Mitiro 8

Saule a xanisa handla ga le Jerusalema.

1Na yena Saule i lo vumela ka kufa ka Stefani. Hi lego siku ku lo vuka a kuxaniswa ka hombe ko vukela handla legi gi nga hi Jerusalema; vontlhe va lo hangalaswa matikweni ya Judia ni le Samaria, ku sala a vapostoli ntsena. Xip. 7:58; 11:19

2A vanhu va kholwako va lo mu lahla Stefani, va maha xirilo xa hombe ha yena. 2 Sam. 3:31

3Kanilezi Saule i lo hlasela a handla, a enghena tindlwini, a rorovisa a vavanuna ni vavasati, a va valela paxweni. 1 Kor. 15:9; Gal. 1:13

Ivangeli yi konelwa le Samaria.

4Zonake lava va nga hangalakile va lo fambafamba va kanela ivangeli. Mat. 10:23; Xip. 11:19

5Filipu i lo relela aya mutini wa le Samaria, a yaba hungu ka vona ha Kristu. Xip. 6:5

6A zidlemo zi lo ingisa hi mbilu yinwe lezi zi nga kanelwa hi Filipu, laha zi nga zwile ni ku wona a ziwoniso lezi a nga zi maha.

7Hakuva a mimoya ya kubiha yi lo suka ka vanyingi lava va enghenilweko hi yona, yiba huwa hi gezu ga hombe; ni vanyingi lava va nga hi ni wubabyi gofa reve ga tlhelo, ni zilema, va lo hanyiswa. Mar. 16:17

8Zonake ku wa hi ni kutsaka ka hombe mutini lowo.

9Kanilezi ku wa hi kona a munhu wo kari lomu mutini, a nga hi Simoni a vito gakwe, loyi a nga hi mungoma, a hlamalisa a vanhu va Samaria, a ti wula lezaku yena i munhu wa hombe. Xip. 5:36

10Vontlhe va lo mu ingisa, a vatsongwani ni vahombe, vaku: Loyi munhu i ntamu wa Nungungulu lowu wu vitwako Wa hombe.

11Va wa mu ingisa hakuva i wa va hlamalisile a xikhati xa hombe hi wungoma gakwe.

12Kanilezi laha va nga kholilwe ka Filipu, loyi a nga kanela ivangeli ya mufumo wa Nungungulu, ni vito ga Jesu Kristu, a vavanuna ni vavasati va lo bapatizwa. Xip. 1:3

13Na yena Simoni i lo kholwa; anzhako ka kuva na a bapatizilwe i lo simamisa na Filipu; a hlamala nguvu hi ku wona a ziwoniso ni zirewukiso lezi zi nga mahiwa hi yena.

14Laha a vapostoli lava va nga hi le Jerusalema na va zwile lezaku a tiko ga Samaria gi amukele a mhaka ya Nungungulu, va lo rumela kabye Pedro na Johani.

15Vona laha na va relele kona, va lo va khongelela, lezaku va fela ku amukela a Moya wa ku Basa;

16hakuva wu wa nga se ku relela ni ka munwe wabye; va wa bapatizilwe ntsena a vitweni ga Hosi Jesu Kristu. Xip. 19:2

17Zonake va lo va tlhateka a mandla, va amukela Moya wa ku Basa.

18Laha Simoni a nga wona lezaku a Moya wa ku Basa wa nyikiwa hi kutlhatekwa ka mandla ya vapostoli, i lota kabye ni mali,

19a taku: Nzi nyikeniwo lowu ntamu, lezaku kani hi wihi nzi ta nga mu tlhateka mandla, a fela ku amukela a Moya wa ku Basa.

20Kanilezi Pedro aku ngalo kakwe: A mali ya wena a yi lobyiswe zinwe na wena, lezi u alakanyileko a ku kuma a xinyikiwo xa Nungungulu hi mali. 2 Tih. 5:16; Mat. 10:8; Xip. 2:38

21Wena a ku na xipanze hambu ni xiavelo mhakeni leyi; hakuva a mbilu ya wena a yi lulamangi mahlweni ka Nungungulu. Mav. 11:20; Isa. 44:20

22Hikwalaho hunzuluka kubiheni ka wena, u kombela ka Hosi, kutani u nga tsetselelwa a kualakanya ka mbilu ya wena.

