Lucas 13

Jutsankunapita arrepentikuyänanpä Jesús ninqan

1Tsaychömi runakuna Jesústa willar niyarqan: <<¡Galilea runakuna templuchö sacrificiuta rupaykätsiyaptinshi Pilato mandanqan soldädunkuna wanutsiyashqa!>>

2Tsaynö willayaptinnam Jesús nirqan: <<¿Wakin Galilea runakunapita tsay wanuq runakuna mas jutsayuq kayanqantaku yarpäyanki? 3Noqam nï: Manam jutsayuq kayanqanpitatsu wanuyashqa. Peru qamkunam sïqa jutsa rurayta mana dëjar paykunanö wanuyanki. 4Tsaynömi Jerusalénchö Siloé törri juchur chunka puwaq runakunata wanutsirqan. ¿Jerusalénchö täraq marka mayinkunapita tsay wanuq runakuna mas jutsayuq kayanqantaku yarpäyanki? 5Noqam nï: Manam jutsayuq kayanqanpitatsu wanuyashqa. Peru qamkunam sïqa jutsa rurayta mana dëjar paykunanö wanuyanki>>.

Mana wayuq hïgusman Jesús iwalatsinqan

6Hïgusman iwalatsirmi Jesús nirqan: <<Juk runapash üva chakranchö hïgusnin kanä. Tsayshi wayuyninta pallaq aywar ni jukllayllatapis tarinätsu. 7Chakran cuidaqtanash ninä: <Kimsa watana kay hïguspa wayuyninta pallaq shamurpis manam ni jukllayllatapis tarirqütsu. ¡Juklla muturiy! Mana wayuqtaqa ¡imapätä chakrachöpis katsishun!>

8<<Peru chakran cuidaqnash ninä: <Taytay, mä kay watallana karitsun. Shumaq oqtipaskirmi wanun wiñashä. 9Tsaynö ruraptï wayurqa wayunqam. Mana wayuptinmi sïqa muturinki> >>.#13.9 Israel runakunata hïgus plantaman iwalatsirmi Jesús yachatsirqan.

Kurkayashqa warmita Jesús allïtsinqan

10Jamay junaqnam sinagögachö Jesús yachatsikuykarqan. 11Tsaychömi supay kurkayätsinqan warmi kaykarqan. Payqa imanöpapis derechakayta mana puëdirmi chunka puwaq watana kurkayashqa kakurqan. 12Tsaynö kaykaqta rikarmi Jesús qayaykur nirqan: <<Warmi, allishqanam kanki>>.

13Tsaynö nir yataykuptinmi tsay warmi jinan höra derechakaskir Tayta Diosta alabarqan.

14Jamay junaqchö Jesús allïtsiptinmi sinagögachö mandakuq runa ajaskir nirqan: <<Joqta junaqmi kaykan runakuna aruyänanpä. Alliyta munarqa tsay junaqkunachö shayämunkiman. ¡Imanirtä jamay junaqchörä shayämunki!>>

15Tsaynam Jesús nirqan: <<¡Allish tukuq runakuna! Jamay junaq kaptinpis ¿manaku töruykikunata y ashnuykikunata paskaskir yakütsiyanki? 16Kay warmiqa Abrahampita miraqmi. ¡Allaw! Chunka puwaq watam Satanás ñakatsishqa. Tsaynö kaykaptinqa ¿manaku jamay junaqchöpis allïtsïman?>>

17Tsaynö niptinmi chikiqninkunaqa pasaypa penqakuyarqan. Peru wakin runakunam sïqa Jesús espantaypä ruranqankunata rikar kushikuyarqan.

Ñäbus muruman Jesús iwalatsinqan

Mateo 13.31-32; Marcos 4.30-32

18Mastam Jesús nirqan: <<Tayta Diospa mandakuyninta ¿imamanrä iwalatsïman? ¿Ima iwalatsikuywanrä tantiyatsïman? 19Tayta Diospa mandakuyninqa ñäbus muruta juk runa chakranman murunqannömi. Jeqamur jatunyaptinmi rämankunachö pishqukunapis qeshunkuna rurayan>>.#13.19 Tsaynö nirmi Jesús nirqan: Ichiklla murullapita ñäbus jeqamur wiñanqannömi Tayta Diospa willakuynin maytsaymanpis chanqa.

