Mitiro 7
7
A kutihlamulela ka Stefani.
1A mupristi wa hombe i te ngalo: Leti timhaka ti nghaho ke?
2Stefani aku ngalo: Vamakabye ni vadadani, nzi ingiseni. A Nungungulu wa kungangamela i lo woneka ka koko wa hina Abrahama, laha a nga wa hi le Mesopotamia, na a nga se ku aka Harani,
3aku ngalo kakwe: Suka tikweni ga nwina, ni le maxakeni ya wena, uya tikweni legi nzi ta nga ku kombeta gona. Gen. 12:1
4Zonake i lo huma tikweni ga maKaldea, a ya aka Harani. Laha a raru wakwe a nga file, Nungungulu i lo mu rurisa, a mu tisa tikweni legi mu akileko ka gona makunu. Gen. 11:31; 12:4; Maheb. 11:8
5Kanilezi a nga mu nyikangi tshomba ka gona, ge, hambu ni ya ku veka konzo wakwe kona; kanilezi i lo mu tsumbisa lezaku i ta gi nyika kakwe, giva gakwe ni ga pswalo wakwe, hambu lezi a nga ngha a nga seva na nʼwana. Gen. 12:7; 15:3; 17:8; 26:3
6Nungungulu i lo mu byela lezaku a pswalo wakwe wu ta maha valuveli tikweni ga vambe, va mahiwa tikhumbi, va xanisiwa a 400 wa malembe. Gen. 15:13; Ekso. 12:40; 1 Ped. 2:11
7Kanilezi a tiko legi va ta nga maha tikhumbi ta gona, nzi ta gi lamula, ku wulile Nungungulu; zonake va ta huma kona,: va ta nzi khozela ka legi wutshamu. Ekso. 3:12
8Hi laha a nga mu nyika a xivumelwano xa wukwera. Na Abrahama i lo pswala Isaka, a mu enghenisa wukwera hi siku ga wuntlhanu ni manharu; Isaka a pswala Jakobe, na Jakobe a pswala a vanyapanze va khume ni vambiri. Gen. 17:9; 21:2; 1 Kro. 1:34; Mat. 1:32; Gen. 25:26
9A vanyapanze va wa hi ni mona ha Josefa, va mu xavisa a yiswa Gipite. Kanilezi Nungungulu i wa hi naye, Gen. 37:4; 39:2; Tis. 105:17
10a mu tlhatlhisa makhombyeni yakwe wontihe, a mu nyika thomo ni kutlhariha mahlweni ka Faro, a hosi ya le Gipite; a hosi yi lo mu yimisa a kuva mufumeli wa le Gipite, ni wa yindlu yakwe yontlhe. Gen. 42:6
11Zonake ku lota a ndlala le Gipite gontlhe, ni le Kanani, ni kuxaniseka ka hombe; a vakoko va hina a va kumangi zakuga.
12Laha Jakobe na a zwile lezaku a mavele ma kona le Gipite, i lo ruma a vakoko va hina hi xikhati xa kuranga.
13Na va yile hi xikhati xa wumbiri, Josefa i lo ti tivekisa ka vanakulobye; na Faro i lo tiviswa hi lixaka la Josefa.
14Josefa i lo rumela a ku ya vitana Jakobe a raru wakwe, ni maxaka yakwe wontihe, va nga hi 75 wa vanhu. Gen. 45:9; 46:27; Deut. 10:22
15Jakobe i lo relela aya Gipite, a ya fela kona, yena ni vakoko va hina; Gen. 49:33; Ekso. 1:6
16va lo yiswa Xekemi, va ya lahliwa xilahleni lexi a nga xava Abrahama hi ntsengo wa mali ka vana va Hamori le Xekemi. Gen. 23:16; Ekso. 13:19
17Kanilezi loku xi chikele a xikhati xa xitsumbiso, lexi Nungungulu a nga xi tsumbisa ka Abrahama, a vanhu va wa anza va enzelekelana le Gipite, Gen. 15:13
18ku kala ku huma yinwanihosi le Gipite, leyi yi nga mu tiviko Josefa.
19Yona yi lo khoma a lixaka la hina hi mano, yi xanisa a vakoko va hina, lezaku va fela ku hoxa a zihlangana zabye, kasi va fela ku kala va nga hanyi.
