Mitiro 13
13
Saule na Barnabasi va rumelwa matikweni.
1Ku wa hi kona a vaprofeti ni vagonzisi lomu bandleni ga le Antiokia, va nga Barnabasi, na Simeoni loyi a nga vitwa Nigeri, na Lukio wa le Kirene, na Manaen loyi a nga wundliwa zinwe ni hosi Herodi, na Saule. Xip. 14:26; 11:22
2Na va kari va tira a ntiro wa Hosi, na va yila, a Moya wa ku Basa wu te ngalo: Nzi hambanyiseleni Barnabasi na Saule a ntirweni lowu nzi va viteleko wona. Efe. 3:7, 8; 1 Tim. 2:7
3Zonake loku va yilile ni ku khongela, va lo va tlhateka mandla, va va tsika va famba.
Barnabasi na Saule le Kupero.
4Vona na va rumilwe hi Moya wa ku Basa, va lo relela vaya Selukia; va suka laho hi taru vaya Kupero.
5Laha na va chikele le Salami, va loba hungu hi mhaka ya Nungungulu masinagogeni ya vaJuda; va wa hi na Johani a nga hi muvuni wabye. Xip. 12:25
6Laha na va tsemakanyile xihlale va kala va chikela Pafosi, va lo kuma a mungoma wo kari, a muJuda a nga hi muprofeti wa mawunwa, loyi a vito gakwe a nga hi Bar-Jesu.
7Yena i wa tshama ka hosana Sergiu Paulusi, a munhu a tlharihileko. Yaloye i lo vitana Barnabasi na Saule, na a lava kuzwa a mhaka ya Nungungulu.
8Kanilezi Elima, (kutani Mungoma, hakuva a vito gakwe gi wula lezo,) i lo va vukela, na a xuva ku hambukisa a hosana kukholweni.
9Kanilezi Saule, loyi kambe a nga Paule, na a tele hi Moya wa ku Basa, i lo mu honokela,
10aku ngalo: Wena loyi u teleko hi kukanganyisa kontlhe ni wuchunguhungu, wena nʼwana wa Diabolus, u nga nala wa zontlhe lezi zi lulamileko, xana u nga ta tsika ku hambukisa a tindlela ti lulamileko ta Hosi ke?
11Makunu, languta, a canja ga Hosi gi le hehla ka wena, u tava xikhumu, u nga ha woni gambo hi xikhati xo kari. Zalezo i lo chikelelwa hi kupfhupela ni munyama; a hulumetela na a lava wo mu koka hi canja. Ekso. 9:3; 2 Tih. 6:18
12Loyi wa hosana, na a wonile lezi zi mahekileko, i lo kholwa, na a kari a hlamala hi kugonzisa ka Hosi.
Barnabasi na Paule le Antiokia wa Pisidia.
13Paule ni lava a nga hi zinwe navo va lo suka Pafosi hi taru vaya Perga ga le Pamfilia; kanilezi Johani i lo hambana navo, a tlhelela Jerusalema. Xip. 15:38
14Vona va lo tsemakanya Perga, va chikela Antiokia wa le Pisidia; va enghena sinagogeni hi siku ga sabado, va tshama.
15Anzhako ka kuva na ku gonzilwe a nayo ni vaprofeti, a varangeli va sinagoga va lo va vitana, vaku: Vamakabye, loku mu hi ni mhaka ya ku khongotela vanhu, wulani. Lu. 4:16; Maheb. 13:22
16Paule i lo suka a yima, a khweneta hi canja, aku ngalo: Madota ya ka Israeli, na nwina lava mu chavako Nungungulu, ingisani.
17Nungungulu wa lixaka leli la ka Israeli i lo hlawula a vakoko va hina, a va kulisa laha va nga luvele tikweni ga le Gipite, a va humesa ka gona hi canja gi tlakukileko,
18Yena i lo hunisela ha vona le xiwuleni a xipimo xa 40 wa malembe.
19Ni laha a nga lovisile a ntlhanu wa matiko ni mambiri le tikweni ga Kanani, i lo va nyika a matiko ya wona, ma maha a tshomba yabye a xipimo xa 450 wa malembe.
20Zonake i lo va nyika Valamuli, kala ka muprofeti Samueli.
21Anzhako ka lezo va lo kombela a hosi. Nungungulu i lo va nyika Saule nʼwana Kixi, wa lixaka la ka Benjamini, loyi a nga fuma 40 wa malembe.
22Kanilezi i lo mu susa, a yimisa Davida a kuva hosi yabye, loyi Nungungulu a nga maha wukustumunyu ha yena, aku: Nzi mu kumile Davida nʼwana Jese, a nga munhu wa mbilu ya mina, loyi a ta nga maha kontlhe kuranza ka mina. 1 Sam. 16:1, 13; Tis. 89:20
23Hi ka pswalo wa loyi munhu, Nungungulu i humesele Israeli a Muhanyisi kotisa xitsumbiso, a nga Jesu. Isa. 11:1; Lu. 1:32; Rom. 1:3; 2 Sam. 7:12
24Na a nga se ku chikela yena, Johani i lo kanela a kubapatiza ka kuhunzuluka ka vanhu vontlhe va ka Israeli.
25Laha Johani a nga lava ku mbhetisa a ntiro wakwe, aku ngalo: Mu alakanya muku nzi mina mani ke? A hi mina yena. Kanilezi wata munwe anzhako ka mina, loyi a zilato za mikonzo yakwe nzi nga faneliko ku zi tlhatlha.
26Vamakabye, vana va lixaka la ka Abrahama, ni vona lava xikari ka nwina va chavako Nungungulu, a mhaka ya kuhanyisa loku yi rumelwe ka hina.