23Hakuva nza wona lezaku u tele hi nyongwa ya kubava, ni ku bohiwa hi kuonha. Maheb. 12:15

24Simoni i lo hlamula, aku: Nzi khongeleleni ka Hosi, kasi nzi nga humelwi hi nchumu xa lezi mu zi wulawulileko.

25Hikwalaho laha a vapostoli na va kustumunyile, va kanela a mhaka ya Hosi, va lo tlhelela Jerusalema na va kanela ivangeli mitini yinyingi ya vaSamaria.

Filipu ni muEtiopia.

26Kanilezi a ngelosi ya Hosi yiku ngalo ka Filipu: Suka u famba le Dzongeni, hi ndlela leyi yi relelako hi le Jerusalema yiya le Gaza, leyi yi nga xiwula. Tis. 91:11

27Yena i lo suka a famba. Zonake i lo wona a munhu wa le Etiopia, a thenwa ni nduna ya hombe ya Kandake, a muzinza wa vaEtiopia, a nga hi muhlayisi wa tshomba yakwe yontlhe. I wa tile Jerusalema ku ta khozela, Joh. 12:20

28laha a nga tlhelela kaya, i lo tshama kareteni yakwe, a gonza bhuku ga muprofeti Isaya.

29A Moya wuku ngalo ka Filipu: Famba, u tshinelela a kareta leyiya.

30Filipu i lo tsutsuma, a muzwa na a kari a gonza a bhuku ga muprofeti Isaya, aku ngalo: Xana wa zi pima lezi u zi gonzako ke?

31Yena aku ngalo: Nzi nga zi pima hikuyini loku nzi nga hi na mutlhamuseli? I lo kombela Filipu ku khilela a tshama naye.

32Makunu a wutshamu ga lomo mitsalweni legi a nga kari a gonza hi legi:

I lo yiswa kutlhabyiweni kota yivu,

Khwatsi hi yivana leyi yi miyelako mahlweni ka mukayi wa yona,

Lezo a nga vululangi nomu wakwe. Isa. 53:7

33A kutikoramiseni kakwe a nga lamuliwangi hi nongameto;

Himani a ta nga tshawutela a xizukulwana xakwe ke?

Hakuva a wutomi gakwe gi susilwe misaveni.

34A nduna yiku ngalo ka Filipu: Hi nga nzi byela, a muprofeti i wula lezo hi mani ke? Hi wutsumbu gakwe, kutani hi munwani ke?

35Filipu i lo vulula nomu wakwe, a sangula hi lowu mutsalo, a mu gonzisa ivangeli ya Jesu. Lu. 24:27

36Kota lezi va nga ha longoloka ni ndlela, va lo chikela laha ku nga ni mati. A nduna yi te ngalo; A mati hi lawa; xana nzi beletelwa hi yini ku bapatizwa?

37Filipu aku: Loku u kholwa hi mbilu ya wena yontlhe u nga vumelwa. Yiku: Nza kholwa lezaku Jesu Kristu i Nʼwana wa Nungungulu.

38Yi lo laya a kuva a kareta yi yima; va lo enghena matini hi wumbiri gabye, Filipu ni nduna; i lo yi bapatiza.

39Laha va nga humele matini, a Moya wa Hosi wu lo wutla Filipu; ni nduna a ya ha mu wonangi kambe, hakuva yi lo simama ndleleni ya yona na yi tsakile. 1 Tih. 18:12; Ezek. 3:12

40Kanilezi Filipu i lo kumiwa le Azota; zonake i lo kanela ivangeli mitini yontlhe a kala a chikela Kesaria.

Currently Selected:

Mitiro 8: TSC72

Highlight

Copy