Kejadian 31

Yakub en ami Laban e’birek welegesarik pobuk ugoboluk laigoluk tagalat wene wat-wat egesa a’ge

1At Laban eiyagai en,

“Nis nenaik emining a’ge ’berlegat Yakub nak hwerlesi o. Asogo takpoluk ap e’gikmu oruak a’ge ’gela’geat tak pagathwerlasu o,” oluk ogukhwe, at Yakub esa’go hweliselat, 2ye, at laban epema o naduk welaga ano ’gela’ge erlak muat agoma hasulat, tegei.

3Asogo tagoam, at ’gain Onuk Logo A’ge Allah en Yakub mo’guleselat,

“Hat yagodagat o yema ukpoluk, howi pam hia haik, hue hari oruakma entai lak o. Lasukhwe an en ukhobo erlakma en ’gwelakhiarok welik o,” oluk mo’gulesi.

4Mo’gulesimu, at Yakub en ugurami Rahel Lea e’birek o leimu kambing domba ’gwelakharok oruakma il haumagoluk yo’go perakpesi. 5Asogo enil ’gogol hau wegesema, mo’gulentasulat e,

His hwami yu logwe.

“His henaik orogole naduk op disogo welaga ano so’go oruakma hegi erlak a’geat de, an naik Ishak ano aik Allah nak e, an uknobo erlakma en nemat oruak o. 6’Gwelakniarok oruakhwe his henaik paget yabuk nanni a’bik set li-lagaksogo takpasu legi a’ge ano his henalugat o. 7Asogo yabuk taga legi a’ge, O’go asogo wokheik o, oluk mo’gulnesi a’geat de agauwa 10 a’ge pam mu-miarak nebasulat, o’go hegitsogo woknoum erlakma e, mi-miarak nebasulat, o’go hegitsogo woknoum erlakma en tegei a’geat de, enebe nak e, wiagap nobouwa no oluk, Allah en at hwerli ’balogo welaga o. 8At Laban en eselat e,

Kambing domba asu esing ’gut dagago a’ge ano re, hat yabuk tago o’goat wokhogu lomul o, oluk oso holuk, kambing domba ia ’berlegat enemalik enasu esing ’gut wi’be’gen ’balhegei nagat dogonobogulat, ye, kambing domba asu dape’gek dago ai re, hat yabuk tago a’ge ano o’goat wokhogu lomul o, oluk oso holuk e, kambing domba ia ’berlegat enemalik enasu wi’be’gen dape’gek ’belak a’ge nak dogonobogulat togwi holuk e, ai pamat, at 9Allah en his henaik uam ebano ’erlegat wokho an nak woknesi o.

10Ye, kambing domba ebe iie nil lasu eriano pam e, an agauwa mesik pam nabi pam hasulat, kambing ie nouwagoluk tagoam e, il ’gut lek esing lek wi’be’gen dape’gek asu il mumuat dagagokhwe nil yethegi o. Asogo ie nil lasukhwe, 11at Allah en yo’go peragenebasu a’ge malaikat ano en e,

Yakub o oluk mo’gulnasoam en, an en e, welegi o, oluk mo’gulogoam e, 12At malaikat ano en e,

Kambing ierak enasu wi’be’gen ’belak a’ge emin, esing ’gut ’belak a’ge emin nak oluktak nagat na’gwi ai yerentemin o. At Laban en hat takhebil lasu ano, nil hiegirik, polik pegi o. 13#Kej. 28:18-22Hat en o Betel pam en habi hegen a’ge ano heperlak agoma no oluk, helep uak werik a’ge ano wokho edikpoluk, e zaitun e’gen a’bosu helep ano pam herlilogo pasulat, nonuk ’balogo ho’buk ’balu erlige ne’birek la’bolige a’ge ano haik Allah anat o. Yogodak o yema ukpoluk haik owi togolik lak o,” oluk mo’gulentesi.

