Marko 7

Jesu ni mikhuwo ya gale nya Vajudha

(Matewu 15:1-9)

1Vafarisi ni vahevbudzi nya gukari nya Nayo, va ngatago khu Jerusalema, va di tshangana naye. 2Va di wona gukhavo vambe vapizane vaye va di gu hodza guhodza khu mandza nya ndzilo nyamba hamba. 3Kholu vafarisi ni Vajudha vatshavbo, khu nayo wawe, kha va hodzi nyamba phela khu gu hamba mandza, khu gulandra giolovedzo nya mikhuwo ya vagale. 4Gikhati va wuyago khu wugwewoni, kha va hodzi nyamba phela khu gu dzi agisa, yomo yimbe milayo nya yingi ya gale va yi landrisago, kha nga: Guhandza dzikhokho, dzikhali nya mati, sikalango nya sugu ni malawu. 5Vafarisi ni vahevbudzi nya Nayo va di mu wudzisa, khavo: “Khu ginani vapizane vago va si landrisigo tumbunugo wa vagale, olu va hodzago nyamba hamba mandza?” 6Jesu a di va hakha, khuye: “Khidzo muprofeti Isaya a nga ganelago na gu thula enu vapfhadzi nenu, khuye:

‘Ava vathu va gu nyi rungudza khu magana

aholu myonyo yawe yomo hwindzo ni eni.

7 # Wona gambe: Isa 29:13. Milombelo va nyi girelago khya malipha

kholu, milayo va hevbudzago khya gu yi khugela.’

8Mwa gu diga milayo ya Nungungulu mu gu landrisa tumbunugo nya vathu.” 9A di engedza gambe, khuye: “Mu ngu kodza gwadi gu tshiphisa milayo ya Nungungulu, gasi mufela gu landrisa tumbunugo wanu. 10#Wona gambe: Eks 20:12; Dhet 5:16; Eks 21:17; Levh 20:9. Kholu, Mosi a di khuye: ‘Rungudza babe wago ni mayi wago.’ Bwelo khavbo, khuye: ‘Uye a hembululago babe, gani mayi waye, tsayiso waye khu gufa!’ 11Gasi enu mwa gu hevbudza gukhenu: ‘Muthu a gu embela babe ni mayi waye, khuye: Kha nyi kodzi gu gu phasa khu esi nyi gu naso kholu khya Korobani, gu tshamusago pwani si phasedwe ga Nungungulu’; 12enu kha mu mu dzumedzisi gu gira simbe silo nya guphase babe ni mayi waye. 13Khu kharato, mu ngu tshipisa Nayo wa Nungungulu khu kotani nya mikhuwo ya vababe vanu mu yi hevbudzago. Mu ngu girani gambe simbe silo nya singi nya gufanane ni esi.”

Silo si nyenyezisago muthu

(Matewu 15:10-20)

14A di rana nyaluphye gidzemo, a gi embela, khuye: “Nyi yingiseni mwatshavbo gasi mu si mane gwadi esi nyi vbwetago gu mi embela! 15Muthu kha nyenyeziswi khu silo sa vbavbandze si belago ndrani gwaye, aholu a gu nyenyeziswa khu esi si dugago khu ndrani gwaye. 16[Oyu a gu ni ndzeve nya guyingise a napwe.”]

17Na digile gidzemo a gu bela nyumbani, vapizane vaye va di mu wudzisa tshamuselo nya gipimaniso gile. 18A di va hakha, khuye: “Gasi enu nenu mu lemede mihungo? Ina kha mu dziti nya gukhenu egi gi belago ndrani nya muthu kha gi dzi kodzi gu mu nyenyezisa, 19kholu kha gi beli monyoni, gya gu bela girumbuni gi gu duga vbavbandze khu ndzila yaye, gani?” (Khu magana yaya a gu hevbudza gukhuye guhodza gwatshavbo gu agide gu ngu yela gu hodzwa.)

20A di engedza gambe, khuye: “Igyo gi dugago khu ndrani nya muthu khigyo gi mu nyenyezisago. 21Kholu, khu monyoni nya muthu, khumo gu dugago mahingigedzo nya guvivbe, wubhayi, wuvafa, wughevenga, wuphuphulu, 22gumba khodwa, lidiwo, milembo, matshandza ni wupumbu. 23Guvivba gogu gwatshavbo gwa gu duga khu ndrani, khugo gu nyenyezisago muthu.”

Gukhodwa ga nyamayi nya Mukhanani

(Matewu 15:21-28)

24Na khugide khu vbale, Jesu a di hongola tigoni ga Tiro ni Sidhoni. Na bede ndrangani nya gukari, kha nga vbweta gu tidwa khu muthu, aholu kha nga kodza gu sihala; 25nyamayi moyo, nyamahegyane waye a nga bani a gu saniswa khu liphuvbo nya guvivbe, na pwide gu ganedwa khu mahungu yaye, a dita dzi thesa migondroni gwaye. 26Nyamayi yoyu a diri wa nya mayigo, kholu a diri Musiro-fenisiya, a di mu lomba khuye a tutumise liphuvbo nya guvivbe ga mwanaye. 27Aholu uye a di khuye: “Nga diga si khure sanana guphela, kholu khandri gwadi gu dzega guhodza nya sanana u rinyela simbwana.” 28Aholu nyamayi a di khuye: “Khidzo u ganelago, Pfhumu, aholu dziti nya gukhuwe simbwana niso si ngu roledzela khu vbavbatshi nya meza dzitsheta dzi theswago khu sanana.” 29Jesu a di mu embela, khuye: “Khu kotani nya isoso u ganedego, indra basi; liphuvbo nya guvivbe li dugide ga mwanago.” 30A di hongola gaya aya mana mwanaye na lade vbadawutunu; liphuvbo nya guvivbe na li mu digide li gu hongola.

Jesu a ngu hawulugisa givbwiri nya mbeveve

31A di khuga nyaluphye khu tigoni ga Tiro a vbindra khu Sidhoni, a gu hongola phwani ga Galileya a tsemakanya khu tigoni ga Dhekapoli. 32Va di mu resela muthu nya givbwiri nyamba ganela gwadi, va mu lomba gu mu handzega mandza. 33Na ndreyide naye mwandrani nya vathu, a di bedza dzinyala dzindzeveni gwaye, a hetsha dzindrura a mu todza khidzo lidimi. 34Khavbo avbo, a di khusa maho, a khedza a hefemula khu tshivba, a mu embela, khuye: “Efata” gutshamusago pwani, “Tulega.” 35Dzindzeve dzaye dzi di tulega, lidimi li gu tshulega, a gu ganela gwadi nyamba khukhumela. 36Khu gu vbiredza Jesu a di va laya gumba embela muthu, aholu avo va di simama gu laledza ndruma yaye. 37Vatshavbo va di liwuga ngudzu va gu ganela, khavo: “Satshavbo a ngu gira gwadi: A ngu tula dzindzeve sivbwiri, ni gu tulela gu ganela sidudu.”

Currently Selected:

Marko 7: BGE2014

Highlight

Copy