Lukas 22

At Yesus ebe woruogoluk obok ’baligisa wene

(Matius 26:1-5; Markus 14:1-2; Yohanes 11:45-53)

1 # Kel. 12:1-27 Is aphwami Yahudi a’ge seni lok setil lagai a’ge ano onuk Paskah no’gulat, e’gen roti poruagoluk ogola ’gwelabogwi a’ge ogola ’gwelebak erlak a’ge werakho no’gwi a’ge ano agauwa horok lau wagama welat e, 2is ap Allah eiye a’ge onuelak ’gaindek emin, Allah iak pelal wogo eiye a’ge emin, aphwami ’berlegat onogorlok en e,

“Yesus wene ’gesogo ebam poluk worul epegep,” oluk obok ’balogu legesa.

At Yudas en Yesus woruagoluk yo’go laga wene

(Matius 26:14-16; Markus 14:10-11)

3Asogo obok ’balogukhwe re, is Yesus osi enebe 12 ebano a’ge, mesik onuk Yudas Iskariot ano ogola Iblis ’gwegei. 4’Gwegeimu re, at Yudas, is ap Allah eiye a’ge onuelak emin, Allah owi werik tenak welegesa a’ge emin, ene’bek lagarik e,

“Yesus ai worogup en e, no’gosogo hene’gikmu paik o,” oluk enemin obok ’baligisa. 5Enemin obok ’baligisarik e, is ap ebano onogola enagai hogulat e,

“O’go uang hwerli ai pam wokhomul,” oluk obok mo’gulegisa. 6Obok mo’gulegisema, at Yudas en e,

“I o,” oluk mo’gulentesirik e,

“Aphwami eneperlak oruakhwe, panoasuak Yesus ematekma oruakma, metne en ene’gikmu paik e,” oluk ogola en obok eselat mennei ebetil lasu laga.

Domba wam seni Paskah no a’ge paget degeli louwagoluk osi peragenebesi wene

(Matius 26:17-25; Markus 14:12-21; Yohanes 13:21-30)

7Yudas asogo ede eberisokhwe, e’gen roti poruagoluk ogola ’gwelabogwi a’ge ogola ’gwelebak erlak a’ge werakho no’gulat, seni Paskah paget wam domba wam wusogo no hegit aga. 8No hegit agama re, at Yesus en Petrus Yohanes emin peragenebasulat e, disogo mo’gulentesi,

“Nis seni Paskah paget domba wam nenemin nul en, laguptik werakho degelogo pogu lomup o,” oluk mo’gulentesimu, 9is en e,

“Nis en di a’ge yu a’ge o ’geba degelogo poluk wolom hagai en egen,” oluk egesema, 10at Yesus en e,

“His o kota ano ’gwi laguptik e, ap mesik ik e’be ’gwiang domul hele’gik a’ge pam ik na’goluk wagoma enemin sarlok togup ani o. Sarlok toguptik e, e’berligat lu o. Laguptik at owi pam ’gwiso holuk e, 11ap owi eiye a’ge ai ebam hin disogo oluk womup o,

At nonue wene mo’gulnentasu a’ge ano en e, disogo egei,

An nosi niak wogwi a’ge nemin seni Paskah paget domba wam wusogo nouwogoluk, o ebale se’gerlak ogorlirak ’ge ’gela’ge nebegen, oluk hin wai lit o, oluk peraknonobou wagama wege, oluk asogo mo’gulogwiam, 12at en e, o holi’bo lok se’gerlak ogorlirak a’ge werakho noma ebale modok hele’gik a’ge hwiakhontouwa ani o. Hwiakhontouema re, ebayat di a’ge yu a’ge degelogo poluk wolomup o,” oluk e, peragenebesi. 13Peragenebesimu, is eriano legesa ’gal e, at en egei hegitsogoat, asogo oruakma hai legesarik e, seni Paskah paget domba wam wit-wat e, werakho degelogo pegesa.

