MATIYUT 18

”Aap nggwok ti, ta o?” yereegwaarak wone

(Mrk 9:33-37, Luk 9:46-48)

1O ti eyom paga at oone waganggwi nogo nen Yetut owagam wogo nogogwaarik, yogo logonet, ”At mbogut paga mendek abu'me piige minggim mondok nggwok logorak ta o?”

2Yogo mbareegwa, elege wiireegerak wage mbareegi, inenggela'me mippunuk, 3”Kit aap yi, kiniki yunggu yinuk, elege mbuulogwe yogop yi arumunggup lek kenok, at mbogut paga mendek abu'me piige minggim unggwi namunggup abu lek o, yinuk, abet aret yokkiragi o. 4Aap ambi nen elege yi pogom iniki tebeppake kenok ti, at mbogut paga mendek abu'me piige minggim mondok nggwok at aret logogin o. 5Ndi, aap ambi nen, An Yetut oone wagangge menggerak mendek aret o, yinuk, elege yogop mendek ambi wagangge kenok ti, an aret wa'nake o,” yinuk, yoragagerak.

Maluk eeriyak ee'ninake kenok, eeko logorak wone

(Mrk 9:42-48, Luk 17:1-2)

6Yetut nen wone ambinom yorage logonet, ”It aakumi nen elege-aabologwe iniki an noba panggombunuk abet nombako menggaarak yi, maluk eeruwak nduk, inikime manabi wagaatak paga maluk eekwi iinok ti, yugum nggwok paga inenggaanok keele yilinogo punuk, yi alogup ambik me mbo mambiyoorak op o. 7Kit o nggween paga yime maluk eeriyak nduk, eekkinake ti wonage aret me, kinabuwa o. Maluk eeriyak eekkinake nogo ti, logogin aret kwe, it maluk eeriyak nduk eekkinakwi iinok perak, inabuwa o.

8Kineenggi-kiniyok imbirak wonage kagak, kani omoonuk wunuk mban ari minggim time mbo nappinagarak ti, abu maluk aret me, kineenggi-kiniyok nogo paga maluk eeriyak eekkinake kenok, mbanogo nappinip o. Mbanogo nappunuk, kineenggi-kiniyok peenok mbanak kagak, ineenik eeginake minggim unggwi noorak ti, op o. 9Ndi, kinigen imbirak wonage kagak, kani omoonuk wunuk mban ari minggim time mbo nappinagarak ti, abu maluk me, kinigen paga maluk eeriyak eekkinake kenok, kilirogo mbo nappinip o. Kilirogo mbo nappunuk, kinigen peenok lek kagak ineenik eeginake minggim noorak op aret o,” yinuk, yoragagerak.

Wam ndomba kobak agagerak wone

(Luk 15:3-7)

10-11Yorage nagagirik, ”It elege-aabologwe inarum wako menggaarak mbogut paga yonggo nugu menggaarak melaikat nogo nen an nogoba mbogut paga mendek enggaanom paga mondok-mondok paganogo yogo menggaarak me, kit nen elege-aabologwe yi, meek inombakwi kiyo, kiniki liippogo logonip o,” yoragagerak.

12”Kit nonggop mbako ogotik? Aap ambi aanggumi ndomba ineebe 100 wonage kwe, ambiret kobak age kenok, ndomba ando 99 nogo, puurom paga teppiinok, ambiret kobak agaarak nogo, kwaari nagin lek mbakop? Lek o. Kwaari nagin aret o. 13Ndi, kwaake kenok ti, ndomba 99 kobak arulik nogo iniki ale'nggen mbuuluk negen mbake logonet, ambiret kobak agaarak kwaakerak nogo ale'nggen nggwok lombok mbake menggerak nogo lek a? Mbake menggerak aret nduk, yokkiragi o. 14Togop me, kinogoba mbogut paga mendek nogo nen it elege-aabologwe yi, ambiret kobak ariyak abu eebi mbake menggerak o,” yinuk, yoragagerak.

Aap kinore ambi nen maluk eeke kenok eeko logorak wone

15Yorage nagagirik, ”Aap kinore ambi nen maluk eeppinagage kenok, owagam nogo logomonggotik, Togop eeppanggendak o, yinuk, kinom kinalik aret wone mbanumunggup o. Ndi, wone mbanumonggotak nogo aruk liirogon konengge kenok, kinom ogoorak wonogotak kwe, lambunik aret logomunggup o. 16Ndi, aruk liirogon konengge lek kenok perak, Aap mbere-kenagan inaruk iigak yogwe iinok, abet aret, mbako menggaarak me, aap ambi a, mbere a, wogoret, kinom yori nanu o. 17Ndi, it aap ti kinom yorumonggotak aruk liirogon konengga'lek mbo pege kenok, it Ala apuri apit kuwak eeppiinok, yoruwak nduk, yoraanu o. Ndi, Ala apuri kuwak aago inoone kunduk konengga'lek kenok, it aap abet mbaka'lek endekem mendek pemerintah inake kuwak eeko menggaarak nogo pogom omba'nuk mbo punu o,” yinuk, yoragagerak.

