Yesus 'ai so-soma'a 19

Paulus toma limau Epesus

1Wakutu 'a Apolos toma limau Korintus, Paulus 'o ḏingana sitola'a daeraha muḏuo i'a ḏua 'o ngadolo toma limau Efesus. I'a da'a, unanga 'o ma'u sanga ngowa'a ngaku Yesus nga muḏuo i'a.

2Unanga 'o sano ra ananga, “Ioronongoḏu ngo-ngaku rimoi, wakutu ngini ni ngaku Yesus, taninga 'akala re sinyingara ni dawongo Ma Ngagara 'Ofi-'Ofi ḏua bolo nyangu?”

Ananga 'aḏi sangoro, “Nyangu, ngomi ma 'isene nyangu mangale Ma Ngagara 'Ofi-'Ofi gena-ge.”

3Paulus 'o sano, “Na'o so'o gena, wakutu ngini ni sanga baptis, mete'e do-doto'o ra guna ino?” Ananga ya sangoro, “Ngomi mi mete'e do-doto'o ra Yohanes ino”.

4Ḏua Paulus 'o kanau, “Yohanes 'o baptis ngowa'a reo ḇanyo ga'a ngowa'a 'aḏi maḏibo toma ngo'omo boloto. So'o gena ḏi'i, 'a Yohanes 'o siajele toma ngowa'a Yahudi, ngoi togumu i'a 'age rema ngowa'a matengo 'o sapolo ngini balasu ni ngaku unanga, Unanga gena-ge 'a Yesus.”#Mat. 3:11; Mrk. 1:4, 7-8; Luk. 3:4, 16; Yoh. 1:26-27 5Wakutu ananga ya 'isene so'o gena, ananga 'aḏi sanga baptis ra Yesus 'ai lomanga dadi nana'o rimoi mangale ananga raḏi dadi ngowa'a ngaku Yesus. 6Wakutu 'a Paulus 'a siteru 'ai giama ra ananga, Ma Ngagara 'Ofi-'Ofi 'i 'uci tala re ya'u ḏegoro. Dadi ananga mulaingi 'aḏi siajele habari da'u ra Ma Jou'ongu Madutu tala re ananga 'aḏi kanau remanga demo ua. 7Ananga gena-ge manga repe ḏa nga nyagi moi re nga muḏiḏi.

8Toma limau Efesus gena-ge, Paulus 'o singadolo re ma'u rubutu ra ananga mangale Ma Jou'ongu Madutu 'ai Pareta toma wala puji ma dara kama mojongo ua ma di'ara ngara ro'ange ma dara. 9Mada'a tamanga sigolona, 'age nga muḏuo i'a manga 'akala lai te'e dadi 'aḏi ngaku ua. Toma ngowa'a repe manga biono, ananga gena-ge 'aḏi sije-jengere Ma Jou Yesus 'ai do-doto'o. Sababu gena-ge 'a Paulus ya'u sisoi'i tala ananga re 'o tagi mamete'e reo ngowa-ngowa'a ngaku Yesus, ananga 'aḏi tagi ra Tiranus 'ai do-doto'o ma ngi'i. Toma ngi'i gena-ge, ma wangere ma jelele i'a, ananga 'aḏi ma'u sano i'a re ino. 10'A Paulus 'a si'a'a so'o gena-ge tau-taunu, ma di'ara musungu romoḏiḏi singadolo ngowa'a repe masala toma daeraha Asia: bae ngowa'a Yahudi bae Yahudi ua, ananga mo-moini ya 'isene habari mangale Ma Jou Yesus.

Skewa 'ai ngowa'a nau'u nga tumudingi

11-12Paulus 'o 'a'a ga'a hera-heranga ma repe sababu Ma Jou'ongu Madutu 'o pula'a kuasa. Ngowa'a siḏi gena-ge 'aḏi la re roh ma jira mai supu ra ananga, na'o tuala bolo golona ma biri'u ga'a Paulus 'a pake ḏua ananga ya gasa ra ananga.

