Génesis 26

Gerar markachö Isaac täranqan

1Tsay witsanmi pasaypa hambrüna karqan. Tsayqa Abraham kawanqan witsan kanqannömi karqan.#Gén. 12.10. Tsaynö kaptinmi Gerar markaman Isaac aywakurqan. Gerarchömi filisteo runakunapa mandaqnin rey Abimelec täkurqan. 2Tsaychömi Tayta Dios yuripuskir Isaacta nirqan: <<Egiptuman ama aywaytsu. Tänaykipä ninqä partillachörä 3jäpa runanö täkuykay. Noqaqa qamwanmi imaypis kaykäshä.#Gén. 26.24; 28.15; 31.3; 39.2. Tsaynöllam qamta bendisar qamta y qampita miraqkunata kay entëru jallqakunata y raqrakunata entregashä. Tsaynöpam cumplishä papäniki Abrahamta awninqäta. 4Noqam qampita miraqkunata bendisashä qoyllurkunanöpis yupayta mana atipaypä kayänanpä. Paykunatam entregashä kay entëru jallqakunata y raqrakunata. Paykuna kayninpam llapan nación runakunapis bendicionnïta chaskiyanqa.#Gén. 12.1-3; 13.14-15; 15.18-21; 22.16-18. 5Tsaynö kanqa mandamientükunata, leynïkunata y yachatsinqäkunata Abraham cumplinqanpitam>>.

6Tayta Dios tsaynö niptinmi Isaacqa Gerarchö täkurqan.

7Tsaychö täraq runakunam Isaacta tapuyarqan Rebeca iman kanqantapis. Rebeca kuyayllapä kaptinmi Isaac yarparqan warmin raykur runakuna wanutsiyänanpä kanqanta. Tsaymi willakurqantsu Rebeca warmin kanqanta. Rasun kaqta ninanpa rantinmi <<payqa panïmi>> nirqan. 8Tsaypita unaytanam filisteo runakunapa mandaqnin rey Abimelec ventänanpa rikachakunqanchö rikarqan Rebecata Isaac kuyar shullpapaykaqta. 9Tsayta rikaykurmi Isaacta qayaykatsir Abimelec nirqan: <<Payqa warmikim ¿aw? Warmiki kaykaptinqa ¿imanirtä <panïmi> nirqayki?>>

Tsaymi Isaac nirqan: <<Taytay, tsaynö nirqä warmï raykur wanutsiyämänanpä kanqanta yarparmi>>.

10Tsaynö niptinmi Abimelec nirqan: <<¿Imanirtä tsaynöqa llullapämarquyki? Jinachi mayqan runapis warmikiwan pununman karqan. Tsaynö llullapäyämaptiki jinachi jutsamanpis ishkiyäman karqan>>.

11Tsaypitanam llapan runakuna musyayänanpä Abimelec nirqan: <<Kay runata o warminta pipis wajupaq kaqqa wanutsishqam kanqa>>.

12Tsay watam Isaacqa tsaychö murukurqan. Tayta Dios bendicionninta churaptinmi qoriytapis mana puëdinqanyaq mikuynin wayurqan. 13Tsaynöpa Isaac pasaypa rïcuyaptinmi imaykanpis atska karqan. 14Üshankunapis, cabrankunapis, wäkankunapis atskamanmi mirayarqan. Chakranta arupäyänanpä sirviqninkunapis atskam kayarqan. Tsaynö rïcuyaptinmi filisteo runakunaqa chikir 15Isaacpa papänin Abraham uchkutsinqan pözukunata tsapayarqan.

16Tsaypitanam Isaacta Abimelec nirqan: <<Kaypita aywakuy. Noqakunapita masmi rïcuyarquyki>>.

17Tsaynö niptin Isaac aywakurmi Gerar raqra ñöpan pampachöna täkurqan. 18Tsayman chaykurmi papänin Abraham uchkutsinqan pözukunata Isaac pitsatsirqan. Tsay pözukunatam Abraham wanuskiptin filisteo runakuna pampar ushayarqan. Pitsaskatsirmi Isaacpis papänin jutitsinqannölla jutin churarqan.

