Lukas 24

At Yesus ebe elaluk aga wene

(Matius 28:1-10; Markus 16:1-8; Yohanes 20:1-10)

1Agauwa sabit a’ge pam Allah paget weat welegesarik, loruk o’gwe hari Minggu pam hubet siaksogo is hwami ebano en a’bosu degelogo pegesa a’ge ebano woluk e, owikmu werak pegesema ano wegesa. 2Wegesarik enil ’gwelakhegesa ’gal e, owikmu werak helep ’goduk dopnosogo lerak pegesa a’ge ano erlebilogo hwikhai legesema ’goduk hwerik oruakma enil hegesa. 3Hegesarik, enebe owikmu ’gwi legesa ’gal e, at nonue ’gain Onuk Logo a’ge Yesus werak ano ebe erlakma enil hegesa. 4Werak ebe erlakma enil hegesarik e,

“Yu no’gosogo aga,” oluk ebagase le’geksogo mennei yat horok eberugumu, ap enebe ’biren onosum amulit a’bik a’ge ’buksogo, is hwami enilem erianoat ’ga en ’gela’ge eneragam inla ’bu wegesa. 5Wegesema re, is hwami ebano onogorlok en onodogun ’gi-’gonu oruakma re, is ap ’biren eriano en hwami ebano disogo mo’gulentigisa,

“His e, at elaluk welago a’ge ano aphwami werak a’ge welagaimu nopaget heratogu legep. 6#Mat. 16:21; 17:22,23; 20:18,19; Mrk. 8:31; 9:31; 10:33,34; Luk. 9:22; 18:31-33At ebe yema erlak o. Allah en arat elalugaptegei ani o. 7At naduk his henemin o Galilea welat, disogo mo’gulhentesi a’ge anoat honogola eberip o. At en e,

An abat daklau wegi ano watnobuagoluk nebe ap wiak a’ge ene’gigem noboma, e pam ediknoboluk watnobumu, agauwa ’biren werak weleiktik e, henaganak a’ge nelaluk eik ani o, oluk mo’gulhentesi ano honogola eberip o,” oluk mo’gulentigisema, 8is hwami ebano pobuk wene Yesus en mo’gulentesi a’ge ano enede eberigisa. 9Enede eberigisarik, owikmu eba en togolik o pam legesarik e, is ap enebe 11 ebano emin, is enarilak pema ebano emin, ’beli’gogo mo’gulentigisa. 10Is hwami ebano enebe re, Maria owi Magdala a’ge ano emin, Yohana emin, Maria Yakobus ia emin, hwami ado ebano eneminat enebe ’berlek ’beli’gogo Yesus osi peragenebaigoluk yo’go enebesi a’ge ebano mo’gulentai legesa. 11Asogo mo’gulentai legesa a’geat de, is ebano demat oluk enede eberu erlak. We, eniak esei ogwi, oluk epegesa a’geat de, 12at Petrus ano nak e, peiyalogo inagarik, pungtak owikmu werak pegesema ebano il hau waga. Wagarik odogun ’gonu oluk il ’gwelakhesi ’gal e, we sum lenan a’ge ano nak no’gorlogo oruakma hesi. Asogo oruakma il holuk e,

“Yu no’gosogo aga. Nogorlok e,” oluk ede pit-pit owi akhit laga.

Ap enebe ’biren Yesus emin o Emaus wagalat

ebe enil hegesa wene

(Matius 16:12-13)

13O ai erlige re, Yesus osi iak wogu legesa a’ge ebano enebe ’biren o kota Yerusalem en o onuk Emaus eba, we, 2 jam ’gela’ge wagaimu no oluk e, is ebano womogoluk waga legesa. 14Wagalat e, di a’ge yu a’ge ’berlegat aga a’ge ebano obok ’bele’gil wegesa. 15Wene obok ’bele’gil wagalat e, at ap mesik en e, at are mesik mo’guleselat, are mesik en e, at ap mesik mo’guleselat, til wagaimu re, at Yesus mugentau wagarik eneminat wegesa. 16Enemin wegesa a’geat de, is ap eriano en enak a’ge pobi nobuano oluk enilarogun sebelegeimu re, ebe enak a’ge pobitu erlak. 17Wagaimu re, at Yesus en, is eriano disogo mo’gulentesi,

“His he’birek ebela’gwe lagalat, wene no wene il laga legep,” oluk mo’gulentesimu onorogole enerlagaik takpegesarik e, edik mo egesa. 18Edik mo oluk e, is eriano, at mesik onuk Kleopas en e, disogo mo’gulesi,

