِھردا سی۔ تَد سردار کاہِن تے فقِیہ تے بزُرگ اوہدے کول آئے۔ 28تے اوہنوں آکھن لگّے۔ پئی تُوں کیہڑے اختیار نال ایہہ کمّ کرنا ایں؟ یا کِس ایہہ کمّ کرن دا تینُوں اختیار دِتّا؟ 29یِسُوع اوہناں نُوں آکھیا۔ مَیں تُہاتھوں اِک گلّ پُچھنا آں تُسی مَینُوں جواب دیو۔ تے مَیں تُہانوں دساں گا۔ پئی کیہڑے اختیار نال ایہہ کمّ کرنا آں۔ 30یُوحنّا دا بپتِسمہ اسمان ولّوں سی یا بندیاں ولّوں؟ مَینُوں جواب دیو۔ 31تے اوہناں آپو وِچ وچار کرے آکھیا۔ جے آکھئے اسمان ولّوں۔ تے اوہ آکھے گا فیر تُساں اوہدا یقِین کیوں نا کِیتا؟ 32پر جے آکھیئے پئی بندیاں ولّوں۔ تے اوہ لوکاں کولوں ڈر دے سن۔ ایس لئی پئی سبھے یُوحنّا نُوں سَچّی مُچّی نبی مَن دے سن۔ 33تے اوہناں یِسُوع نُوں جواب دِتّا۔ اسی نئیں جان دے۔ یِسُوع اوہناں نُوں آکھیا۔ مَیں وی تُہانوں نئیں دسدا۔ پئی کیہڑے اختیار نال مَیں ایہہ کمّ کرنا آں۔
