Génesis 45

Wawqin kanqanta José willanqan

1Judá tsaynö rugaptinmi José awantarqannatsu wawqin kanqanta willayta. Tsaymi sirviqnin runakunata nirqan: <<Kaypita llapayki yarquyay>>.

Sirviqninkuna yarquskiyaptinnam wawqinkunallawanna José quëdarqan.#Hech. 7.13. 2José jinchipa waqanqantam Egipto runakunapis wiyayarqan. Tsaynöllam Faraónpa palaciunchöpis musyayarqan.

3Tsaypitanam José nirqan: <<Wawqikikuna Josémi kä. ¿Rasunpaku papänï kawaykanrä?>>

Josépa ñöpanchö kaykäyanqanta musyaykurmi wawqinkuna pasaypa mantsakaywan ima niytapis puëdiyarqantsu. 4Josénam nirqan: <<Ñöpäman witiyämuy>>.

Witiykuyaptinnam nirqan: <<Egiptuman rantikayämanqayki wawqikikunam kä. 5Rantikayämanqaykipita ama llakikuyaytsu ni ajäpänakur ama nanaq ñawikikunapa rikapänakuyaytsu. Tayta Diosmi puntaykikunata kayman mandamashqa runakuna mallaqaywan mana wanuyänanpä. 6Ishkay watanam maytsaychö hambrüna. Tsaynöllam pitsqa wata masrä hambrüna kanqa. Muruyaptinpis manam mikuy wayunqatsu. 7Tsaynö kananpä kaptinmi Tayta Dios qamkunapa puntaykikunata mandamashqa hambrünawan mana ushakäyänaykipä. Tsaynöpam qamkunapita miraqkunapis ushakäyanqatsu. ¿Pirä ichikllatapis yarpanman karqan Tayta Dios tsaynö permitinqanta? 8Tayta Dios munaptinmi qamkuna mana tantiyarpis rantikayämarqayki. Tsaymi kay nacionchö noqata churamashqa Faraónta mandayinäpä, wayinta rikanäpä y llapan Egipto runakunapa gobernadornin kanäpä.

9<<Kananqa papänï kaqman ras kutiykur willayay: <Tsuriki Josétam Tayta Dios churashqa Egipto runakunapa gobernadornin kananpä. Rasshi tinkunaykipä aywashun. 10Wanukunqaykiyaq José rikashunaykipäshi imaykantsikta apakurkur llapan willkaykikunawan y ashmaykikunawan Gosén partiman aywakushun. 11Tsay nacionchöshi imapis mana faltämänapä mikuyta alistapämäshun. Pitsqa wata masräshi hambrüna kanqa>.

12<<Tsaynö ninqäta wawqï Benjamín y llapaykikunam wiyaykäyanki. 13Kay Egiptuchö llapanpis respitayämanqanta papänintsikta willayanki. Tsaynölla willayanki kaychö llapan rikayanqaykikunata. Kanan ras aywar papänintsikta pushayämuy>>.

14Niskirmi Joséqa Benjamínwan makallanakurkur waqayarqan. 15Tsaynöllam wakin wawqinkunatapis makallakur mutsarnin José waqarqan. Tsaypitaqa mana mantsapaypanam Joséta wawqinkuna parlapäyarqan.

Egiptuchö tänanpä Jacobta Faraón qayatsinqan

16Josépa wawqinkuna chäyämunqanta musyaskirmi mandayiqninkunawan Faraónpis kushikuyarqan. 17Tsaymi Joséta Faraón nirqan: <<Wawqikikunata niy ashnunkunaman chaqnakurkur Canaánman kutiyänanpä. 18Llapan castankunatawan papänikita kayman pushayämutsun. Chäyämuptinnam allinnin partita rikatsishä tsaychö täyänanpä. Tsaynöllam kay nacionchö allinnin mikuyta mikuyanqa. 19Tsaynölla manday kaypita carrëtakunata aparnin warmikunata, wamrakunata y papänikitapis apayämunanpä. 20Ama llakikuyätsuntsu apamuyta mana puëdiyanqanpäqa. Egiptuchö mas alli kaqkunatam chaskiyanqa>>.

21Israelpa#45.21 Israelqa Jacobpa jukaq jutinmi. tsurinkuna José ninqannöllam llapantapis rurayarqan. Faraón ninqannöllam carrëtakunata José apatsirqan. Nänichö mikuyänanpämi millkapatapis apatsirqan. 22Tsaypitanam wawqinkunata mushuq röpankunata qararqan. Benjamíntanam kimsa pachak (300) siclo qellayta y pitsqa mushuq röpata qararqan. 23Papäninpänam chunka ashnukunawan Egiptuchö mas allinnin kaqkunata apatsirqan. Tsaynöllam apatsirqan chunka china ashnukunawan trïguta, tantata y wakin mikuykunatapis Egiptuman aywar mikuyänanpä. 24Wawqinkunata despacharmi José nirqan: <<Rimanakurtä nänipa aywayankiman>>.

Tsaynö yätsiskiptinmi aywakuyarqan.

25Egiptupita kutirnam papänin Jacob täranqan Canaánman chäyarqan. 26José kawaykanqanta y Egiptuchö mandaq kanqanta willayaptinmi Jacob ima niytapis mana puëdir criyirqantsu. 27José ninqanta llapanta willayaptinmi y payta apayänanpä carrëtakunata apatsinqanta rikaykurmi pasaypa kushikurqan. 28Tsaymi nirqan: <<¡Kananmi musyaskillä tsurï José kawaykanqanta! ¡Manarä wanukur tsurïwan tinkunäpä juklla aywashä!>>

Currently Selected:

Génesis 45: qxo

Highlight

Copy