27Hakuva kota lezi a vaaki va le Jerusalema ni vahombe vabye, va nga kala ku mu tiva Jesu, va lo mu kona, va tatisisa lezo a timhaka ta vaprofeti leti ti gonziwako hi sabado ginwe ni ginwani. 1 Kor. 2:8
28Hambu lezo va nga kala ku kuma nanzu ka yena wa kuva afa, va lo kombela Pilatu lezaku ngha a dayiwa.
29Laha va nga wa tatisile zontlhe lezi zi nga wa tsalilwe ha yena, va lo mu chisa sinyeni, va mu lahla xilahleni.
30Kanilezi Nungungulu i lo mu vuxa hi ka vafileko;
31a woniwa masiku yo tala hi lava va ngata zinwe naye hi le Galilea kuya Jerusalema, lava makunu va nga vakustumunyu vakwe xikari ka vanhu. 1 Kor. 15:5
32Hina ha mu nehela a mahungu yo saseka ya xitsumbiso lexi xi nga mahiwa ka vakokwani, Gen. 3:15; 12:3; 22:18; Rom. 4:13
33lezaku Nungungulu i xi tatisile ka hina, vana vabye, hilezi a nga vuxa Jesu; kota lezi ku tsalilweko lomu ka Lisimu la wumbiri, ku ngalo: Wena u Nʼwana wa mina, nzi ku psweleko nyamutlha. Tis. 2:7; Maheb. 5:5
34Ni wukustumunyu legi gi tiyisako lezaku i mu vuxile hi ka vafileko, kasi a nga tlheli a bola, hi gezu ga Nungungulu legi gi nge ngalo: Nzi ta ku nyika a zikatekiso zi basileko lezi zi tsumbisilweko ka Davida.
35Ni ka linwani lisimu i te ngalo: Wena u nga ta vumela a wa ku Basa wa wena ku wona kubola. Tis. 16:10
36Hakuva anzhako ka kuva Davida a tirile a khungo ga Nungungulu xizukulwaneni xakwe, i lo etlela, a lahliwa zinwe ni vakoko vakwe, a wona kubola;
37kanilezi loyi Nungungulu a mu vuxileko a nga wonangi kubola.
38Hikwalaho, vamakabye, ngha zi tiveka ka nwina, lezaku ha yena ku biwa hungu ka nwina hi kutsetselelwa ka zionho.
39Ni kambe kani hi wihi loyi a kholwako wa hlayelwa kululama ha yena, ka zilo zontlhe lezi nwina mu nga hluleka ku hlayelwa kululama hi nayo wa Mosi. Isa. 53:11; Gal. 2:16
40Hikwalaho ti woneleni, lezaku ku nga dzuki ku wela hehla ka nwina lezi zi tsalilweko mabhukwini ya vaprofeti, ku ngalo: Hab. 1:5
41Langutani nwina vakanyisi, mu hlamala, mu lova;
Hakuva nzi ta tira ntiro masikwini ya nwina,
Lowu mu to kala mu nga wu kholwi hambu loku mu byeliwa,
42Laha Paule na Barnabasi va nga huma sinagogeni, a vanhu va lo va kombela lezaku a timhaka leti ti kanelwa kabye kambe hi sabado gi tako.
43Laha a hlengeletano yi nga wa hangalakile, a linyingi la vaJuda ni vaproselita va chavako Nungungulu, va lo lanzela Paule na Barnabasi, lava va nga wulawula kabye, va va khongotela lezaku va namarela tipswalweni ta Nungungulu. Xip. 11:23; Tit. 2:11; 1 Ped. 5:12
44Hi sabado gi gamelako ku wa su khwatsi a muti wu tsombene wontihe a ku tazwa a mhaka ya Nungungulu.
45Kanilezi laha a vaJuda va nga wona a xidlemo, va lo tatiswa hi wukhuxu, va kaneta lezi zi nga kanelwa hi Paule, va rukatela. Xip. 18:6; 1 Ped. 4:4; Juda 10
46Zonake Paule na Barnabasi va lo wulawula hi kutiya, vaku: Zi wa lavekile lezaku a mhaka ya Nungungulu yi kanelwa ka nwina kuranga. Kanilezi kota lezi nwina mu yi alako, mu ti lamula lezaku a mu fanelwi hi wutomi ga pinzukelwa, mangabye, hi hunzulukela ka vamatiko. Isa. 55:5; Mat. 10:6; 21:43; Rom. 1:16
47Hakuva zinghaho a Hosi yi hi layile, yiku:
Nzi ku yimisile a kuva a kuwonekela ka vamatiko,
Kasi uva kuhanyiswa kabye ku kala le magemeta-musi. Isa. 49:6
48Laha a vamatiko na va zi zwile, va lo tsaka, va dumisa a mhaka ya Nungungulu; ni vontlhe lava va nga wa yimiselwe wutomi ga pinzukelwa va lo kholwa. Xip. 2:47
49Ni mhaka ya Hosi yi la su ga fenemete tikweni lego gontlhe.
50Kanilezi a vaJuda va lo kucetela a vavasati va dumileko va chavako Nungungulu, ni vahombe va muti, va vuxela Paule na Barnabasi a kuxaniswa, va va panzanya tikweni gabye.
51Kanilezi vona va lo phumunhela a ntshuri wa mikonzo yabye ka vona, vaya le Ikoniume. Mat. 10:14; Lu. 9:5
52Ni vapizani va lo tala hi kutsaka ni Moya wa ku Basa. Mat. 5:12; Joh. 16:22; Xip. 2:46
Currently Selected:
Mitiro 13: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
