Lukas 18

Hwe sugwe a’ge emin, ap ’gain a’ge emin,

enebam elitsogo mo’gulentesi wene

1Asogo mo’gulentesirik e, at Yesus en osi iak wogu legesa a’ge ebano se’ban ogu lemarik onogola ’buk otluk ukpo erlakma en, hwedik-hwadigat ogu lemagoluk, wene mesik ebam elitsogo disogo mo’gulentesi,

2“O seli mesik, ap ’gain a’ge wene enebam pasulat, no’gorliselat, tago a’ge mesik Allah ogorlok erlak welat, aphwami opsogo edeabenebiso erlak a’ge welaga. 3Asogo oruakma, hwe sugwe a’ge mesik ogo o seli anoat welaga. Welat e, nin erlige nan erlige ap ’gain ano e’bek wago modok welat e, disogo mo’gulese laga,

Ap mesik an ne’birek il ’belak a’ge hat en erlele woknobogun en wegi o, oluk mo’gulosu waga laga. 4Asogo mo’gulosu wagoam e, ap ’gain ano en naduk iak holu erlakma en, ebit hasu laga a’geat de, pobuk ede eberiselat e,

An nebabut e, Allah nogorlok erlaksogo welat, aphwami opsogo nedeabenebise legi erlak a’geat de, 5at hwe sugwe a’ge yu re, hwedik-hwadik derlelnobu wagoma re, owene hwalom erlakma en ukpoma re, ne’bek wago modok welat nogola mep sagal-’bagalsogo taga lema no oluk e, at owene ai hwaleigat o, oluk ogola epesi,” oluk Yesus en mo’gulentesi.

6Asogo mo’gulontoluk e, at nonue ’gain Onuk Logo a’ge Yesus en e, mesik disogo mo’gulentesi,

“Ap ebabut wiak a’ge hegitsogo tago erlak welat wene aphwami enebam pasulat, no’gorliselat, tago a’ge egei ai pobi tit o. 7Ai ’gela’ge, at Allah en eiyagai pulogo enebesi a’ge en hup erlige eniak ningsogo yo’go pogwi holuk e, erlele wogonobua erlak no? Eniak o’gonise lemarik en, pobuk holuk erlele wogonobua no? 8Erlak o. Perleneat erlele wogonobua o, oluk demat mo’gulhentegis. Asogo tagonobouwa a’geat de, an abat daklau wegi ano pobuk weiktik e, aphwami ’gwiangma a’ge yema logon enede nebam he’berik oruakma entau weik a? Erlak hwi a,” oluk mo’gulentesi.

Ap Farisi a’ge emin, ap uang pemerintah paget ’gonu oluk odoktago a’ge emin, enebam elitsogo mo’gulentesi wene

9Asogo mo’gulentesimu, is aphwami pema akhit ebano onogola en e, disogo opogu legesa,

“Is aphwami ’berlegat yema mia ’gela’ge a’geat de, nis yu nak e, nenebe logo welat hegitsogo togu lege o,” oluk opogu legesema re, at Yesus en wene ebam elitsogo disogo mo’gulentesi,

10“Ap enebe ’biren a’ge se’ban uogoluk, Allah owi werikmu ’gwi legesa. Ap mesik e, Farisi a’ge. Ye, ap mesik e, uang pemerintah paget ’gonu oluk odoktiso a’ge. 11E’birek ’gwi legesarik se’ban ogulat, ap Farisi a’ge ano inagarik se’ban ematekma eselat e, disogo egei,

Naik Allah o! An nebabut e, aphwami ’berlegat enebabut ’gela’ge re, erlak o. Is aphwami yogunat yogorlia wogwi a’ge emin, hegitsogo togwi erlak a’ge emin, hwami ’babi tenontogwi a’ge emin, ap uang pemerintah paget ’gonu oluk odoktogwi a’ge yu emin, enebabut ai ’gela’ge re, an asogo modok tiso erlakma no oluk e, hau wathebise legi o. 12An e, se’ban mesik ogola agauwa ’birenam so’boru nasu erlagat hweyang ’gela’ge poluk welat, na’ge di a’ge yu a’ge pagathwerlasu a’ge, ’berlegat wenakho re, 10 lau wagoam e, mesik hat hebasulat, tago yo. Naik, oluk egei a’geat de, 13at ap uang pemerintah paget ’gonu oluk odoktiso a’ge ano nak e, ebe walekma edik welat odogun ’gonnuksogo il ’bogorl akhit likho erlakma en ogorloksogo welat, e’gik en ede pukhasulat e, disogo egei,

Naik Allah o! An wiak tiso a’ge yu, hede niemen o, oluk mo’gulesi. 14#Mat. 23:12; Luk. 14:11Is se’ban asogo egesa ai paget, an wene mesik mo’gulhentaik. Ap sa en ede logo pagathorloluk erlikhwerlasu holuk e, Allah en sebelak pasu o. Ye, ap sa en u’gwarek ede sebelak pasulat,

An mia, epasu holuk e, Allah en logo pasu ai en e, at ap se’ban naduk egei a’ge ai, Allah en wene ebam a’ge erlagapsogo ukpo erlakma en mo egei. A’geat de, at ap se’ban pobuk egei a’ge ai nak e, Allah en wene ebam a’ge erlagapsogo ukpesimu owi pam laga o, oluk mo’gulhentegis,” oluk mo’gulentesi.