At Yesus osi enemin en so’boru emin, anggur e’gen a’bosu emin, ologun pam ne’gesa wene

(Matius 26:26-30; Markus 14:22-26; 1 Korintus 11:23-25)

14Arat no hegit lau wagama re, at Yesus en e, osi peragenebaigoluk yo’go enebesi a’ge pema akhit logon emin legesarik, enemin nouwogoluk huregesa. 15Huregesarik, at en disogo mo’gulentesi,

“An di obotut yu obotut hasukhwe watnobua ano, owan taknobo erlak oruakhwe, domba wam seni Paskah paget yogodak nul yu re, nosi nemin nolo e, oluk, an nagai a’bik hasu legi o. 16Nenemin yayat noluk pobuk, at Allah en eragam onoboluk ebe a’ge nul ai owan oruakhwe re, yu a’ge mesik henemin no erlakma en weleik o, oluk demat mo’gulhentegis o,” oluk mo’gulentesirik e, 17-18pobuk ik e’be anggur e’gen a’bosu ne’gak a’ge e’gikmu wesirik Allah hau wusogo, osi wogentasulat e, disogo mo’gulentesi,

“Anggur e’gen a’bosu yu noluk e, an pobuk logon no erlakma en weleiktik, hwerli, at Allah en eragam onobouwa ai hwerli, pobuk en naik o. Holuk e, yu wik-wokhonu’gwarek en so’busogo no’gu lorogup en wokhentegis o,” oluk mo’gulentesi. 19Asogo mo’gulentesirik e, pobuk so’boru roti a’ge e’gikmu wesirik e, Allah hau werak poluk ebe ’gusogo re, osi so’burentasulat e, disogo mo’gulentesi,

“Yu an nebeat o. [An nebe his henebaget watnobogwiam wareikmu re, an nebam eberak wolorogup en e, disogoat no’gu lomup o,” oluk mo’gulentesimu, 20#Yer. 31:31-34arat no’gwiam e, ik e’be anggur e’gen a’bosu ne’gak a’ge asogoat wogentasulat e,

“Yu re, an nemebat o. Allah en wene ’get a’ge wusogo wokhenebik, egei ano his henebaget nemep namogo watnobua ai pam, demat ema o,” oluk so’busogo wogentesi.] Wogentesirik e, disogo mo’gulentesi,

21 # Mzm. 41:9 “Nosi! Yethemit! Ap mesik so’boru e delak pam ne’birek mesikmu no’gu lege a’ge ya enat, an watnobuagoluk yo’go louwa ani o. 22Yo’go louwema an abat daklau wegi ano at Allah en e,

At woruak, oluk epesi hegitsogoat watnobua a’geat de, ap an watnobuagoluk yo’go louwa a’ge ai nak e, nede o. Wiak ema o,” oluk mo’gulentesimu re, 23is-is nak disogo egesa,

“Ai sa ’gela’ge en tua a’ge de, egei,” oluk e, hin wok han wok egesa.

“Hat ’gain no? An ’gain,” il legesa wene

24 # Mat. 18:1; Mrk. 9:34; Luk. 9:46 Asogo il legesarik e, ’gain e, sa, oluk eniak sagalugulat e, disogo egesa,

“Hat ’gain no? An ’gain,” oluk, at mesik en osokhwe, mesik en osokhwe, toluk, eniak sagaligisa. 25Asogo egesema, at Yesus en disogo mo’gulentesi,

“Is aphwami o’borl o’gwe a’ge ai re, onuelak ononuk logo a’ge en onosi tenentarok welat eniak ningsogoat,

Di a’ge tip, yu a’ge tip, oluk mo’gulontugulat, ye, is onosi en,

Nonue ai op tennentarok oruak, ogulat, ogwi ai ’gela’ge re, 26#Mat. 23:11; Mrk. 9:35#Mat. 20:25-27; Mrk. 10:42-44his en, asogo modok togup o. Holuk e, ap his a’ge mesik en e,

An ’gain welle, epasu holuk e, honot ’gela’ge emak o. Ye,

An en tenentarok welle, oluk epasu holuk e, heneragam a’geat emak o. 27#Yoh. 13:12-15His honogola en e, ap sa ’gela’ge ’gain welema epegep. At ap mesik hweriogo welat so’boru nasu a’ge ai ya? At e, eragam a’ge en, at ue nouwagoluk wogosu ago a’ge ai ya. Erlak o. ’Gain e, at hweriogo welat so’boru nasu a’ge, aiat o. Asogo a’geat de, an his henemin welat heneragam a’ge ’gela’ge taga legi o. 28Loksogo wik-wiak taknobogukhweat de, his yu nak e, an uknobogwi erlak nemin modok welege ai en e, 29-30#Mat. 19:28an naik en aphwami an neragam tenentarok welemagoluk ediknebesi ai ’gela’ge re, his ogo aphwami an neragam enebaikmu eba so’boru no’gulat, ik no’gulat, tugulat e, henebale delakma eba ’gainat welat, aphwami Israel a’ge ena’gul onuk 12 ebano wene enebam pogulat, no’gorlogulat, togup oluk, hisat edikhenebegi o,” oluk mo’gulentesi.

