O KISAH RASUL-RASUL 23

1O Paulus wapulo-pulono o juru hakimi manyawa gënanga daha wotemo, ”O Roriadodoto! Hiädono o wange nënanga ngohi tomamäo tahowonua ma Jou Madutuika ahihininga doka magoronaka imakorona de tongohi ahiwowango.” 2Maöraha o Paulus wotemo hokogënanga, ma Imam womo Mulia o Ananias wihuloko o nyawa womaoko o Paulus aihonongaka wapoka o Paulus aiuru. 3#Mat. 23:27-28 O Paulus wotemo ma imam womomuliaika gënanga, ”Ma Jou Madutu maraioka wonipoka ngona, o nyawa notota lawani, de noelu-eluku notebini! Ngona nogogeruku genangoka nohi tailako ngohi imoteke o Musa aitita, enahioko ngona mahirete natilakuru o tita gënanga de nahuloko o nyawa ihipoka ngohi!”

4O nyawa aihonongaka o Paulus wotemo o Paulusika, ”Ngona nihikauku ma Jou Madutu ai imam womomulia!” 5#Kel. 22:28 O Paulus wohaluhu, ”Eë, ngohi tohiorikua o Roriadodoto, ünanga ma imam womomulia. Igoungu Ma Jou Ai Demo ma Buku magoronaka naga i tulihoka, ’Uha ngona nahikauku anihoana matutuda.’ ”

6 # Kis. 26:5; Plp. 3:5 O Paulus wamäke utu o juru hakimino gënanga, o Saduki manyawaino deʼ utuoli o Farisi manyawaino. Karana gënanga ünanga watemo o juru hakimika gënanga, ”O Roriadodoto! Ngohi o Farisioka manyawa moi, o Farisioka manga difauku. Ngohi nihi tailako nenangoka mahababu ngohi tongaku o nyawa yohone-honengoka aha yowangokali.” 7Maöraha ünanga wotemo hokogënanga, o Farisioka manyawa deʼ o Saduki manyawa gënanga muläenge imatekeributu, hiädono o doomu gënanga idadi iregu o doomu hinoto. (8#Mat. 22:23; Mark. 12:18; Luk. 20:27 Hababu o Saduki manyawa manga gamäke o nyawa yohonengoka aha yowangokaua, o malaekat koiwa, deʼ o womaha-o womahaö koiwa; mä o Farisi manyawa yongaku aha naga mata-mata gënanga.) 9Ipuda o gigoro kohagiria. O Farisioka manyawa yamuruono naga yodadi guru agama imaoko deʼ yalawani yagou-goungu. Onanga yato, ”Imoteke ngomi o nyawa nënanga kama huhutulö de koiwa aihowono! Mudukua igoungu naga o womaha ekola o malaekat iwitemo unangika!”

10Ima teke ributu gënanga idadi hokogënanga mahiri hiädono o tentara duru manga baluhu gënanga wohawana uha-uha o Paulus aha iwiguruhe önanga. Hoʼ unanga wahuloko o tentara de manga duduonoka yoiki iwil̄ë o Paulus o nyawa gënanga manga hidogoronaka deʼ iwiao ünanga manga ngï ika.

11Ma hutu yaino ma Jou Yesus womaoko o Paulus aidatekoka deʼ wotemo, ”Ani hininga naputurungu! Ngona nohidoakoka anihakihi yakorona Ngohi o Yerusalemoka. Ngona aha kiani nohi döaka o hakihi gënanga o Romakaö.”

O doomu madorou mangale iwitoma o Paulus

12Yarehino mawange kao ngoru-ngoruminohi, o Yahudioka manyawa muläenge yodiai o doomu madorou. Onanga yokoboto aha yol̄omua ekola yokere nako önanga iwitomauahi o Paulus. 13Naga o nyawa yamoruata iholoi yodiai o doomu madorou gënanga. 14Onanga yoiki o imam-imam manga häekika, deʼ o Yahudioka manga tutuda de yotemo, ”Ngomi mikokikobotoka, aha miol̄omua ekola miokerua okia naga nako ngomi miwitomauahi o Paulus. 15Aa, öraha nënanga o Roriadodoto de o Agama ma Juru Hakimi kiani nihidingoto o hurata o tentara duru manga baluhika o Romaino gënanga mangale nigahoko ünanga wiaoli o Paulus wini himanga ngini, tanu hokä ngini nimau niwitailakoli aiparakara de iholoi madiai. Deʼ ngomi aha mimahidiaioka mangale miwi toma ünanga womahi adonuahi ünanga nenangino.”