14Asogo mo’gulentesimu, is Lea Rahel e’birek en e Yakub disogo mo’gulegisa,

“Di a’ge yu a’ge at nenaik emining a’ge ano nis woknonto a’ge oluk mesik uknenebesi epegen a? 15Nis aphwami parema a’ge eneiyagai ’gela’ge taknonoboluk, nenebe nono’go wasulat, ado pema nis woknonto a’ge at nagat nasulat, tegei ano erlak a? 16Ai tegei ai pam nenaik en a’ge nis nenemalik nenemin woknonto a’ge Allah en wokho hat nak wokhesimu re, at Allah en mo’gulhesi a’ge ano hegit-hegirat tuok o,” oluk ma’gulegisa.

17-21Mo’gulegisema, at Yakub aik Ishak o Kanaan oruakma hau wom a’ge paget di-degel takpasulat, at Laban ano domba asu ’balilasuam e, hwe Rahel ano en at aik laban odogwi asua mesik hisakho yagat hwerlasulat, at Yakub en ugwe malik enemin wam unta o’borl pam hweriogo oruakhwe louwagaluk yaro’gwik enebasulat, o Padan-Aram welat, a’ge di a’ge yu a’ge odoktegei a’ge emin, uam emin, ebano hwerlasulat takpoluk,

“An yogodak nowi pam laik o,” oluk, ap Aram a’ge onuk Laban ano mo’guloum erlakma en e, lelak paluk ena’ge di a’ge yu a’ge ’berlegat horloluk ik Efrat ano ebagase ’balogo, dom ligom-’bugom o Gilead ebano lau wegesa.

At Laban ano Yakub e’bek waga wene

22At Yakub ano wagama, agauwa henagan welegesarik, at Laban disogo mo’gulegisa,

“At Yakub ugwe emalik enemin ebano o arat ’bogoligisema o,” 23at Laban en osilak odogenebegeitik, Yakub e’berlik motluk wegesa. Nogo 7 pam nogwil wagalat, at Yakub ano dom ligom ’bugom o Gilead ebano oruakma ebe haumogoluk horogat lau wegesa. 24Asogo horok lau wegesarik, o hup nogo ogwi oruakma Allah en ap Aram a’ge Laban ano abi pam disogo mo’gulesi.

“Hat Yakub he’birek la’bolik poluk e, at ogorlok houwagoluk, hiak wiak a’ge logon u no, oluk e, pobirak pomup o,” oluk mo’gulesi.

25Mo’gulesimu, at Yakub ano, o Gilead dom hogorlakma owi sobo uthorloluk oruakma, at Laban e’bek wagarik osilak enemin ebayat nogo uogoluk osabo werigisa.

26Werik pegesarik, at Laban en Yakub disogo mo’gulesi,

“Hat no’borl pam ligagalat, hwami nogolani wing yogunat ’gela’ge wogonoboluk wegen yu, nopaget tigen? 27No pagerat lalogo no’borl pam ligagalat, an mo’gulnoum erlakma en hisak-hisak ’bogulogo wegep? Hat en, an yogodak nowi pam nia naik oruakma nil ’gwelak entai laik o, oluk mo’gulnetlinmu en e, ’bigong iak inghogwi a’ge emin, iak inghogukhwe weni wusogo nonogola nenagai pam perakhonobouwalo a’ge de, an mo’gulnigen erlakma o. 28Nogolani ne’balak hau nemde motok weragenebasulat teli a’ge logwe. Hat e, uo a’ge ’gela’ge hede erlak enat takpoluk wegenma ol. 29An nanni a’bigatma re, modogat wiagapsogo paigolugat wegimu re, hup ede ’burl nogo osoma, haik Ishak aik Allah en nabi pam mo’gulneselat,

Hat Yakub he’birek la’bologuptik at ogorlok houwagoluk hiak wiak a’ge logon osoma no oluk pobi tip o, oluk mo’gulnesi ano pam we, ukhebegi o. 30Yogodak hat howi pam haik hia ene’bek laik, oluk epegentik wegen ai obat a’geat de, an en a’ge nodogwi asua nak e, no pagerat yogorlia hisatluk wegen o?” oluk mo’gulesi. 31Asogo mo’gulesimu, at Yakub en,

