Génesis 15

Abramta Tayta Dios awninqan

1Tsaypitanam Abramta revelar Tayta Dios nirqan: <<Abram, ama mantsakuytsu. Noqam tsapäshuqniki escüdu kä. Qammanmi bendicionnïta churamushä>>.

2Tsaynö niptinmi Abram nirqan: <<Tayta Dios, tsurï mana kaykaptinqa ¿pïnïpätä llapan qaramanqaykipis kanqa? Wanukuptïpis llapan imaykäkunawan Damascupita sirvimaqnï Eliezerllanachi quëdanqa. 3Tsuriynaq kanäpä destinaykämaptikiqa podernïchö yuriq sirvimaqllächi llapan imaykäwanpis quëdanqa>>.

4Tsaynö niptinmi Tayta Dios nirqan: <<Manam sirvishuqnikitsu imaykaykiwanpis quëdanqa, sinöqa kikikipa tsurikim>>.

5Tsaypita Abramta waqtaman pushaykurmi Tayta Dios nirqan: <<Ciëluta rikay. ¿Qoyllurkunata yupayta puëdinkiku?>>

Tsaypitam yapay nirqan: <<Tsaynöllam qampita miraqkunapis yupayta mana atipaypä kayanqa>>.#Rom. 4.18; Heb. 11.12.

6Tsaynö ninqanta Abram criyiptinmi Tayta Dios jutsaynaqtana chaskirqan.#Rom. 4.3, 9, 22; Gál. 3.6; Stg. 2.23. 7Tsaypitanam Tayta Dios nirqan: <<Noqaqa Tayta Diosmi kä. Kay rikatsinqä chakrakunata herenciayki entreganäpämi caldeo runakuna taräyanqan Ur markapita jipimurqä>>.

8Tsaynö niptinmi Abram tapurqan: <<Tayta Dios, ¿imanöpatä musyashä kay rikatsimanqaykikuna rasunpa noqapä kanqanta?>>

9 Tayta Diosnam nirqan: <<Kayman apamuy juk ternërata, juk cabrata y juk carnëruta. Tsay ashmakuna kayätsun kimsa watayuq. Tsaynölla apamuy juk kullkushta y juk pushapa palumata>>.

10Tsaynö niptinmi Abram tsay ashmakunata apaykur pullanpa cuartizaskir frenti frenti churarqan.#Jer. 34.18-19. Palumatawan kullkushtam sïqa cuartizarqantsu. 11Tsay churanqan aytsaman wiskurkuna shayämuptinmi Abram wajakurqan. 12Patsa tsakaykaptinnam Abram pasaypa punukaskirqan. Punukashqa kaykarmi sueñuyninchö tsakayta rikar pasaypa mantsarirqan.

13Tsay höram Tayta Dios nirqan: <<Qampita miraqkunam chusku pachak (400) wata juk markachö jäpa runakunapa esclävun kar ñakayanqa.#Éxo. 1.1-14; Hech. 7.6. 14Tsaynö kaptinpis tsay marka runakunatam castigashä. Tsaypitanam qampita miraqkunata imaykayuqta jipimushä.#Éxo. 12.36; Hech. 7.7. 15Manarä tsaykuna päsaptinmi qamqa rukuyashqana wanur unay castaykikunawan tinkuq aywakunki. 16Chusku pachak wata päsaskiptinnam qampita miraqkuna kay taykanqaykiman kutiyämunqa. Kutimunanpäqa kaychö täraq amorreo runakunapa jutsankuna mana atipaypämi kanqa>>.

17Patsa tsakaskiptinnam shanshayuq qoshtarrä kañalla y qeru puntanchö lunyarrä nina yuriskir churaraykaq aytsakuna chawpinpa päsarqan.#15.17 Tsay witsanmi tsaychö täraq runakuna imatapis awninqanta cumplinanpä parlar ashmakunata pullanpa cuartizaskir frenti frenti churayaq. Tsaypitanam tsay aytsakuna chawpinpa päsar niyaq: <<Noqatapis ishkayman roquyämätsun pactuta ruranqäta mana cumpliptïqa>>. Tsaymi shanshayuq qoshtarrä kañalla y qeru puntanchö lunyarrä nina aytsakuna chawpinpa päsaykaqta rikar Abram tantiyarqan roqunqan ashmakunapa chawpinpa kikin Tayta Dios päsaykanqanta. Tsaynö päsarmi Abramta Tayta Dios tantiyatsirqan awninqanta cumplinanpä. 18Tsay junaqmi Abramwan pactuta rurar Tayta Dios nirqan: <<Kay taykanqayki partita qampita miraqkunatam entregashä Egipto mayupita Éufrates jatun mayuyaq.#Hech. 7.5. 19Tsaychömi taykäyan ceneo runakuna, cenezeo runakuna, cadmoneo runakuna, 20heteo runakuna, ferezeo runakuna, refaíta runakuna, 21amorreo runakuna, cananeo runakuna, gergeseo runakuna y jebuseo runakunapis>>.

Currently Selected:

Génesis 15: qxo

Highlight

Copy