20A xikhatini lexo ku lo belekiwa Mosi, a woneka na a sasekile nguvu; i lo wundliwa tihweti tinharu lomu ndlwini ya raru wakwe. Ekso. 2:2
21Laha a nga wa hoxilwe, a nhanyana wa Faro i lo mu thumba, a mu wundla kasi wa maha nʼwana wakwe.
22Mosi i lo gonziswa a kutlhariha kontlhe ka va le Gipite; i wa hi ni ntamu kuwulawuleni ni mitirweni yakwe. Lu. 24:19
23Laha a nga hi ni 40 wa malembe, i wa xuva mbilwini yakwe a kuva a enzela a vamakabye vakwe, a vanana va ka Israeli. Ekso. 2:11
24Na a wona munwe wa vona a kari a xaniswa, yena i lo mu vikela, a mu photela loyi a nga kari a xaniswa, a daya muGipite.
25I lo alakanya lezaku a vamakabye vakwe va ta pima ha zona, lezaku Nungungulu i ta va tlhatlhisa hi canja gakwe, kanilezi a va zi pimangi.
26Hi siku gi gamelako i lota kabye na va kari va holova, a lava ku va lamula, aku: Madota, mu vamakabye; hi yini mu vukelanako ke?
27Kanilezi loyi a nga maha kubiha ka waakelane wakwe, i lo susumeta Mosi, aku: Himani a ku vekileko a hosi ni mulamuli hehla ka hina ke? Lu. 12:14
28U lava ku nzi daya kota lezi u nga daya a muGipite atolo ke?
29Hi nomu lowu Mosi i lo chava, a ya maha muluveli tikweni ga Midiani, laha a nga beleka kona a vafana vambiri. Ekso. 2:15
30Laha na ku hunzile 40 wa malembe, a ngelosi yi lo woneka ka yena le xiwuleni xa xitsunga xa Sinai, na yi hi lomo phingweni ga nzilo lomo xihlahleni.
31Laha Mosi a nga xi wonile, i lo hlamala hi xiwoniso xa kona; kota lezi a nga tshinela kasi ku wona, ku lo huma gezu ga Hosi, giku:
32Hi mina Nungungulu wa vakoko va wena, a Nungungulu wa Abrahama, ni wa Isaka, ni wa Jakobe. Mosi i lo rurumela, i wa nga hi na hlana wa ku cuwuka. Mat. 22:32
33A Hosi yiku ngalo kakwe: Tlhatlha a zilato mikonzweni ya wena; hakuva a wutshamu legi u yimileko ka gona, misava yi basileko. Ekso. 3:5
34Hakunene nzi wonile a kuxaniseka ka vanhu va mina lava va nga le Gipite, nzi zwile a kuketa kabye, nzi relele ku ta va ponisa. Ngone makunu, nzi ta ku rumela Gipite.
35Mosi loyi va nga mu alile, vaku: Himani a ku vekileko a hosi ni mulamuli? yaloye Nungungulu i mu rumile a ku maha hosi ni mutiruli wabye hi ngelosi leyi yi nga woneka ka yena xihlahleni. Ekso. 14:19
36Hi yena a nga va humesa, na a mahile a zirewukiso ni ziwoniso le Gipite, ni le Bimbini go Pswhuka, ni le xiwuleni hi 40 wa malembe. Ekso. 14:21; 16:1; 33:1
37Hi yaloye Mosi a ngaku ngalo ka vanana va ka Israeli: Nungungulu i ta mu vuxela a muprofeti wo kota mina xikari ka vamakabye va nwina. Deut. 18:15
38Hi yena a nga hi kona hlengeletanweni le xiwuleni, a yima zinwe ni ngelosi leyi yi nga wulawula naye le xitsungeni xa Sinai, zinwe ni vakoko va hina; hi yena a nga amukela a timhaka ta kuhanya, a hi nyika tona. Ekso. 19:3; Isa. 63:9
39Kanilezi a vakoko va hina va wa nga vumeli ku mu ingisa, va lo mu ala, va tlhelela Gipite hi timbilu tabye,
40vaku ka Aroni: Hi mahele vanungungulu lava va ta nga hi rangela; hakuva Mosi loyi a nga hi humesa tikweni ga le Gipite, a hi tivi lexi xi mu humeleleko. Ekso. 32:1
41Va lo maha a role hi lawo masiku, va neha a muphahlo zifananisweni, va tsaka hi mitiro ya mandla yabye.