“Hat heiyagai yema ne’gikmu a’ge delogo onobouwa hwia? oluk niak erlak wogonoboluk wegi o, nami. 32Ye, hat hodogwi ai nak de, sa en woluk wagarik tenakho oruakma hil haguntik holuk e, at elaluk welema erlak modogat wusogo po yo. Nis ’berlegat nenil pam ha’ge a’ge mesik emin lo’boksogo woluk wagama hil haguntik holuk en ogo re, daluksogo delhwerlagun nagat o,” oluk mo’gulesi. At Yakub en Laban odogwi ugwe Rahel en hisatluk waga a’ge ano eperlakma no oluk e, asogo mo’gulesi.

33Mo’gulesimu at Laban ano en e, Yakub owi saboma ’gwi lotluk heratagalat, hwe Lea owi saboma ’gwi lotluk heratagalat, pobuk is hwelani eneragam a’ge enebe ’biren eriano onosaboma ’gwi lotluk heratagalat, asogo til lagarik modogat erlak en e, pobuk togolik nin at Rahel owi saboma heratil ’gwi lasumu, 34at hwe Rahel en e, aik odogwi ano wam unta o’borl pam poluk huragaimu lekho sebelak poluk o’borl pam sebelogo hweriogo oruakhwe, aik ano en e, heratil modok tegei a’ge re, modogat erlak en e, 35agalogo Rahel ebale hweriogoma ebano haigoluk tagoma hwe Rahel ano en selat,

“Naik o. An yogodak o dugwi hasu legimu re, hil pam inom mia enat welegimu re, wene yaknorogun no yo,” oluk osokhwe, asua a’ge ano herahesi a’geat de, hwiaru modok erlak welaga.

36Asogo tegei ai en e, at Yakub olot het en ebam harowiak agarik, at Laban wene yageselat,

“Nami o. An no tegis? An en logon wiak ’gesogo takhebegimu en de, hat en muknoboluk hebegimu en de, hat en muknoboluk-naknoboluk nese legen? 37Nena’ge oruakma ’berlegat eden-pedensogo hil hegen a’ge ano re, hat en a’ge mesik woluk wegesa oluk epegen a? Erlak a. Wegen holuk e, hat hosi emin, an nosi emin en nonuak lolnonobuagaluk ha’ge wegen a’ge ai, neneragam pei suk o.

38An hat ’gwelakhiauwiktik 20 tahun pam ne’birek nemin welat, huam degelisokhwe kambing domba enemalik derisokhwe, mesik delogo pagathwerlasu legi erlak ani o. Ebe ogo re, mesik wusogo nasu legi erlagat ol 39Mene en huam ebano wusogo lebilogo nasulat, hat hebaget logon wokhosuam erlakma re, an enat ebalema wokhosu agalat, erlige yen huba’go hwerli aphwami en yogorlia hisarogwiam,

40Ebelema pemen o, oluk mo’gulnogwi holuk ebalema pasulat, taga legi ani o. Ye, erlige holuk e, mo orluktak taknebasulat, o hup ede’burl holuk e, sogwei nebam agalat, opsogo nogo erlagat welegi o. 41Asogoat tagalat nemin welat, 20 tahun tegis o. Ye hat heiyagai enebe ’biren ya woknerinogoluk hiyabuk tagokhwe 14 tahun tagalat, ye, kambing domba woknerinogoluk ogo re, 6 tahun pamat tegis ani o. Yabuk taga legi ne’gik o’go, Disogoat wokheik o, oluk e’gen a’ge ebano re, ne’gik 10 pamat hegitsogo woknoum erlakma en mi-miarak nebasu legen ano yo. 42An naik Ishak aik Allah emin, Abraham aik Allah emin, ye, at Ishak en Ogorlok Tago a’ge emin, ano en an ’gwelakniarok wellep erlakma en e, hat en an ne’gikmu mesik po erlakma en weat mukho peraknobou welep a’geat de, an di obotut yu obotut taknebasukhwe hat hiabuk ning-nangsogo til lasu ano, at Allah en yetniesimo re, hat hup nogosoma re, wene mo’gulhesi aiat o,” oluk mo’gulesi.

