O KISAH RASUL-RASUL 21

O Paulus woiki o Yerusalemika

1Ngomi mimakitingaka de o jemaat matutuda-tutuda o Efesusino gënanga ahao miamal̄a önanga. Daha ngomi mihidete kamihigila o Kos manühika; deʼ iyarehino ngomi mimahiädono o Rodos manühoka. Genangino ngomi mihidete gila-gila o Patara maleleotika. 2O Pataraka, ngomi miamäke o kapa imau o Fenisiaika. Ngomi miharene o kapa gënanga daha mima jobo 3deʼ mihidete hiädono ngomi miamäke o Siprus manühu miahigiloka; mä ngomi mihidete migila-gila miameta o Siria. Ngomi miuti o Tirusoka, hababu genangoka o kapa ngomi mio bare-barene gënanga aha ihiguti magina. 4O ngï genangoka ngomi mioiki mia tailako o nyawa yongaku-ngaku o Yesusika, daha migogere dede önanga o minggu moi madekana. Imoteke ma Jou Madutu ai Womaha mahimatoko önanga iwitemo o Paulusika hupaya uha woiki o Yerusalemika. 5Mä imataka maöraha mangale ngomi migogere genangoka, ngomi miä mal̄a önanga deʼ ngomi mihigila-gila miadodagi. Onanga mata-mata mimakinïki de mangahekata de önanga mangangohaka imingotaka ngomi hiädono o kota maporetika. Dokengoka o dowongi madatekoka, ngomi mata-mata miatilabukuku deʼ mimaniata. 6Ipaha gënanga ngomi mimakadahi, daha ngomi midoa o kapail̄e deʼ onangö yolio manga tauika.

7Ngomi mihidete migila-gila o Tirusino hiädono o Ptolemais. Dokengoka ngomi mioiki mialega o roriadodoto yongaku-ngaku, mangale mihidöaka miatabea onangika, daha migogere o wange moi dede önanga. 8#Kis. 6:5, 8:5 Yarehino ngomi mimagorakoli daha mimahiädono o Kaisariaika. Genangoka ngomi mioiki mapenginjilika airomanga o Filipus, daha migogere aitauoka. Unanga ganga womatëngo o nyawa yaoiri-iriki yatumidi o Yerusalemoka. 9Ai ngohaka yaruata o moholehe, ma Jou Madutu wahidoakoka o kuata mangale ihingahu o abari ma Jou Madutuino. 10#Kis. 11:28 Ipaha o wange muruono naga madekana ngomi dokengoka, woböa o Yudeaino womatëngo o nabi airomanga o Agabus. 11Unanga woböa ngomino daha wal̄ë o Paulus aigorona maninikutu. De o gorona maninikutu gënanga ünanga womahinikutu ail̄ou deʼ aigiama mahirete daha wotemo, ”Nënanga ma Jou Madutu ai Womaha itemoka: O gorona maninikutu nënanga madutu aha iwinikutu hoko nënanga o Yerusalemoka o Yahudioka manyawa, deʼ iwi hilapahi o Yahudi manyawa okaikaua.”

12Maöraha ngomi miihene gënanga, ngomi deʼ mata-mata o riadodoto yogogogere o Kaisariaka gënanga duruhe migahoko o Paulusika hupaya ünanga uha woiki o Yerusalemika. 13Mä unanga wohaluhu, ”Okia mabaraguna o Riadodoto niari hokonënanga, hiädono niadiai ngohi ahihininga iwedere? Ngohi tomabötoka duga-duga mangale kaihitagokua dokengoka, mä mangale ngaroka tohonenge dika karana ma Jou Yesus.” 14O Paulus woluku womihigihene ngomi, ho ngomi kamima togumu miwiduhunu ünanga. Ngomi miato, ”Mal̄aika, ma Jou aimau idadi dika.”

15Migogere genangoka o wange muruono naga madekana, ngomi mimahidiai tongomi miakiahonanga, daha mimagoraka o Yerusalemika. 16O riadodoto yamuruono naga o Kaisariaino yoikö mimakinïki de ngomi, mangale imingotaka ngomi o Manason aitauika, karana aitauoka ngomi aha mimahidodogumu. (O Manason ganga o Siprus manyawa moi madekanoka wodadi wininïki o Yesus.)

O Paulus woiki wilega o Yakobus

17Maöraha ngomi mimahiädono o Yerusalemika, o roriadodoto genangoka imitarima ngomi de manga hininga imore-morene. 18Yarehino o Paulus woiki mimakinïki de ngomi miwilega o Yakobus; o jemaat matutuda mata-mata genangokaö naga. 19Watabea iböto onangika, o Paulus waade-ade onangika hagala moi-moi ma Jou Madutu wodiaioka toünanga aimanaramoka o Yahudiokaua manyawa manga hidogoronaka. 20Yoihene iböto o Paulus aiade-ade gënanga, önanga mata-mata iwipuji ma Jou Madutu. Ahao önanga yotemo o Paulusika, ”O Riadodoto Paulus! O Riadodoto kiani nohiöriki o Yahudioka manyawa de manga ribu-ribuhu iwingakuoka o Yesusika. Onanga mata-mata ganga o nyawa yososetia yamoteke o Musa aitita. 21Deʼ orahanënanga önanga yoihene o Riadodoto nadotoko mata-mata o Yahudioka manyawa yogogere o nyawa mahomoa manga hidogoronaka, hupaya yapidili o Musa aitita. O Riadodoto nahitiari önanga, hupaya önanga ngarouha yähuna manga ngoha-ngohaka ekola yanïki manga ada-adati o Yahudioka. 22Orahanënanga o Yahudioka manyawa yongaku-ngakuoka gënanga igoungu aha inigihene o Riadodoto naga nenangoka. Hoʼ, sarakia öraha nënanga? 23#Bil. 6:13-21 Kayaoa de namoteke tongomi miahitiari. Naga o nyawa yaruata nenangoka yodiaioka o jaji ma Jouika. 24Aa, koaho o Riadodoto nöiki nadiai madodagi nomahitebini anidiri nima kinïki dede önanga, deʼ natagongo to önanga manga baajanga hupaya önanga manga tadauru yakunu yakori. De hokogënanga aha inyata o nyawa mata-mataika okia önanga yoihene mangale ngona o Riadodoto itiaiua karana o Riadodoto mahireteö namoteke o Musa aitita. 25#Kis. 15:29 Mä mangale o Yahudiokaua manyawa iwingakuoka o Yesusika, ngomi miahidingotoka o hurata onangika mangale tongomi miaputuhu iyakunua önanga yaol̄omo o inomo ihihubaka o gomangika, iyakunua yaol̄omo o awunu, ekola yaol̄omo o aiwani ihonenge yahirikiti deʼ i yakunua yadiai o manarama-manarama isosafarune.”