“Hat en, Yesus neperlak, oluk elabe togun ani o,” oluk Petrus mo’gulesi wene

(Matius 26:31-35; Markus 14:27-31; Yohanes 13:36-38)

31Yesus en asogo mo’gulentesirik e, Petrus mesik disogo mo’gulesi,

“Simon! Simon! Hesa’go hwelin! Gandum agap hwelilogo ukpogwi ai ’gela’ge, his ’berlegat asogo, at Iblis en henebe hwelilhenebigoluk Allah ’gonu mo’gulesimu, at en elit oluk mo’gulesi a’geat de, 32hat hede nebam he’berik poluk welegen a’ge ai erlak ema no oluk e, hat hebaget an Allah yo’go arat pegimu ani o. Hebabut heberlorogun holuk e, harilak yema hat en enede ago weriso lomup o,” oluk mo’gulesi. 33Asogo mo’gulesimu, at Petrus en e, disogo mo’gulesi,

“Nue o! O aphwami ene’gik herle wusogo onobogumu ’gwelaphobogulat, hebe modok wathobogulat, takhobogwi holuk e, an neminat watnonobuagoluk welegi o,” oluk mo’gulesi a’geat de, 34at Yesus en e,

“Petrus! Yogodak ayam iak owan u erlak oruakhwe, hat en,

Yesus ai an neperlak, oluk, he’gik henaganam elabe togun ani o,” oluk mo’gulesi.

“’Garok emin, di a’ge yu a’ge emin, woluk lu o,” oluk mo’gulentesi wene

35 # Mat. 10:9,10; Mrk. 6:8,9; Luk. 9:3; 10:4 At Yesus en asogo mo’gulesirik e, at Petrus arilak pema akhit enemin la’bulogo disogo mo’gulentesi,

“An en, his hono uang owi emin, honosuma a’ge emin, hene sepatu emin, woluk lagup o, oluk perakhenebegi ano en e, his di a’ge yu a’ge erlak a’ge welegep a?” oluk mo’gulentesimu, is en e, disogo mo’gulegisa,

“Erlak o. Elirat welege o,” oluk mo’gulegisema, 36at Yesus en e, disogo mo’gulentesi,

“A’geat de, yogodak nak e, hono uang owi emin, honosuma a’ge emin, oruak holuk e, horloluk lu o. Ye, his mesik ’garok ap waronobogwi a’ge ano erlak holuk e, hosum o’borl o’gwe ’buktak a’ge ano pam o’go ’balogo uang wa’guntik e, ’garok o’go ’balip o. 37#Yes. 53:12An taknobouwa a’ge paget pelal wokho pogulat e,

At ai aphwami enebabut wiak togwi a’ge enemin hegitsogo tagenebegesa o,

oluk egesa ai, an nebam hegit om a’geat yogodak hegit lau wago ai en mo’gulhentegis o,” oluk mo’gulentesimu, 38is en e, disogo mo’gulegisa,

“Nue. Nis en a’ge ’garok ap waronobogwi a’ge ano ’biren oruak yema hemen?” oluk onukhegesema, at Yesus en e,

“Ai elit oruak o,” oluk mo’gulentesi.

