Marko 10

Lipango kha li dzi kodzi gu tshudwa

(Matewu 19:1-12; Luka 16:18)

1Jesu na khugide khu vbale, a diya tigoni ga Judheya, tshatugo nya tsongo wa Joridhani. Na randredwe nyaluphye khu vathu, a di va hevbudza kha nga giolovedzo gyaye.

2Vafarisi nya gukari va di hidzimela va mu wudzisa gasi gu mu linga, khavo: “Ina gu ngu kodzega mwama gu hula mwangadzi waye, gani?” 3Uye a di va hakha, khuye: “Gasi umo nya Milowo, Mosi a di mi laya kharini ?” 4#Wona gambe: Dhet 24:1-4; Mat 5:31. Va di mu hakha, khavo: “A di dzumedzisa gu lova lidangalila nya musi a mu hula.”

5Aholu Jesu a di va embela, khuye: “Mosi a mi dzumedziside khu kotani nya gulemele nya myonyo yanu; 6#Wona gambe: Gen 1:27; 5:2. aholu, gukhugela guhegulani Nungungulu a di gira mwama ni nyamayi. 7Khu kharato, mwama a na tshiya babe ni mayi aya patana ni mwangadzi waye. 8#Wona gambe: Gen 2:24. Va vavili va na khala nyama mweyo basi. Khu kharato, kha va ngari vavili gambe, aholu nyama mweyo basi. 9Khu magirelo yoyo, kha dzi kodzi muthu gu tshula egi gi hungidwego khu Nungungulu.”

10Na va vbohide gaya, vapizane va di ya mu wudzisa nyaluphye khu mahungu yaya. 11Jesu a di va embela, khuye: “Oyu a hulago mwangadzi waye a gu dzega mumbe a ngu bhaya naye. 12#Wona gambe: Mat 5:32; 1 Kor 7:10-11. Nyamayi nuye a gu diga mwama waye a dzegwa khu mumbe a ngu bhaya.”

Jesu a ngu kategisa sanana

(Matewu 19:13-15; Luka 18:15-17)

13Khavbo avbo, va di yisela sanana nya gukari gasi a si kuha, Aholu, vapizane va di si himbedzela. 14Jesu, na si wone, a di garadzega a va embela, khuye: “Digani sanana sita gwangu. Mu nga si himbedzeli, kholu Mufumo wa Nungungulu wa gu lumba iso. 15#Wona gambe: Mat 18:3. Khu lisine nyi ngu mi embelani kheni oyu a si hakhigo Mufumo wa Nungungulu kha nga gyanana, gima kha na wu bela.” 16Jesu a di wugarela sanana mawogoni, a si handzega mandza a gu si kategisa.

Lidzaha nya gitetema

(Matewu 19:16-30; Luka 18:18-30)

17Na gu duga a hongola, a di khingwa khu mwama na gu tutuma, a ta khidzima migondroni gwaye a mu wudzisa, khuye: “Muhevbudzi nya wadi, ginani nyi fanelago gu gira gasi nyi mane guvbanya nya gupindruge?” 18Jesu a di mu hakha, khuye: “Khu ginani u nyi ranago nya wadi? Uye a gu wadi, khu Nungungulu basi. 19#Wona gambe: Eks 20:12-17; Dhet 5:16-21. U ngu yiti milayo yi gu, khiyo: ‘U nga songi; u nga bhayi; u ngabi; u nga singedzi; u nga kanganyisi; rungudza babe ni mayi wago.’ ” 20Gasi uye a di hakha, khuye: “Muhevbudzi, nyi ngu landrisa satshavbo soso gukhugela wudzahani wangu.” 21Jesu, na mu khedzide, a di tsakiswa khuye a gu mu embela, khuye: “U nga gu keneledwa khu gimwegyo basi. Indra u ya rengisa satshavbo u gu naso, u ninga sisiwana, gasi u mane thomba ya Ndzadzini. Hwane nya iso delu uta nyi landrela.” 22Aholu, mwama, na pwide magana yaya a di garadzega a gu hongola na swihade kholu a diri ni dzithomba nya dzingi.

23Jesu, na va khedziside gwadi vatshavbo, a di embela vapizane vaye, khuye: “Gu ngu garadza ngudzu gubela Mufumoni wa Ndzadzini ava va gu ni dzithomba!” 24Vapizane va di liwuga khu magana yoyo. Aholu Jesu a di engedza gambe, khuye: “Vanavangu, gu ngu garadza ngudzu gubela Mufumoni wa Ndzadzini vale va tumbago dzithomba! 25Gu ngu vbevbuga guvbindra ngameriya khu vbatshinganotunu guvbindra gu dzega gitetema gi gu bela Mufumoni wa Ndzadzini.”

26Avo va di liwuga ngudzu. Va wudzisana khu gyawe, khavo: “A gu bani nari kharato khu mani a na vbulugago?” 27Khavbo avbo, Jesu a di va khedzisa a gu va hakha, khuye: “Ga vathu kha si kodzegi, aholu ga Nungungulu si ngu kodzega, kholu, gwaye gimwalo gi si kodzegigo.”