“Malik wei a’ge eba ne’bek wemak o,”

oluk mo’gulentesi wene

(Matius 19:13-15; Markus 10:13-16)

15At Yesus en asogo mo’gulentesirik oruakma, pobuk aphwami en enemalik wei a’ge Yesus en e’gik enebam pou wagoluk e’bek wogonoboluk wegesa. Asogo wogonoboluk wagaiam e, at Yesus osi iak wogu legesa a’ge ebano en enil ontoluk e, wene yagentigisa. 16Asogo wene yagentigisa a’geat de, at Yesus en malik wei a’ge ebano wemagoluk worlentesimu wagaihwe re, at iak wogu legesa a’ge ebano disogo mo’gulentesi,

“Aphwami enebabut is malik wei a’ge eba enebabut ’gela’ge ema holuk e, Allah en eragam enebasumu eba eiye ema ai en e, malik wei a’ge eba an ne’bek wemak o. Wene ’balogup. 17Sa en, malik wei a’ge Allah en eragam enebasu wene ai wik-wok ’gwi lagai ai ’gela’ge ’gwi lagai erlak holuk e, ’gwi louwa modok erlagat o, oluk demat mo’gulhentegis o,” oluk mo’gulentesi.

Ap ’gain a’ge a’bik a’ge Yesus e’bek waga wene

(Matius 19:16-30; Markus 10:17-31)

18Asogo mo’gulentasu lagama re, is ap Yahudi a’ge onue ’gain mesik en e, Yesus disogo mo’gulesi,

“Nue. Wene mo’gulnentasu legen ai, hat obat o. An noburlal-hoburlal om a’ge eiye eik en, an nebabut no’gosogo taga leik o,” oluk mo’gulesimu, 19at Yesus en e, disogo mo’gulesi,

“Hat op o, oluk mo’gulnigen ai re, no’gosogo oluk mo’gulnigen. At mesik op e, erlak o. We, at Allah ematek nagat op o. 20#Kel. 20:12-16; Ula. 5:16-20Wene Allah en,

Disogo tip, asogo tip, oluk nenesa’go weriselat e, disogo egeimu oruak o,

’Babi tenentagup o.

Aphwami enebe waronobogup o.

Yogorlia wagup o.

Henepenenat lalholuk onobok ’balogup o.

Henialak henaiklak eniak hologo hau do’goksogo waronobogu lomup o,

oluk nenesa’go weregei ano hat halugat o,” oluk mo’gulesimu, 21at ap ano en e, disogo mo’gulesi,

“Wene mo’gulnigen ai ’berlegat e, an nebe malik wei a’ge pam enat nesa’go hwelak welat hegitsogo taga legi a’geat o,” oluk mo’gulesimu, 22at Yesus esa’go hwelegeirik e, disogo mo’gulesi,

“Wene mesigat nak e, tu erlak welegen o. Hat ha’ge ebano perlengsogo is logon enebam o’go ’balogo sabusi lak o. Saborogun a’ge ebano is aphwami pema ena’ge erlak welat enerlagaik a’ge ai modok so’busogo wogontomup o. Asogo arat wogentagunmu re, hat ’bogorl pam a’ge loksogoat eiye orogun ani o. Holuk e, asogo arat so’busogo wogontoluk e, an ne’berlik noso lorogun en manup o,” oluk mo’gulesimu, 23at ap ano esa’go hwelegeitik e, a’ge modok a’bikmu no oluk e, ogola modok wiak aga. 24Asogo ogola wiak agama re, at Yesus il enak a’ge yetholuk e, osi disogo mo’gulentesi, “Eige. Nogorlok e. Aphwami ena’ge a’bik a’ge Allah en eragam enebasumu eba no’gosogo ’gwilo ’gela’geat o. 25Wam unta lok a’ge ai hin ele’gwe ’gwelabumu re, elit sollongsogo ’gwilo a’geat de, is aphwami ena’ge a’bik a’ge Allah en eragam enebasumu eba ’gwilo modok mia o,” oluk mo’gulentesi. 26Asogo mo’gulentesimu, is aphwami ebano enesa’go hweligisarik e, at Yesus disogo mo’gulegisa,

“Holuk e, Allah en aphwami salak ’gela’ge nak e, elit delonobu logwe,” oluk mo’gulegisema, 27at Yesus en e, disogo mo’gulentesi,

“Aphwami en tu re, modok mia a’geat de, at Allah en di bele yu bele tu nak e, elit o,” oluk mo’gulentesi.

