O KISAH RASUL-RASUL 22
22
1”Bapa-bapa de o Roriadodoto mata-mata! Ngohi aha tohihimanga tomademo ngohi nginika. Abeika niihene!” 2Maöraha önanga yoihene o Paulus wotemo de o Ibranioka manga demo, önanga idadi iholoi yorïdoli. O Paulus wohigila-gila aihitararono. 3#Kis. 5:34-39 ”Ngohi o Yahudioka manyawa,” o Paulus wato, ”ngohi tomakil̄au o Tarsusoka o Kilikia mabereraka, mä ngohi todogilamoka nenangoka o Yerusalemoka deʼ ihidotoko de madiai maguru wolamo-amoko o Gamaliel o tita magoronaka o Musa wohidöa-döakoka tongone nangaete de nangatohoraika. Hokä imadäene o Roriadodoto mata-mata nenangoka o wange nënanga, ngohiö duru tomagawe mangale ma Jou Madutu. 4#Kis. 8:3, 26:9-11 Ngohi taaniaya hiädono yohonenge yaninïki o dodötoko mahungi gënanga. Onanga mata-mata yaoa o nauru yaoa o ngoheka, ngohi tatagoko deʼ tahingohama o buiika. 5Ma imam womomulia mahirete de mata-mata o Agama ma Juru Hakimi yakunu ihidöaka o hakihi igoungu ngohi toelukua. Hababu önanga gënanga ihihidoakoka ngohino o hurata mahidongotaka mameta o Yahudi manyawaika o Damsyikoka. De o hurata gënanga ngohi takunu tatagoko dokengoka o nyawa yongaku-ngaku o dodotokika gënanga deʼ taao önanga o Yerusalemika mangale yahukumu.”
O Paulus wohiade-ade aidodagi magoronaka wameta o Damsyik
(Kis. 9:1-19, 26:12-18)
6”Maöraha ngohi o dodagi mahi dogoronakahi deʼ ngade tomahiädono o Damsyikika, maöraha o wange ikorona, o cahaya moi duru kohadararono itodokanino itararono o dihanguku ihikilolitino ngohi. 7Ngohi toruba o tonakuku daha ngohitoihene o ilingi moi itemo ngohino, ’Saulus, Saulus! Yadodoa ngona nohi aniaya Ngohi?ʼ 8Daha ngohi toleha, ’O nagona Ngona, Tuanga?’ Ihaluhu, ’Ngohila o Yesus o Nazaret manyawa gënanga ngona nohiö aniaya Ngohi.’ 9O nyawa naga genangoka mima kokinïki de ngohi yamäke o cahaya gënanga, mä onanga yoihenua o ilingi itemo ngohino. 10Daha ngohi tolehali, ’Ngohi kiani tadiai okia Jou?ʼ Ma Jou wohaluhu, ’Nomomiki deʼ nowohama o Damsyikika. Dokengoka ngona aha inihi ngahu mangale mata-mata ma Jou Madutu womau ngona nadiai.’ 11Ngohi todadi topiloko karana o cahaya yodoleletongo gënanga. Hoʼ, ahi dodiawo ihituda ngohi ihihingohama o Damsyikika.
