Génesis 49

Tsurinkuna y paykunapita miraqkuna imanö kayänanpä kanqantapis Jacob willanqan

1Tsaypitanam llapan tsurinkunata qayaykur Jacob nirqan: <<Ñöpäman llapayki witiyämuy. Waray warantin imanö kayänaykipä kanqanta kanan willashayki.

2<<Llapayki witiykamur ninqäta wiyayay.

3Rubén, qammi mayor tsurï kanki.

Jövinllarä kaykaptïmi qam yurirqayki.

Llapan wawqikikunam respitayäshurqayki.

Paykunapita mas munayyuqmi karqayki.

4Mayu atskayaptin tsapayta mana puëdinqannömi qamtapis jutsa rurayta munaptiki tsapayta puëdiyäshunkitsu.

Concubïna warmïwan punurmi penqakuyman churamarquyki.#Gén. 35.22.

Tsaymi mayor derëchuykita perdirquyki.

5<<Simeónwan Levími tanta pakishqanö kayan.

Paykunam runakunata cutsilluwan wanutsiyarqan.

6Pasaypa rabyarmi runakunata wanutsiyarqan.#Gén. 34.24-30.

Asikuyänan raykurmi törukunapa ankunta roquyarqan.

Tsaymi paykuna qorikäyanqanchöqa qorikaytapis munätsu.

7Paykuna ajanäyanqan pasaypa mana allim karqan.

Paykunapita miraqkunatam destinä Israel nacionchö mashtakashqa täyänanpä.

8<<Judá, qampita miraqkunatam llapan Israel mayinkuna kuyayanqa.

Chikiqninkunataqa poderninmanmi churayanqa.

Llapan Israel mayinkunapis respitarmi ñöpanman qonqurikuyanqa.

9Hïju, malta león ashmata tsariqnömi kanki.

Ashmata tsarinanpä patsaman lätakuykuq leonnömi kanki.

Mantsaypä kaptiki ¿pirä ichikllatapis wajupäshunkiman?#Núm. 24.9; Apoc. 5.5.

10Judá castallapitam reykuna imaypis kayanqa.

Manam pipis rey kanqanta qechunqatsu.

Tsaynö kanqa llapanpä poderyuq rey chämunqanyaqmi.

Tsay reytam maytsay nación runakuna cäsuyanqa.

11Tsay witsan üvapis pasaypam wayunqa.

Tsaymi üva yurallamanna ashnunkunatapis watayanqa.

Vïnupis röpanta taqshananpänörämi atska kanqa.

12Tsaytsika üva kaptinmi runakunapa ñawinkunapis vïnupita mas yanarä kanqa.

Tsaytsika lichi kaptinmi kirunkunapis lichipita mas yuraqrä kanqa.

13<<Zabulónpita miraqkunam lamar kuchunkunachö täyanqa.

Büquikuna chäkuyänan y yarqukuyänanchömi markankunapis kanqa.

Lindërunkunapis Sidónwan tinkuqyaqmi kanqa.#Deut. 33.18-19; Jos. 19.10-16.

14<<Isacarpita miraqkunam corralchö kallpayuq ashnunö kayanqa.

15Täyanqan markankunapis täkuy munaymi kanqa.

Tsaymi qepita apayänanpäpis waqtankunata kamapäyanqa.

Esclävu karpis kushishqallam kawayanqa.

16<<Danpita miraqkunam wakin Israel trïbukunanö trïbun runakunata mandayanqa.

17Tsaynöllam näni ñöpanchö maya maya pakaraykaq culebranö kayanqa.

Paykunam caballupa chakinta kanir muntaqninta jitatsiqnö kayanqa.

18 Tayta Dios, ¡qamllamanmi yärakü salvamänaykipä!

19<<Gadpita miraqkunatam tsaytsika soldädukuna atacayanqa.

Tsaynö atacayaptinpis kikinkunatam qatikachäyanqa.

20<<Aserpita miraqkuna täyanqanchöqa mikuypis atskam kanqa.

Tsaymi rey mikunqannö imaypis alli allillata mikuyanqa.

21<<Neftalípita miraqkunam munanqanpa lluytsunö puriyanqa.

Kuyayllapä wawankunata qeshpitsiq lluytsunömi kayanqa.

22<<Josépita miraqkunam yaku kuchunchö wiñamuq jachanö kayanqa.

Paykunam atska wayuq jachanö kayanqa.

Lloqlluyparä jacha wiñar pirqa jananpa päsaqnömi kayanqa.

23Paykunatam pasaypa chikir flëchankunawan atacayanqa.

Tsaynöllam imaypis rabyanätsiyanqa.

24Tsaynö kaptinpis Josépita miraqkunapa rikrankuna pasaypa kallpayuqmi kayanqa.

Flëchananpä flëchakunantapis chachakmi aptaräyanqa.

Tsaynö kallpayuq kayanqa llapanpä poderyuq Tayta Dios yanapaptinmi.

Paymi Israel runakunata mitsir poderninwan imapitapis tsapan.

25Yärakunqä Tayta Dios yanapaykulläshuy.

Llapanpä poderyuq Tayta Dios ciëlupita bendicionninta churaykallämutsun.

Patsa rurinpita yakutapis pashtaykatsillämutsun.

Wamraykikuna y ashmaykikuna atska kayänanpä bendicionninta churaykallämutsun.

26Papänïpita bendicionta chaskinqäpita mastam qamman bendicionnïta churamü.

Kay bendicionqa jirkakuna imaypis mana ushakaq kanqannömi qampä y qampita miraqkunapä imaypis kanqa.

Qamtaqa wawqikikunapitam Tayta Dios akrashurqayki.#Deut. 33.13-17.

27<<Benjamínpita miraqkunam mantsaypä löbunö kayanqa.

Tsarinqan ashmata wäraylla mikuqnömi kayanqa.

Tardipanam soldädu mayinkunata aypunqa>>.

28Tsaynö nirmi tsurinkunaman Jacob bendicionta churarqan. Chunka ishkay tsurinkunapita miraqkunam Israel runakunaqa chunka ishkay trïbukuna kayan.

Jacob wanunqan

29Tsaypitanam tsurinkunata Jacob nirqan: <<Unay castäkunawan tinkuq aywanäpänam kaykä. Wanukuptï papänïwan awilü pamparanqanman apaykamar pampayämanki. Paykunam heteo runa Efrónpa chakran machaychö pamparaykäyan. 30Tsay machayqa Canaánchö Mamripa wak tsimpan Macpelachömi kaykan. Tsay machaytam chakrantinta Efrón runapita awilü Abraham rantirqan castankunawan pampakuyänanpä.#Gén. 23.1-20. 31Tsaychömi pamparaykan awilü Abraham, awilä Sara, papänï Isaac#Gén. 25.9-10; 35.27-29. y mamä Rebecapis. Warmï Leatapis tsaymanmi pamparqä. 32Tsay machaytam chakrantinta heteo runakunapita awilü rantirqan>>.

33Tsurinkunata yätsiskirmi cämanman chachaykur Jacob qokaskirqan.#Hech. 7.15.

Currently Selected:

Génesis 49: qxo

Highlight

Copy