13'Age rema ngowa'a Yahudi nga muḏuo i'a 'aḏi tagi le'a bolo le'a 'aḏi dusu'u roh-roh ma jira; ya sitai'i terongo Ma Jou Yesus 'ai lomanga di'a sisupu roh-roh ma jira. Ananga 'aḏi kanau, “Ra Ma Jou Yesus 'ai lomanga, ga'a Paulus 'o singadolo gena-ge, ngoi tini dusu'u ngini!” 14'Age rema na-nau'u gi'a nongoḏu nga tumudingi (manga ḇaḇa unanga 'ai lomanga Skewa, ga'a 'o dadi 'imam ma sae'e) ananga ḏi'i ya sitai'i ma duhu gena-ge. 15Mada'a roh ma jira 'i kanau, “ 'A Yesus re 'a Paulus ngoi to nana'o, mada'a ngini ngoi to nana'o ua.” 16Ḏua ngowa'a ga'a roh ma jira 'u dungosama gena-ge 'o maruta re 'o maḏupa-ḏupaka kakafu manga pakeanga singadolo ananga 'aḏi wiḏi supu toma wala gena-ge, re manga nyaboto re 'aḏi wa-wa'e.

17Ngowa'a Yahudi re Yahudi ua toma limau Efesus, ananga mo-moini ya 'isene habari gena-ge, dadi 'aḏi matai mojongo re 'aḏi silamo'o Ma Jou Yesus 'ai lomanga. 18Ngowa'a repe ga'a raḏi dadi ngowa'a ngaku Yesus 'aḏi sapolo mangaku manga ḏosa-ḏosa ma siḏa moju toma ngowa'a repe manga biono. 19Ananga ga'a 'a'a sarati ya lomu manga boku-boku sarati, kara ya tau'u toma ngowa'a repe manga biono. Boku-boku gena-ge ma ijana ḏa cala nyagi romotoa re pipisi salaka.#19:19 pipisi salaka cala nyagi romotoa gena-ge ma tero sa'olo ngowa'a munara nga nyagi moi re nga ḏurama manga gaji ma di'ara musungu nyagi moi 20Ma duhu so'o gena, Ma Jou'ongu Madutu 'ai kuasa re 'Ai demo ganapu rera re walata singadolo ngowa'a ngaku Yesus 'aḏi matai dogo ganapu repe.

'Aḏi marubutu toma limau Epesus

21Togumu i'a, Paulus 'ai maksudu mau 'o tagi tola'a i'a toma daeraha Makedonia re daeraha Akhaya singadolo sapolo toma limau Yerusalem. Paulus 'o kanau, “Ngadolo da'a toma limau Yerusalem togumu i'a, ngoi balasu to tagi ḏi'i toma limau Roma.” 22Gena ḏua, unanga 'o cumutu 'ai ri-riono nga muḏiḏi. Ananga gena-ge 'a Timotius re 'a Erastus, ananga 'aḏi tagi siḏa i'a toma daeraha Makedonia, mada'a unanga 'o tegoro toma daeraha Asia wangere muḏuo i'a moju. 23Toma 'orasa gena-ge, ngowa'a 'aḏi 'a'a kaco masala toma limau Efesus mangale Ma Jou Yesus 'ai do-doto'o. 24Toma limau gena-ge, 'age rema ngowa'a matengo 'ai lomanga Demetrius, unanga 'o 'a'a salaka re 'o 'a'a dodati dewi Artemis reo salaka. Unanga gena-ge 'ai munara 'i gasa 'utungu lai lamo'o di'a 'ai ngowa-ngowa'a munara. 25Ma sababu gena-ge, unanga 'o lomu 'ai ngowa'a munara re ngowa'a 'aḏi 'a'a sa-salaka ma lelegu re 'o kanau, “Ioronongoḏu ngowa'a Efesus, ngini na waro nanga munara nena-ne wa sanga pipisi lai repe. 26Ngini ni oḏi'i re ni 'isene masiretene 'oru ga'a Paulus 'o 'a'a ḇato nange-ne. Unanga 'o kanau mangale dulada-dulada wa 'a'a re manusia nanga giama, gena-ge 'o dewa ua. Sidogo ḏi'i, ngowa'a repe ya ngaku 'a Paulus 'ai do-doto'o. Pa'i toma limau Efesus ḇato ua mada'a toma daeraha Asia mo-moini. 27Awa-awa ḏuanga i'a nanga 'ahu ma cimi nena-ne enanga ma lomanga cira re 'i togumu. Re pa'i gena ḇato ua, ḏuanga i'a dewi Artemis ma wala mai ya sipake-pake ua re dewi gena-ge ma kabasarana ya sito'u-to'u. Momongolo ua dewi nena-ne ngowa'a ya silamo'o toma daeraha Asia mo-moini re dungia sitabi donga.”