12Genangoka naga o nyawa womatëngo airomanga o Ananias. Unanga o nyawa moi wohininga aiagama de wamoteke de madiai o Musa aitita. O Yahudioka manyawa mata-mata yogogogere o Damsyikoka duruhe iwihoromati ünanga. 13Unanga woböa wohilega ngohi, daha womaoko ngohi ahihonongaka deʼ wotemo, ’O, Riadodoto Saulus, tanu ngona nomahimäkeokali!ʼ Oraha gënanga dika ngohi tagoraka tongohi ahibiono daha timäke ünanga. 14Ahao ünanga wotemo ngohino, ’Nangaete de nangatohora manga Jou Madutu woni irikoka ngona hupaya ngona nohiöriki Ai mau, deʼ nimäke o Yesus, ma Jou Madutu ai Gilaongo wadiaioka ma Jou Madutu aimau de noihene o Yesus aiilingi mahirete. 15Ngona aha nodadi o hakihi mangale nohiabari o nyawa mata-mataika, okia ngona namäkeoka deʼ noihene. 16Oraha nënanga uhali notamä nomatotedekana. Nomomiki, deʼ nohidöaka anidiri yaohiki. Nomahi böaka ma Jouika hupaya ngona nolapahi ani baradoha.’ ”
Ma Jou Madutu wihuloko o Paulus woriwayati o nyawa mahomoaika o Yahudiokaua
17”Ngohi tomakilioro o Yerusalemika, deʼ maöraha ngohi tomaniata magogiriaka ma Jou ai Tauoka, ngohi ihikuaha ma Jou Madutu ai Womaha. 18Ngohi timäke ma Jou; ünanga wotemo ngohino, ’Taiti namal̄a o Yerusalem, hababu o nyawa nenangoka aha yatarimaua anihakihi mangale Ngohi.’ 19Ngohi totemo, ’Jou, önanga ihiöriki de madiai, ngohi tongohamoka o puji matau-matau mangale tatagoko önanga deʼ tagohara o nyawa iningaku-ngaku Ngona. 20#Kis. 7:58 Hoko genangoli maöraha Anihakihi o Stefanus wohonenge iwitoma, ngohi mahirete naga genangoka deʼ tohigoungu iwitoma gënanga. De ngohi tögöana to önanga manga pakeanga o nyawa iwitoma-toma ünanga.’ 21Mä ma Jou wotemoli ngohino, ’Noiki dika, hababu Ngohi aha tonihuloko ngona o ngï magogurutika o Yahudiokaua manyawaika.’ ”
22O nyawa ka ihigihenohi o Paulus wotemo-temo, mä aidemo mabobahaka gënanga önanga imapöaka imakua-kuatil̄e, ”Niwitoma dika o nyawa hokogënanga. Unanga ipatutua wowango!” 23De imapöaka, önanga yahurero manga juba, deʼ makafo idoa ikokapupu. 24O tentara manga baluhu o Romaino gënanga wahuloko o Paulus iwiao manga ngïika hupaya ünanga iwitailako genangoka de mabuturungoka mangale ihiöriki okia mahababu o Yahudioka manyawa imapöaka hokogënanga yahimanga unangika. 25Mä maöraha o Paulus iwilikoka mangale iwigohara, o Paulus wotemo o tentara manga baluhika woma okoino genangoka, ”Nagaka iyakunu niwigohara o nyawa moi o Roma mapareta mabä, nako ünanga niwi tailakouahi?”
26Woihene gënanga, o tentara manga baluhu gënanga woiki o tentara duru manga baluhika deʼ wotemo, ”Okia nënanga aha Bapa nadiai? O nyawa nënanga o Roma mapareta mabä!”
27Duru manga baluhu gënanga woiki o Paulusika deʼ woleha, ”Abeika nohingahu, naga ngona o Roma mapareta mabä!”
O Paulus wohaluhu, ”Igoungu,” ”ngohi o Roma mapareta mabä.” 28O tentara duru manga baluhu gënanga wotemokali, ”Ngohi todadi o Roma mapareta mabä de tofangu duru koha amoko!”
O Paulus wohaluhu, ”Mä ngohi toma kil̄au hokä o Roma mapareta mabä.” 29Oraha gënanga dika o tentara manyawa yomau iwitailako o Paulus gënanga, imadohuku deʼ duru manga baluhu genangö idadi wohawana karana ünanga iwiranteoka o Paulus, enahioko o Paulus o Roma mapareta mabä.
O Paulus o Agama ma Juru Hakimi manga himangoka
30O tentara maduduono mabaluhu o Roma gënanga woigo duru wohiöriki igou-goungu okia idadi hababu o Yahudi manyawa iwihihowono o Paulus. Hababu gënanga yarehino ünanga wä ähoko o imam-imam manga häeke deʼ o Agamaka manga Juru Hakimi hupaya imatoomu. Daha o Paulus iwihohe airante, ahao iwi ao iwihihimanga onangika mata-mata.
Currently Selected:
O KISAH RASUL-RASUL 22: TLB
Highlight
Share
Copy
Want to have your highlights saved across all your devices? Sign up or sign in
