Lukas 20

“Yesus, hat en no’gwe on eiye egentik taga legen,” oluk emdema wegesa wene

(Matius 21:23-27; Markus 11:27-33)

1Pobuk agauwa mesik erlige re, at Yesus Allah owi werikmu ’gwegeitik welat e, aphwami wene op wene dokhumsogo mo’gulentasulat, enesa’go weriselat, tagoma re, is ap Allah eiye a’ge onuelak ’gaindek emin, Allah iak pelal wogo eiye a’ge emin, enarluedek ebano emin, enemin at Yesus e’bek wegesa. 2Wegesarik e, disogo mo’gulegisa,

“Hat en e, no’gwe on eiye egentik di tagalat, yu tagalat, taga legen. Ye, ap sa en eiye welemagoluk edikhebesimu taga legen. Mo’gulnentemen da,” oluk mo’gulegisema, 3at Yesus en e,

“An ogo re, his en mesik mo’gulnemagoluk, hin wokhentaigat o. 4At Yohanes en ik olomu ’belabenebise laga ano re, Allah ’bogorl pam a’ge en mo’gulesimu ’belabenebise laga ya? At e, aphwami ’gwiangma a’ge en mo’gulegisema ’belabenebise laga ya. Mo’gulnemis da!” oluk mo’gulentesimu, 5is-is nak ogulat e,

“Allah ’bogorl pam a’ge en mo’gulesimu ’belabenebise laga, oluk mo’gulomul ’gal e, at en e,

Holuk e, his e, Yohanes iak demat oluk pobirak erlak welegep ai nopaget, oluk mo’gulnontouwano. 6Ye,

Aphwami en mo’gulegisema ’belabenebise laga, oluk umu re, eige! Is aphwami ’berlek en,

Yohanes ai Allah iagat mo’gulnentasu laga, oluk opugumu no oluk e, helep pam nenebe modok damuksogo watnonobuano,” oluk egesarik e, 7pobuk Yesus disogo mo’gulegisa,

“Wene ai edip nis neneperlak o,” oluk mo’gulegisema, 8at Yesus en e, disogo mo’gulentesi,

“Holuk e, an en ogo re,

Ai a’ge eiye egirik taga legi oluk his mo’gulhentaik erlagat o,” oluk mo’gulentesi.

“Ap pema anggur yabuk ’gwelakharok welegesa,” oluk ebam elitsogo mo’gulentesi wene

(Matius 21:33-46; Markus 12:1-12)

9 # Yes. 5:1 At Yesus en asogo mo’gulentesirik e, pobuk aphwami ebano wene mesik ebam elitsogo disogo mo’gulentesi,

“Ap mesik iabukmu anggur owi yeregei. Yogo poluk e, ap logon ’gwelakharok welemagoluk onoboluk e, o walegat loluk agauwa logon eminsogo weleiktik en de, weigoluk laga. 10O eba lagarik oruakhwe, agauwa anggur e’gen ’balogwi a’ge pam hegit lai lagama re, ap iabuk eiye a’ge ano en is ap ebano e’gen akhen ’balogo wogemagoluk, eragam a’ge mesik perakpou waga. Ene’bek perakpou wagama re, is ap yabuk pekharok welegesa a’ge ebano ene’bek waga ’gal e, ebe ’go’bu worugulat e’gen ’balom erlakma en weat togolik perakpegesa. 11Perakpogwiam lagama re, nin pobuk eragam a’ge mesik perakpou wagayat. Perakpou waga a’ge re, is en e’gerli wusogo ’go’bu werak poluk e, e’gen ’balom erlakma en weat togolik perakpegesayat. 12Agauwa ’birenam perakpou waga a’ge asogo tigisa ai en e, nin pobuk eragam a’ge mesik perakpou wagayat. A’ge re, at pobuk perakpou waga a’ge ano wagama is en asogoat ’go’bu emep nim-namsogo wusogo anggur yabukmu en hwikhai legesa. 13Asogo modok tagenebegesema re, at ’gain iabuk eiye a’ge ano ogola en e,

Pobuk e, no’gosogo tik e. An nu’gwarek nomlogo nede hwedik a’ge yuat ene’bek perakpaikmu re, hau do’goksogo wusogo wouwa epasu legi, oluk epesirik perakpou waga. 14Perakpou wagoam wagama, is ap yabuk pekharok welegesa a’ge ebano enil yethegesarik e, is-is nak ogulat e, disogo egesa,

Aik ebalema yabuk eiye ema a’ge ano ebe waga etle i o. Holuk yabuk yu nisat eiye omul en e, ebe woruok o, oluk, 15omlogo ano yabukmu en leget o’borl akhit lebikpegesarik e, ebe modogat werigisa. Is asogo tigisa ai en e, ap ’gain iabuk eiye a’ge ano en e, is ap ai no’gosogo tagonobouwa epegep. 16At ebe wemarik e, is ai enebe modogat wusogo hwigontoluk e, enebalema yabuk anggur yabuk ano tenak welemagoluk e, ap logon muon edigonobouwayat o,” oluk mo’gulentesimu, is ebano en e,

