YouVersion Logo
Search Icon

Génesis 38

38
Tamar qeshyakunqan
1Tsay witsanmi wawqinkunawan taykanqanpita Hirapa wayinman Judá aywakurqan. Hiraqa Adulam markapitam karqan. 2Tsaychö tärarmi Súa jutiyuq cananeo runapa tsurin jipashwan reqinakuskir churakarqan. 3Tsay jipash qeshyaq rikakurmi ollqu wamrata qeshyakurqan. Wamranpa jutintanam churarqan Erta. 4Tsaypita yapay ollqu wamrata qeshyakurmi jutinta churarqan Onánta. 5Tsaypita yapaypis juk ollqu wamrata qeshyakurmi jutinta churarqan Selata. Quezibchö Judá taykaptinmi tsay tsurinkuna yuriyarqan.
6Mayor tsurin Ertam Judá tätsirqan Tamar jutiyuq jipashwan. 7Erqa mana alli ruraq karmi Tayta Dios munanqannötsu kawarqan. Tsaynö mana cäsukunqanpitam Tayta Dios wanutsirqan.
8Tsaymi qepa kaq tsurin Onánta Judá nirqan: <<Hïju, wawqikipa viüdanwan täkuy paychö tsuriki yuriptin wawqikipa tsurinnö kananpä>>.#Deut. 25.5-6.
9Onánqa musyarqan tsurin yurirpis wawqinpa tsurinnö kananpä kanqantam. Tsaymi llumtsuynin viüdawan pununqan höra ruraykanqanchö jipiskir jukläman juturatsiq. Tsaynö rurarqan wawqinpa tsurinnö kananta mana munarmi. 10Tsaynö Onán ruraptinmi Tayta Dios pasaypa rabyarnin paytapis wanutsirqan.
11Ishkan tsurinkuna tsaynö wanuskiyaptinnam Judáqa yarparqan tsurin Selapis Tamarwan tarnin wanunanpä kanqanta. Tsaymi Tamarta nirqan: <<Tsurï Sela jövinyanqanyaq papänikipa wayinchö viüdalla täkuy>>.
Tsaynö niptinmi papäninpa wayinman Tamar kutikurqan.
12Tsaypita atska wata päsaskiptinnam Judápa warmin wanurqan. Tsay warmiqa Súapa tsurinmi karqan. Warminta lütur cumpliskirnam Timnatchö üshankunapa millwanta rutuykäyanqan kaqman Judá aywarqan. Paytam Adulam markapita reqinakunqan Hira wallkirqan.
13Timnatman millwa rutuq suegrun aywaykanqantam Tamar musyaskirqan. 14Tsaymi lütunqan röpata trocakuskir pipis mana reqinanpä vëluwan tsapakuskir Enaim marka yaykunaman jamaskirqan. Tsayqa Timnatman aywana nänichömi karqan. Tamarqa tsaynö rurarqan Sela jövinna kaykaptinpis suegrun mana tätsiptinmi.
15Cäran tsapashqa warmi jamaraykaqta rikaykurmi Judá yarparqan prostitüta warmi kanqanta. 16Tsaymi nänipa aywaykar parlapänanpä yaqarqan. Llumtsuynin kanqanta mana musyarmi nirqan: <<¿Manatsurä punurkushwan, mamïta?>>
Niptinnam nirqan: <<Punushqaqa ¿imatatä pägamanki?>>
17Judánam nirqan: <<Juk malta cabratam apatsimushä>>.
Warminam nirqan: <<Rasunpa apatsimänayki kaptinqa imallaykitapis prendata jaqipämay>>.
18Tsaynö niptinnam Judá nirqan: <<¿Imata jaqipänätatä munanki?>>
Warminam nirqan: <<Watuntin sëlluykita y aptaraykanqayki tukruykita dëjapämay>>.
Tsaynö niptinmi prendata dëjapaykur paywan punurqan. Tsaypitanam Tamarqa qeshyaq rikakurqan. 19Tsaypitanam wayinman Tamar kutiykur jatiranqan vëlunta jipiskir lütu röpanta yapay jatikurqan.
20Judánam amïgun Hirawan malta cabrata apatsirqan prenda jaqimunqankunata qorimunanpä. Tsay cabrata apakurkur aywar tsay warmita manam tarirqannatsu. 21Tsaymi tsay markachö täraq runakunata tapukur nirqan: <<Taytakuna, tapukulläshayki. Kay Enaim markaman yaykunachö jamaraq prostitüta warmita ¿manaku rikayällarquyki?>>
Tsaynö tapukuptinmi tsaychö täraq runakuna niyarqan: <<Kaychöqa manam ima prostitütatapis rikayarqütsu>>.
22Runakuna tsaynö niyaptinmi Judá kaqman kutiykur willarqan: <<Manam tsay warmita tarirqütsu. Tsaychö täraq runakunam niyämashqa imaypis prostitüta warmi tsaychö mana kanqanta>>.
23Tsaymi Judá nirqan: <<Mana tarishqa kaykaptikiqa imanashuntä. Yapay ashishqaqa runakunam asipämäshun. Prenda jaqipamunqäkunata jina apakutsunpis>>.
24Tsaypita kimsa killa päsaskiptinnam runakuna shamur Judáta willayarqan: <<¡Llumtsuyniki Tamarqa piwanpis kakushqam kanqa! ¡Tsaymi kanan qeshyaq kaykan!>>
Judánam pasaypa rabyar nirqan: <<¡Tsay niraq warmitaqa wayinpita jipiskir rupatsiyay!>>
25Wanutsiyänanpä apaykäyaptinmi suegrun Judáman Tamar willakatsir nirqan: <<Kay prenda jaqipämaq runapatam qeshyaq kaykä. Reqiyay watuntin sëllu y tukru pipa kanqantapis>>.
26Tsayta rikaykurmi kikinpa kanqanta reqiskir Judá nirqan: <<Payqa manam jutsayuqtsu. Noqam jutsayuq kä tsurï Selawan mana tätsinqäpita>>.
Tsay junaqpitaqa Judá mananam llumtsuyninwan imaypis punuyarqannatsu.
27Killan tinkuskiptinnam Tamar qeshyakurqan millishta. 28Qeshyakur ñakaykaptinmi jukaq wamrapa makin yarqamurqan. Tsaynö yarqamuptinmi partëraqa puka jïluwan wataskir nirqan: <<Kay kaqmi mayor kaykan>>.
29Peru jinan höram makinta kutiskatsirqan. Tsaypita wawqin puntata yuriskiptinnam partëra nirqan: <<¿Kayqa imanöparä jukaqta llallimushqa?>>
Puntata yurinqanpitam tsay wamrapa jutinta churarqan Faresta#38.29 Fares ninanqa kichaq ninanmi.. 30Tsaypitarämi puka jïluwan makin watashqa kaq yurirqan. Tsay wamrapa jutintam churarqan Zarata#38.30 Zara ninanqa atsikyaq ninanmi. Tsaynö jutinta churarqan puka jïluwan watashqa kanqanpitam..

Currently Selected:

Génesis 38: qxo

Highlight

Share

Copy

None

Want to have your highlights saved across all your devices? Sign up or sign in