At Yakub Laban emin wene ’balegisa wene

43Mo’gulesimu, at Laban en Yakub mo’guleselat,

“Is hwellani ya e’birek e, an neiyagaiat, Enemalik ogo re, an ne’balak at o. Kambing domba ogo re, an na’ge nak o. Ye, di a’ge yu a’ge hat hibhasu legen a’ge yema re, an na’ge nagatma re, is hwami yu enemin, enemalik emin, an no’gosogo en de, tagonobo yo? 44Asogo tu erlakma re, wene disogo ’balige ano o, oluk nenedemu eberak wolomok oluk, hat nemin wene mesik ologun deksogo ’balogo pouwok o,” oluk mo’gulesi.

45Mo’gulesimu, at Yakub ano en helep mesik wokho enaluk emagoluk edikpoluk 46ugwe emalik mo’gulentasulat,

“His ’berlegat hene’gik dawi helep wik-wok odoktu manis o,” oluk mo’gulentasuam e, helep ano wik-wok at odoktak pasumu ebano odoksogoat pou wegesarik, odoktak pegesema eriaano hurottuk, so’baru ne’gesa. 47So’boru ano arat noluk, at Laban en helep uak werik pegesa a’ge onuk e, Yegar-Sahaduta tualegei. Ye, at Yakub en e, onuk Galed o, oluk tualegei.

48Asogo tigisarik, at Laban en Yakub disogo mo’gulesi,

“Nis ne’birek wene ’balogu lege yu, neneperlagap nenebasumu no oluk, helep agabak a’ge yu nenil yetholuk eberagat nenaluk aga lemagoluk, helep uaak werik lagabak a’ge onuk e, Galed o,” oluk egei. 49Ye, at Laban en e, wene muat mesik eselat e,

“Hat ne’birek la’bolik erlak hat homu, ye an nomu oruakhwe ap weim wagaimu no oluk, weim yenal enil welagai ’gela’ge, at nenaik ’gain Onuk Logo A’ge en ilen woknenebisoat welema o,” oluk egeimu re, o ai onuk mesik e, Mizpa ya togu legesa. 50Pobuk laban wene ado pema eselat,

“Ap mesik ne’birek welagai erlakma re, oluk an neiyagai yu wia’gapsogo enebasulat, an neiyagai oruakhwe, hwami muat a’ge mesik wasulat, tago holuk e, an ogo hat ogo re, Allah ilen woknenebisokhweat de, tul o,” 51oluk Yakub wene mesik emin mo’guleselat,

“Helep mesigat nak edikpasulat, ado pema ’bullak pege a’ge yema nemin wene ’balige a’ge ano eberak wolomok oluk pege o. 52Helep lagabak uak werik yu emin, ye, wene nemin ’balige a’ge neneperlak agoma no oluk, helep mesigat edikpege a’ge yu emin, e’birek nenil yetholuk nenaluksogo pege a’ge yu oruakhwe, ebam hwik hat en an wiagap nebil wagalat, ye, an en hat wiagaphobou wagalat, tul modok eragat o. 53Wene werak yu oruakhwe muat mesik togwi holuk e, Abraham aik Allah emin, Nahor aik Allah emin, e’birek enaik aik Allah emin en ne’birek uak lolnenebise lema o,” oluk, wene ologun ’balogo egesa.

Asogo ologun ’balegisarik, at Yakub en e,

“Naik Ishak aik Allah ogorlok tiso a’ge ano uak o,” oluk ho’buk ’alegeitik 54dom ano pam domba mesik Allah akhit wusogo sogo poluk arilak eba welagai a’ge ebano enebe ’berlegat worlentegisema wagaiam e, seni ano is enebe ’berlega ne’gesa.

55Ye, tono hubet, at Laban ano en e, ogolani ebalak hau emde motok-motok warenebise lasulat ede aganhan enebam pasu lagarik pobuk togolik owi pamat ’bok laga.

Currently Selected:

Kejadian 31: Wul

Highlight

Copy