Génesis 34

Dinata violanqan

1Leapa wamranmi Dina karqan. Paymi tsay läduchö täraq yanasankuna watukaq aywarqan. 2Siquemmi heveo runa Hamorpa tsurin karqan. Hamorqa tsaychö täraq runakunapa autoridäninmi karqan. Dinata rikaykurmi Siquem pasaypa munaparnin violarqan. 3Tsaypitanam Siquemqa Dina kuyananpä imaykanöpapis shonqunman yaykuyta munarqan. 4Tsaymi Siquemqa papänin Hamorta nirqan: <<Papä, tsay jipashta warmïpä ashipaykallämay>>.

5Jacobnam musyaskirqan tsurin Dinata Siquem violanqanta. Tsaynö musyaykarpis tsurinkuna ashmankunawan jallqachö kaptinmi paykuna kutiyämunqanyaq upälla kakurqan. 6Tsayyaqmi Siquempa papänin Hamor aywarqan Jacobwan parlananpä. 7Jacobpa tsurinkuna jallqapita kutiskamurmi musyayarqan paninta Siquem violanqanta. Tsayta musyaykurmi pasaypa rabyakuyarqan. Tsaynö violanqan pasaypa penqakuypämi karqan. Tsaytaqa manam imaypis ruranmantsu karqan.

8Tsaymi paykunawan parlar Hamor nirqan: <<Tsurï Siquemmi panikipä pasaypa löcuyashqa puriykan. Tsaymi shamurqü tsurïwan panikita tätsinantsikpä. 9Tsaynöpam compädrita rurar juk castanöllana kashun. Tsaymi tsurïkunapis qamkunapa warmi tsurikikunawan churakäyanqa y qamkunapapis noqakunapawan churakäyanqa. 10Tsaynöpam kayllachöna täkushun. Täyänaykipä munayanqaykita mayqan lädutapis akrakuyay. Tsaynölla ima negociullatapis rurayay. Chakratapis kikikikunapana kananpä rantiyay>>.

11Tsaynöllam Siquempis Dinapa papänintawan turinkunata nirqan: <<Taytakuna, panikita awniykayällämay. Awniyämaptikiqa imatapis munayanqaykitam qarayäshayki. 12Panikita awniyämaptikiqa costumbrintsikpita masta mañayämaptikipis pägayäshaykim. Imaykanöpapis panikita awniyämänaykitam munä>>.

13Tsaynö niptinmi paninta violanqanpita Jacobpa tsurinkuna pasaypa rabyashqa kar Siquemtawan papänin Hamorta janan shonqulla awniyarqan. 14Tsaymi niyarqan: <<Noqakunaqa manam panïta awnikuyämantsu señalakunni runataqa. Señalakunni runa mashäkuna karqa penqakuypämi kanman. 15Noqakuna señalakushqa kayanqänö qamkunapis llapan ollqu kaqkuna señalakuyaptikiqa panïwan tänaykipä awniyäshaykim. 16Señalakuyaptikiqa tsurikikunatapis warmi tsurïkunawanmi churashun. Tsaynöllam warmi tsurikikunawan tsurïkunatapis churashun. Tsaynöpam llapantsikpis tsay castanölla kashun. 17Niyanqänö mana señalakuyaptikiqa panïta pushakurkurmi aywakuyäshä>>.

18Tsaynö niyaptinmi Hamorwan tsurin Siquem paykuna niyanqannö señalakuyänanpä awniyarqan. 19Tsaypita aywakurmi Dinata kuyarnin Siquemqa cuerpunta juklla señalakurqan. Payqa papäninpa castanchö mas respitädu jövinmi karqan. 20Tsaypitam papänin Hamorwan marka yaykuna punkuman aywayarqan. Tsaychömi runakunata niyarqan: 21<<Jacob casta runakunaqa alli runam kayan. Paykuna kaychö täyänanpä jallqantsikkunapis chakrantsikkunapis jäkuykanmi. Tsaynö kaykaptinqa kaychö täkur ima negociutapis rurayätsun. Tsaynöpam warmi tsurinkunawan tsurintsikkuna täyanqa. Warmi tsurinkunana tsurintsikkunawan täyanqa. 22Peru tsay castanölla kanantsikpämi paykuna munayan señalakushqa kayanqannö noqantsikpis ollqu kaqkuna señalakunantsikta. 23Paykuna niyanqanta awnishqam noqantsikwan quëdayanqa. Tsaynöpam llapan imaykankunapis ashmankunapis noqantsikpana kanqa>>.

24Tsaynö niptinmi tsaychö qorikaq runakuna awniyarqan Hamorwan Siquem niyanqanta. Tsaymi llapan ollqu kaqkuna cuerpunta señalakuyarqan.

25Tsaypita kimsa junaqtam Dinapa turinkuna Simeónwan Leví tsay markaman yaykuyarqan. Cuerpunkunata señalakuyanqanpita nanaywan karmi defiendikuyänanpä valorninkunapis karqantsu. Tsaynö kaykaqtam espädawan llapanta wanutsiyarqan. 26Tsaynöllam Hamortawan tsurin Siquemtapis espädawan wanutsiyarqan. Tsaypitanam Siquempa wayinpita Dinata pushakurkur aywakuyarqan.

27Tsaypitam Jacobpa wakin kaq tsurinkunapis markaman yaykur llapan runakuna wanushqa jitaraykaqta tariyarqan. Paninta violanqanpita rabyashqa karmi tsay markachö tariyanqan kaqtaqa imaykantapis apayarqan. 28Tsaynöllam apayarqan üshakunata, cabrakunata, wäkakunata, ashnukunata y imaykatapis markachö y chakrachö tariyanqan kaqtaqa. 29Wayikunachö tariyanqan kaqta llapanta aparmi wamrakunatapis warmikunatapis prësu apayarqan.

30Tsaynö rurayanqanta musyaykurmi Simeónta y Levíta Jacob nirqan: <<¿Imamantä jitarpayämarquyki? Wanutsiyanqaykita musyaskirqa cananeo runakunawan ferezeo runakuna pasaypam chikiyämanqa. Paykuna willanakur shamurmi llapantsikta wanutsimäshun. Sirvimaqnintsik runakunapis paykunata ichipänapä wallkallam kaykäyan>>.

31Tsaynö niptinmi paykuna niyarqan: <<Tsayöraqa ¿jinachi imayka prostitüta warmitanöpis panïkunata tsaripakunman karqan?>>

Currently Selected:

Génesis 34: qxo

Highlight

Copy