O KISAH RASUL-RASUL 20

O Paulus woiki o Makedoniaika de o Yunani

1O huru-hara o Efesusoka irïdokali ipahaino, o Paulus watoomu o jemaat deʼ wahidöaka o hihitomo onangika. Ahao ünanga wotemo halamati nigogogere, daha aidodagi wohigila-gila o Makedoniaika. 2Unanga wodulu-dulu o Makedonia madaera deʼ wahidöaka o hitiari mangöe o nyawaika iwingaku-ngaku o Yesusika dokengoka mangale wahidöaka o hihitomo onangika. Ahao ünanga woiki o Yunanika. 3O mede hange madekana ünanga wogogere dokengoka. Daha maöraha ünanga womahidiai magogiriaka mangale wohidete o Siriaika, naga o abari o Yahudioka manyawa imahikagaro magogiria mangale iwitoma. Hababu gënanga ünanga waputuhoka mangale womaidulu watilakuru o Makedonia. 4O Sopater o Pirus aingohaka aiahali o Bereaino yoiki imakinïki de ünanga; hokogenangö o Aristarkhus deʼ o Sekundus o Tesalonika manyawa, deʼ o Gayus o Derbe manyawa. O Timotiusohi, o Tikhikus deʼ o Trofimus, o provinsi Asiaino manyawa. 5Onanga imihihiraika ngomi, daha imidamä ngomi o Troasoka. 6Ipahaika o Roti i Ragi-ragi Ua ma Rameanga, ngomi mihidete miamal̄a o Filipi. O wange motoa ipahaika ngomi mimatoomuoli dede önanga o Troasoka. Dokengoka ngomi migogere o minggu moi.

O Paulus aidodagi mabobaha o Troasoka

7O Hapitu mahutu ngomi mimatoomu mangale mimakongol̄omo moi hokä riadodoto. O Paulus imateke ade-ade de o nyawa genangoka, karana iyarehino ünanga aimau womajobo. Hiädono o hutu gorona o Paulus kawotemo-temohi. 8O kamari magoronaka malape il̄oku-l̄oku, mangï ngomi mimatotoomu gënanga, naga o hilo mangöe. 9Womatëngo o goduru airomanga o Eutikhus wogogeruku o jangelaka. Karana o Paulus womatogu-togumua wotemo-temo, o goduru gënanga duru wokadu-kadunu hiädono ünanga iwikiokoka o jangelaka gënanga, daha iwiotakuku daukuku o lape hangeoka de wauku. Maöraha önanga iwigoraka, ünanga wohonengoka. 10Mä o Paulus wouti daukuku, daha womaruba uku airöehe o goduru ail̄okuoka gënanga de wikoino. O Paulus watemo, ”Uha nihawatere, ünanga kawowangohi!” 11Ahao o Paulus wodoaokali dakuil̄e, daha wahikodoku o roti de yol̄omo mata-mata. Ipaha madekana wotemo-temo de o nyawa hiädono o ngorumino, o Paulus womajobo. 12O nyawa iwiao iwihigilio o goduru gënanga wowango-wango aitauika. Onanga yamäo yosanangi deʼ duru yälaru.

O Troas de yaino o Miletusika

13Ngomi mioiki o kapaoko daha mihira mihidete o Asosika mangale miwibuhuku o Paulus o kapaoko dokengoka. Unanga watatoroka hokogënanga karana ünanga aha dokengika wanïki o ngëkomo o dudungika. 14Mimakamäke iböto o Asosoka, o Paulus de aijapati wodoa o kapail̄e daha ngomi mihidete o Metileneika. 15Dokengino ngomi mihidetoli, deʼ iyarehino mimahiädono o ngï imari himangino de o Khios. Midiringi yaino ngomi mimahiädono o Samos deʼ o wange moi yaino o Miletus. 16O Paulus wohitatapuoka mangale mitulua o Efesus, hupaya uha miaumo o öraha o Asia madaeraka. Nako yakunu ünanga aimau itai-taiti imahi ädono o Yerusalemika o Pentakosta mawange ma ago-agomoka.

