KEJADIAN 11
11
Uma puni madema Babel
1Makasososan-na, basa leoina manai daebafak-ka, lanuu ka'da dede'ak esa, ma kokolan-nala matak esa. 2Lelek, laleu-lalaak leo daebafak-ka boboan dulu leu boema, ala losa masadokek esa nai Babilonia, boema ala leo lahele leme ndia leona. 3Esa kokolak no esa nae, “Mai fo, ata tao batu cetak, fo ata hotun losa natea.” Boema ala hapu batu cetak, soaneu tao uma batu, ma ter, fo lakadiditak lenik-kana. 4Beekola lae, “Mai fo ata tapadedeik kota, ma uma puni madema esa, poin-na losa lalai, fo ela ita nanakoa-nanakiok, ma ita ta tapasasala leo daebafak-ka lala'en-na teu fa.”
5Boema, Manetualain kona mai, fo Ana mete kota, ma uma puni madema fo, hataholi daebafak-ka tao-nak ndia. 6Boema Manetualain nae, “Hataholi ia-la, leoina esa, ma dede'ak esa, de ia, besak-ka sila dale tutu'u makasososan-na. Ta dook-ka so'on te, neukose ala bisa tao su'di beek fo, ala lahiik-kana. 7Malole lenak, Ata kona teu, fo sese'do-babalik dede'an-nala, fo ela esa ta nalelak esa dede'an-na so'on.” 8Manetualain tao tapasasalas leo daebafak-ka lala'en-na neu-a, enon-na leondiak. Boema, ala ta tao kota ndia so'on. 9Hu ndia de, losa besak ia, kota ndia na'de Babel, nanahu Manetualain tao tasi'bu basa leoina-la dede'an-na neme ndia, ma Manetualain tao tapasasalas leme ndia, leo basa daebafak-ka lala'en-na leu.
Sem tititi-nonosin
(1Taw. 1:24-27)
10Sem tititi-nonosin nde ia: Basa faa matuaina, teuk 2, fo ndia te, Sem teun natun esa, boema ana bongi anatouk esa, na'de Arpakhsad. 11Basa ndia boema, ana bei naso'da teuk natun lima seluk.
12Nai lelek, Arpakhsad teun teluhulu lima boema, ana bongi anatouk esa, na'de Selah. 13Basa ndia boema, Arpakhsad bei naso'da teuk 403 seluk, de ana bongi ana fe'e-fe'en-nala.
14Nai lelek, Selah teun teluhulu, boema ana bongi ana touk esa, na'de Eber. 15Basa ndia boema, Selah bei naso'da teuk 403 seluk, de ana bongi ana fe'e-fe'en-nala.
16Nai lelek, Eber teun teluhulu haa boema, ana bongi ana touk esa, na'de Peleg. 17Basa ndia boema, Eber naso'da teuk 430 seluk, de ana bongi ana fe'e-fe'en-nala.
18Nai lelek, Peleg teun teluhulu boema, ana bongi ana touk esa, na'de Rehu. 19Basa ndia boema, Peleg bei naso'da teuk 209 seluk, de ana bongi ana fe'e-fe'en-nala.
20Nai lelek, Rehu teun teluhulu dua boema, ana bongi ana touk esa, na'de Serug. 21Basa ndia boema, Rehu bei naso'da teuk 207 seluk, de ana bongi ana fe'e-fe'en-nala.
22Nai lelek, Serug teun teluhulu boema, ana bongi ana touk esa, na'de Nahor. 23Basa ndia boema, Serug bei naso'da teuk 200 seluk, de ana bongi ana fe'e-fe'en-nala.
24Nai lelek, Nahor teun duahulu sio boema, ana bongi ana touk esa, na'de Terah. 25Basa ndia boema, Nahor bei naso'da teuk 119 seluk, de ana bongi ana fe'e-fe'en-nala.
26Lelek Terah teun hituhulu boema, ana bongi ana touk telu, fo nde Abram, Nahor ma Haran.
Terah tititi-nonosin
27Terah tititi-nonosin nde ia. Abram, Nahor ma Haran, fo sila aman nde Terah. Haran bongi ana touk esa, na'de Lot. 28Haran maten nai nggolo-ta'dun, fo nde Ur nai Babilonia, ndia te aman bei naso'da. 29Abram saon-na Sarai, ma Nahor saon-na Milka, fo Haran anafe'on-na. Haran bei nanuu ana touk esa, na'de Yiska. 30Sarai nde been-na, ina manabongi taak.
31Terah la'oela kota Ur-ra nai Babilonia, sama-sama no anan Abram, upun Lot, ma manafeuinan Sarai, fo Abram saon-na. Ana dodoo nae, sanga neu leo nusa Kanaan-na neu. Tehu ala losa Haran boema, ala leo lahele leme ndia. 32De mate Terah neme ndia boe, fo nai lelek, teun 205.
Currently Selected:
KEJADIAN 11: twu
Highlight
Share
Copy
Want to have your highlights saved across all your devices? Sign up or sign in