Yesus 'ai so-soma'a 20

Paulus 'o tagi toma daeraha Makedonia re nagara Yunani

1Kaco toma limau Efesus ri ogoro pasala i'a, Paulus 'o lomu ngowa'a ngaku Yesus re pula'a duga re domolo ra ananga, kara 'o masilo-loasa 'a dowanga 'ai ḏo-ḏagi toma daeraha Makedonia. 2Unanga 'o tutumu daeraha-daeraha toma Makedonia re 'o pula'a duga re domolo toma ngowa-ngowa'a ngaku Yesus kara 'o tagi toma nagara Yunani. 3Toma ngi'i gena-ge, unanga 'o tegoro ma di'ara ngara ro'ange. Wakutu unanga 'o ḏu-ḏuanga ḏua sa'i ro sidete toma nagara Siria, 'age rema ngowa'a matengo 'o gasa habari mangale ngowa-ngowa'a Yahudi 'aḏi mafakati 'aḏi mau sisengene unanga. Sababu gena-ge, unanga 'o maputusu tala 'o maḏibo mete'e daeraha Makedonia. 4Pirus 'ai ngowa'a 'a Sopater 'ai 'asala toma limau Berea ino 'o tagi mamete'e ra Paulus. So'o gena ḏi'i, Aristarkhus re 'a Sekundus ngowa'a limau Tesalonika re 'a Gayus ngowa'a Derbe. 'A Tikhikus re 'a Trofimus ngowa-ngowa'a toma daeraha Asia re 'a Timotius ḏi'i. 5Ananga 'aḏi siḏa i'a toma limau Troas 'aḏi totoma ngomi. 6Toma wangere lamo'o Roti kama ragi ua palisi'i i'a, ngomi mi sidete sisoi'i tala limau Filipi. Ma di'ara wangere romotoa palisi'i i'a, ngomi ma'u sanga ra ananga gena-ge toma limau Troas. Toma ngi'i gena-ge ngomi tegoro ma di'ara migu rimoi.

Paulus 'o tutumu siḏo-ḏogumu toma limau Troas

7Wangere ma mulaingi toma migu gena-ge, wakutu ngomi mi malomu di'a sibalangu roti,#Som. 2:42 Paulus 'o maja-jarita ra ananga singadolo utu golona sababu ma ḇiḇini ino ro tagi. 8Ngomi mi malomu toma kamara da'u re'u, kamara gena-ge ma poci lai repe. 9Ngowa'a tubaie matengo 'ai lomanga Eutikus, unanga 'o mate-teru toma jangela. Sababu 'a Paulus 'o majarita togumu ua, tubaie gena-ge 'ai gagadungu 'i rama ḏua 'ai la'o ri ruutu singadolo 'o masieta'a da'u tala toma wala teru retene ro'ange. Wakutu ananga 'aḏi gola'a unanga, unanga 'o sengene ḏua. 10Mada'a Paulus 'o 'uci tala, 'o ḇa-ḇagara re 'o sibo'olo tubaie gena-ge. Paulus 'o kanau, “Ninga 'akala re sinyingara 'i iranga awa, unanga 'o 'ahu moju.” 11Togumu i'a, Paulus dadunu 'o pere da'u re'u re 'o sibalangu roti, kara ananga mo-moini 'aḏi oromo mamete'e ḏi'i. Paulus 'o majarita ra ananga singadolo ḇiḇini, kara unanga 'o sisoi'i tala ananga. 12Tubaie nange-ge dadunu 'o 'ahu moju, ananga 'aḏi sidiḇo tai wala re manga 'akala re sinyingara 'i sanangi re maroanga masala.

Toma limau Troas mi tagi toma daeraha Miletus

13Ngomi mi mabalene toma kapala ḏua mi sidete i'a da'a toma limau Asos di'a mi totoma 'a Paulus da'a. 'A Paulus 'a si'aturu pasala ḏua, sababu unanga masiretene 'o ḏingana. 14Wakutu Paulus ma'u sanga ngomi toma limau Asos, unanga 'o jau-jau mabalene toma kapala, ḏua mi sidete toma Metilene. 15Ma ḇiḇini ino, toma limau gena-ge ngomi mi sidete ḏi'i re mi singadolo toma ngi'i rimoi 'i ma'u talaḏi reo pulo Kios. Ma soana wangere ḏiḏi, mi ngadolo toma pulo Samos, kara ma ḇiḇini ino mi ngadolo ḏi'i toma limau Miletus. 16Paulus 'a sitantukanga ḏua mi tuḏu toma limau Efesus riwara, la mi upa'a wakutu rawara toma daeraha Asia. Unanga 'o mau, na'o nyengara gari'a, capati ngadolo toma limau Yerusalem sikunu'i wangere lamo'o Pentakosta gena-ge 'i ngadolo nyangu.

'A Paulus 'o masilo-loasa jama'ata ma bi-biri'i toma limau Efesus

17Toma limau Miletus, Paulus 'o bererongo jama'ata ma bi-biri'i toma limau Efesus 'aḏi sapolo, la ma'u sanga ra unanga. 18Wakutu ananga 'aḏi sapolo, Paulus 'o kanau ra ananga, “Ioronongoḏu ngo-ngaku rimoi, ngini mo-moini na waro mangale 'ari 'ahu wakutu ngoi to tegoro taninga sigolona mulaingi ngoi to ngadolo toma daeraha Asia. 19Kalaha ngoi to kangela masala sababu ngowa'a Yahudi ya sidodai manga 'akala ma jira ra ngoi, ngoi to munara ra Ma Jou'ongu Madutu rari 'akala re sinyingara to maholo tala re rari 'ongoro. 20Ngini na waro mangale ngoi to sitaka-taka ua singadolo 'ori i'a la-la ga'a 'i gasa 'utungu ra ngini. Ngoi to doto'o ḏua ra ngini bae toma ngowa'a repe manga biono, bae toma wala-wala. 21So'o gena ḏi'i bae toma ngowa'a Yahudi bae toma ngowa'a Yahudi ua, ngoi tini si'elingi taunu, ngini balasu ni maḏibo toma ngo'omo boloto ra Ma Jou'ongu Madutu re ni ngaku Ma Jou Yesus.