O Paulus wohidemo o gitingaka mademo-demo o Efesusoka

17O Miletusino o Paulus wohidingoto o abari o Efesusika mangale wogahoko o jemaat matutuda-tutuda dokengoka yoböa imakamäke dede ünanga. 18Maöraha önanga imahiädono, o Paulus watemo onangika, ”Roriadodoto nihiöriki sarakia ngohi towango madekana nenangoka ngini nia hidogoronaka muläenge o wange madodihiraka ngohi tadono o Asiaino. 19De ahihininga maboluluku deʼ ahiköngo iwöe, ngohi tomanarama mangale ma Jou o hangihara mahidogoronaka ngohi taohana, karana o Yahudioka manyawa manga datoro itotorou. 20Riadodoto nihiöriki ngohi todododatoua tinihi ngahu nginika okia de mabaraguna nginika. Ngohi tinidotoko ngini o nyawa yowöe-wöe madöomuoka deʼ o tau-tauika. 21Yaoa o Yahudi manyawaika yaoa o nyawa mahomoaika ngohi itoa-toakua tahidöaka o hohininga hupaya önanga imatoba önanga manga baradoha de yoböa ma Jou Madutuika, de iwingaku ma Jou Yesusika. 22Orahanënanga mangale tamoteke ma Jou Madutu ai Womaha mapareta, ngohi toiki o Yerusalemika. Deʼ ngohi tohiorikua okia aha idadi ngohino dokengoka. 23Duga-duga ngohi tohiöriki o kota yogetongo, ma Jou Madutu ai Womaha ihitotiaiino ihingahu ngohino, ngohi aha towohama o bui deʼ aha tohangihara. 24#2Tim. 4:7 Mä ngohi tohaduliua de ahingango ngohi nënanga, itingohi takunu taböto o manarama ma Jou Yesus wohihi ngongakuoka ngohino deʼ itingohi tosetia hiädono ngohi ahingango mabaha, mangale tohingahu o Abari ma Oa gënanga mangale ma Jou Madutu aidora.

25Ngohi tinidagioka o Roriadodoto mata-mata deʼ tinihingahuoka iböto mangale sarakia ma Jou Madutu wopareta hokä o Koano. Oraha nënanga ngohi tamäo aha homakamäkeokaua de Roriadodoto. 26Hababu gënanga de tohitotiaika ngohi totemo nginika o wange nënanga, nako naga ngini niahidogorona aha yobinaha, gënanga tongohiua ahihowono. 27Komaiwahi ngohi töara tongohi ahimanaramoka mangale tinihi mangarati nginika ma Jou Madutu aidatoro mata-mata. 28Kiani ngini niogöana niadiri deʼ niogoanö o jemaat mata-mata inihilapahioka nginika ma Jou Madutu ai Womaha mangale niogöana; hababu ngini inigorakoka nidadi o gogöana jemaat gënanga. Kiani ngini niogöana ma Jou Madutu Ai jemaat gënanga hokä o gogöana yogöana o duba, karana ma Jou Madutu wohidadioka o jemaat gënanga Toünanga mahirete, imoteke Ai Ngohaka mahirete aihonenge. 29Ka de ngohi toikoka, igoungu aha iböa o kaho honganika ihohatera ngini niahidodogoronaka. Deʼ o nyawa, ngini niagogöa-göana gënanga aha idadi o kaho honangika magoli gënanga. 30Ma niahidogoronaino o Roriadodoto mahireteö aha yoböa o nyawa aha ihingahu o abari itotiaiua. Onanga yodiai hokogënanga hupaya o nyawa yongaku-ngakuoka o Yesusika yodadi yohihanga deʼ yänïki önanga. 31Hababu gënanga nima göa-göana! Nio hininga o taongo hange madekana de ahiköngo itiha kohangöe, o hutu de o wange toma togu-togumua tinidotoko o nyawa moi-o nyawa moi nginino.

32Orahanënanga ngohi tinihilapahi ngini ma Jou Madutuika, hupaya Unanga winipaliara ngini deʼ hupaya ngini nimahijojö ma Jou Madutu aidora maabarika. Ma Jou Madutu To ünanga Ai kuaha mangale winihikuata ngini de winihidöaka nginika o barakati-o barakati wasadiaka mangale mata-mata Ai umati. 33Komaiwahi ngohi tonahihu o tiwi ekola o pakeanga kao nyawa ima tëngoinoö ma. 34O Riadodoto mahirete nihiöriki, de ahi giama mahirete ngohi tomanarama mangale tohitotomo tongohi ahiparalu deʼ ngohi ahidodiawo mimakokinïki de ngohi. 35Hagala parakara magoronaka ngohi tinihidoakoka o dulada nginika de homanarama hokuata hokä nënanga ngone kiani hariwo o nyawa imagaku-gakunua. Karana ngone kiani hohininga aha okia ma Jou Yesus mahirete wotemoka, ’Iholoi houtumu hohidöaka de hö dahongo.’ ”

36O Paulus wotemo-temo iböto ipahaino, ünanga watilabukuku dede önanga mata-mata, daha imaniata. 37Onanga mata-mata yoari de iwiko o Paulus de yotemo halamati nomajobo. 38Onanga yoduka duru iholoi, hababu o Paulus wotemo önanga aha iwimäkeokaua ünanga. Daha önanga iwihingotaka hiädono o kapaoko.

Currently Selected:

O KISAH RASUL-RASUL 20: TLB

Highlight

Copy