Yohanes 14
14
At Yesus en, “An o his wolomma eba degeli laik o,” oluk wene weragenebesi wene
1At Yesus en wene asogo mo’gulentesirik e, pobuk e, mesik disogo mo’gulentesi,
“Neiyagai. His honogola en e,
Eige, oluk henede perik wolorogup o. Henede Allah pam he’berik pogulat, an nebam ogo he’berik pogulat, togu lemis o. 2An naik owi pam eba re, o his wolomma eba ebale a’bik selak oruak o. Asogo erlak wellepma re, an o his wolomma eba degeli laik, oluk wene werakhenebele erlak o. 3An o eba arat laiktik e, his honowi arat degelogo poluk, an weleikmu eba nemin wolomul en oluk, togolik wokhenebil weik o. 4Ye, o an laikmu ai, ebela ebe his henalugat o,” oluk mo’gulentesimu, 5at Tomas en e, disogo mo’gulesi,
“Nue. O hat lagunmu ai nis neneperlakma re, ebela ai no’gosogo en nenaluk om o,” oluk mo’gulesimu re, 6at Yesus en e, disogo mo’gulesi,
“Ebela emin, dem wene emin, aphwami waragai a’ge enelalugabenebiso a’ge emin re, an nebeat o. At ap sa en an ne’bek wago erlak holuk, an naik oruakma ’bekhit ’gwilo modok mia o,” oluk mo’gulesirik, 7is ’berlegat mo’gulentasulat e,
“His an nebe henaluk egep ai re, an naik ogo henaluk emayat o. Henaluk ema ai re, hwerli yogodak hwerli en, at ebe henaluk agalat, henil hogulat, arat hogu legep o,” oluk mo’gulentasu lagama, 8at Filipus en e, disogo mo’gulesi,
“Nue. Nenil holuk nenede ha’buksogo welemagoluk, hat haik ai ebe mo’gulnentemen o,” oluk mo’gulesimu, 9at Yesus en e, disogo mo’gulesi,
“Filipus not o. An o pageat eba enat nenemin welege a’geat de, hat en an nebe pobi nobu erlak welegenma hegi o, i a? Ye, ap sa en an il niesi ai re, an naigat il hesi o. Asogo a’geat de, hat en,
Haik ai mo’gulnentemen o, oluk e’gen ai re, no’gosogo oluk en egen. 10An en naik ne’birek hwedik, ye, naik en an ne’birek hwedik, welege ai, hat pobi taga legen erlak a?” oluk mo’gulesirik e, is ’berlegat mo’gulentasulat e,
“An en wene mo’gulhentasu legi ai re, an nogola en ’gagalogo mo’gulhentasu legi puk. Erlak o. We, an naik ne’birek hwedik welat, an niak pam en eselat, ne’gik pam en tagalat, taga legi a’ge ai, at u’gwarek enat tago yo. 11An en e, naik e’birek hwedik, ye, naik en e, an ne’birek hwedik, welege o, egi ai, demat oluk, his pobi tit o. Ai pobitu mia holuk e, an tise legi a’ge ai henil holuk, pobi nebit o. 12At ap sa en ede an nebam he’berik pasu holuk e, an taga legi a’ge ai, at en taga lemayat o. An taga legi ai re, weiyat ’gela’ge a’geat de, an naik e’bek laik ai en e, at ap sa en ede an nebam he’berik welago a’ge ai en ebenagaikmu loksogoat taga lema o, oluk niak demat mo’gulhentegis o. 13Ye, at ap sa en, di a’ge yu a’ge an nonuk ’balogo Allah ’gonu mo’guloso holuk e, an omlogo en tagokhwe, is aphwami en naik erliktuagoluk, an en tik o. 14Asogo tik ai en e, his en di a’ge yu a’ge an nonuk ’balogo ’gonu mo’gulnogu lemis o. Asogo ’gonu mo’gulnogu lorogup holuk e, an en tik o,” oluk wene weragenebesi.
