Apocalipsis 21

Yiba kub nu yizhyo kub

1Zeera myun tub yiba kub nu tub yizhyo kub lo na, nel lee yiba nu yizhyo kwaan yilo mlux, nu lee nistoo nyentra. 2Nu myun yezh nambey lo na, kwaan nak Jerusalén kub, kwaan mroo lo Dios nyaadla naz yiba. Chul nluya mod tub ngwnaa chul ndexkwaa xab, me listla nzo chelya nu me listla nzo ka sa. 3Nu mbin na tub bos dublegan, kwaan nze naz paro nzob xaa nabeyy, nu mbezh:

—Lee nal, lee Dios nzho kwaan re myet. Yo xaa kwaan re xaa, nu re xaa gak xaa xaa, nu leeka Dios gak Xdios re xaa. 4Nu lee Dios chee re nis garlo re xaa xaa, nu nayotra yalgut, nixa nagonntra re xaa, nixa nayotra bel, nixa yalne; nel rese kwaan yilo ngulola mlux.

5Zee lee Dios, xaa nzob naz pa nabeyy xaa, nzhé:

—Lee na le kub rese kwaan.

Nu noka nguné xaa:

—Bkee rese kwaane, nel rese wdizh ne wli zee nzho mod le xaa krera.

6Nu lee xaa né lo na:

—Ngulola ngoka. Na nak xaa yilo nu na nak xaa gwluzh, na nak xaa yilotlaka nu na nak xaa gwluzhtlaka. Lee xaa kwaan nzhek lextoo, na zelazh nis go xaa kwaan nzaa yalnaban kwaan tira. 7Nu re xaa le gan, kayaa rese kwaane, na gak Xdios xaa nu lee xaa gak xiin na. 8Per lee re xaa kwaan nzheb, re xaa nanet wii lo Dios, re xaa naxinn nak, re xaa kwaan nzhut myet, re xaa kwaan nchaal stub naz sa myet, xaa nle yalwezh, xaa nzholl lo maj, nu rese xaa nkade. Rese xaa ne nya leen yal kwaan kayek kwaan azufre, nu kwaane nak yalgut mrop.

Jerusalén kub

9Nu tub re mandad, xaa mzo lo gazh mandad, xaa mzen tub lo gazh kop kwaan nyazhe kwaan re gazh yalzi kwaan gwluzh cheen Dios, mbii lo na nu né:

—Te nee, na luu me chelya lo lu, me nak sa Mbakxiil cheen Dios.

10Nu Mbi Naban cheen Dios mle zee mbe mandad na axta yek tub yi ndok, kwaan ya nzeb; nu mlu xaa Jerusalén lo na, yezh nambey, kwaan mroo lo Dios nyaadla naz yiba. 11Nu lee yezh nla xni kwaan xni cheen Dios; nu lee xni cheena nak mod xni cheen tub ke kwaan non, mod cheen tub ke kwaan le jaspe, kwaan nded benin mod bidr. 12Nu lee roo wri yezh nzob tub bla ndok nu ya nzeb nu nkano chiibchop pwert nu kad roo tub pwert nzo tub mandad; nu lee roo pwert nkee le re chiibchop dii cheen Israel. 13Chon pwert nkee naz pa nlen mbizh, xchon pwert nkee lad li, xchon pwert nkee lad rebes nu xchon pwert nkee naz tich. 14Nu lee bla kwaan nsaaw yezh nkano chiibchop ke mod simyent, nu cho re ke ne, nkee le re chiibchop xaa mkayaa yalnabeyy lo Mbakxiil cheen Dios.

15Nu lee mandad, xaa kayawdizh kwaan na, nzheno tub nit or, zee chiix xaa yezh, re pwert nu bla cheena. 16Nu lee yezh nak kwadrad, lal nolla nu naxena. Lee mandad mchiix kwaan nit cheen xaa lo yezh nu neya chop mil chop gayoo kilómetro, nu lanee nolla, naxena nu naroya. 17Nu mchiix xaa lo bla cheena nu neya tub gayoo choobtap zhit ne lo bla, nu lee mandad mchiix kwaane kwaan medid kwaan nchiix myet kwaan.

18Nu lee ke kwaan nya bla nak ke kwaan le jaspe, nu lee yezh nak duzna or, kwaan nzhak kwenta bidr chul nzhak. 19Nu lee simyent cheen bla nak kwaan reta lo ke non nu chul nzhak; nu myun chiibchop ke:

lee ke yilotlaka cheen simyent nak ke kwaan le jaspe,

nu lee ke rop le safiro,

nu lee ke yon le ágata,

nu lee ke mdap le esmeralda,

20lee ke gaay le ónise,

lee ke xop le kornalina,

nu lee ke gazh le krisólito,

nu lee ke xon le berilo,

nu lee ke yeey le topasio,

nu lee ke chii le krisopraso,

nu lee ke chiibtub le jasinto

nu lee ke chiibchop le amatista.

21Nu lee re chiibchop pwert nak chiibchop ke kwaan le perla. Nu lee kay cheen yezh nak nebse or, mod tub lee bidr kwaan nded benin.

22Nu leen yezh namyunt nik tub yidoo lo na, nel lee Dios, Xaa Nabeyy, xaa ngezh doo lo rese kwaan, nu lee Mbakxiil nak yidoo cheena. 23Nu lee yezh nankint mbizh nixa mbee zaa xni, nel lee xni cheen Dios nu xcheen Mbakxiil cheen Dios nzaa xni. 24Nu lee re xaa dubse yizhyo ze lo xni cheena nu lee re rey yizhyo nyiidlaa kwaan chul cheen xaa loya. 25Nu lee pwert cheena nayaawt nik tub mbizh nu lee loya nayot yaal. 26Nu rese xaa yizhyo, noka nyiidlaa re kwaan chul cheen xaa loya. 27Nu nik tub kwaan beed nazeebt baa, nixa xaa nle kwaan nawent, nixa xaa nkade; nebse zeeb re xaa kwaan nkee le lo Yech cheen Yalnaban cheen Mbakxiil cheen Dios.

Currently Selected:

Apocalipsis 21: zpo

Highlight

Copy