Marko 8

Jesu a ngu hodzisa magumana mazana vathu

(Matewu 15:32-39)

1Khu matshigu yale, a di randredwa gambe khu gidzemo nya gingi na guri mwalo gilo nya guhodze, Jesu a di rana vapizane vaye a va embela, khuye: 2“Nyi ngupwa gisiro khu vathu vava kholu va na ni matshigu mararu na nyiri navo, nyamba hodza gilo. 3Nya gu va diga va hongola gaya ni ndzala, va na gimbila va rereka ndzilani, kholu vambe va guta khu hwindzo.” 4Aholu vapizane va di mu hakha, khavo: “Hi na si mana hayi sibaba nya gu va ninge va hodza giwulani momu, na?” 5Jesu a di va wudzisa, khuye: “Sibaba singani mu gu naso?” Va di khavo: “Livbandre na sivili.”

6A di va ruma gu khala vbavbatshi. Na dzegide sibaba sile nya livbandre na sivili, a di bonga, a si kabanisa, a ninga vapizane vaye va kabanisela gidzemo. 7Va diri gambe ni dzindzandzyana, Jesu a di dzi kategisa a va ruma va kabanisela gambe. 8Vatshavbo va di hodza va khura, bwelo khavbo va gu tadza livbandre na sivili situndru khu sipandre si nga tshalago. 9Avo va nga hodzago va diri gipimo nya magumana mazana. Khavbo avbo, Jesu a di va diga va gu hongola gaya. 10Khavbovbo, Jesu a di bela ngalavani ni vapizane vaye a hongola tigoni ga Dhalimanuta.

Vafarisi va ngu lomba giliwugiso gya Ndzadzini

(Matewu 16:1-4)

11Khavbo avbo, va di vboha Vafarisi va ta ganedzisana naye, na va gu vbweta gu mu linga. Va mu lomba gukhavo a gire giliwugiso nya gukari gya Ndzadzini. 12Jesu a di tala khu gugaradzega hefemuloni gwaye, a ganela, khuye: “Khu ginani mela yoyu wu lombago giliwugiso? Khu lisine nyi ngu ganela gukheni, vathu nya melego yoyu, gimwalo ne giliwugiso gimwegyo va na ningwago.” 13#Wona gambe: Mat 12:38-42; Luk 11:29-32. A di va diga a gu bela gambe ngalavani a hongola tshatugo.

Mela nya Vafarisi

(Matewu 16:5-12)

14Vapizane va di divade gu dzega sibaba, ngalavani va diri ni gibaba gimwegyo basi. 15Khavbo avbo, Jesu a di va embela, khuye: “Gwadigwadi ni mela nya Vafarisi, nuwo wa Herodhi!” 16Va di pimisa gukhavo mwendro a gu thula ulo va nga divalago sibaba.

17Aholu, Jesu na tugude mapimo yawe, a di khuye: “Khu ginani mu gukhenu mu mwalo sibaba. Mu si gu si pimi iso nyi si thulago? Mapimo yanu ma nga lemede kharati? 18Khu ginani mu si woni na muri ni maho, mu sipwi, na muri ni dzindzeve? Ina kha mu alakanyi gilo, 19avbo nyi nga kabanisa livbandre sibaba nyi hodzisa livbandre magumi mazana vathu, situndru singani mu nga tadzago khu sipandre si nga tshala?” Va di hakha, khavo: “Likhumi na sivili.” 20Ahati iso mu nga tadzago litshigu lile nyi nga kabanisago livbandre na sivili sibaba nyi hodzisa magumana mazana vathu? Va di khavo: “Livbandre na sivili.”

21Khavbo avbo, a di va wudzisa, khuye: “Kala ni olu mapimo yanu ma si gu tulegi, gani?”

Jesu a ngu hawulugisa gikhumu gya Bhetisayidha

22Khavbo avbo, va di vboha Bhetisayidha; Va di mu resela mwama nya gikhumu, va gu mu lomba gu a mu khuhe. 23A di dzega gikhumu a gi phara khu libogo, a gu duga naye vbavbandze nya talala. A di mu todza dzindrura mahoni a mu handzega mandza, a mu wudzisa, khuye: “U ngu wona gilogyo, gani?”

24Uye, a tula maho, a ganela, khuye: “Nya gu wona vathu kha nga misimbo yi gimbilago.”

25A di mu kuha nyaluphye maho khu mandza; mwama a di dzegela gu wona gwadi vatshavbo khu hwindzo, a gu hawulugisa guralo. 26Khavbo avbo, Jesu a di mu ruma gu hongola gaya gwaye. A di mu laya, khuye: “U nga vbindri gambe khu talalani mule.”

Wufakazi wa Pedro

(Matewu 16:13-20; Luka 9:18-21)

27Jesu a di duga ni vapizane vaye, a gu hongola mitalalani ya Sezareya gwa Filipi. Vbakari nya ndzila a di wudzisa vapizane vaye, khuye: “Vathu vari khavo kheni mani?”

28 # Wona gambe: Mark 6:14-15; Luk 9:7-8. Va di mu hakha, khavo: “Vomo va gukhavo khuwe Johane Mubhapatisi; vambe vari khavo khuwe Eliya; gasi vambe vari khavo u moyo nya vaprofeti.”

29 # Wona gambe: Joh 6:68-69. A di va wudzisa gambe, khuye: “Ahati enu mwari khenu kheni mani?” Pedro a di hakha, khuye: “Uwe khuwe Kristo.”

30Khavbo avbo, a di va laya gukhuye va si embeli muthu khu mahungu yaye.

Jesu a ngu tivisa gufa ni guwuga gwaye

(Matewu 16:21-28; Luka 9:22-27)

31Khavbo avbo, a di phela gu va hevbudza, khuye: “Mwamana wa Muthu a na ni fanelo nya gusaniseke ngudzu, a gu nyenywa khu madhota, ni vakhongolo nya vaphasi nya mhamba, ni vahevbudzi nya Nayo, a songwa. Aholu, khu litshigu nya wuraru a na wuga.” 32A di va embela esi nyamba siha gilo. Pedro, a di mu rana khu phuvbo aya mu kawuka. 33Aholu, Jesu a di thendregedza a khedza vapizane, a gu kawuka Pedro, khuye: “Leya mbeli gwangu, Sathane, kholu khu theli kota khu silo sa Nungungulu, wa gu thela kota khu silo sa vathu basi.”

34 # Wona gambe: Mat 10:38; Luk 14:27. Na ranide gidzemo gumogo ni vapizane vaye, a di va embela, khuye: “Oyu a vbwetago gu nyi landrela a na dzi dige wurumba waye, a gu rwala gihambano gyaye a nyi landre. 35Kholu, oyu a dwanelago gu vbanyisa womi waye a na wu luza; gasi oyu a luzago womi waye khu kotani yangu ni Ivhangeli, a na wu vbanyisa. 36Giphaso muni a na gi manago wule a fumelago litigo rumba a gu hegisa khu gu dzimeledwa khu hefemulo waye? 37Ginani muthu a na gu ningelago gasi gu dzegisa hefemulo waye? 38Kholu oyu a khalago dzitshoni khu eni ni magana yangu vbakari nya melego yoyu nya vathu nya sibhayi ni sighohi, Mwamana wa Muthu a na mu khalela nuye dzitshoni litshigu a na wuyago na tade khu wudhumo wa Babe waye, vbakari nya dzingilozi nya guage.”

Currently Selected:

Marko 8: BGE2014

Highlight

Copy