At Yesus dom Zaitun duk pam ligagarik Allah yo’go pesi wene

(Matius 26:36-46; Markus 14:32-42)

39Asogo mo’gulontoluk enemin lebegesarik e, o kota ano ukpoluk e, at Yesus dom Zaitun duk pam ligaga laga ano ’gela’geat ligagama, osi iak wogu legesa a’ge ebano e’berlik legesa. 40Arat legesarik e, disogo mo’gulentesi,

“Wiak tuagoluk honogola ’gagalil wema no oluk e, se’ban ogu lemis o,” oluk mo’gulontoluk e, 41at ebe ematekma ’geksogo helep hwikhai loma ’gela’ge horoksogo lagarik e, odogorlu pam hurotluk se’ban eselat e, 42disogo egei,

“Naik o! Hat en op epegen holuk e, an wiagapnobua a’ge ai delnebip o,” oluk u ’gela’ge,

“Ik ne’gak a’ge nouwagoluk woknema ai, hat en an nebam a’ge wokhomup o. A’ge re, an nogola epasu legi a’ge ai erlak o. We, hat hede epegen a’ge aiat taknobomup o,” oluk mo’gulesi. [ 43Mo’gulesimu, is malaikat Allah en yo’go peragenebasu a’ge mesik ’bogorl pam en ’bu agarik e, ede ago weregei. 44Ede ago weregei a’ge re, ede modok wiak welat pobuk se’ban e’ginsogo osokhwe, erlegisak mep ’gela’ge dep hasulat e, ’gwiangma dingdung-dangdungsogo ’begei.] 45Se’ban oluk inagarik, osi ebano ene’bek waga ’gal e, is ebano onogola modok wiak agama no oluk e, nogogumu entau waga. 46Entau wagarik e, disogo mo’gulentesi,

“His nopaget nogo ogu legep. Wiak tuagoluk henede ’gagalu wema no oluk e, henebe inotluk se’ban ogu lemis o,” oluk mo’gulentesi.

At Yesus ebe tenak pegesa wene

(Matius 26:47-56; Markus 14:43-50; Yohanes 18:3-11)

47At Yesus en asogo osokhwe erianoat, at osi enebe 12 ebano a’ge mesik onuk Yudas ano, yo’go lagarik e, ap esanat wogonoboluk wagarik e, at naduk Yesus hau emde motok werigoluk, e’bek waga. 48Wagama, at Yesus en e, disogo mo’gulesi,

“Yudas! An abat daklau wegi ano, aphwami en pobirak noboluk noruagoluk, hat en hau hemde motok wusogo nebe ene’gigem paigoluk wegen a?” oluk mo’gulesimu, 49is ap Yesus emin welegesa a’ge ebano en e, is wegesa a’ge ebano enil ontoluk e, onogola en e,

Disogo tua hegi, epegesarik, Yesus disogo mo’gulegisa,

“Nue! Nis ’garok pam waronobu a? Erlak a,” oluk, hin wogulat erianoat, 50Yesus ot mesik en ap Allah eiye a’ge onue ’gain eragam a’ge mesik weriogoluk lelhesi ’gal e, esa’go ’bekhit akhit nak sebasogo ’bo pesi. 51Asogo sebasogo ’bo pesi a’geat de, at Yesus en e,

“’Buk ’buk! Arat o,” oluk, ap ano esa’go e’gik en tenak poluk e, pobuk dopnorak pesi. 52Asogo dopnorak pesirik e, at Yesus en, is ap Allah eiye onuelak ’gaindek emin, Allah owi werik tenak welegesa a’ge emin, enarluedek emin, at ebe tenak pouwogoluk wegesa a’ge ’berlegat disogo mo’gulentesi,

“Ap yogorlia wasumu tenak pou wagai ’gela’ge, his asogoat tennobuogoluk ’garok emin, ’go’bu emin, woluk wegep yema re! 53#Luk. 19:47; 21:37Nin erlige nan erlige Allah owi werikmu his an henemin oruakhwe eriano tennobu erlakma en welegeptik en de, yogodak ya nak e, o hiktak eiye welago a’ge ano anni agama re, his en tennobu hegirat wegep ai o,” oluk mo’gulentesi.