Levadüraman Jesús iwalatsinqan

Mateo 13.33

20Tsaynöllam yapay nirqan: <<Tayta Diospa mandakuyninta ¿imamanrä iwalatsïman? 21Tsayqa imayka levadüranömi. Tantata rurananpä ishkay arröbanö jarinaman levadürata wiñaptinmi mäsa atskaman jakan>>.#13.21 Tsaynö nirmi Jesús nirqan: Ichiklla levadüra mäsata jakatsinqannömi Tayta Diospa mandakuyninpis maytsayman chanqa.

Kichki punkuman Jesús iwalatsinqan

Mateo 7.13-14, 21-23

22Tsaypita Jerusalénman Jesús aywarnam markakunapa y jallqakunapa yachatsikur päsarqan. 23Tsaychömi juk runa tapurqan: <<Taytay, ¿wallkaqllaku salvakuyanqa?>>

Jesúsnam nirqan: 24<<Imanöpapis kichki punkupa yaykuyay. Noqam nï: Atskaq yaykuyta munarpis manam puëdiyanqatsu. 25Wayiyuq runa punkunta wichqaskamuptinmi waqtachö quëdaskir töcakur niyanki: <¡Taytay, punkuta kichapaykayällämay!> Peru wayiyuqnam niyäshunki: <Qamkunata manam reqïtsu. ¡Maypitarä kakuyankipis!> 26Tsaymi niyanki: <Qamwanmi mikurquntsik y upurquntsik. Markäkunachöpis yachatsirquykim>. 27Paynam niyäshunki: <Qamkunata manam reqïtsu. ¡Maypitarä kakuyankipis! ¡Jutsasapa runakuna, ñöpäpita witikuyay!>

28<<Tsaynö niyäshuptikim pasaypa waqar kiruykikunatapis uchuyanki. Tsay höram Abrahamta, Isaacta, Jacobta y profëtakunata Tayta Diospa mandakuyninchö kaykaqta rikayanki. Qamkunam sïqa yaykuyta puëdiyankitsu. 29Maytsay nacionkunapitapis qorikaykurmi Tayta Diospa mandakuyninchö mikuyanqa.#Mat. 8.11. 30Tsay höram qepa kaqkuna puntachö kayanqa. Punta kaqkunanam qepachö kayanqa>>.

Jerusalén runakunapä Jesús llakikur waqanqan

Mateo 23.37-39

31Tsay junaqmi fariseukuna Jesúsman chaykur niyarqan: <<¡Kaypita ras aywakuy! Herodesmi wanutsishuynikita munan>>.

32Jesúsnam nirqan: <<Tsay atuqta willayay: <Juk ishkay junaqllanash supaykunata runakunapita qarqunqa y qeshyaqkunatapis allïtsinqa. Warantinllanash llapan rurananpä kaqkunata cumplinqa. 33Imanö kaptinpis kay junaqkunash Jerusalénman aywanqa. Jerusalénpita juklächöqa profëtakuna manash wanuyanmantsu> >>.

34Tsaypitanam Jesús nirqan: <<¡Ay, Jerusalén, Jerusalén! Qamqa Tayta Diospa profëtankunata unaypitam wanutsinki.#1Rey. 19.10; Jer. 2.30. Pay mandamunqan willakuqkunatapis saqmankim. Chipshankunata wallpa oqllaqnö wamraykikunata#13.34 Jerusalénpa wamrankunaqa Jerusalénchö täraq runakunam kayan. atska kuti qoriyta munaptïpis manam munarquykitsu. 35Tsaynö kanqaykipitam wayikikunapis templuykipis tsunyaykar quëdanqa. Noqam nï: Manam yapay rikamankinatsu hasta <¡Tayta Diospa jutinchö shamuq runa alabashqa kaykullätsun!>#Sal. 118.26. ninqaykiyaq>>.

Currently Selected:

Lucas 13: qxo

Highlight

Copy