MATIUS 22
22
Papinintu sal᷊iwangu kawing
(Luk. 14:15-24)
1I Yesus sau nudidato su tingo ngu taumata maul᷊i dingang u papinintu, 2I Sie nangul᷊i, “Boko Mawu Ruata mamarenta, kakakoae kere papinintu i'i: Pia singkatau ratu nukoa sal᷊iwang kawing u anae koese. 3Ratu e'e nundoi manga paparentange paral᷊eng panginsomahi manga taumata ko ninoti sarang sal᷊iwang e'e. Kateho apang i sire ko ninoti nandiri nusumongo. 4Bou e'e ratu e'e sau nundoi manga paparentange ko wal᷊inge. I sie nutumanata si sire: ‘Puhabari si sire apang ko ninoti e'e: Medangu sal᷊iwang seng nasadia. Sapi ku dingang u ana e ko kapia nge seng buae nihata. Kaul᷊ie seng nasadia. Maite songo sarang sal᷊iwangu kawing!’ 5Kateho manga taumata ko ninoti takoae ko nupandung. I sire nakoa sarang hal᷊i u simbau-simbau singkatau nakoa sarang awuhe, singga sarang tampa puhal᷊ikange; 6dang l᷊ai i sire kowal᷊inge naname manga paparentangu ratu e'e mbuhue nududu l᷊au namate si sire. 7Su tempo ngu ratu e'e nakaringihi hal᷊i e'e, i sie nuwawal᷊uang dal᷊ai-l᷊ai. I sie nundohongu sordadonge pamate si sire apang ko namate e'e dingang panutung soangi sire. 8Bou e'e i sie nukumui apang paparentange, mbuhue nangul᷊i, ‘Sal᷊iwangu kawing seng nasadia, arawe kaul᷊i u apang noti ku ta tanuhino. 9Dakoe tamai sarang apang dal᷊eng su soa, dang punoti apang kaul᷊i u taumata pasongo su sal᷊iwang u kawing i'i.’ 10Kute manga paparentange e'e nusau nurumal᷊eng. I sire nakoa sarang apang ral᷊eng ko l᷊abo, mbuhue nangomol᷊i manga taumata ko nipusombang i sire tamai se'e, ko mapia l᷊au ko dal᷊ai. Kute napene'e tampa pusal᷊iwangeng e'e su sake.
11Bou e'e ratu e'e nusumu nutuhung apang sake. I sie nakawua pia tau simbau su sal᷊iwang e'e ko tanul᷊oho pakeangu sal᷊iwang. 12Bou e'e i sie nukina su tau e'e, ‘Anu, kirapa i kau sarang nakasu si'i wal᷊inge dingang u l᷊aku u sal᷊iwang?’ Tau e'e ta nakasimbahi. 13#Mat. 8:12, 25:30; Luk. 13:28Bou e'e ratu e'e nangul᷊i su manga paparentange, ‘Hapusi l᷊aere dingang l᷊imangu tau i'i, dang rume i sie su l᷊ikure, su tampa ko marundung. Pai se'e pia sangi dingang u singsara.’ ”
14Bou e'e I Yesus nanginsue papinintu e'e kiri'i, “Maul᷊i ko nikuiang, kateho kitang singkodo ko nikapile.”
Hal᷊iu mamaehi balasteng
(Mrk. 12:13-17; Luk. 20:20-26)
15Bou e'e manga tau Farisi natamai nughaghighili kirapa i sire tadeau makaakal᷊i si Yesus dingang haghingu kakina. 16Kute i sire nundoi manga tumatuhu i sire sarang koa I Yesus dingang u pirangkatau taumata bou simbuka ngi Herodes. I sire e'e nangul᷊i si Yesus, “Tuang Guru, i kami matitong i Tuang ko matul᷊iri. I Tuang manintiro mal᷊ahe-l᷊ahe apang hal᷊i u kao u Mawu Ruata guna ngu taumata, tamundiangu tingihi sai-sai. Watu u I Tuang tamutatuhung ghahiu taumata. 17Ual᷊ingu e'e, kenang ko I Tuang puhabari si kami: Tumuhu atorang u agama ngi kite, apa botonge mamaehi balasteng su Kaisari arako ta?”
18I Yesus matitong pandungi sire ko dal᷊ai e'e, Inau i Sie nangul᷊i, “Ei manga taumata ko pal᷊antikari! Nakurawe i kumu mangakal᷊i si Sia? 19Kenang andaghi si Sia doi ko i pake i kumu guna ngu mamaehi balasteng!”
Bou e'e i sire nangonggo doi peraki simbau si Sie. 20I Yesus nukina si sire, “Gambari dingang u arengi sai i'i?”
21“I Kaisari,” nisimbahi sire.
Kuteu I Yesus nangul᷊i si sire, “Boko kere'e, onggo e si Kaisari apang koa i Kaisari, dang su Mawu Ruata apang koa u Mawu Ruata.”
22Su tempo ngi sire nakaringihi ko nil᷊ahe e'e, i sire naherang. Kute i sire natamai nanintang I Yesus.