19Tsay pampachö mushuq pözupä uchkuykarmi Isaacpa sirviqninkuna tsuya yakuta tariyarqan. 20Tsaymi Gerarchö täraq üsha mitsiqkunawan Isaacpa üsha mitsiqninkuna yakuta qechunakur pelyayarqan. Tsaypitam tsay pözupa jutinta Isaac churarqan Esekta#26.20 Esek ninanqa pelyatsikuq ninanmi.. 21Tsaypitanam Isaacpa sirviqninkuna juk pözutana uchkuyarqan. Tsay jananpis yapaymi pelyayarqan. Tsaymi tsay pözupa jutinta Isaac churarqan Sitna#26.21 Sitna ninanqa chikinakuy ninanmi. jutin kananpä. 22Tsaynö pelyayaptin jukläpana aywakurmi tsaychöpis pözuta uchkutsirqan. Piwanpis tsay janan mana pelyarnam jutin churarqan Rehobot#26.22 Rehobot ninanqa libri ninanmi. jutin kananpä. Tsaymi nirqan: <<Kananmi sïqa Tayta Dios yanapaykämantsik tranquïlu kawanantsikpä. Tsaymi wamrantsikkunapis ashmantsikkunapis atskaman mirayanqa>>.

23Tsaychö taykanqanpitam Beersebaman aywakurqan. 24Tsayman chanqan paqasmi Isaacta yuripaykur Tayta Dios nirqan:

<<Noqam kä papäniki Abraham yärakunqan Dios.

Qamwan kaykaptïqa ama mantsariytsu.

Sirvimaqnï Abrahamta awnishqa karmi bendisashayki.

Tsaynöllam qampita miraqkunamanpis bendicionnïta churashä atskaman mirayänanpä>>.

25Tsaychömi altarta pirqaskir Tayta Diosta Isaac adorarqan. Tsaychö täraptinmi sirviqninkuna juk pözuta uchkuyarqan yakuta jipiyänanpä.

Isaacwan Abimelec awninakuyanqan

26Juk kutim Gerar markapita Abimelec aywarqan Isaacwan parlayänanpä. Abimelecwanmi#Gén. 21.22. aywarqan yätsiqnin Ahuzat y soldädunkunapa mandaqnin Ficolpis. 27Chaykuyaptinmi Isaac nirqan: <<Chikiyämar markaykipita qarqaykämarqa ¿imaqtä shayämurquyki?>>

28Tsaynö niptinmi paykuna niyarqan: <<Noqakunam tantiyakuyarqü Tayta Dios imachöpis qamta yanapaykäshunqaykita. Tsaymi pactuta ruranantsikpä shayämurqü. 29Kanan awniyämay imaypis alli kawanantsikpä. Manam qamkunata chikiyarqütsu, tsaypa rantinqa imaypis allim kawarqantsik. Yarqakamurpis tranquïlum aywakayämurquyki. Qamtaqa Tayta Diosmi imaykachöpis yanapaykäshunki>>.

30Tsaynö niyaptinmi Isaacqa alli allita kusinaskatsir paykunawan mikuyarqan y upuyarqan. 31Wäraynin wäraynam Abimelecwan Isaac juramentuta rurayarqan alli kawayänanpä. Tsaypita Isaac despachaptinmi paykuna kushishqa aywakuyarqan.

32Tsay junaqmi Isaacpa sirviqninkuna willayarqan uchkuykäyanqan pözuchö yakuta tariyanqanta. 33Tsaymi tsay pözupa jutinta Isaac churarqan Seba#26.33a Seba ninanqa juramentu ninanmi. jutin kananpä. Tsaypitam kananyaqpis tsay markapa jutin Beerseba.#26.33b Beerseba ninanqa Juramentu Pözu ninanmi.

Esaúpa warminkuna

34Esaú chusku chunka (40) watayuq kaykarmi Beeripa tsurin Juditta warmïkurqan. Beeriqa heteo runam karqan. Tsaynöllam Esaúqa Elónpa tsurin Basematta warmïkurqan. Elónpis heteo runam karqan. 35Tsay warmikunawan täraptinmi Isaacwan Rebeca pasaypa rabyakuyarqan.

Currently Selected:

Génesis 26: qxo

Highlight

Copy