Mateo 8
8
Leprawan qeshyaqta Jesús allïtsinqan
Marcos 1.40-45; Lucas 5.12-16
1Jirkanchö yachatsinqanpita Jesús urämuptinmi atskaq runakuna qatiräyarqan. 2Tsaychömi leprawan qeshyaq runa Jesúspa puntanman qonqurikuykur nirqan: <<Taytay, voluntäniki kaptinqa alliykatsillämay>>.
3Tsaynö rugakuptinmi yataykur Jesús nirqan: <<Allishqa kanaykitam munä>>.
Tsaynö niptinmi jinan höra alliskirqan. 4Tsaypitanam Jesús nirqan: <<Allïtsinqäta ama pitapis willankitsu, sinöqa allinqaykita rikashunaykipä sacerdötiman ayway. Tsaypita allinqaykita musyayänanpä Moisés qellqanqanchö ninqannölla ofrendaykita templuman apay>>.#Lev. 14.1-32.
Capitanpa sirviqninta Jesús allïtsinqan
Lucas 7.1-10; Juan 4.43-54
5Capernaúm markaman Jesús chaykuptinnam Roma soldädukunapa capitannin rugakur 6nirqan: <<Taytay, sirviqnïmi wayïchö qeshyar ujuraykan. Pasaypa antsa karmi ni kuyukuntsu>>.
7Jesúsnam nirqan: <<Allïtsinäpä aywashun>>.
8Capitannam nirqan: <<Taytay, mana Israel runa kaykaptïqa wayïman manam yaykunkimantsu. Kayllapita sirviqnï allïnanpä niykullay. 9Noqapis mandamaqnïpa poderninchömi kä. Tsaynöllam soldädükunapis podernïchö kayan. Mayqantapis <tsaypa ayway> niptïmi aywan, <shamuy> niptïmi shamun y sirviqnïta <kayta ruray> niptïmi ruran>>.
10Tsayta wiyaykurmi Jesús kushikur paywan aywaykaq runakunata nirqan: <<Rasunpam nï: Paynö criyikuq runataqa Israel runakunachö manam tarirqütsu. 11Qamkunatam nï: Maytsay nacionkunapitapis qorikaykurmi Tayta Diospa mandakuyninchö Abrahamwan, Isaacwan y Jacobwan jamaykur mikuyanqa.#Luc. 13.29. 12Peru wakin runakunam sïqa Tayta Diospa mandakuyninchö kawayänanpä kanqanta yarparpis mantsaypä tsakayman qaykushqa kayanqa. Tsaychömi pasaypa waqar kirunkunatapis uchuyanqa>>.#Mat. 22.13; 25.30; Luc. 13.28.
13Capitantanam Jesús nirqan: <<Wayikipa kutikuy. Criyinqaykinömi sirviqniki allishqana>>.
Tsay höram capitanpa sirviqnin alliskirqan.
Pedrupa suegranta Jesús allïtsinqan
Marcos 1.29-34; Lucas 4.38-41
14Tsaypitanam Pedrupa wayinman aywar Jesús tarirqan Pedrupa suegran fiebriwan qeshyaykaqta. 15Makinta yataykuptinnam jinan höra alliskir mikuyta qararqan.
Atskaq qeshyaqkunata Jesús allïtsinqan
Marcos 1.32-34; Lucas 4.40-41
16Patsa tsakaykaptinnam Jesúsman apayämurqan supaykuna ñakatsinqan atskaq runakunata. Tsay runakunapitam supaykunata juk shimilla ollqutupar Jesús qarqurqan. Tsaynöllam imaykaläya qeshyawan qeshyaqkunatapis allïtsirqan. 17Tsaynö allïtsirmi profëta Isaías qellqanqanta cumplirqan. Tsay qellqanqanchömi nin:
<<Paymi qeshyantsikkunata apashqa.#Isa. 53.4.
Paymi nanaynintsikkunatapis jipishqa>>.
Qatirayta munaqkunata Jesús tantiyatsinqan
Lucas 9.57-62
18Atskaq runakuna juntapaykuyaptinmi discïpulunkunata Jesús nirqan: <<Wak tsimpaman päsashun>>.
19 Büquiman yaykuyänanpäna kaykäyaptinmi ley yachatsikuq runa Jesústa nirqan: <<Rabí, maypa aywaptikipis qatiräshaykim>>.
20Jesúsnam nirqan: <<Atuqkunapapis machayninkuna kanmi. Pishqukunapapis qeshunkuna kanmi. Peru Runapa Tsurinpam sïqa maychö pununallanpäpis kantsu>>.
21Juk discïpulunnam nirqan: <<Taytay, qatiränäpä papänïtarä puntata pampaskamushä>>.
22Jesúsnam nirqan: <<Wanushqakunataqa wanushqa mayinkuna pampayätsun. Qamqa juklla qatimay>>.
Vientuta y yakuta Jesús päratsinqan
Marcos 4.35-41; Lucas 8.22-25
23Tsaypitanam büquiman Jesús yarkuptin discïpulunkunapis qepanta yarkuyarqan. 24Qochata tsimpaykäyaptinmi Jesús punukaskirqan. Tsayyaqmi pasaypa vientuwan yaku laqchikachar büquita jundikätsinanpäna kaykarqan. 25Tsaymi discïpulunkuna Jesústa rikchatsir niyarqan: <<¡Taytay, jundikaykantsiknam! ¡Salvaykayällämay!>>
26Jesúsnam nirqan: <<Yärakuyniynaq janan shonqu runakuna, ¿imanirtä mantsakashqa kaykäyanki?>>
Tsaypita sharkurnam vientutawan yakuta ollqutuparqan. Ollqutupaskiptinmi vientuwan yakupis päraskirqan. 27Tsayta rikarmi discïpulunkuna mantsakashqa niyarqan: <<Yakupis vientupis tsaynö cäsunanpäqa ¡pinatä kay runaqa!>>
Supaykuna löcuyätsiyanqan runakunata allïtsinqan
Marcos 5.1-20; Lucas 8.26-39
28Qochata tsimpaskirnam Gadara niyanqan partiman chäyarqan. Tsaychömi supaykuna löcuyätsiyanqan ishkay runakuna panteonpita yarqayämurqan. Paykuna pasaypa mantsaypä kayaptinmi tsaypaqa pipis päsayaqtsu. 29Jesústa rikaskirmi jinchipa qayarar niyarqan: <<¡Diospa Tsurin Jesús! ¡Imatatä noqakunawan munanki! ¿Manarä höra chämuptinku ñakatsiyämänaykipä shamurquyki?>>
30Paykunapita mas washaläninchömi atska kuchikunata mitsiykäyarqan. 31Tsaymi supaykuna Jesústa rugakur niyarqan: <<Kay runakunapita qarqayämarqa taqay kuchikunallaman yaykuyänäpä permitiykullay>>.
32Rugakuyanqanta Jesús awniptinmi supaykuna ishkan runakunapita yarquskir tsay kuchikunaman yaykuyarqan. Tsaymi kuchikuna löcuyar tunapa cörrir qochaman jeqarpuyarqan. Tsaychömi shenqaypa wanuyarqan.
33Tsayta rikaykurmi kuchi mitsiqkuna cörrilla markaman willakuq aywayarqan. Chaykurmi willakuyarqan löcuyashqa runakunapita supaykunata Jesús qarqunqanta y kuchikuna qochaman jeqar shenqaypa wanuyanqanta. 34Tsaymi llapan runakuna markapita Jesús kaqman aywar tsaypita aywakunanpä rugayarqan.
Currently Selected:
Mateo 8: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