16Mä o Paulus ngoi hiranga amingohaka wohigihe-gihene imakatatoro yodiai gënanga. Unanga woiki o tentara manga ngï ika deʼ wohingahu o hali gënanga o Paulusika. 17Daha o Paulus wiahoko womatëngo o tentara mangabaluhu deʼ wotemo unangika, ”Niao o ngohaka o goduru nënanga o tentara niabaluhika; ünanga womau wohingahu okia naga utu unangika.” 18O tentara manga baluhu gënanga wiao o ngohaka o goduru gënanga o tentara duru manga baluhika deʼ wotemo, ”O Paulus, hitumu-tumunguku gënanga, wohiahoko ngohi deʼ wogahoko ngohi tiao o ngohaka o goduru nënanga ngonaika Bapa; ünanga womau wohingahu okia naga utu.”

19O tentara duru manga baluhu gënanga wasö aigiama o ngohaka o goduru gënanga, daha wiao ünanga womatëngo dika madatekika deʼ wileha, ”Ngona nomau nohihingahu okia ngohino?”

20O ngohaka o goduru gënanga wohaluhu, ”O Yahudioka manyawa imakatatoro mangale yogahoko Tuanga niao o Paulus wahimanga o Agama ma Juru Hakimi yarehino, hokä tanu önanga yomau iwitailakoli aiparakara de iholoi madiai. 21Mä uha Tuanga namoteke önanga manga gogahoko gënanga, hababu naga o nyawa yamoruata yoholoi imangiunika mangale iwitatoko ünanga o ngekomoka. Onanga mata-mata yokobotoka aha yol̄omua deʼ yokerua nako önanga iwitomauahi o Paulus. Oraha nënangaö önanga imahidiaioka; mahou yodamä dika anibobaluhu Tuanga.” 22O tentara duru manga baluhu gënanga wotemo, ”Uha nohi ngahu kamoi ikaö de okia ngona nohingahuoka nënanga ngohino.” Daha ünanga wihuloko o ngohaka o goduru gënanga wolio.

O Paulus iwihidingoto o Feliksika

23Ahaino o tentara duru manga baluhu wa ahoko o nyawa yahinoto ihibalu-baluhu, daha ünanga watemo onangika, ”Niasadia o tentara yäratuhu hinoto imakinïki de yamori tumidi o tentara yokuda deʼ yaratuhu hinoto o tentara de manga tuba mangale ima goraka o takoro hiwo o hutu nënanga dika o Kaisariaika. 24De nia sadiaö o kuda mangale o Paulus wodoa deʼ niwi ao ünanga de mahalamati hiädono ma Gubernur Feliksika.” 25Daha o tentara duru manga baluhu gënanga wotulihi o hurata mademo hokonënanga,

26”No Mo Mulia Gubernur Feliks. Ani tabea o Klaudius Lisiasino! 27O nyawa neünanga iwitagokoka o Yahudioka manyawa deʼ ngadekohi önanga iwitoma, nako ngohi toböaua de ahingoha-ngohaka de manga duduono miwihihalamati ünanga; hababu ngohi toihene ünanga o Roma mapareta mabä. 28Karana ngohi toigo tohiöriki imoteke madiai okia aihowono ho önanga iwihi howono unangika, mangohi tiao to önanga manga Agama ma Juru Hakimika. 29Ma inyata ünanga wadiaiua okia naga moiö i patutu wamäke o hukumanga de o hukumanga wohonenge ekola wobui. To önanga manga galaki unangika duga-duga imadohanga de manga tita-tita agama önanga mahirete. 30Ahaino ihingahu ngohi okia naga moi yadiai itotorou o Yahudi manyawaino ihihimanga unangika. Hoʼ, gila-gila ngohi tihidingoto ünanga Tuanga Gubernurika. Deʼ ngohi tähulokoka iwilolawa-lawani ünanga yoao o galaki ngonaika Tuanga.”

31O tentara-tentara gënanga yadiai manga manarama önanga. Onanga iwi l̄ë o Paulus daha iwiao ünanga o hutu gënanga hiädono o Antipatrisika. 32Yarehino önanga yamal̄aika manga duono yoko kuda-kuda manga dodagi ihigila-gila de o Paulus, deʼ onanga mahirete imaidulu manga ngïika. 33Maöraha manga duono yokokuda-kuda gënanga imahi ädono o Kaisariaka, önanga ihi döaka o hurata gënanga magubernurika, daha o Paulus wihi lapahi unangika. 34Ma gubernur wabasa i böto o hurata gënanga, ünanga wileha o Paulusika okiaino aiahali. Maöraha ünanga wohi öriki o Paulus ai ahali o Kilikiaino, 35ünanga wato, ”Kayaoa! Ngohi aha tatailako ani parakara, maöraha okia o nyawa ini kökalaki ngona yoböaka nenangino.” Daha ünanga wapareta hupaya o Paulus iwitumungu o Herodes aikadato magoronaka.

Currently Selected:

O KISAH RASUL-RASUL 23: TLB

Highlight

Copy