”Eeriyak op a, eeriyak mage a? yuurak,” yoragagerak wone

18”Kit nen nggween paga yime ambi, Eeriyak mage o, yogwe kiinok ti, mbogut paga kunduk eeriyak lek aret kaamunggup o. Ndi, kit nen nggween paga yime ambi, Eeriyak op o, yogwe kiinok ti, mbogut paga kunduk eeriyak aret kaamunggup o, yinuk, abet aret yokkiragi.

19-20Ndi, ambi yi yokkira o. Aap mbere ilik, kenagan a, an nendage paga kuwak eekwi kiinok, an kinenggela'me taati ninom aret logogin me, kit o nggween paga yime kinore ambi kimbirak kiniki ambit a'nuk, Ndogop eeppinanu o, yinuk, Ala nggino yogwi kiinok, an nogoba mbogut paga mendek nen eeppinagage aret kaamunggup o,” yoragagerak.

Maluk eeppinanugwi kwe, ninami eerogo puurak wone

21Yorage mbareegi, at Peterut nen Yetut owagam wage nagagirik, ”Nogoba wae. An nore ne mande paga maluk eeppanege kenok, an nen at omaluk nami eerogo puurak o? Ne 7 kuli ilik, ne mande a?”

22Yoge mbareegi, Yetut nen, ”Ne 7 kuli mban lek o. Ata, aakumi apit ineenggi nonggop lingginubok lombok aret maluk eeppagagwi iinok, kami eerogo pege logonok nduk, yokkigi o. 23Togop me, at mbogut paga mendek abu'me piige minggim nogo ti, aap endagembogut ayeloman awu wogoragagerak nogo obaane'me, Wo'niruwak, yinuk, wiiragagerak nogo pogom aret o. 24Wiiragagerak nogo ambi aa'nduk wage mbareegi, Nawu 10,000 talenta wokkigirak nogo obaane'me ambi wo'niru o, yoreegerak kwe, 25awu lek me, wogoriyak meek aret age mbareegi, aap nggwok nogo nen awuri yorage logonet, Aap yi eebe inom, akwe-apuri inom, amindik-amendek inom, abok aret aakumi kunggolaawak nduk, wogorogo logomonggotik, onggo wu wokkiramenggaarak nogo, an nawu wogoreegirak obaane'me an aret wo'niri wa'nu o. 26Yorage nogo at ayeloman nogo aruk konembunuk, nggween paga abu'me anep wanduk ngginnage logonet, Ai, nogoba o. Nawu wonage kenok abok aret wokkirigin me, kiniki yanggo yinuk puk aru o. 27Yoge mbareegi, ogoba nogo nen at ayeloman nogo abuwa mbake logonet, Obaane'me wo'niriyak neebi aret o, yinuk, teppereegerak.

28Teppereegerak kwe, ayeloman nogo endekem wundi nage nagagirik, oreeluk ambi at anomat wu mbuuluk we 100 talenta wogoreegerak nogo kage nagagirik, enggaanok nggeremborogo logonet, Nawu wokkigirak nogo obaane'me wo'niru o. 29Yoge mbareegi, oreeluk nogo nen abu'me tebe yinuk, oone nabek togon yoge logonet, Ai. Nawu wonage kenok abok aret wokkirigin me, yanggo yinuk puk aru o. 30Yoreegerak kwe, Lek o. Nawu obaane'me wo'nege kenok perak, keele piinogo pagarak o, yinuk, keele maarogo mambiigo menggam mambereegerak. 31Keele maarogo mambiigo menggam mambegerak nogo, oreewi nen inigen kogo nogogwaarik, iniki abu maluk a'nuk, aap eereegerak nogo inogoba mbininogo yori nogogwaarak. 32Yori nogo mbareegwa, inogoba nogo nen aap nogo wiireegerak wage mbareegi, yoge logonet, Kat aap maluk lombok eeke yi, koone nabek togon yo'nege mbaken, nanomat mbanak we aret teppagagirak kwe, 33kat nen an kabuwa mbakirak pogom koreeluk abuwa mbakembok eekendak me, 34Nawu obaane'me wo'nega'lek keegak, mondok-mondok yawi kooko logowak o, yinuk, anini nen it yawi unde menggaarak nogo wogoragagerak o,” yinuk, yoragagerak.

35Yoge nagagirik, ”Kit kinoreewi maluk eeppinagagwi nogo, kinalitak lombok abet aret kinami eerogo piigwi lek kiinok, an nogoba mbogut paga mendek nen kit togop aret eekkinabigin o,” yinuk, yoragagerak.

Currently Selected:

MATIYUT 18: WNO

Highlight

Copy