At Petrus en, “Yesus ai an neperlak o,”

oluk elabe tegei wene

(Matius 26:57-58,69-75; Markus 14:53-54,66-72; Yohanes 18:12-18,25-27)

54At Yesus en asogo mo’gulentesimu, is en at ebe tenak pegesarik e, ap Allah eiye a’ge onue ’gain a’ge ano owi pam woluk lagaihwe, at Petrus ano pobuk ene’berlik daduk laga. 55Asogo lasu lagarik, ap ’gain ano owi dipmu aphwami en odouk mu’gelak poluk sogwei oro’gogulat hweriogo oruakma re, ene’gerlakma huraga. 56Asogo hweriogo oruakma odouk magale e’gerlak o’gwe, hwele mesik eneragam a’ge en Petrus ebe il yethesirik e, il ebam puttak welat e, disogo mo’gulentesi,

“Ap yu ogo re, Yesus emin welegesa a’geat o,” oluk mo’gulentesimu, 57at Petrus en elabe tagalat e, disogo mo’gulesi,

“Erlak o. Hwele yu! Ap ai ebe an neperlak o,” oluk mo’gulesi. 58Asogo mo’gulesirik wolom erlakma enat, ap akhen en Petrus ano il holuk e, disogo mo’gulesi,

“Hat yu re, is a’geat epegi,” oluk mo’gulesi ’gal e, at en e,

“Nue. An erlak o,” oluk mo’gulesi. 59Asogo mo’gulesimu pobuk 1 jam ’gela’ge welegesarik e, ap mesik en iak ningsogoat is aphwami ebano disogo mo’gulentesi,

“Ap yu ebe Galilea a’geatma, demat Yesus emin nese laga a’geat o,” oluk mo’gulentesimu, 60at Petrus en e,

“Nue! Hat e’gen ai, an neperlak o,” oluk osokhwe erianoat ayam iak egei. 61Egeimu re, Yesus orogole edenogo Petrus il yethesi ’gal e, at Petrus ogola en e, disogo epesi,

“Eige! At Yesus en an mo’gulneselat e,

O yogodak sue ayam iak owan u erlak oruakhwe, hat en e,

Yesus neperlak o, oluk, he’gik henaganam elabe togun ani o, oluk mo’gulnesi ano ebe arat elabe tegismu hegi o,” oluk ede eberegei. 62Ede ebetholuk e, odipmu lebagarik e, nge modok a’bik ede duk-duksogo tegei.

At Yesus ’go’bu worugulat, eniak esegen yagugulat, tigisa wene

(Matius 26:63-68; Markus 14:65)

63At Petrus asogo nge tagokhwe, is ap Yesus ebe tenak welegesa a’ge ebano en eniak esegen yagugulat, ’go’bu worugulat, tigisa. Asogo tugulat, 64il sebelak poluk e,

“Sa en wathebegei no. Mo’gulnentemen da!” oluk mo’gulogulat, 65eniak esegen di-damuksogo yagugulat, e’gerli worugulat, togu legesa.

At Yesus emdema wegesa wene

(Matius 26:59-66; Markus 14:55-64; Yohanes 18:19-24)

66Asogo mo’gulogulat oruakma, o dakha egeimu re, ap Yahudi a’ge enarluedek ebano emin, Allah eiye a’ge onuelak ’gaindek ebano emin, Allah iak pelal wogo eiye a’ge emin, odoktigisarik, wene Allah iak paget edip ’belo’gogumu ebano oruakma, Yesus woluk ene’bek ’gwigisema re, 67is en disogo mo’gulegisa,

“Allah en Kristus yo’go poluk perakpou weik egei ano harat a? Hat holuk e, mo’gulnentemen da,” oluk mo’gulegisema, at Yesus en e, disogo mo’gulentesi,

“An en mo’gulhentasukhwe re, demat oluk henede eberogup no? 68An en hin wokhentasuam e, o’go mo’gulnorogup no? Erlak o,” oluk mo’gulentesirik, mesik disogo mo’gulentesi,

69“Hwerli yogodak ya en e, pobuk an abat daklau wegi a’ge naik Allah anni welat di a’ge yu a’ge tu a’ge nakma re, e’gik ’bekhit akhit ’gainat weleik o,” oluk mo’gulentesimu, 70is ’berlek en e, disogo mo’gulegisa,

“Holuk e, hat Allah omlogo no?” oluk mo’gulegisema, at en e,

“His honu’gwarek en egep aiat o,” oluk mo’gulentesimu, 71is en e, disogo mo’gulegisa,

“Aphwami en at wiak tisokhwe enil hegesa a’ge en wene se’geksogo uagoluk ai re, nopaget yerentarok wolomul no. Wene at u’gwarek en egei a’ge arat nenesa’go hwelige ’gela’ge yema re!” oluk egesa.

Currently Selected:

Lukas 22: Wul

Highlight

Copy