KISAH RASUL-RASUL 19

Paulus léq Epesus

1Sewaktu Apolos masih léq Korintus, Paulus kenyeke jelajahin daérah-daérah pedaleman terus dateng léq Epesus. Léq derike ie bedait kance pire dengan saq sampun percaye léq Deside Isa. 2Paulus beketuan léq ie pade, “Napi side pade sampun nerimaq Roh Suci waktu side pade percaye léq Deside Isa?”

Ie pade bejawab, “Ndéqman, malahan tiang pade ndéqman dengah araq Roh Suci.”

3Paulus beketuan, “Lamun maraq nike, kadu baptisan napi side pade tebaptis?”

“Kadu baptisan Yahya,” Jawab ie pade. 4#Mat. 3:11; Mrk. 1:4, 7-8; Luk. 3:4, 16; Yah. 1:26-27 Terus Paulus bebase, “Yahya baptis dengan jari nyatayang bahwe dengan-dengan nike sampun tobat léman dose-dosene. Laguq léq waktu nike éndah Yahya bebase léq dengan-dengan Israel bahwe, ie pade harus percaye léq Dengan saq gen rauh sesampun Yahya, nike Deside Isa.”

5Sesampun ie pade dengah hal nike, ie pade tebaptis léq dalem peséngan Junjungan Saq Mulie Deside Isa. 6Dait léq waktu Paulus noloq imene léq atas ie pade, Roh Suci turun léq ie pade, terus ie pade mulai ngeraos kadu base lain dait benubuat. 7Selapuqne nike kire-kire araq due olas dengan luwéqne.

8Telu bulan ngonéqne Paulus terus bani bebaos tipaq dengan-dengan léq balé ibadah dait bedebat kance ie pade mengenai Kerajaan Allah. 9Laguq pire dengan léq antare dengan-dengan nike pagah dait ie pade ndéq mélé percaye. Léq julu selapuq dengan saq bekumpul léq derike, ie pade ngewade pengajahan mengenai Tuhan nike. Keranaq nike Paulus bilin ie pade, terus lumbar kance pengiring-pengiringne ojok sekolah Tiranus. Léq derike sebilang jelo ie besoal jawab kance dengan-dengan. 10Paulus tetep ngelaksaneang hal nike due taun ngonéqne, jangke selapuq dengan saq ndot léq wilayah Asia, timaq dengan Yahudi atao dengan Yunani, selapuqne dengah Manik Tuhan.

Bije-bije Skewa

11Allah miaq keajaipan-keajaipan saq luar biase langan Paulus. 12Malahan araq dengan saq jauq saputangan atao kéréng saq sampun tekadu siq Paulus ojok dengan-dengan sakit, make penyakit ie pade telang dait roh jahat éndah sugul léman ie pade. 13Pire dengan belian Yahudi lumbar ojok mbé-mbé, nyugulang roh jahat léman dengan-dengan. Ie pade éndah cobaq kadu peséngan Junjungan Saq Mulie Deside Isa jari nyugulang roh-roh jahat nike. Basen ie pade léq roh-roh jahat nike, “Léq dalem peséngan Deside Isa saq teberiteang siq Paulus, tiang préntahang side sugul!” 14Araq sopoq imam kepale, aranne Skewa, bedowé pituq bije mame, ie pade saq ngelaksaneang hal saq maraq nike.

15Laguq roh jahat nike ngeraos léq ie pade, “Tiang kenal Deside Isa dait Paulus éndah tiang kenal, laguq side niki sai?”

16Terus dengan saq tekuasein siq roh jahat nike nyelontak dait gemes gati entan ie cakrah bije-bije Skewa nike jangke bakat dait ie pade pelai léman balé nike belondan séngaq kelambine soék. 17Selapuq dengan Yahudi dait dengan bangse-bangse lain saq ndot léq Epesus dengah peristiwe nike, terus ie pade jari takut. Make peséngan Junjungan Saq Mulie Deside Isa sayan kesohor. 18Luwéq dengan saq sampun jari percaye léq Deside Isa, dateng ngakuq léq julun dengan luwéq selapuq perbuatan-perbuatan ie pade. 19Dait ie pade saq biase kadu ilmu-ilmu séhér, ngumpulang buku-buku ie pade terus sedutne léq julu dengan luwéq. Aji buku-buku nike lamun terékéng selapuqne, araq kire-kire séket iyu képéng perak. 20Make, siq care saq hébat nike manik Tuhan sayan nyebar dait sayan kuat pengaruhne.

