Marko 9

1Jesu a di va embela gambe, khuye: “Khu lisine nyi ngu mi embela gambe gukheni, vbakari nya avo va guromo avba vomo va na gumba linga gufa kala va gu wona gu vboha Mufumo ni tshivba ya Nungungulu.”

Gu vbindrugedza ga Jesu

(Matewu 17:1-13; Luka 9:28-36)

2Hwane nya livbandre na limwedo matshigu, Jesu a di dzega Pedro, ni Jakobe ni Johane vari vonga a di gwela navo gigomoni nya gulaphe. Na vbohide, a di vbindrugedza mahoni gwawe. 3Dzingandzu Dzaye dzi di ngangamela, dzi gu aga, nya gu mwalo muhandzi mafuni a dzi kodzago gu dzi agisa kharato. 4Gu di wonega avbo gwawe, Eliya ni Mosi na va gu bhula ni Jesu. 5Pedro a di embela Jesu, khuye: “Muhevbudzi, gwadi gu hi khale avba! Hi na vbaha mitshatsha miraru, moyo wago, mumbe wa Mosi ni wa Eliya.” 6Kholu a di si giti ni egi a nga bani a gu ganela, kholu va di tade khu hwanga. 7#Wona gambe: Mat 3:17; Mark 1:11; Luk 3:22. Khavbo avbo, li di tshiga lipfhi li nga ta va fenengedza; Khu vbakari nya lipfhi li di pwala lito na li gu, khilo: “Oyu khu Mwamana wangu nya gigodwa, mu yingiseni.” 8#Wona gambe: 2 Ped 1:17-18. Na va hapfhude, va di khedza maphuvbo yatshavbo, mwalo va mu wonego, vbavbandze ga Jesu basi.

9Gikhati va nga bani va gu tshiga khu gigomoni, Jesu a di va laya, khuye: “Mu nga embeli muthu esi mu nga si wonago kala Mwamana wa Muthu a gu wuga khu ga vafudego.” 10Khu kharato, va di degula naso esi va nga embedwa. Aholu va di wudzisana khu gyawe, khavo: “Sa gu tshamusela ginani guwuga khu ga vafudego?” 11Va di mu wudzisa, khavo: “Khu ginani vahevbudzi nya Nayo va gukhavo a na phela khu Eliya ata?” 12#Wona gambe: Isa 53:3; Dzind 22:1-18. Jesu a di va phindrula, khuye: “Khidzo. Eliya a na phela khuye ata gasi guta lulamisa silo satshavbo. Milowo gasi yari khiyo ginani khu Mwamana wa Muthu, khandri yari khiyo gu vbwetega a saniseka ngudzu ni gu nyenywa? 13#Wona gambe: Mal 4:5; Mat 11:14. Dzitini nya gukhenu Eliya dzude. Gikhati a ngatago, va dita mu gira edzi va nga dzinago, kha nga edzi gu lovidwego khidzo.”

Jesu a ngu hawulugisa gikhwathana nya liphuvbo nya guvivbe

(Matewu 17:14-21; Luka 9:37-43a)

14Na vbohide avbo va nga bani va romo vambe vapizane, va di wona vathu nya vangi gumogo ni vahevbudzi nya Nayo na va va randrede va gu ganedzisana navo. 15Na va wonide Jesu, vatshavbo va di liwuga va tutuma vaya mu losa. 16Khavbo avbo, a di va wudzisa, khuye: “Ginani mu ganedzisanago khigyo navo?” 17Moyo nya gidzemo, a di khuye: “Muhevbudzi, nyi gu resede mwamana wangu a saniswago khu liphuvbo nya guvivbe, li mu giridego gidudu. 18Ni evbini avba li gunago, la gu mu dugela, li mu thesa vbavbatshi, a pupuma liguvi khu kanani ni gu khukhurusa magwaha, a banga sivbango. Nyi di lomba vapizane vago gu li tutumisa, aholu kha va li kodza.”

19Jesu a di khuye: “Vathu nyamba khodwa! Nyi na khala nanu kala lini? Nyi na mi timisela kala lini? Mu reseni eno.” 20Va di mu yisa gwaye.

Liphuvbo nya guvivbe, na li wonide Jesu li di dzudza gikhwathana khu tshivba ni tshivba, li gi thesa vbavbatshi gi gu kuya ni gu pupuma liguvi khu kanani. 21Jesu a di wudzisa babe wakone, khuye: “Phedwe vbanyalini?” Babe wule a di mu hakha, khuye: “Gukhugela wanana waye; 22dzinyondro dzingi la gu mu thesa matini ni niloni li dwanela gu mu songa. Khu kharato, wa gu dzina gu hi phasa, hi girele wuhindzi.” 23Jesu a di khuye: “Wa gu dzina! Satshavbo si ngu kodzega ga wule a khodwago.” 24Khavbo avbo, babe nya gikhwathana gile a di khusedza lito na gulila ganela, khuye: “Nyi ngu khodwa! Ambari ulo nyi phase, u engedzela gukhodwa gwangu.”