“Wene sono hau yayat aga eriano pam, is ap ’bok o Yerusalem wotluk lodu oruak a’ge pema ’berlegat enaluk a’geat de, hat yu nak e, heperlak welegenma hegi,” oluk mo’gulesimu, 19at Yesus en e,

“Wene ai no’gosogo aga a’ge paget egen,” oluk mo’gulesimu, is eriano en e, disogo egesa,

“Ap onuk Yesus, owi o Nazaret a’ge ai, ebe Allah iak mo’gulentasu a’geat welat e, Allah ilem, nis aphwami ’berlegat nenilem, wene mo’gulentasulat, di a’ge yu a’ge annisogoat taga laga a’geat de, 20is ap Allah eiye a’ge onuelak ’gaindek emin, nis nonuelak ’gaindek emin, enemin en wene ebam pegesarik e pam edikpoluk woruagoluk ene’gigem pegesema werigisa o. 21Nis aphwami Israel a’ge, at en delnonobua oluk nenede opogu lege a’geat de, eige! Asogo arat agarikmu re, agauwa ’birenat nogoige ai o. 22Ye, is hwami nis a’ge pema en nenarogun lebi legesayat o. Is ai hubet siaksogoat werak owikmu pegesema ebano wegesa ’gal e, 23werak ebe erlakma hegesa. Ebe erlakma enil holuk legesarik e, wene mo’gulnentasulat e,

Malaikat ’bogorl pam a’ge en e,

Erlak o. At ebe elaluk agama ani o, oluk mo’gulnentigisema wege o, oluk, asogo egesema yuk ege o. 24Ye, nis nenarilak pema akhit owikmu werak pegesema eba hau wegesa a’ge re, ebe erlak welat en e,

Hwami mo’gulnentai legesa a’ge ano demat hegi, oluk, Yesus ebe enil ho erlakma en legesayat o,” oluk Yesus mo’gulegisa. 25Asogo mo’gulegisema, at Yesus en e,

“Eige! Henebe uo a? Ap Allah iak mo’gulontogu legesa a’ge ebano en wene ’berlegat mo’gulontogu legesa a’ge ebano demat oluk his perlene pobitu pukmu en welegep yema re! 26At Kristus Allah en yo’go pesi ano, di obotut yu obotut ho erlakma en erliktu no? Erlak o. Hasuamat erliktu o. His en egep ai tu hegitsogoat tigisa o,” oluk mo’gulentesi. 27Asogo mo’gulentesirik e, at u’gwarek paget Musa en pelal wesi a’ge ebano hwerli en ’bekhit e, is ap Allah iak mo’gulontogu legesa a’ge en pelal wegesa a’ge ebano, ’berlegat dokhumsogo ’beli’gogo mo’gulentesi.

28Asogo mo’gulentesirik, o Emaus womogoluk wegesa a’ge ano arat horok lau wegesarik e, at Yesus ebela ’bekhit weigoluk ’gela’ge tegei. 29Asogo tegeimu re, is ap eriano en e, disogo mo’gulegisa,

“A! O hik iogoluk, mo arat ’gobok egei yema re, nenemin yema nogouwok o,” oluk, tenak pegesema re, enemin nogouwogoluk o pam ’gwigisa. 30’Gwigisarik enemin so’boru nouwogoluk e, huregesarik so’boru roti a’ge e’gikmu wesirik e, Allah hau wusogo se’ban oluk ’gusogo is eriano so’burentesi. 31Asogo tisokhwe, is eriano naduk enilarogun sebelegei a’ge ano dek otluk e, enak a’ge pobi tigisa. Enak a’ge pobi tigisa a’geat de, at ebe is ene’gerlakma en ’ga laga ’gela’geat nalaga. 32Asogo nalagama re, is-is nak disogo egesa,

“Eige! Ebela’gwe wagalat e, wene Allah iak pelal wogo a’ge ’beli’gogo mo’gulnentasukhwe re, nenede aganhan agarik nonogola ’gagalaga ano erlak no?” oluk egesa. 33Asogo egesarik e, wolom erlakma en, is ebano e’biregat siaksogo inegesarik togolik o Yerusalem legesa. Legesema re, at Yesus osi enebe 11 ebano emin, enarilak onorokhwi pema emin, enemin odoktak welat disogo ogukhwe entai legesa,

34“Yesus Simon ologotma inagama il hesi ai, Allah en demat elalugaptegeimu oruak o,” oluk wene ’beli’gisoma legesa. 35Legesarik, is enebe ’biren eriano en ebela pam wagalat Yesus emin tigisa a’ge emin, so’boru ’gusogo so’burentasumu ebe pobi tigisa a’ge ano emin, modok ’beli’gogo mo’gulentigisa.