“Eige! Asogo tu puk o!” oluk mo’gulegisema, 17#Mzm. 118:22at Yesus orogole edenogo is ebano il yerontoluk e, disogo mo’gulentesi,

“Is ap agaikhen en pelal wokho pogulat e,

Is ap tukang o helep a’ge worogwi a’ge en, o ebe worugulat e,

Helep yu wiak, oluk ukpegesa a’ge ai o wa’giat dalagama o,

oluk pelal wogo pegesa ai nopaget pegesa epegep. 18Ap sa en ebe ’bule helep ai pam ’bu ago holuk e, ebe modok se’gerl-se’garltak pouwa o. Ye, helep ai sa ebam sebelu ago holuk e, ebe modok al ’besilogo worua o,” oluk mo’gulentesi.

“Uang pemerintah paget ’gonu ogwiam wogonto a? Erlak a,” oluk hin Yesus ebam wegesa wene

(Matius 22:15-22; Markus 12:13-17)

19At Yesus en wene asogo mo’gulentesimu re, is ap Allah iak pelal wogo eiye a’ge emin, Allah eiye a’ge onuelak ’gaindek ebano emin, enesa’go hweligisarik e,

“Wene ai nis nenebaget ebam elitsogo mo’gulnentesi hegi o,” oluk pobi tigisarik e, ai erlige, at Yesus ebe tenak pouwogoluk tigisa a’geat de, aphwami ebano onogorlok en e, mo egesa. 20Mo egesarik pobuk, at en iak ua a’ge ai pam ebe wene e’gen poluk, at gubernur aphwami tenentarok welat wene enebam pasulat, no’gorliselat, tago eiye a’ge en wene ebam pou wagoluk, ap logon enebabut op a’ge ’gela’ge Yesus enilen wogu lemagoluk peragonobou wegesa. 21Peragonobou wegesema, Yesus e’bek wegesarik e, hin wokhogulat, disogo mo’gulegisa,

“Nue! Hat e, wene mo’gulentasulat aphwami logon holukhwema enebasulat, logon ho’borlma enebasulat, taga legen erlak o. We, hiak hegitsogo nak eselat, Allah ogola en e,

Aphwami disogo togu lemak, oluk ogola epasu a’ge demat mo’gulnentasu legen ai, nis nenaluk o. 22Holuk e, nis aphwami Yahudi a’ge togu lege hegitsogo, uang pemerintah paget, ’gain onuk logo a’ge Kaisar wogum elit a? Mia ya,” oluk mo’gulegisema, 23at Yesus en e,

“Is ap yu an lalnobuogoluk eniak lalogo mo’gulnegisa hegi,” oluk, enak a’ge pobirak onoboluk e, disogo mo’gulentesi,

24“Uang perak yabuk agauwa mesik erlige nak togwiam ene’gik o’go wogontogwi ano a’ge mesik onukniemit da,” oluk mo’gulentesimu onukhegesema re,

“Yu sa orogole hele’gik a’ge pam onuk pelal wogo oruak epegep,” oluk mo’gulentesimu, is en e,

“Yu ’gain Kaisar at o,” oluk mo’gulegisa. 25Asogo mo’gulegisema, at Yesus en e, disogo mo’gulentesi,

“Holuk e, Kaisar en a’ge holuk e, Kaisar at wogogulat, Allah en a’ge holuk e, Allah at wogogulat, togu lemis o,” oluk mo’gulentesi. 26Asogo mo’gulentasu lagama, aphwami enilem iak egei a’ge paget il walsogo wene ebam po a’ge erlak agama re, is en e,

“Eige! Wene o’go hegitsogo egei ai nonogorlok e!” oluk, eniak erlak mo egesa.

Ap Saduki a’ge en aphwami warotluk en enelaluk ema paget, Yesus ebam hin wokhegesa wene

(Matius 22:23-33; Markus 12:18-27)

27 # Per. 23:8 Asogo oruakhwe, pobuk is ap Saduki a’ge en,

“Aphwami warotluk en e, pobuk enelaluk ema modok erlak,” oluk ogwi a’ge pema Yesus e’bek wegesarik ebam hin wokhogulat e, disogo mo’gulegisa,

28 # Ula. 25:5 “Nue! At Musa en disogo mo’gulentesi,

Ap mesik ugwe horloluk emalik dagonobu erlakma en, ebe warago holuk e,

ebalema emalik logon dagonobuagoluk e, hwe sugwe ai ap ai orat wo yo,

oluk mo’gulnentesirik pelal wokho pesimu oruak o. 29Asogo egei a’ge oruakma re, ap enebe sabiren enaik mesigat a’ge en dogo welegesa. Dogo welat, onue naduk a’ge ai ugwe wesirik, eiyagai dagonobu erlakma en waraga. 30Waragama re, ot e’berlik a’ge ano en, hwe sugwe ano wesirik en e, waraga. 31Waragama, nin pobuk onot ene’berlik a’ge ano en wesi a’ge re, asogoat eiyagai dagonobu erlakma en warat aga. Asogo, is ap enebe sabit eria en, hwe mesigat aiat wegesarik e, eneiyagai dagonobu erlakma en waretil modok wegesa. 32Ye, pobuk e, hwe ebe ano warat aga. 33Holuk e, is ap enebe sabiren eria en, hwe mesigat a’ge ai wil wegesarikmu re, pobuk Allah en aphwami werak a’ge enelalugabonobua ai erlige re, hwe ai sa ’gela’ge ugwe ema epegen,” oluk hin wokhegesa. 34Asogo hin wokhegesema, at Yesus en e, disogo mo’gulentesi,

