Mitiro 9
9
A kuhunzuluka ka Saule.
1Kanilezi Saule na a ha kukutela a ku dzukisa ni ku daya a vapizani va Hosi, i loya ka mupristi wa hombe, Xip. 8:3; Gal. 1:13
2a ya mu kombela a mapapilo ya kuya ha wona masinagogeni ya le Damasku, lezaku loku a kuma lava va lanzako leyi Ndlela, a vavanuna kutani vavasati, a fela ku va yisa Jerusalema na va bohilwe.
3Laha a nga wa famba, a tshinela Damasku, hi xitshuketi xa zalezo i lo ranzelwa hi kuwonekela ka le tilweni. Xip. 22:6
4I lowa hasi, azwa a gezu gi ngaku ka yena: Saule, Saule, hi yini u nzi xanisako ke? Mat. 25:40
5Yena aku ngalo: Hi wena mani Hosi ke? A Hosi yiku: Hi mina Jesu loyi u mu xanisako.
6Kanilezi suka, u enghena mutini, u ta byeliwa kona lezi u faneleko ku zi maha. Lu. 3:10; Xip. 2:37
7A vavanuna lava va nga mu pangalata, va lo yima vaku kaye, vazwa a gezu kanilezi a va wonangi munhu. Dan. 10:7
8Saule i lo vuka hi lahasi; kanilezi laha a nga vulule mahlo a nga wonangi nchumu; va lo mu koka hi canja, va mu enghenisa Damasku.
9I lo tshama masiku manharu na a nga zi koti ku wona, a ngagi, hambu ni kunwa.
Saule le Damasku
10Le Damasku ku wa hi kona a mupizani a tibyako Ananiasi. A Hosi yiku ngalo ka yena hi muwoniso: Ananiasi. Yena aku: Nzi laha, Hosi.
11A Hosi yiku ngalo kakwe: Vuka, uya phangweni legi gi vitwako, Go Lulama, u ya lava le ndlwini ya Juda a munhu loyi a vitwako Saule wa le Tarsusi; hakuva wa khongela. Xip. 21:39
12Hi muwoniso i wonile munhu a tibyako Ananiasi, a enghena a mu tlhateka mandla, lezaku a tlhela a wona.
13Kanilezi Ananiasi i lo hlamula, aku: Hosi, nzi zwile hi vanyingi hi munhu loyi, hi kubiha kontlhe loku a ku maheleko a vakubasa va wena le Jerusalema;
14ni kwalaha i na ni ntamu a wu kumileko ka vapristi va hombe, a ku ta boha vontlhe lava va khongelako hi vito ga wena. Xip. 7:59; 22:16
15Kanilezi a Hosi yiku ngalo ka yena: Famba, hakuva loyi hi xibya xi hlawulilweko xa mina, a ku yisa a vito ga mina ka vamatiko ni ka tihosi, ni ka vanana va ka Israeli; Xip. 13:2; Rom. 1:1; 2 Tim. 1:11
16hakuva nzi ta mu komba zontlhe lezi a ta nga xaniseka ha zona hi kota ya vito ga mina. Xip. 20:23; 21:11
17Ananiasi i lo famba, a ya enghena ndlwini, na a mu tlhateka mandla, aku ngalo: Saule, makabye, Hosi Jesu, loyi a nga woneka ka wena a ndleleni leyi u ngata ha yona, i nzi rumile lezaku u tlhela u wona, ni lezaku u tatiswa hi Moya wa ku Basa. Xip. 22:12
18Khalekhale ku lowa hi le mahlweni yakwe zo kota magwaru, a tlhela a wona; i lo vuka a bapatizwa.
19Zonake i loga zakuga, a kuma ntamu. Yena i lo tshama masiku yo talana zinwe ni vapizani lava va nga hi le Damasku.
20Zalezo i loba hungu hi Jesu lomu masinagogeni, lezaku i Nʼwana wa Nungungulu.
21Vontlhe lava va nga muzwa va lo hlamala, vaku: Xana a hi yena loyi a nga xanisa le Jerusalema lava va khongelako hi vito legi ke? I tile seno kasi a fela ku ta va yisa mahlweni ka vapristi va hombe na va bohilwe.