42Kanilezi Nungungulu i lo va fularela, a va tsikeleta ku khozela a handla ga tilo; kota lezi ku tsalilweko bhukwini ga vaprofeti, ku ngalo:
Yindlu ya Israeli, xana mu nzi humesele a zihari zi tlhabyilweko ni miphahlelo
A 40 wa malembe le xiwuleni ke? Ezek. 20:39; Deut. 17:3; Am. 5:25
43Kasi mu rwele a tabernakeli ga Moloki,
Ni nyeleti ya mingungulu Refani,
Yi nga mifananiso leyi mu nga yi maha a ku yi khozela.
Hikwalaho nzi ta mu yisa le Babuloni.
44A vakoko va hina va wa hi ni tabernakeli ga wumboni le xiwuleni, kota lezi ku leletelweko hi loyi a nga wulawula na Mosi, lezaku i ta gi maha kukotisa a mufananiso lowu a wu wonileko. Ekso. 25:40
45A vakoko va hina loku va gi amukele, va lo gi neha na va hi na Joxua va enghena nago tikweni ga tixaka leti Nungungulu a nga ti hlongola mahlweni ka vakoko va hina; gi tshama kona kala masikwini ya Davida; Jox. 3:14
46loyi a nga kuma thomo mahlweni ka Nungungulu, a kombela a kuva a akela Nungungulu wa Jakobe a yindlu. 1 Sam. 16:1
47Kanilezi hi Solomoni a nga mu akela yindlu.
48Ahemba-lokoke, loyi a nga Hehla-hehla a nga tshami tindlwini leti ti akilweko hi mandla, kota lezi a wulako muprofeti, aku: 2 Kro. 2:6
49A tilo xitshamu xa mina xa wuhosi,
Ni misava xikhegetelo xa mikonzo ya mina;
I yindlu ya kuyini mu ta nga nzi akela yona ke? ku wula Hosi;
Wutshamu muni gi ta ngava wuhumulelo ga mina ke? Isa. 66:1, 2
50A hi canja ga mina gi nga zi maha zontlhe lezi zilo ke?
51Nwina va tinhamu ta kunonoha, mu nga hiko mikwera hi timbilu ni tindleve, xontlhe xikhati mu ala a Moya wa ku Basa, mu kotisa a vakoko va nwina. Ekso. 33:3; Levi 26:41
52Hi wihi wa vaprofeti a vakoko va nwina va nga mu xanisangiko ke? Va dele lava va nga ranga va kanela hi kuta ka Loyi a Lulamileko; loyi nwina mu mu nyikeleko ni ku mu daya;
53nwina lava mu nga amukela a nayo lowu wu nyikilweko hi tingelosi, kanilezi a mu wu gongangi.
54Makunu laha va ngazwa a timhaka leti, va lo zangara nguvu, va getsela ka yena hi meno yabye.
55Kanilezi yena na a tele hi Moya wa ku Basa, i lo cuwukisisa le hehla le tilweni, a wona a kungangamela ka Nungungulu, na Jesu na a yimile hi le canjeni ga xinene ga Nungungulu,
56aku ngalo: Mangabye, nzi wona tilo na gi vululekile, ni Nʼwana wa munhu na a yimile hi le canjeni ga xinene ga Nungungulu. Mat. 3:16; Dan. 7:13
57Kanilezi vona va lo kanyuluka, vaba huwa, va ti siva tindleve, va wela khatiginwe hehla kakwe;
58va mu rorovisela le handle ka muti, va ya mu gandla hi maribye; a timboni na ti veka a tinguwo tabye laha mikonzweni ya jaha gi vitwako Saule. Maheb. 13:12; Levi 24:16
59Va lo gandla Stefani hi maribye, na a kari a vitana Hosi, aku: Hosi Jesu, amukela a moya wa mina.
60Zonake i lo khizama, aba huwa hi gezu ga hombe, aku: Hosi, u nga va hlayeli a xionho lexi. Laha na a wulile lezo i lo etlela. Lu. 23:34
Currently Selected:
Mitiro 7: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