Hal᷊iu puwawangung bou papate
(Mrk. 12:18-27; Luk. 20:27-40)
23 #
Wuk. 23:8
Su silou e'e l᷊ai, pia pirangkatau tau Saduki nusumongo si Yesus. I sire i'i ko bou simbuka ngu taumata ko pia titong i sire ware takoa e taumata ko nate sau muwangung. 24#Ul. 25:5“Tuang Guru,” angkung i sire. “I Musa nanintiro kiri'i: Boko singkatau koese mate, dang i sie takoae ana, tuaringe mambeng pukawing dingang u wal᷊unge e'e tadeau makanggile hintou nge su tau ko nate e'e. 25Pia i sire pitu tamahuari natana su si'i. Ko iakang nukawing bou e'e nate takoae ana. Kuteu wal᷊unge e'e nitintang guna ngu tuaringe. 26Tuaringe e'e mang l᷊ai nate takoae ana. Hal᷊i ko musul᷊ung nariadi l᷊ai su tuaringe katilunge dang naturusi sarang ko kapitunge. 27Panginsuenge kowawine e'e nate l᷊ai. 28Ho, boko kere'e su tempong taumata nate sau i puwangung, nakoa kawing i sai tau kowawine e'e? Watu u i sire pitu kaul᷊ie nukawing si sie.”
29I Yesus nusumimbahi, “I kumu seng nunsala sipiri, watu u i kumu ta nakahingang wisara ngu Buki Susi, dingang u l᷊ai kawasa ngu Mawu Ruata. 30Watu u boko taumata sarung sau muwangung, i sire seng ta sau mukawing, kateho i sire sarung muwiahi kere manga malaekati su sorga. 31Mborong ta manga paghisa i kumu nubasa apang ko nihabaru Mawu Ruata bou hal᷊i u taumata ko nate sau nipuwangung? Mawu Ruata nangul᷊i, 32#Kel. 3:6‘Ia Mawu-Ngi Abraham, Mawu ngi Ishak dang Mawu ngi Yakub.’ Mawu Ruata wal᷊inge Mawu ngu taumata ko nate. I Sie Mawu ngu taumata ko wiahi!”
33Sumanga taumata maul᷊i e'e nakaringihi ral᷊ahe I Yesus, i sire mangkatewe naherang u tintiro-Nge.
Parenta ko kahimotongange
(Mrk. 12:28-34; Luk. 10:25-28)
34Su tempo ngu tau Farisi nakaringihi I Yesus nukoa tau Saduki ta nakadidatong apa, i sire nukomol᷊i. 35#Luk. 10:25-28Singkatau bo i sire, meteru agama, nanuka mangakal᷊i si Yesus dingang u simbau kakina. 36“Tuang Guru,” angkunge, “parenta sude'e kahimotongange su l᷊al᷊ungu atorang u agama?”
37 #
Ul. 6:5
I Yesus nusumimbahi, “Kindaghite Mawu Ruata ngu dingang u kal᷊abo u naung u, dingang u kaul᷊i u jiwa ngu, l᷊au dingang u kaul᷊i u sipirangu. 38E'e parenta kahimotongange dang kal᷊abokange! 39#Im. 19:18Parenta karuange ko musul᷊ung u himotongange e'e: Kindaghite sinsul᷊ung u kere i kau kumindaghi u watangeng u. 40Kaul᷊i u atorang u agama ko nionggo i Musa l᷊au tintiro ngu manga nabi nituhu su parenta darua e'e.”
Ratu Mananal᷊amati
(Mrk. 12:35-37; Luk. 20:41-44)
41Su tempo ngu manga tau Farisi mborong kapukomol᷊e su se'e, I Yesus nukina si sire, 42“Apa su titong i kumu hal᷊i u Ratu Mananal᷊amati? Hintou ngi sai i Sie?”
“Hintou ngi Daud,” nisimbahi sire.
43“Boko kere'e,” I Yesus nukina, “Nakurawe Roku Mawu Ruata nungonggou kasasua si Daud tadeau pusigho su Ratu Mananal᷊amati e'e ‘Mawu’? Watu u i Daud nangul᷊i,
44 #
Mzm. 110:1
‘Mawu nangul᷊i su Mawuku:
kangiangte su kuaneng-Ku,#22:44: kangiangte … kuaneng-Ku: Tumuhu adatu tau Yahudi, ko inggilenang u adati dang kawasa kumangiang su simbuka kuaneng.
sarang Ia mukoa apang roka-U sumulung si Kau.’
45Inau boko i Daud musigho si Ratu Mananal᷊amati e'e Mawu, ute maradi we kirapa i Sie hintou ngi Daud?”
46Takoae manga singkatau nakasimbahi si Yesus. Dang nanita bou silou e'e, takoae kowahani makina manga apa l᷊ai si Sie.
Currently Selected:
MATIUS 22: LAISXN
Highlight
Share
Copy
Want to have your highlights saved across all your devices? Sign up or sign in
2014 Indonesian Bible Society (Lembaga Alkitab Indonesia)