28Asogo mo’gulentesimu, at Petrus en e, disogo mo’gulesi,

“A’ge re, nis hat he’berlik no’gu lomogoluk nena’ge di a’ge yu a’ge ukpoluk wegerik hemin no’gu lege a’ge yu nak e, no’gorak,” oluk mo’gulesimu, 29-30at Yesus en e, disogo egei,

“Sa en Allah eragam weleigoluk holuk e, owi werik emin, ugwe emin, ue ari emin, aik ia emin, eiyagai emin, ugonoboluk wago holuk e, o yogodak ya pam welat ebalema modok a’bik ebam louksogo wogema o. Ye, o pobuk ema eriano pam welat, noburlal-hoburlal wogemayat o, oluk demat mo’gulhentegis o,” oluk mo’gulentesi.

“An watnobua o,” oluk obok e’gik ’birenam mo’gulentesirik en, pobuk henaganak a’ge mo’gulentesi wene

(Matius 20:17-19; Markus 10:32-34)

31At Yesus en wene asogo mo’gulontoluk e, osi enebe 12 ebano wogonoboluk e, enematekma ’geksogo legesarik disogo mo’gulentesi,

“Nosi o. Nis yogodak o Yerusalem ’bugu lege ai o. Arat ’bilulmu re, is ap naduk Allah iak mo’gulontogu legesa a’ge ebano en e, an abat daklau wegi ano pobuk taknobouwa a’ge pelal wokho pegesa a’ge hegitsogoat taknobouwa ani o. 32Nebe watnobuagoluk, yo’go loluk is ap o’borlma a’ge ene’gikmu nobouwa ani o. Nobouema, eniak esegen yaknogulat, was topuktak nobogulat, 33lagal’bisok ’go’bu watnobogulat, toluk e, nebe modok watnobua o. Watnobuema, agauwa ’biren werak weleiktik en, henaganak a’ge en de, nelaluk eik ani o,” oluk, 34asogo ’baksogo mo’gulentesi a’geat de, hisogo a’ge egei oluk, at osi ebano en e, no a’ge paget egei, oluk nelak pegesa.

Ap il hopnik a’ge mesik dektak pesi wene

(Matius 20:29-34; Markus 10:46-52)

35At Yesus o Yerikho ’gwi laigoluk horok lai laga ’gal e, ap mesik il hopnik a’ge welat emde ’gonu wiak ese laga a’ge ebela pam eriano hweriogo oruakma re, 36aphwami eniak a’bik il lagaimu esa’go hwelegeirik e, disogo mo’gulentesi,

“Eniak eba, no paget il wagai,” oluk hin wesi. 37Hin wesimu, is en e, disogo mo’gulegisa,

“Yesus owi Nazaret a’ge ano ebela ’go yu wago en ogwi o,” oluk mo’gulegisema, 38ap ano en iak loksogo eselat e, Yesus disogo mo’gulesi,

“Yesus Daud en dogo’gwe a’ge nue a! Hedeapnebin a,” oluk mo’gulesimu, 39is aphwami naduk legesa a’ge ebano en e,

“Hiak o,” oluk wene yagegisa a’geat de, pobuk ebenagaikmu iak loksogoat disogo mo’gulesi,

“Daud en dogo’gwe a’ge nue a! Hedeapnebin a,” oluk mo’gulesimu re, 40at Yesus ebe duksogo inagarik e, aphwami ebano disogo mo’gulentesi,

“Ap ai woluk manis o,” oluk mo’gulentesimu, ap ebe ano Yesus eragam pou wegesema, at en hin wokhasulat,

41“An en no’gosogo takhobouwagoluk mo’gulnigen,” oluk mo’gulesimu, at ap ano en e, disogo mo’gulesi,

“Nue e. Nil yu dektak nebagun en mo’gulhegis o,” oluk mo’gulesimu, 42at Yesus en e, disogo mo’gulesi,

“Hil hopnik a’ge ai dek in o. Hat hede nebam he’berik pegen ai pamat op e’gen o,” 43oluk mo’gulosokhwe erianoat, il hopnik a’ge ano op agarik Yesus e’berlik lasulat e, Allah erliktil laga. Ye, is aphwami pema akhit ebano Yesus en tegei a’ge ai enil hegesarik e, is en ogo Allah erliktigisa.

Currently Selected:

Lukas 18: Wul

Highlight

Copy