“O yogodak ya ’gwiangma welat e, ap en hwami horlogulat, is nin pema wogontugulat, togwi a’geat de, 35is aphwami waragaiam Allah en enelalugabonobua ano pam, o pobuk wolomulmu eba re, elit welemak, oluk epasu a’ge eba welat, hwami horlogulat, is nin pema wogontugulat, togu lema modok erlak o. 36Aphwami warotlukmu Allah en enelalugabonobua ai en e, enebe Allah eiyagai, is malaikat ’bogorl pam yo’go no’gwi a’ge emin hegitsogo welat, pobuk waraga lema modok erlak o. 37#Kel. 3:6Is aphwami warotlukmu Allah en enelalugabenebiso ai paget e, at Musa en, e hourak a’ge edipmu Allah ebe il hesi wene ai pam disogo egei,

Abraham o, Ishak o, Yakub o, enaik Allah at o,

oluk egeirik pelal wokho pesi ai o. 38At Allah il pam is enebe ’berlek en e, enelaluk oruak ai en e, Allah ebe re, aphwami werak a’ge enaik puk. Enelaluk a’ge enaik o,” oluk mo’gulentesi. 39Asogo mo’gulentesimu re, is ap Allah iak pelal wogo eiye a’ge pema en e, disogo mo’gulegisa,

“Nue. Hat wene o’go obat mo’gulentigen o,” oluk mo’gulegisema 40is ap logon en e, hin wo onogorlok agama re, hin wo erlakma en mo egesa.

“At Kristus ai ebe sa epegep,”

oluk mo’gulentesi wene

(Matius 22:41-46; Markus 12:35-37)

41Asogo mo egesa a’geat de, at Yesus en is disogo mo’gulentesi,

“Kristus Allah en yo’go poluk perakpou weik egei ano, ebe Daud en dogo’gwe a’ge o, oluk ogwi ai, no’gosogo holuk ogwi epegep. 42-43#Mzm. 110:1At Daud u’gwarek en buku Mazmur wene pam disogo egei,

’Gain Allah Onuk Logo a’ge en an nue ’gain Onuk Logo a’ge mo’guleselat e,

Aphwami hat heselei a’ge ebano hoyuk en al ’besilogo enebagun en,

an en owan he’bek onobou wom erlak oruakhwe,

an neragam ne’gik ’bekhit akhit hebe ’gainat hweriogo wolorogun o,

oluk Allah en Kristus mo’gulesi, oluk Daud en egeimu pelal wogo oruak ai re, 44at Daud en Kristus ebe paget,

Nue ’gain Onuk Logo a’ge, oluk egei a’geat de, is aphwami en,

Kristus ai Daud en dogo’gwe a’ge, oluk no’gosogo u epegep. Asogo u mia o,” oluk mo’gulentesi.

“Is ap Allah iak pelal wogo enaluk a’ge enebabut ai muatma re, henebabut heberlogo welemis o,” oluk egei wene

(Matius 23:1-36; Markus 12:38-40)

45At Yesus en wene asogo mo’gulentasukhwe, aphwami ’berlegat enesa’go hwelak oruakhwe, is at osi iak wogu legesa a’ge ebano disogo mo’gulentesi,

46“Is ap Allah iak pelal wogo eiye a’ge enebabut togwi ai en lalhonobuano oluk, henebabut heberlogo welemis o. Is ap ai enebabut e, onosum yat a’ge ’buktak poluk pasar o’go wogumu eba is aphwami en hau do’goksogo waronobuagoluk lagalat, o aphwami Yahudi a’ge se’ban ogumu ebano ap ’gain enebalema ’golokho hutla ’gugulat, aphwami seni lok sakho no’gumu ap ’gain huragaimu ebano ’golokho hutla ’gugulat, tugulom enagai welat togwi o. 47Asogo welat, hwami sugwe a’ge onowi werik emin, ena’ge emin, sebelhorlugularat de, aphwami en enesa’go holugulat e,

Is op, opou wagoluk se’ban yat wiak litluk lagai a’ge ano asogo togwi erlak wellepma re, Allah en wene weiyat enebam poluk wellep o. A’ge re, asogo togwi ai en, wene e’gin a’ge enebam poluk wiagabonobua ani o,” oluk mo’gulentesi.

Currently Selected:

Lukas 20: Wul

Highlight

Copy