KEJADIAN 13
13
Abram no Lot lasi'da-laba'e
1Abram la'oela Masir boema, no saon-na, ma hata-heton lala'en-na, ma Lot boe, de ala la'ok leo kii leu, fo ala la'ok lasale leo, Kanaan boboan kona leu. 2Abram namasu'i hatu-hatu; nanuu bi'ilopo, bi'ihiik, sapi, lilofulak ma lilopilas boe. 3Boema, ana la'ok neme mamanak esa leo mamanak esa neu, de ana la'ok nasale leo Betel neu. Ana losa nusak manai Betel no Ai tala'da, nai ai manituk, fo makahulun-na ana ofu neme ndia, 4de ana taon-na mei tunu-hotuk esa nai ndia, fo ana sene-do'ok neu Manetualain.
5Lot boeo, nanuu teidale-bobongik, ma ata, boema bi'ilopo, bi'ihiik ma sapi. 6Hu ndia de, mook mana'uk manai dae ndia, ta dai soaneu duas leo fan, nana duas bana-manun makadotok nanseli. 7Boema, Abram manafoon-nala lale'a loo Lot manafoon-nala. (Nai lelek ndia, hataholi Kanaan-nala, ma hataholi Feris-sala, ala bei leo dae ndia.)
8Abram nafa'da Lot nae, “Ita ia, tolanook, de ta malole, metema o hataholim-mala, ma au hataholing-ngala, esa nale'a no esa. 9Hu ndia de, malole lenak, ata tasi'da-taba'e. O mahiik dae ia boboan beek-ka soona, helem-man, fo o soa ndia. Metema, o la'ok masale leo ia muu soona, neukose au la'ok asale leo mamana fe'ek u.”
10 #
Kej. 2:10
Lot nakanae leo boboa-kaisun neu, boema nita la'iesak Bafak Yarden-na lala'en-na, losa leo kota Zoar-ra neu, fo oen-na makadotok, sama leo nai Manetualain Osin-na, do sama leo dae Masir-ra. (Ndia te, Manetualain beita tao namopo Sodom ma Gomora kotan-nala fa.) 11Mate'en-na, Lot hele-na Bafak Yarden-na lala'en-na, boema ana la'o leo dulu neu. Hataholi ka dua sila-la nasi'da-naba'en, tutuin-na leondiak. 12Abram leo nahele neme dae Kanaan-na, te Lot ofu nai kota-kota manai bafak-kala, losa deka no Sodom. 13Hataholi manatao tatao-nono'i mangalauk nanseli-la, ma lasala-lasingo neu Manetualain-na, ala leo nai Sodom ndia.
Abram lali leo Hebron neu
14Lelek, Lot la'o boema, Manetualain nafa'da Abram nae, “Memete matalolole, neme mamanak fo o mapadeik ndia, leo basa boboak lala'en-na neu; 15#Hat. 7:5Neukose Au fe basa dae, fo o mitak ndia neu o, ma neu o tititi-nonosim, fo ela ana da'di o pusakam losa dodoon-na. 16Neukose, Au fe o tititi-nonosik makadotok nanseli, nalosa ta hapu hataholi esa boen, hapu leke-nala fas. Sama leo hataholi-a, ta hapu leke-nala daesopuk manai dae-a fa, leondiak boe, o tititi-nonosim, neukose ta hapu leke-nala fas. 17Besak ia, la'ok okofefeo dae ia lala'en-na, nana neukose Au fen neu o.” 18Basa ndia boema, Abram lali heok ofun-na, boema ana leo nahele deka no ai manituk-la, fo mamana nakalupu-nakatela nai Mamre, fo deka no Hebron, ma ana taon-na mei tunu-hotuk esa soaneu Manetualain.
Currently Selected:
KEJADIAN 13: twu
Highlight
Share
Copy
Want to have your highlights saved across all your devices? Sign up or sign in