At Yesus ebe osi ’berlek en enil hegesa wene

(Matius 28:16-20; Markus 16:14-18; Yohanes 20:19-23; Peragenebesi 1:6-8)

36Wene asogo owan ’belo’gogumu, at Yesus ebe ’ga en ’gela’geat ene’gerlakma inagarik e,

“Nosi. Henede erlikhagup o,” oluk hau warenebisokhwe, 37is ebano yuk a’bik egesarik e, mu’gat oluk onogorlok a’bik aga. 38Onogorlok a’bik agama re, at Yesus enat osi disogo mo’gulentesi,

“His e, nopaget honogorlok egeptik demat opo erlakma en henede ’biren welegep. 39An nebeat o. Ne’gik noyuk yema henil yethemit o! An e, neinno emin, nuak emin, oruak ai ’gela’ge, is mu’gat ai asogo modok erlak o. Holuk e, hene’gik tenniogulat, henil niogulat, tugulat e,

Yesus demat, oluk honogola eberit o,” oluk, 40asogo mo’gulentasulat, at e’gik oyuk ebano onugentesi. 41Asogo onugentasukhwe, is ebano en e,

“Eige!” oluk erliktugulat, onogola enagai en e, demat oluk owan pobirak erlak oruakma, at en is ebano mo’gulentasulat e,

“His so’boru logon yema pegepma ya? Erlak a,” oluk mo’gulentesimu, 42is en e, hiane worogo a’ge ’gwerik mesik wogegisema re, 43at en wesirik e, is ebano enilemat ne’gei.

44Noluk e, is ebano disogo mo’gulentesi,

“An his henemin welat mo’gulhentasulat e,

An taknobouwa a’ge Musa en pelal wasulat, ap Allah iak mo’gulontogu legesa a’ge ebano en wogulat, is nin pema en buku Mazmur pam wogulat, wokho pegesa ai hegitsogo, an arat taknobouwa ani o, oluk mo’gulhentasu legi ano ebe arat aga o,” oluk, 45Allah iak pelal wogo a’ge pobi tuagoluk, is ebano wene enede ’baksogo mo’gulentesimu pobi tigisa. 46Asogo enede ’baksogo mo’gulentasulat e,

“Allah en Kristus yo’go poluk perakpou weik egei a’ge pelal disogo oluk wogo oruak,

Di obotut yu obotut hil-hil warotluk e, agauwa ’biren werak wolotluk e, henaganak a’ge warotluk lagaimu en elaluk ema o, oluk pelal wogo oruak. 47Ye, mesik disogo oluk pelal wogo oruagat,

His aphwami wiak togu legep a’ge ai, ukpoluk henebabut heberlogup holuk e, Allah en erlagapsogo ukpouwa o, oluk, at onuk ’balogo wene ogulat e, edip o Yerusalem hwerli en mo’gulentil, hwerli ’bekhit o di owi yu owi aphwami ena’gul onuk lo’bok modok mo’gulentil laga lomup o, oluk Allah iak pelal wogo oruagat o. 48Wene pelal wogo oruak ai ’gela’ge, ebe aga a’ge his henil hegep a’ge enat, is aphwami mo’gulentil laga lomup o. 49#Per. 1:4Ye, an naik en his wokhentaik, oluk obok mo’gulhentesi ano, an enat henebam ’belakhonobou weik o. A’ge re, Allah anni ’bogorl pam en owan henebam louk uom erlak oruakhwe ya re, henebe o kota yemayat wolomup o,” oluk wene weragenebesi.

At Allah en Yesus ’bogorl pam woluk ligaga wene

(Markus 16:19-20; Peragenebesi 1:9-11)

50 # Per. 1:9-11 At Yesus en wene asogo weragenebesirik, at osi ebano o kota lokma en wogonoboluk libagarik e, o Betania eba laga. Lagarik, e’gik lagabak poluk e, at ede aganhan enebam pasulat e,

“Allah en tenhentarok welat obaphenebise lemak o,” oluk hau warenebegei. 51Asogo hau warenebisokhwe erianoat e, is eriano oruakhwe, Allah en, at ebe ha’boksogo woluk ’bogorl pam ligaga. 52Asogo ligagokhwe re, is osi ebano ondogorlu pam hurotluk e, onogola enagai a’bik holuk, o Yerusalem togolik wegesa. 53Wegesarik, o Allah owi werikmu nak welat e, Allah erliktogwi modok welegesa.

Currently Selected:

Lukas 24: Wul

Highlight

Copy