Mitiro 10

Pedro na Korneliu.

1Le Kesaria ku wa hi kona a munhu a nga hi Korneliu a vito gakwe, a nga hi nduna ya ntlawa wa zana ga masochwa, lowu wu vitwako wa Italia.

2I wa hi munhu a pinyamileko kukhongeleni, loyi a nga chava Nungungulu zinwe ni yindlu yakwe yontlhe; i wa bana nguvu ka zisiwana, ni xontlhe xikhati i wa khongela ka Nungungulu. Gen. 18:19; Xip. 22:12

3Hi siku go kari i lo wona muwoniso hi hora ya wuntlhanu ni mune, a ngelosi ya Nungungulu na yi enghena ka yena, yiku ngalo kakwe: Korneliu!

4I lo yi cuwukisisa hi kuchava, aku ngalo: Mahungu muni, Hosi? Yona yiku ngalo kakwe: A mikhongelo ya wena ni kuhana ka wena zi yile ziya maha xialakanyiso mahlweni ka Nungungulu. 2 Kro. 7:15; Tis. 65:2

5Makunu rumela vanhu le Jopa, va ya vitana Simoni, loyi a ginwani vito a nga Pedro;

6a enzeleko ka Simoni, a mufuki wa madzowo, loyi a yindlu yakwe yi nga kusuhi ni bimbi. Xip. 6:43

7Laha yi nga sukile a ngelosi leyi yi nga wulawula naye, i lo vitana a malanza mambiri, ni sochwa ginwe gi chavako Nungungulu, ga vona lava va tshamako naye;

8laha na a va hlawutele zontlhe, i lo va rumela Jopa.

9Hi manziko wa kona, kota lezi va nga ha hi ndleleni, na va tshinela mutini, Pedro i lo kanziha hehla ka yindlu a ku ya khongela; ku wa hi hora ya wuntlhanu ni yinwe. Tis. 55:17; Xip. 11:5

10Yena i lozwa ndlala, a lava zakuga; kanilezi na va ha longisa, i lo chikelelwa hi muwoniso;

11a wona tilo na gi vululekile, ku relela a xibya xo khwatsi i nguwo ya hombe, na yi releliswa hi mune Wa tichoka. Ezek. 1:1; Xip. 7:56; Kuv. 19:11

12Xikari ka yona ku wa hi ni tixaka tontlhe ta zihari za mune wa milenge, ni zikokakoka za misava ni tinyanyani ta tilo.

13Ku lo zwala a gezu giku kakwe: Pedro, vuka, u tlhava uga.

14Kanilezi Pedro aku ngalo: Kokwihi, Hosi; cima a nzi se ngaga a xilo xo yila, ni xi nga hlazekangiko. Levi 11:4; 20:25

15A gezu gi lo engeta giku kakwe: Lexi Nungungulu a xi basisileko, u nga wuli wena uku xa yila.

16Lezi zi lo maheka kunharu, zonake a xibya xi lo kokelwa tilweni.

17Makunu laha Pedro a nga ha kanganyiseka nguvu, lezaku xi ngava xi wula yini a xiwoniso lexi a xi wonileko, a vavanuna lava va nga rumilwe hi Korneliu, na va wutisile a yindlu ya Simoni, va lo yima laha nyangweni,

18va vitana, va wutisa, vaku: Kutani Simoni loyi a ginwani vito a nga Pedro, i enzele laha ke?

19Kota lezi Pedro a nga ha alakanya hi xiwoniso, a Moya wuku ka yena: Languta, a vanhu vanharu va ku lava.

20Suka, u chika, u famba navo, u nga vileli nchumu; hakuva hi mina nzi va rumileko.

21Pedro i lo chika, aya ka vona, a yaku ngalo: Hi mina yena loyi mu mu lavako; i mhaka muni mu yi tisako ke?

22Vaku ngalo: Korneliu, a nga nduna ya zana, a munhu a lulamileko loyi a chavako Nungungulu, loyi a khesiwako hi vaJuda vontlhe, i lo layiwa hi Nungungulu hi nomu wa ngelosi yo basa ku ku vitana ndlwini yakwe, lezaku a yazwa lezi u ta nga mu byela zona. Vesi 1, 2; Xip. 22:12

23Zonake i lo va rurela ndlwini a kuva va etlela. Hi manziko wa kona Pedro i lo suka, a famba navo, ni vamakabye va le Jopa va lo mu pangalata.

24Ni mixo ya kona va lo chikela Kesaria. Korneliu i wa va rinzele, na a tsombanyisile a maxaka yakwe ni vanghana vakwe a ranzanako navo.

25Laha Pedro a nga enghena, Korneliu i lo mu tlhangaveta, awa mikonzweni yakwe, a mu khizamela.