28Khavbo avbo, Pedro a di mu embela, khuye: “Hi womo avba ethu hi nga diga satshavbo hi gu landrela.” 29Jesu a di phindrula, khuye: “Khu lisine nyi ngu mi embelani gukheni: Mwalo uye a digidego ndranga yaye, vandriyaye nya vama ni vanyamayi, mayi ni babe waye ni sanana khu kotani yangu ni Ivhangeli, 30a na gumba bweledzedwa lizana dzinyondro, dzindranga, vandruye, vamayi ni vababe, ni sanana marembwe gumogo ni sisaniso, na nga gu vbanya mafuni momu, gambe ga gikhati gitago a na hakha guvbanya nya gupindruge. 31#Wona gambe: Mat 20:16; Luk 13:30. Vangi va nya guhegula va na hegisela, va nya guhegisa va na thanga.”

Jesu a ngu tivisa nya wuraru gufa gwaye

(Matewu 20:17-19; Luka 18:31-34)

32Na vari vbakari nya ndzila, na va gu hongola Jerusalema, Jesu a di thanga mbeli gwawe, vapizane va di samala, va mu landra na va tade khu hwanga. A di rana ava nya likhumi na vavili khu phuvbo, a va tugudzisa esi si na gu dugelelago gwaye, khuye: 33“Wonani, olu hi ngu gwela, gu hongola Jerusalema, Mwamana wa Muthu a na ningedwa ga vakhongolo nya vaphasi nya mhamba, ni vahevbudzi nya Nayo, va na lamula gukhavo a na songwe, va na mu ningela mandzani ga va nya mayigo, 34va na mu vala, va mu hetshela, va mu kwamula khu dzimboma, va hegisa khu gu mu songa. Aholu, khu litshigu nya wuraru a na wuga khu gufani.”

Gulomba ga sanana sa Zebhedhewu

(Matewu 20:20-28)

35Khavbo avbo, Jakobe ni Johane, sanana sa Zebhedhewu, va di hidzimela ga Jesu vaya mu embela, khavo: “Muhevbudzi, ha guvbweta gukhethu u hi girela esi hi vbwetago gu gu lomba.” 36Uye a di va wudzisa, khuye: “Ginani mu vbwetago gukhenu nyi mi girela?” 37Avo va di mu hakha, khavo: “Hi dzumedzise gu khala wudhumoni gwago, mumbe khu nyamudye, mumbe khu nyambade gwago.” 38Aholu Jesu a di va phindrula, khuye: “Negi mu lombago kha mu giti! Ina mu ngu dzi kodzani enu gu sela gikombe nyi na gu selago, ni gu hakha gibhapatiso eni nyi na gu hakhago, gani?” 39#Wona gambe: Luk 12:50. Avo va di hakha, khavo: “Ina, hi ngu dzi kodza.” Khavbo avbo, Jesu a di khuye: “Gikombe nyi selago, mu na selani, ni gubhapatisa nyi na gu hakhago mu na gu hakhani, 40aholu, gu khala nyamudye mwendro nyambade gwangu kha si tidwi kheni; iso sa gu lumba vale va dongisedwego.”

41Na va pwide esi, vale vambe nya likhumi va di sola Jakobe ni Johane. 42Khavbo avbo, Jesu a di va rana a gu va embela, khuye: “Kha nga mu dzitigo gwadi, vafumeli nya mayigo va gu ma fuma khu tshivba, ni dzindruna dzakone dza gu vbweta gu tidwa pwani khidzo dzi rumago. 43Gu nga giregi kharato vbakari gwanu. Aholu, oyu a vbwetago gu khala khongolo vbakari gwanu, a na dzi gire githumi gyanu; 44oyu a vbwetago gu khala nya guhegule vbakari gwanu, a na dzi gire khumbi yanu. 45#Wona gambe: Luk 22:24-27. Kholu, Mwamana wa Muthu nuye kha tela guta thumedwa aholu, guta thumela ni gu ningela womi waye gasi gudzegisa va nya gutala.”

Jesu a ngu hawulugisa gikhumu

(Matewu 20:29-34; Luka 18:35-43)

46Khu hwane, va di hongola dhoropani ga Jeriko, gikhati a nga vbweta guvbindra ni vapizane vaye, gumogo ni gidzemo nya gingi, mwamana wa Timewu nya gupwani khu Bharitimewu, gisiwana nya gikhumu, a di khade bambe nya ndzila na gu lomba zomola, 47na pwide gupwani khu Jesu wa Nazareta a vbindrago, a di khusa lito a lomba, khuye: “Jesu, mwamana wa Dhavhidhe, nyi pwele wusiwana.” 48Nya vangi va di mu kawuka khavo a degule. Aholu, uye a di engedzela gugulumela, khuye: “Mwamana wa Dhavhidhe, nyi pwele wusiwana!”

49Jesu a di ema a ganela, khuye: “Mu raneni.” Khavbo avbo, va di rana gikhumu va gi embela, khavo: “Tiya, khuga u ema, a ngu gu rana.” 50Khu vbale, gikhumu gi di rinya hwindzo gifenengelo gyaye gi khuga khu gu ndraga gi hongola ga Jesu. 51Jesu a di mu wudzisa, khuye: “Wa guvbweta gukhuwe nyi gu girela ginani?” Gikhumu gi di hakha, khigyo: “Muhevbudzi, nya guvbweta gukheni nyi wone!” 52Khavbo avbo, Jesu a di gi embela, khuye: “Indra, gukhodwa gwago gu gu vbanyiside.” Gikhumu gi di dzegela gu tulega maho gi gu landrela Jesu.

Currently Selected:

Marko 10: BGG2014

Highlight

Copy