9
یِسُوع اِک جنم دے اَنھے نُوں چَنگا کر دا اے
1تے اوس لنگھدیاں ہویاں اِک جماندرُو اَنھے نُوں ویکھیا۔ 2تے اوہدے شاگِرداں اوہنوں پُچھیا پئی اَے ربّی کِس گُناہ کِیتا۔ ایس یا ایہدے ماپیاں پئی ایہہ اَنھا جمّیا؟ 3یِسُوع جواب دِتّا۔ گُناہ نا تے ایس کِیتا نا ایہدے ماپیاں نیں پر ایس لئی پئی خُدا دے کمّ اوہدے وِچ ظاہر ہون۔ 4جد تِیکر دِن اے سانُوں اوہدے کمّ کرنے پَیندے نیں جِس مَینُوں گھلّیا اے۔ رات آؤندی اے جد کوئی کمّ نئیں کر سکدا 5جد تِیکر مَیں دُنیا وِچ آں مَیں دُنیا دا چانن آں۔ 6ایہہ آکھ کے اوس زمین اُتّے تُھکیا تے تُھک نال مِٹّی گُتّھی تے اوہدیاں اَکھّیاں اُتّے اوہ مِٹّی لمِب دِتّی۔ 7تے اوہنوں آکھیا جا شِیلوخ دے حوض وِچ (جِہدا مطلب گھلّیا ہویا اے) نہا۔ تَد اوہ جا کے نہاتا تے سُجاکھا ہو کے آیا۔
8تَد گوانڈِھیاں تے اوہناں وی جِنہاں اوہنوں بھیکھ منگدیاں ویکھیا سی آکھیا ایہہ اوہو نئیں اے جیہڑا بَیہہ کے منگدا ہوندا سی؟ 9ہورناں آکھیا پئی ایہہ اوہی اے۔ ہورناں آکھیا نئیں پر اوہدے وانگر اے۔ پر اوس آکھیا۔ مَیں اوہی آں۔ 10تَد لوکاں اوہنوں آکھیا۔ فیر تیریاں اَکھّیاں کِیویں کُھل گِئیاں؟ 11اوس جواب دِتّا اِک بندے جِہنُوں یِسُوع آکھدے نیں اوس مِٹّی گُنّھ کے میرِیاں اَکھّیاں اُتّے لیپ کِیتا تے مَینُوں آکھیا جا شِیلوخ دے حوض وِچ نہا۔ مَیں گیا تے نہاتا تے ویکھن لگّا۔ 12تَد اوہناں اوہنوں پُچھیا اوہ کِتّھے اے؟ اوس آکھیا مَیں نئیں جان دا۔
فریسی شفا دی جانچ پڑتال کر دے نیں
13اوہ اوہنوں جیہڑا پہلاں اَنھا سی فرِیسیاں کول لیائے۔ 14تے جِس دِن یِسُوع مِٹّی گُنّھ کے اوہدیاں اَکھّیاں کھولِیاں سبت دا دِن سی۔ 15ایس لئی فیر فرِیسیاں وی اوہنوں پُچھیا پئی تُوں کِیویں ویکھن لگ پیا؟ اوس اوہناں نُوں آکھیا۔ اوس میرِیاں اَکھّیاں اُتّے مِٹّی لائی تے مَیں نہاتا تے سُجاکھا آں۔ 16تَد فرِیسیاں وِچوں کئیاں آکھیا پئی ایہہ بندہ ربّ ولّوں نئیں اے کیوں جو اوہ سبت نُوں نئیں مَندا۔ پر ہورناں آکھیا گُناہگار بندہ کِیویں ایہو جِہیاں کراماتاں وکھا سکدا اے؟ تے اوہناں وِچ پُھٹ پئی۔ 17تَد اوہناں اوس اَنھے نُوں آکھیا تُوں اوہدے حق وِچ کِیہ آکھنا ایں اوس تیریاں اکھّاں جو کھولِیاں؟ اوس آکھیا اوہ نبی اے۔
18پر یہُودِیاں اوہدی بابت سَچ نا مَنّیا پئی اوہ اَنھا سی تے فیر ویکھن لگّا جِنّاں چِر اوس سُجاکھے ہوئے دے ماپیاں نُوں سَدّ کے۔ 19اوہناں کولوں ایہہ پُچھ نا لیا پئی ایہو تُہاڈا پُتر اے جیہڑا تُسی آکھدے ہو پئی اَنھا جمّیا سی؟ فیر ہُن کِیویں ویکھدا اے؟ 20اوہدے ماپیاں اوہناں نُوں جواب دِتّا اسی جاننے آں پئی ایہہ ساڈا پُتر اے تے اَنھا جمّیا سی۔ 21پر ایہہ سانُوں پتا نئیں پئی ہُن کِس طرح ویکھدا اے تے نا سانُوں خبر اے پئی ہُن کِس اوہدیاں اَکھّیاں کھول دِتّیاں نیں۔ اوہنوں پُچھو اوہ جوان اے اپنا حال اوہ آپے دسے گا۔ 22ایہہ گلّاں اوہدے ماپیاں ایس واسطے آکھیاں کیوں جو اوہ یہُودِیاں کولوں ڈر دے سن۔ ایس لئی پئی یہُودِیاں آپو وِچ ایکا کِیتا ہویا سی پئی جیہڑا کوئی اوہنوں مسِیح آکھے عبادتخانیوں کڈھیا جائے۔ 23تَدے اوہدے ماپیاں آکھیا سی اوہ جوان اے۔ اوہنوں پُچھو۔
24تَد دُوجی واری اوہناں اوس بندے نُوں جیہڑا اَنھا سی سَدّ کے آکھیا۔ ربّ دی وڈیائی کر۔ اسی جاننے آں پئی ایہہ گُناہگار بندہ اے۔ 25اوس جواب دِتّا مَیں نئیں جان دا پئی اوہ گُناہگار اے کہ نئیں۔ پر اِک گلّ مَیں جاننا آں پئی مَیں اَنھا ساں تے ہُن سُجاکھا آں۔ 26تَد اوہناں اوہنوں آکھیا اوس تینُوں کِیہ کِیتا؟ اوس تیریاں اَکھّیاں کِس طرح کھولِیاں؟ 27اوس اوہناں نُوں جواب دِتّا مَیں ہُنے تُہانوں دسیا اے تے تُساں سُنیا نئیں مُڑ تُسی کاہدے لئی سُننا چاہندے اوہ۔ تُسی وی اوہدے شاگِرد تے بننا نئیں چاہندے؟ 28تَد اوہناں اوہنوں پھٹکاریا تے آکھیا۔ تُوں ای اوہدا شاگِرد ایں پر اسی تے مُوسیٰ دے شاگِرد آں۔ 29سانُوں معلُوم اے پئی خُدا مُوسیٰ نال کلام کِیتا ہے پر ایہنوں اسی نئیں جان دے پئی ایہہ کِتّھوں دا اے۔ 30اوس بندے اوہناں نُوں جواب دِتّا ایہہ تے اچرج گلّ اے پئی تُسی نئیں جان دے پئی اوہ کِتّھوں دا اے تے اوس میرِیاں اَکھّیاں کھول دِتّیاں۔ 31اسی جاننے آں پئی خُدا گُناہگار دی نئیں سُندا پر جے کوئی خُدا دا بَھگت ہوئے تے اوہدی مرضی اُتّے چلّے۔ اوہ اوہدی سُندا اے۔ 32دُنیا دے شُروع توں نئیں سُنیا گیا پئی کِسے جماندرُو اَنھے دِیاں اَکھّیاں کھولِیاں ہون۔ 33جے اوہ بندہ خُدا ولّوں نا ہوندا تے کُجھ نا کر سکدا۔ 34اوہناں اوہنوں جواب وِچ آکھیا تُوں تے گُناہاں وِچ جمّیا سائیں تے سانُوں سکھانا ایں؟ تے اوہنوں باہر کڈھ دِتّا۔
رُوحانی اَنھا پن
35یِسُوع سُنیا پئی اوہناں اوہنوں کڈھ دِتّا۔ تے اوہنوں لَبّھ کے آکھیا تُوں خُدا دے پُتر اُتّے اِیمان لیاؤنا ایں؟ 36اوس آکھیا اَے خُداوند اوہ کیہڑا اے پئی مَیں اوہدے اُتّے اِیمان لیاواں؟ 37یِسُوع اوہنوں آکھیا تُوں تے اوہنوں ویکھیا اے تے اوہ اوہو اے جیہڑا تیرے نال گلّاں کر دا اے۔ 38اوس آکھیا اَے خُداوند مَیں اِیمان لیاؤنا واں۔ تے اوس اوہنوں سجدہ کِیتا۔ 39تے یِسُوع آکھیا ایس دُنیا وِچ مَیں عدالت کرن آیا آں پئی اوہ جِنہاں نُوں نئیں دِسدا ویکھن تے جِنہاں نُوں دِسدا اے اَنھے ہو جان۔ 40اوہناں فرِیسیاں جیہڑے اوہدے نال سن ایہہ سُن کے اوہنوں آکھیا اسی وی اَنھے آں؟ 41یِسُوع اوہناں نُوں آکھیا جے تُسی اَنھے ہوندے تے تُہاڈا گُناہ نا ہوندا۔ پر ہُن تُسی آکھدے ہو پئی سانُوں دِسدا اے۔ تُہاڈا گُناہ تُہاڈے ذِمّے رہندا اے۔