28Ananga ya 'isene so'o gena ḏua 'aḏi ruta, re 'aḏi maulili, “Silamo'o re siḏubuso Artemis, ngowa'a Efesus manga dewi.” 29Ḏua ngowa-ngowa'a toma limau mo-moini 'aḏi 'a'a kaco re ananga 'aḏi cako'o 'a Paulus 'ai ḏagilomu nga muḏiḏi re ya'u gasa toma stadion. Ananga gena-ge ngowa'a Makedonia, manga lomanga 'a Gayus re Aristarkhus ga'a 'aḏi mete'e Paulus tai ḏo-ḏagi ma dara. 30Paulus mau siduu'u 'ai ḏagilomu gena-ge toma stadion, mada'a 'age rema ngowa'a ngaku Yesus 'aḏi simaha unanga ua. 31Ngowa'a la-lamo'o nga muḏuo i'a toma daeraha Asia, Paulus 'ai ḏagilomu, 'aḏi soma'a ngowa'a siajele ra Paulus ḏi'i, la unanga 'o masijumu awa toma stadion.

32Toma 'orasa gena-ge, ngowa-ngowa'a 'aḏi malomu toma stadion 'aḏi 'a'a kaco. Ananga 'aḏi matai poa'a i'a. Re ngowa'a manga repe ya waro ua i'a sa'olo singadolo 'aḏi malomu. 33Toma lo-lomu gena-ge, ngowa'a Yahudi toropo moi 'aḏi simau-mau 'a Aleksander 'o dadi demo ma do-dowanga re 'aḏi ito-itomo unanga, la unanga 'a sitarangi toma ngowa'a repe manga biono. Ḏua Aleksander 'o pula'a nana'o rai giama, la ananga masiogoro sababu unanga 'o kanau 'o riono 'ai diri toma ngowa'a repe gena-ge manga biono. 34Mada'a ananga ya oḏi'i re ya waro unanga gena-ge ngowa'a Yahudi, dadi ananga gena-ge 'aḏi poa'a mamete'e ya siduga-duga ma di'ara ḏa jam romoḏiḏi, “Silamo'o re siḏubuso Artemis, ngowa'a Efesus manga dewi!”

35Ma ḏo-ḏogumu tala, limau manga jurulefo 'o soma'a ngowa'a repe gena-ge masiogoro. Unanga 'o kanau, “Ioronongoḏu ngowa'a Efesus, ngowa'a mo-moini ya waro ngowa-ngowa'a Efesus ya jaga dewi Artemis 'ami wala re 'ami dulada maḏi ga'a 'i eta'a da'u diwanga tala. 36Matengo i'a mai ua 'a lawana 'ori i'a gena-ge. Sababu gena-ge, ni masiogoro re awa ni madaga'a caiti i'a! 37Ngini na'u gasa ananga 'anene mada'a ananga 'aḏi tori'i ua 'ori i'a rana toma Artemis 'ami wala re ya sije-jengere mai ua nanga dewi Artemis. 38Sababu gena-ge, na'o Demetrius re 'ai ḏagilomu munara 'age gamamu ra matengo i'a, ananga nyengara ya sigasa toma juruhakimi manga kantor. Kantor gena-ge ri welanga re ngowa'a pamarenta 'age ḏua. 39Na'o ninga gamamu ra ananga rema enanga moju, ngini balasu na sigasa toma ngowa'a Efesus ga'a sijuruhakimi ngowa'a. 40Dadi kaco toma wangere nange-ne nyengara ḏi'i 'i sigasa ngene toma jira, re ngowa'a nyengara na kalaki ngene, re ngene wo mete'e yoḏu'u sababu wo rapu!” 41Limau manga jurulefo gena-ge 'a kanau mo-moini togumu i'a, unanga 'o soma'a ngowa'a repe 'aḏi maḏibo.

Currently Selected:

Yesus 'ai so-soma'a 19: SNT

Highlight

Copy