Keributan léq Epesus

21Sesampun peristiwe-peristiwe nike, Paulus beniat lumbar ojok Makedonia dait Akaya terus ojok Yerusalem. Basen Paulus, “Sesampun ojok derike, tiang harus lalo ojok Roma éndah.” 22Jari ie ngutus due pembantune, Timotius dait Erastus jari lumbar ojok Makedonia, laguq Paulus mésaq masih ndot pire waktu ngonéqne léq Asia.

23Kire-kire léq waktu nike éndah araq keributan beléq léq Epesus lantaran pengajahan mengenai Langan saq tepetitoqang siq Junjungan Saq Mulie nike. 24Séngaq léq kote nike araq sopoq dengan tukang pandé perak aranne Demetrius saq piaqang Dewi Artemis balé-baléan léman perak. Usahe dengan nike bau datengang hasil saq beléq léq buruh-buruhne. 25Keranaq nike ie ngumpulang buruh-buruhne bareng kance buruh-buruh tukang pandé perak saq lainne, terus bebase, “Semeton senamian! Side pade nenaoq bahwe ite mauq pengasilan léman pegawéan niki. 26Mangkin side pade sampun serioq dait dengah mésaq napi saq telaksaneang siq Paulus nike. Ie bebase bahwe déwe-déwe saq tepiaq siq manusie nike ndéqne déwe. Dait ie sampun nyesatang luwéq dengan, ndéqne cume léq deriki, léq Epesus, laguq gen jangke dateng selapuq wilayah Asia. 27Bahayene bahwe usahente niki gen lengé aranne. Dait ndéqne nike doang, malahan gedéng Déwi Artemis éndah teréméhang dait kemulieanne teicaq-icaq; padahal ie déwi saq tesembah siq selapuq dengan léq Asia dait léq seantéro dunie!”

28Sesampun ie pade dengah hal nike, angen ie pade jari panas, terus ie pade nyurak-nyurak, “Idup Artemis, déwi dengan Epesus!” 29Make keributan nike sayan beléq jangke dateng selapuq kote. Beterus perusuh-perusuh bau Gayus dait Aristarkus, ie dengan-dengan Makedonia saq ngiring Paulus léq dalem kelampanne, terus ie pade teoros ojok gedung kesenian nike. 30Paulus mélé tame turut ie pade, laguq dengan-dengan saq percaye léq Deside Isa balaq ie. 31Araq pembeléq-pembeléq propinsi Asia nike, saq besahabat kance Paulus, suruq dengan bebadaq léq Paulus adéq ie ndaq tame léq gedung kesenian nike. 32Léq waktu nike dengan-dengan saq bekumpul léq gedung nike sampun jari biur lantur. Araq saq nyurak maraq niki, araq éndah saq nyurak maraq nike, séngaq luwéqan léq antare ie pade saq ndéq nenaoq kembéq ie pade bekumpul léq derike. 33Terus sopoq dengan aranne Aleksander tejelek ojok julu siq dengan-dengan Yahudi. Ie mauq keterangan léman dengan luwéq mengenai napi saq telaksane. Make Aleksander ngebéng tande kadu imene adéqne tebéng kesempatan jari béle diriqne léq julun dengan-dengan nike. 34Laguq sewaktu ie pade serioq bahwe ie dengan Yahudi, bareng-bareng ie pade nyurak keras-keras, “Idup Artemis! Déwi dengan Epesus!”

35Ahirne jurutulis kote berhasil piaq tenang dengan luwéq nike. Ie bebase, “Penduduk Epesus! Sebilang dengan nenaoq bahwe Epesus nike kote saq meliharaq gedéng Déwi Artemis dait tetatone saq turun léman langit. 36Ndéq araq sopoq dengan juaq saq bau nentang hal nike. Keranaq nike side pade tenang, dait ndaq gupuh-gupuh gawéq napi-napi. 37Side pade jauq dengan-dengan nike ojok deriki ndéqne lantaran ie pade sampun ngerampok gedéng déwe atao lantaran ie pade sampun menghine déwinte. 38Lamun Demetrius kance buruh-buruhne nike araq bedowé sopoq pengaduan tipaq dengan, alurang ie pade jauq pelekare nike ojok pengadilan. Pengadilan bau nerimaq hal nike dait pejabat-pejabat pemréntah éndah tetep araq. 39Laguq lamun masih araq malik pelekare saq lain saq side pade melétang, nike harus teseleséang léq dalem rapat umum saq sah. 40Séngaq napi saq telaksane jelo niki bau bahayeang ite. Ite bau tetuduh miaq keributan, séngaq ite ndéq bedowé sopoq alasan saq kenaq léq keributan niki.” 41Sesampun jelasang selapuq hal nike, jurutulis kote nike suruq dengan luwéq nike uléq.

Currently Selected:

KISAH RASUL-RASUL 19: LAISAS

Highlight

Copy