22Kanilezi Saule i lo enzeleka hi ntamu, a hlula a vaJuda lava va nga hi le Damasku, a va kombisa lezaku Jesu hi Kristu. Xip. 18:28
23Laha na ku hunzile a masiku yo tala, a vaJuda va lo tsema khungo kasi ku mu daya, Xip. 23:12; 25:3
24kanilezi a khungo gabye gi lo tiveka ka Saule. Vona va lo rinzela tinyangweni ta muti a mumu ni wusiku, lezaku va fela ku mu daya;
25kanilezi a vapizani vakwe va lo mu teka ni wusiku, va mu relelisa hi xirunzu laha khurisini. Jox. 2:15; 1 Sam. 19:12
Saule le Jerusalema.
26Laha a nga chikele le Jerusalema i lo ringa ku ti tlhanganisa ni vapizani; kanilezi vontlhe va lo mu chava, va nga kholwi lezaku mupizani. Xip. 22:17; Gal. 1:17, 18
27Kanilezi Barnabasi i lo mu teka, a mu yisa ka vapostoli, a hlawutela ka vona hi ku yi wona kakwe a Hosi laha ndleleni, leyi yi nga wulawula naye; ni lezi a nga kanela hi ntamu hi vito ga Jesu le Damasku,
28Zonake Saule i lo tshama navo Jerusalema, a enghena ni ku huma,
29a kanela hi kutiya vitweni ga Hosi. Yena i lo wulawula ni ku kanetisana ni vaJuda va xiGreki; kanilezi vona va lo lava ku mu daya.
30Laha a vamakabye va nga zi tivile, va lo mu yisa Kesaria, va mu rumela Tarsusi.
31Lezo a handla gi wa hi ni kurula a Judia gontlhe, ni le Galilea, ni le Samaria; gi lo akiswa gi famba kuchaveni ka Hosi ni kutangalisweni ka Moya wa ku Basa. Tis. 119:165
Pedra a hanyisa Eneasi.
32Kota lezi Pedro a nga fambafamba matlhelweni wontihe, i lo chikela ni ka lavo vobasa va nga wa akile le Lida.
33A kuma kona a munhu a vitwako Eneasi, loyi a nga wa etlele sangweni a ntlhanu wa malembe ni manharu, hakuva i wa file reve ga tlhelo.
34Pedro aku ngalo kakwe: Eneasi, Jesu Kristu wa ku hanyisa: vuka, u songa a sango ga wena. Zalezo i lo vuka. Mat. 9:6; Joh. 5:8
35Vontlhe lava va nga wa akile le Lida, ni le Xaroni, laha va nga mu wona va lo hunzulukela ka Hosi.
Pedro a vuxa Dorkasi.
36Le mutini wa Jopa ku wa hi ni mupizani wa xisati a vitwako Tabita, lezo hi ku ngalo Dorkasi, loyi a nga tele hi mitiro yo saseka, ni ku nyika zinyikiwo ka zisiwana. Tit. 3:8; 1 Tim. 2:10
37Hi ka lawo masiku i lo babya, afa. Laha va nga mu hlazile, va lo mu veka ndlwini ya le xitezi.
38Kota lezi Lida ku nga hi kusuhani ni le Jopa, a vapizani na va zwile lezaku Pedro i kona laho, va lo rumela a vavanuna vambiri, va ya mu kombela vaku: U nga hlweli kuta ka hina.
39Pedro i lo suka a famba navo. Laha a nga chikele va lo mu yisa ndlwini ya le xitezi; zonake a tinoni tontlhe ti lota kakwe na ti rila, ti mu komba a mabhaji ni tinguwo lezi a nga zi rungile Dorkasi laha a nga ha hi navo.
40Kanilezi Pedro i lo va humesa vontlhe, a khizama a khongela; zonake na a hunzulukele xirumbini, i te ngalo: Tabita, vuka! Yena i lo hafula mahlo, ni laha a nga wona Pedro, i lo vuka a tshama. Mat. 9:25; 1 Tih. 17:19-23; Xip. 7:60
41Yena i lo mu khoma hi canja, a mu yimisa; zonake i lo vitana a vobasa ni tinoni, a mu yimisa mahlweni kabye, na a hanya.
42A mhaka leyi yi lo tiveka le Jopa gontlhe, ni vanyingi va lo kholwa ka Hosi.
43Anzhako ka lezo Pedro i lo tshama masiku yo tala le Jopa, a kaya ka Simoni a nga hi mufuki wa madzowo. Xip. 10:6
Currently Selected:
Mitiro 9: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