22Ngoi balasu to mete'e Ma Ngagara 'Ofi-'Ofi ma mau. Dadi, nange-ne ngoi to tagi toma limau Yerusalem; i'a da'a 'i dadi 'oru ngoi ta waro ua. 23Ngoi pa'i ta waro toma limau mo-moini, Ma Ngagara 'Ofi-'Ofi 'i siajele pasala ḏua ra ngoi mangale ngoi to osama bui re to basono sangisara. 24Mada'a ngoi ta kalesanga ua mangale ngoi 'ari 'ahu. Ngoi balasu ta siḏuanga 'ari munara nena-ne ga'a Ma Jou Yesus 'a siwatasa ḏua ra ngoi di'a ta singadolo Habari Roanga mangale Ma Jou'ongu Madutu 'ai mura re dadalara singadolo 'ari 'ahu ma ḏo-ḏogumu.#2Tim. 4:7

25Jama'ata ma bi-biri'i mo-moini, ga'a ngoi ta singadolo ḏua mangale Ma Jou'ongu Madutu 'ai Pareta, ngoi ta sibasono tala ḏuanga i'a ḏa wo ma'u sanga riwara. 26Sababu gena-ge, na'o 'age taninga sigolona matengo i'a mai ua 'o sanga ua 'ahu kasingado-ngadolo i'a, ngoi ta siajele ra ngini toma wangere nange-ne, gena-ge ngoi 'ari sala ua. 27Soi moi nyangu, ngoi to masilalo'o tari munara di'a to sitarangi mo-moini mangale Ma Jou'ongu Madutu 'ai 'akala ma mau ra ngini. 28Ngini balasu ni ma'istiari ninga 'ahu ma dara re ni sioḏi'i ngowa'a ngaku Yesus mo-moini ga'a Ma Ngagara 'Ofi-'Ofi 'i siwatasa re 'i sitede ngini ni dadi jama'ata ma bi-biri'i. Ngini balasu ni sioḏi'i ngowa-ngowa'a ngaku Yesus sa'olo sowohi 'o jaga 'ai doba sababu jama'ata-jama'ata gena-ge ananga 'aḏi dadi Ma Jou'ongu Madutu 'ai 'umata sababu Ma Jou 'ai se-sengene. 29Tantu ḏua ngowa'a ma tero sa'olo 'o serigala-serigala 'i sapolo taninga sigolona, na'o ngoi to sisoi'i tala ngini. Ngowa'a ga'a ngini na'u jaga gena-ge, 'aḏi dadi ma tero sa'olo serigala ma ngo-ngoromo. 30Ḏuanga i'a 'age taninga sigolona masiretene 'i baolo ngowa'a ga'a singadolo habari ma banari ua. Ananga 'aḏi 'a'a so'o gena, la ngowa'a ngaku Yesus 'aḏi macelolo mete'e ananga. 31Sababu gena-ge, ni majaga-jaga! Ni 'eli-'elingi ma di'ara musungu ro'ange ma dara, lobi'i re wangere, ngoi kama togumu ua to doto'o ngini simete'e rari 'ongoro. 32'Orasa nange-ne, ngoi to sidoa'a ngini ra Ma Jou'ongu Madutu, la Unanga 'o jaga ngini re ngoi to golo'o ngini ni macako'o namo-namoto ra Ma Jou'ongu Madutu 'ai demo mangale 'Ai mura re dadalara ra ngini. Sababu Ma Jou'ongu Madutu rai kuasa ḇato nyengara 'o site'e re ḏuanga i'a 'o pula'a cocatu di'a ngini mo-moini, 'Ai 'umata ga'a Unanga cumutu ḏua. 33Soi moi nyangu, ngoi to nyafusu 'o pipisi bolo 'o pakeanga ra matengo i'a. 34Ngini masiretene na waro mangale ngoi re 'ari ḏagilomu ḏi'i ngomi disa minga 'ahu re ngomi minga galasau'u ma duduala masiretene. 35Toma munara 'oru ḇato, ngoi to sijumu ngo'omo pasala ḏua ra ngini, toma munara ma kangela 'oru ḇato ngene balasu riono ngowa'a ma dinga'unu ua. Sababu gena-ge, ngene balasu wa 'elingi Ma Jou Yesus masiretene 'o kanau pasala ḏua, ‘Lebe bara'utungu wo pula'a reo wo dawongo.’ ”

36Paulus 'o kanau gena-ge togumu i'a, unanga re ananga mo-moini 'aḏi maḏipolono, kara 'aḏi manyiata. 37Ananga mo-moini 'aḏi sibo'olo 'a Paulus remanga 'ongoro, sababu 'a Paulus sa'i ro tagi. 38Ananga manga 'akala re sinyingara susa sababu 'a Paulus 'o kanau, ḏuanga i'a ngene ma'u sanga riwara. Ḏua ananga gena-ge 'aḏi singata'a Paulus singadolo toma kapala.

Currently Selected:

Yesus 'ai so-soma'a 20: SNT

Highlight

Copy