26Kanilezi Pedro i lo mu vuxa, aku: Suka, u yima, minawu nzi munhu kota wena. Ekso. 34:14; Kol. 2:13

27Kota lezi a nga ha wulawula naye, i lo enghena a kuma vo tala va nga tsombene kona;

28aku ngalo kabye: Nwina ma zi tiva lezaku a muJuda a nga faneli a ku tlhangana ni wamatiko, hambu ku enghena ndlwini yakwe; kanilezi Nungungulu i nzi wonisile lezaku nzi nga vitani munhu nziku wa nyalidede kutani a nga hlazekangi. Joh. 4:9; Efe. 3:6

29Hikwalaho laha na nzi vitanilwe nzi lota na nzi nga kanakani; makunu nza mu wutisa, mu nzi vitanele yini ke?

30Korneliu i te ngalo: Hi mune wa masiku ma hunzileko, hi hora yaleyi nzi wa khongela lomu ndlwini ya mina; zonake ku lo yima munhu mahlweni ka mina, na a ambele tinguwo to basa,

31aku: Korneliu, a mikombelo ya wena yi zwilwe, ni kuhana ka wena ka tibyiwa mahlweni ka Nungungulu. Dan. 10:12; Maheb. 6:10

32Hikwalaho rumela le Jopa, u ya vitana Simoni, loyi a ginwani vito a nga Pedro; i enzele le ndlwini ya Simoni a mufuki wa madzowo, leyi yi nga kusuhi ni bimbi.

33Lezo nzi lo rumela ka wena; u mahile khwatsi lezi u tileko. Makunu hontlhe hi laha mahlweni ka Nungungulu, a kuzwa zontlhe lezi u layelweko zona hi Hosi.

34Pedro i lo vulula nomu wakwe, aku ngalo: Hakunene nza zi wona lezaku Nungungulu a nga hi na xihlawulela;

35kanilezi ka tixaka tontlhe loyi a mu chavako, ni ku maha kululama, wa amukeleka ka yena. Xip. 15:9; Rom. 2:13; 3:22

36Ma yi tiva a mhaka leyi a nga yi rumela ka vana va Israeli, laha a nga kanela a mahungu yo saseka ya kurula hi Jesu Kristu, loyi a nga Hosi ya vontlhe; Isa. 57:19; Kol. 1:20; Dan. 7:14; Kuv. 17:14

37leyi yi nga biwa hungu a Judia gontlhe, a ku sangula hi le Galilea, anzhako ka kubapatiza loku a nga kanela Johani;

38yaku ngalo: Nungungulu i lo tota Jesu wa le Nazareta hi Moya wa ku Basa ni ntamu; loyi a nga nzulanzula a maha kusaseka, a hanyisa vontlhe lava va nga tsimbeketwa hi Diabolus; hakuva Nungungulu i wa hi naye. Lu. 4:18; Joh. 3:2; Xip. 4:27

39Hina hi vakustumunyu va zontlhe lezi a nga zi tira le tikweni ga vaJuda ni le Jerusalema; kanilezi va lo mu daya hi ku mu hayeka sinyeni.

40Kanilezi Nungungulu i lo mu vuxa hi siku ga manharu, a vumela a kuva a woneka,

41na ku nga hi ka vanhu vontlhe, kanilezi ka vakustumunyu lava va nga wa hlawulilwe kale hi Nungungulu, ku nga hina lava hi ngaga hinwa zinwe naye anzhako ka kuva na a vukile hi ka vafileko. Joh. 14:17; 21:13

42I lo hi layisisa ku kanela ka vanhu, ni ku tiyisa lezaku hi yena loyi a yimisilweko hi Nungungulu a ku maha mulamuli wa va hanyako ni vafileko. Mat. 28:19; Joh. 5:22

43Hi yena loyi a vaprofeti vontlhe va mu mahelako wukustumunyu, lezaku munwe ni munwani a kholwako ka yena, i ta amukela a kurivalelwa ka zionho. Isa. 53:11; Jer. 31:34; Gal. 3:22

44Laha Pedro na a ha wulawula timhaka leti, a Moya wa ku Basa wu lo relela hehla ka vontlhe lava va ngazwa a kuwulawula kakwe.

45Ni makholwa wontihe ya zitshiva, lawa ma nga tile na Pedro, ma lo hlamala hilezi ni vamatiko va chululelwa a xinyikiwo xa Moya wa ku Basa.

46Hakuva va lo vazwa na va wulawula hi tirimi va dumisa Nungungulu.

47Zonake Pedro i lo wula, aku: A nga zi kota munhu a ku beletela lezaku va nga bapatizwi hi mati, lava va amukeleko a Moya wa ku Basa khwatsi hi hina ke?

48I lo laya lezaku va bapatizwa vitweni ga Jesu Kristu. Zonake va mu kombela a kuxwa navo a masiku yo kari. 1 Kor. 1:17; Xip. 2:38

Currently Selected:

Mitiro 10: TSC72

Highlight

Copy