At Yesus en, “Allah Arogun wokhentaik o,”
oluk obok mo’gulentesi wene
15At Yesus en wene asogo weragenebesirik e, wene mesik disogo mo’gulentesi,
“His en an henede hwedik holuk e, an en ogo his disogo togu lemis o, asogo togu lemis o, oluk mo’gulhentasu legi a’ge ai togu lorogubat o. 16-17Asogo togwiam, his lethentasulat, henemin modok welemagoluk, an en naik ’gonu mo’guleikmu, at en mesik ’belakhonobouma o. At ai ebe re, Allah Arogun dem wene mo’gulhentasu lema a’ge. Asogo henebam ’belakhonobou womma, is aphwami ’gwiangma a’ge en, at ai ebe eneperlagat o. Ye, ebe enil houwa erlagat, ai en e, ebe wo miayat o. Asogo a’geat de, his nak e, at ebe henemin welat, honogola modok welema ai en e, at ebe henaluk wolorogup o.
18An ogo re, his henebe malik se’bin a’ge ’gela’ge ukhonoboluk laik erlak o. We, pobuk togolik hentau weigat o. 19Agauwa wei nak weleiktik e, aphwami ’gwiangma a’ge enil modok niouwa erlak a’geat de, his nak e, an nalugat weleik, ye, his pobuk henalugat wolorogup ai en e, henil niagup o. 20Asogo henil niagup ai erlige re, an naik ne’birek hwedik welege, ye, his an nemin hwedik, ye, an his henemin hwedik welege a’ge ai, henaluk ema o.
21At ap sa en, an en, disogo taga lomup, asogo taga lomup, oluk mo’gulhentegis a’ge ai, niak hwelakpoluk tago holuk e, an nebe ede hwedik a’ge at ebe aiat o. Ye, naik en ogo at ai ede hwedigat o. Ye, an en at ai nede hwedik welat, nebe pobi nobuagoluk mo’guleik o,” oluk mo’gulentesimu, 22ap Yudas Iskariot ano puk. At e, Yudas ap muat a’ge mesik en e, disogo mo’gulesi,
“Nue. Hat hebe pobi hobuagoluk, aphwami ’berlegat mo’gulonto erlakma en, nis nak mo’gulnentagun ai nopaget en,” oluk mo’gulese lagama, 23at Yesus en e, disogo mo’gulentesi,
“At ap sa en an nebe ede hwedik holuk e, an niak hwelakpoluk taga lema o. An niak hwelakpoluk taga lemma re, naik en at ai ede hwedik welema o. Asogo welat, an naik emin ap ai e’bek wotluk, at emin modok hwedigat wolomul o. 24Ye, at ap sa en, an nebe ede hwedik erlak holuk e, an niak hwelakpoluk tiso erlak ebe aiat o. An niak his hologu legep ai re, an niak a’ge puk. We, an naik peraknobou waga a’ge ano iagat o.
25-26Wene ai an nebe his henemin welat, mo’gulhentasu legi. A’geat de, an naik en at Arogun his lethentasu lemagoluk, an nonuk pam ’belakpou wemma re, at en di wene yu wene ’berlegat mo’gulhentasulat, an en mo’gulhentasu legi a’ge ai ’berlegat honogola ebethentasulat, taga lema o.
27Holuk e, his henede ha’buksogo welemagoluk an nede ha’buksogo welago a’ge wokhontoluk laik o. Ai re, aphwami ’gwiangma a’ge en wogontogwi ai ’gela’ge wokhentaik erlak ai en e, henede perik welat honogorlok hagup o. 28An laik a’geat de, pobuk togolik hene’bek weik o, oluk mo’gulhentegis ano arat henesa’go hweligep ani o. An nebe henede hwedik wellepma re, an naik ebe logo a’ge, ye, an nebe mia ai en e, an naik e’bek laik ai paget honogola henagai helep o. 29Wene ’berlegat mo’gulhentegis ai ebe demat ago holuk, his en e,
Wene mo’gulnentesi a’ge ano arat demat aga o, oluk pobirak poluk, henede an nebam he’berik pagup en oluk, wene ai ebe owan ago erlak oruakhwe, obok naduk mo’gulhentegis o. 30Aphwami ’gwiangma a’ge onue ’gain ano ebe wago ai en e, an wene a’bigat mo’gulhentaik erlak o. At ai wema a’geat de, an at e’gik pam welegi erlak o. 31Asogo a’geat de, an naik nede hwedik welegi ai aphwami ’gwiangma a’ge enaluk emagoluk, an naik en nesa’go wusogo mo’gulnoso a’geat taga legi o,” oluk mo’gulesirik e,
“Nosi o. Lul en inemis o,” oluk mo’gulentesi.
Currently Selected:
Yohanes 14: Wul
Highlight
Share
Copy
Want to have your highlights saved across all your devices? Sign up or sign in