25Jesu, na wonide gukhuye va ngu vboha vathu nya vangi a di kawuka liphuvbo nya guvivbe, khuye: “Uwe liphuvbo nya givbwiri ni wududu, nyi ngu gu ruma: Duga ga gikhwathana gegi, u nga wuyi gambe uta bela gwaye.” 26Liphuvbo li di womba huwa, li gi dzudza khu tshivba ni tshivba, li duga, gikhwathana gi di dzima. Nya vangi va di pimisa gukhavo gi fude. 27Aholu, Jesu a di gi phara khu libogo a gi wusa, gikhwathana gi di khuga gi ema.

28Gikhati Jesu, a bedego nyumbani, vapizane vaye va di mu wudzisa vari venga, khavo: “Khu ginani ethu hi nga tandrega gu li tutumisa?” 29A di va hakha, khuye: “Maphuvbo nya lifumbu leli ma gu kodzwa basi khu nombelo ni gu hala.”

Jesu a ngu tivisa nyaluphye gufa gwaye

(Matewu 17:22-23; Luka 9:43b-45)

30Na va khugide khu vbale va di tsemakanya litigo la Galileya. Jesu a di si vbweti gu tidwa khu vathu, 31kholu a di gu hevbudza vapizane vaye mahungu nya gukhuye: “Mwamana wa Muthu a na ningedwa mandzani ga vathu, va gu mu songa; aholu, hwane nya gubani na fude a na wuga khu litshigu nya wuraru.” 32Avo kha va nga pima tshamuselo yoyu, aholu va di khala hwanga gu mu wudzisa.

Khu mani a gu khongolo Mufumoni wa Nungungulu

(Matewu 18:1-5; Luka 9:46-48)

33Na va vbohide dhoropani ga Kafarinawume, uye nari nyumbani a di wudzisa, khuye: “Ginani mu nga bani mu gu ganedzisana khigyo ndzilani?” 34#Wona gambe: Luk 22:24. Avo va di degula kholu va di gu ganedzisana khu gu vbweta guti khu mani a gu khongolo vbakari gwawe.

35 # Wona gambe: Mat 20:26-27; 23:11; Mark 10:43-44; Luk 22:26. Khavbo avbo, Jesu a di khala vbavbatshi a rana vale nya likhumi na vavili, a va embela, khuye: “Oyu a vbwetago gu khala nya guhegule, a na khala uye mahegisela ni githumi gya vatshavbo.” 36A di dzega gyanana a gi vega vbakari gwawe, a gi wugarela a va embela, khuye: 37#Wona gambe: Mat 10:40; Luk 10:16; Joh 13:20. “Oyu a hakhago gyanana nya nga egi khu lina langu, kheni a nyi hakhago. Aholu, oyu a nyi hakhago, kha hakhi eni basi, a gu hakha ni wule a nga nyi rumelago.”

Oyu a si hi wugeligo khwana gyathu

(Luka 9:49-50)

38Johane a di khuye: “Muhevbudzi, hi wonide mwama moyo na gu tutumisa maphuvbo nya guvivbe khu lina lago, hi mu himbedzela, kholu kha lumbi tsawa wathu.” 39Aholu, Jesu a di khuye: “Mu nga mu himbedzeli, kholu mwalo a dzi kodzago gu gira siliwugiso khu lina langu a wuya khavbo a nyi wugela. 40#Wona gambe: Mat 12:30; Luk 11:23. Kholu oyu a si hi wugeligo khwana gyathu. 41#Wona gambe: Mat 10:42. Khu lisine nyi ngu mi embela gukheni oyu a na mi ningago gani khokho nya mati, khu lina langu kholu mu gu vapizane va Kristo, gima kha na nga hamuga tshatshazelo waye. 42Gani khu mani a khunguvanyisago moyo nya sanana si khodwago nya nga esi, a diri tshukwana gu hungeledwa thamoni gwaye giwindri nya gikhongolo nya libwe, a rinywa nondrwani. 43#Wona gambe: Mat 5:30. Mandza yago ma gu khala gikhunguvanyiso ma pile, kholu i tshukwana gubela guvbanyani nya gupindruge ni gimbobo, guvbindra gubela ni mandza ya mavili phalani nya nilo nyamba tshimega. 44#Wona gambe: Isa 66:24. Avbo siwungu si si figo, ni nilo wakone wu si tshimegigo. 45Ngondro wago wa gu khala gikhunguvanyiso, wu pile. I tshukwana gu bela guvbanyani nya gupindruge nuri gighwiri guvbindra gu rinywa phalani nya nilo ni migondro yago ya mivili. 46[Avbo siwungu si sifigo, nilo wakone wu si tshimegigo.] 47#Wona gambe: Mat 5:29. Ni liso lago la gu khala gikhunguvanyiso gwago li duse vbavbandze, i tshukwana gubela Mufumoni wa Ndzadzini uri ni liso limwedo guvbindra gu rinywa ni maho ya mavili phalani nya nilo 48avbo siwungu si si figo, nilo wakone wu si tshimegigo.

49“Muthu watshavbo a na agiswa khu nilo, kha nga mhamba yi agiswago khu munyu. 50#Wona gambe: Mat 5:13; Luk 14:34-35. Munyu khwadi, aholu wa gu phusa wu na lungwa khu ginani? Khalani nenu munyu nya wundruye vbakari nya vathu mu vbanya khu gurula khu gyanu.”

Currently Selected:

Marko 9: BGE2014

Highlight

Copy