26O Paulus woiki de o nyawa yaruata gënanga daha yadiai madodagi imahi tebini manga diri imakinïki de önanga yarehino ma wange. Ahao önanga yowohama ma Jou ai Tauika mangale ihingahu o wange muruono nagahi aha iböto madatoro imadebini gënanga deʼ manga huba mangale önanga moi-moi ihihuba.

O Paulus iwitagoko ma Jou ai Tauoka

27Maöraha mahoana o wange tumidi ngade ipaha, o Yahudioka manyawa yamuruono naga o Asiaino iwimäke o Paulus ma Jou ai Tau magoronaka. Daha önanga yängohama o nyawa yowöe-wöeika, ahao o Paulus iwisö 28de imapöa-pöaka, ”Hei o Israeloka manyawa, nimiriwo! Ne ünanga manyawa woiki okiaika honanga wadotoko o nyawa mata-mataika ai dodötoko-dodötoko yalawani o Israeloka manyawa, yalawani o Musa aitita de yalawani ma Jou ai Tau nënanga. Deʼ orahanënanga ünanga waao o Yahudiokaua manyawa yowohama ma Jou ai Tau magoronaika deʼ yadiai yapeseke o ngï madebi-debini nënanga!” (29#Kis. 20:4 Onanga yotemo hokogënanga hababu önanga iwimäkeoka o Trofimus o Efesus manyawa o kotaka imakokinïki o Paulus; deʼ onanga yato bote o Paulus wiaoka ünanga ma Jou ai Tau magoronaika.)

30O kota mata-mataika idadi iruae, deʼ mata-mata o nyawa kayododooara imatoomu. Onanga iwitagoko o Paulus deʼ iwitatauru ünanga iwihihupu ma Jou ai Tau magoronaino. Oraha gënanga dika ma Jou ai Tau mangorana yabeno. 31Maöraha yorororuae gënanga ihidailako iwitoma o Paulus, o nyawa ihingahu o Roma matentara manga baluhika o Yerusalem mata-mataika magogiria ihuru-hara. 32Gila-gila o tentara manga baluhu gënanga wal̄ë o tentara deʼ yamuruono naga manga baluhu daha imatai-taiti yoiki de önanga, o ngï ihohuru-haraika gënanga. Maöraha o nyawa yowöe-wöe gënanga iwimäke o tentara manga baluhu de manga duduono aingoha-ngohaka, önanga imatogumu iwigohara o Paulus. 33O tentara manga baluhu gënanga woiki o Paulusika daha wïtagoko, deʼ wahuloko o nyawa iwirante ünanga. Ahao o tentara manga baluhu gënanga wileha mangale o nagona o Paulus gënanga deʼ okia wadiaioka. 34Mahononga o nyawa yowöe-wöeino gënanga yohaluhu hokonënanga deʼ mahonongali yohaluhu hoko gënanga. Mangale hokogënanga o gigoro hiädono o tentara manga baluhu gënanga wakunua wohiöriki de madiai okia idadioka. Hababu gënanga ünanga wopareta hupaya o Paulus iwiao manga gogöana mangï ika. 35Maöraha önanga iwiao ünanga hiädono o nguteika, yogö gigigoro gënanga imakutuhaka hokogënanga magiria hiädono o Paulus kiani imatekeligoraka o tentaraoka. 36Onanga yanïki manga poretino o doomu yogogigigoro gënanga yopöa-pöaka, ”Niwitoma ünanga!”

O Paulus woma demo

37Hoko gënanga yomau yowohama o gogöana mangï magoronaika, o Paulus wotemo o tentara manga baluhika gënanga, ”Iyakunu ngohi totemo utu de Tuanga?”

”Okia ngona nakunu de o Yunanioka manga demo?” woleha o tentaraoka manga baluhu gënanga. 38”Nako hokogënanga, ngonaua o Mesir manyawa gënanga kahuruono mawange yodiai o lolawani daha waao yoara o nyawa yaribuhu iata yohöhuru-hara de manga daëoka yowohama o tonaka makokakaha?”

39O Paulus wohaluhu, ”Ngohi o Yahudioka manyawa; ngohi o Tarsus makota makawaha, o kota ilamo-lamoko o Kilikiaka. Togahoko nohihi gumal̄a ngohi totemo o nyawaika gënanga.”

40O Paulus iwihigumal̄a iböto wotemo, o Paulus womaoko o nguteoka, daha wohidöaka o nonako de aigiama. Mata-mata o nyawa yokokirïdoka. Ahao o Paulus wotemo onangika de o Ibranioka manyawa manga demo. O Paulus wato,

Currently Selected:

O KISAH RASUL-RASUL 21: TLB

Highlight

Copy